Dahme Kaidehn Koht

Ih me Samatail, me inenen mwahu sang pahpa en sampah me keieu mwahu nan ahmw madmadau. Mendahte atail sohte kak tamataman atail mour mwohn mour wet, E ketin mwahngi emen emen kitail ni unsek. E sapwellimaniki paliwar unsek en uduk oh tih, oh kitail wiawihkihda Mwomwe.

Ma ke ahneki kahpwal en medewe mwomwen Koht, mie karasaras unsek: Sapwellime Iehros, Sises Krais. Krais mahsanih, “Ngehi me ahl, ngehi me mehlel, oh ngehi me mour: sohte me kak kohlahng Semei ma soh ngehi. Ma kumwail eseieier, kumwail pil pahn ese Semei” (Sohn 14:6–7). Ni ehu koasoai, ma kitail men esehla duwen Sahm Nanleng, kitail kak esehla duwen Sises Krais! Ira ehupene ni unsek ni kahrehpe.

Ahpw ni mehlel, sewsewese iuk ahneki mour soutuk iei Sapwellime doadoahk oh Sapwellime kilohri. Ke wia Sapwellime pwukoah me nempe 1! E sohte kin pirapirdiong ansou duwehte kitail. Kohieng Ih ni kapakap ansou kan koaros. Mwuri rongehng wiepe tohto me E kin ketin sapeng.

Elder Dale G. Renlund en Wahnparon Ehk Riemenko padahngki, “En Samatail Nanleng koasoandi [en epwel iei] kaidehn [me] Sapwellime serih kan en wiahte dahme pwung; ahpw irail en pilada [en] wia dahme pwung pwe ni imwilahu irail en duwehla Ih.” E pahn luke iuk, kaweid uhk, oh padahkiong uhk me mehlelo, ahpw E sohte pahn kihsang ahmw saledek en pilipil sang ni idingohng uhk en idawehn Ih.

Ahpw, nin duwen Elder Patrick Kearon en Wahnparon Ehk Riemenko ah koasoaia, “Koht kin ketin nannantihong sewsewese iuk.”me wehwehki me E sohte pahn pweiek sang nannantihong en seweseiuk en pwurala Reh. E mwahngi me kitail koaros pahn sohpai soahng apwal kan ansou me kitail sapwungala. Eri E ketin wiahda ahl ehu me kitail en kak mwakelekelsang dihp oh diar kehl sang ni tomwpen Sapwellime Iehroso.

Sapwellime limpoak ohng uhk sohte imwi. E poakohng uhk ansou wet, mehndahte ke sohte unsek! Preseden Jeffrey R. Holland, Preseden en Pwihn en Wahnparon Ehk Riemen ko, kasalehda kadehde manaman ehu duwen mehlel wet: “‘Kohkihdo [pein uhk],’ Samatailo masanihong emenemen kitail, ahpw E pil kapatahiong, ‘Kedehr leme ken mihmi nan dahme ke mihmi loale.’ Kitail sirei oh tamataman me Koht kak wiaiong kitail soahng laud sang dahme kitail leme.” Sang ni limpoak unsek oh kangoang, Sahm Nanleng ketin songisong en sewese iuhk duwehla Ih oh alehdi soahng koaros me E sapwellimaniki, sang ehu dake ong ehu dake.

Wiepe me keieu mwahu en esehla duwen Semomw Nanleng iei en kin ahniki ansou kan Reh. Ia mwomwe? Esehla duwen Ih oh Sapwellime Iehros sang ni iren pwuhk sarawi kan oh padahk kan en soukohp ieias akan. Kapakap ohng Ih. Kolokol Sapwellime kosonned akan. Doadoahngki ansou en meleilei, ni pein uhk en kaudokihong Ih ni sarawi, nan tehnpas sarawi, oh nan wasa sarawi teikan. Wiahda oh kolokol inou sarawi kan rehn Koht. E pahn ketin sewese iuk en esehla ihs Ih oh mwomwen Sapwellime pepehm ohng uhk.