Uyo Mwari Wavasiri

Ndivo Baba vedu, vanoshamisa kupfuura kunyangwe baba vapanyika vakanakisisa vamungafungidzira. Kunyangwe zvazvo tisingakwanisi kuyeuka upenyu hwedu Navo tisati tazvarwa panyika, Vanoziva mumwe nemumwe wedu uye zvakarurama. Vane muviri wakarurama wenyama nemapfupa, uye tiri mumufananidzo Wavo.

Kana uchinetseka kufungidzira kuti Mwari vakaita sei, kune muenzaniso wakarurama: Mwanakomana Wavo, Jesu Kristu. Kristu akati, “Ndini nzira, nezvokwadi, noupenyu; hapano munhu unouya kuna Baba asi nokwandiri. Dai makanga muchindiziva, mungadai maizivavo Baba vangu” (Johane 14:6–7). Nemamwe mashoko, kana tichida kuziva kuti Baba Vokudenga vakaita sei, tinokwanisa kudzidza pamusoro pokuti Jesu Kristu akaita sei! Vakabatana zvakarurama muchinangwa.

Chokwadi ndechokuti, kukubatsira kuti uve neupenyu hwokusingaperi ndiro basa Ravo uye nokubwinya Kwavo. Uri nangiso Yavo yokutanga! Havasungirwi nenguva sezvatinoitwa isu. Nanavira kwaVari mumunamato panguva ipi zvayo. Zvino woteerera kunzira dzakawanda dzaVanopindura nadzo.

Gosa Dale G. Renlund veChikwata chaVaApositora vane Gumi naVaviri vakambodzidzisa kuti, “Chinangwa chaBaba vedu Vokudenga mukurera vana hachisi chokuita kuti vana Vavo vaite zvakanaka; ndechokuita kuti vana Vavo vasarudze kuita zvakanaka uye pokupedzisira vagova saIvo.” Vanozokukoka, kukuraira, uye kukudzidzisa chokwadi, asi haVazobvisi kwaniso yokuzvisarudzira yako kuburikidza nokukumanikidza kuVatevera.

Panokudaro, sokutaura kwakaita Gosa Patrick Kearon veChikwata chaVaApositora vane Gumi naVaviri, “Mwari vanoshingaira kukutsvaka,” zvichireva kuti haVazombofi vakarega kuedza kukubatsira kudzokera kwaVari. Vanoziva kuti isu tose tinozotarisana nezvinhu zvakaoma apo patinoita zvikanganiso? Saka Vanopa nzira yokuti ticheneswe kubva kuzvivi uye tiwane simba kuburikidza neRudzikinuro rweMwanakomana Wavo.

Rudo Rwavo kwauri harwuna mugumo. Vanokuda iyezvino uno, nokusarurama kwako kwose! Mutungamiri Jeffrey R. Holland, avo vari kufanotungamirira Chikwata cheVaApositora vane Gumi naVaviri, vanopa rujekeso rwakasimba zvikuru pamusoro pechokwadi ichi: “‘Huyai sezvamuri,’ Baba vane rudo vanodaro kune mumwe nemumwe wedu, asi Vanowedzera, ‘Musaronga kuramba makaita sezvamuri.’ Tinonyemwerera uye torangarira kuti Mwari vakashinga kutiita vakarurama kupfuura zvatinofunga kuti tinokwanisa kuva.” Nerudo nerukurudziro rwakarurama, Baba Vokudenga varikuedza kukubatsira kuti uve saIvo uye ugamuchire zvose zvaVainazvo, nhanho imwechete panguva.

Nzira yakanakisisa yokuziva nayo Baba vako Vokudenga ndeyokuramba uchiwana zviitiko Navo. Sei? Dzidza pamusoro Pavo neMwanakomana Wavo kubva kumagwaro matsvene uye mashoko evaporofita vanorarama. Namata kwaVari. Kuchengeta mirairo Yavo. Pedza nguva iwe pachako muchinyararire uchiVanamata kuchechi, mutemberi, uye mune dzimwe nzvimbo tsvene. Ita nokuchengeta zvibvumirano Navo. Vanozokubatsira kuziva uyo waVari uye manzwiro aVanoita pamusoro pako.