Mehlel en Atail Mour kan

Atail Rapahki en Mehlelo

Nan dih wet me kitail mihmi loale, marain lap mie mwowatail laudsang dih akan en mahs. Mahso, ma ke men esehla mehkot, ke anahne kohla ni laiprehri oh rapahki. Rahnwet internet oh dipwisou kan kahrehiong pasapeng en kerenihong soahng koaros me kitail kin anahne diar en direkada ansou karuwaru.

Kauno kin peren ansou me kitail kin doadoahngki dipwisou pwukat ni pwung rehtail, ahpw e ketikidahr iren kaweid wet: “Rapahki ni ngoang oh padahki emen emen mahsen kan en eripit; ehi, rapahki sang ni pwuhk me keieu mwahu kan mahsen kan en eripit; rapahki esehla, sang ni onop, oh pil sang ni pwoson” (Padahk oh Inou kan 88:118). E kangoangehkin kitail en esehla duwen sampah wet (kilang Padahk oh Inou kan 88:79; 93:53), ahpw ni atail rapahki mehlelo, kitail anahne kilengwohng Koht, me “mwahngiher soahng koaros, oh soahng koaros mih mwowe, … oh e ketiket powe soahng koaros, … oh soahng koaros kapikapikda sang Reh, oh kohsang Reh” (Padahk oh Inou kan 88:41).

Nan pwungen mehlel kan me Koht ketikihong kitailehr, me keieu kesempwal oh me kin wia poahson en atail mour pohn sampah iei me Ih iei Samatail Nanleng. Kitail iei Sapwellime seri ngehn kei. E mwangih oh poakoang kitail koaros ni unsek. Oh nin duwen Sapwellime seri ngehn kei, mie duwatail sarawi oh pilahn ong atail mour kan. Wehwehki oh alehdi en mehlel pwukat pahn kihong kitail dehde, kesempwal, oh kahrepe ehu me kapai oh kaweid kitaildahr nan atail mour mwohn mour wet oh pahn doulahte wiewia soahngohte met oh pil kohkohlahte.

Kitail Mihmi rehn Sahmo nin Tapio

Ni atail rapahki mehlel en soahng kan “nin duwen me mieier,” kitail diarada mahsen pwukat sang atail Sounkomour, Sises Krais: “Eri met, Ih padahkiong kumwail, Ih mihmi rehn Sahmo sangete ni tapio, oh ngehi me Meseni,” oh “kumwail pil iang mihmi rehn Sahmo sangete nin tapio” (Padahk oh Inou kan 93:21, 23).

Mwohn atail mour pohn sampah, kitail pahtong tuhpene ehu nanleng wasa me Samatail Nanleng kasalehda Sapwellime pilahn en peren. Soukohp Sosep Smith padahngki me sapwellimen Koht koasoandi ong Sapwelime pilahn et iei en kihong kitail “ansou mwahu en duwehla Ih [oh] … iang Ih lapalapala.” Sapwellime doadoahk oh lingan iei en “kapwaiada komour oh mour soutuk en aramas” (Moses 1:39).

Kitail doadoahngki atail mehn pilipil oh pilada en idawehn sapwellimen Sahm Nanleng pilahno. Kitail kapaidahr en ipwidihong mour wet, wasa me kitail doulahte ahneki mehn pilipil oh kak wehwehkihla duwen mour wet, esehla, oh wonlahte ong mour soutuk.

Nin dokon atail Seilok en mour wet, kitail pahn sohpai kahpwal akan oh kin pwupwidi. Ahpw kitail sohte anahne sohpai kahpwal en mour wet kelehpw. Soseph Smith padahngki me Sahm Nanleng, “me wia Sahm Lapalap en sampah kan koaros[,] kilang pohn peneinei en aramas ni pepehm en pahpa limpoak men oh ngoang en pahpa men.”

Samatail Nanleng, “Pahpa en kalahngan, oh Koht en kaloalemwahu,” pahn kapai kitailda, pwok kitailda, oh kansenamwahuih kitail “nan atail kasongosong kan, pwe kitail en kak kansenamwahuih irail akan me mih nan kahpwal, sang ni mehn kaloalemwahu me kitail alehdier sang rehn Koht” (2 Korint 1:3–4). Ni pali kesempwal en Sapwellime pilahno, Sahm Nanleng kaunopadahr ahl ehu pwe kitail en pwurala Reh.

Ahl me Kolahng Samatailo

Mehlel en “soahng kan koaros nin duwen udahn mwomwarail” (Seikohp 4:13) inenen sansal: kitail sohte kak wiahla seri en Koht kei ni unsek ma kitail kelehpw. Sises Krais, Meseni en Sahmo ni ngehn, inoukidahr en wia atail Sounkomour oh Soundoar.

Sises Krais, “Ieros en Sahmo, me diren kalahngan oh mehlel, iei Ngehn en mehlelo, … ketido oh ipwidihong ni uduk, oh koukouson rehtail” (Padahk oh Inou kan 93:11). E ketido pwe en kasalehiong kitail mwomwen atail pahn diar peren, wehwe, oh popohl nan mour wet oh pil mour soutuk.

“Pwe iei uwen Koht eh ketin loalloale sampah, me e ketikihdohki Sapwellime Iehros, pwe mehmen me kin pwosonla ih en dehr salongala, a en ahneki mour soutuk.

“Pwe Koht sohte ketin poaronedohng nin sampah Sapwellime Iehros pwe en kadeikada sampah; a pwe en komourala” (Sohn 3:16–17).

Sapwellimen Sounkomouro ansou pohn sampah udahn kesempwal. Eh “sohte alehdi unsekpe nin tapio, ahpw eh kin ketin alehdi kalahngan ong kalahngan” (Padahk oh Inou kan 93:12). Eh keirida lau “eh alehdi unsekpen lingan en Sahmo” oh “manaman koaros, wasa koaros nanleng oh pohn sampah, oh lingan en Sahmo ketiket reh, pwe eh kin ketiket reh” (Padahk oh Inou kan 93:16–17). Sounkomouro ketin padahngki:

“Ih padakieng uhk koasoai pwukat pwe ken wehwehki oh ese mwomwen ahmw pahn wia kaudok, oh pil ese dahme ke pwongih, pwe ken kak kohdo rehn Sahmo ni mwarei, oh mwurin ansou kis alehdi unsekpen Sapwellime marain.

“Eri ma ke pahn kolokol ahi kosonned akan ke pahn alehdi unsekpen Sapwellime marain, oh linganla rehi duwehte ngehi rehn Semei; eri, I indaiong uhk, ke pahn alehda kalahngan ong ni kalahngan” (Padahk oh Inou kan 93:19–20).

Nan Mwetuwel en Kesemenih oh pohn lupwuo, Sises Krais ketin alehda dihpen sampah oh lokolongki soahngen lokolok koaros oh “medek kan oh kahpwal akan oh songesongen kasongosong kan koaros” (Alma 7:11). Met “kahrehiong [Ih], … me lapalapasang aramas koaros, en rerrerki pwehki medek, oh nta eh kerasang ni pwoahr en kili pwon” (Padahk oh Inou kan 19:18). Ihte sang ni Sises Krais oh Sapwellime Tomwpen Dihp oh Iasadahu me kahrehda komour oh mour soutuk en kak pweida.

Sang Sapwellimen Sounkomouro kupwur kalahngan oh tohnmetei, kitail pahn kak keirda lau kitail alehdi unsekpehu oh ehu rahn linganla. Ma kitail pahn idawehn Sounkomouro oh kapwaiada Sapwellime kosonned akan, Eh pahn ketin kahluwa kitail ong rehn Samatail Nanleng ni kalingan.

Krais pohn ahlo kohlahng Serusalem{, sang Michael Coleman, sohte mweimwei en alasang

Ke pahn alehda Sapwellime Kisakis?

Nan pwungen me mehlel kan “en soahng kan me uhdahn pahn mie” (Seikop 4:13), kitail esehla me atail pepehm nan mour soutik pahn kohsang atail pilipil en idawehn Sises Krais oh alehda kisakis kan me Eh ketkiheng kitail. Pwuhk Sarawi padahngki me kitail pahn “paiki dahme [kitail] pahn inengieng alehdi.” Me kansensuwed, mie irail kei me sto pahn “inengieng paiki dahme re nek pehn alehdi“ (Padahk oh Inou kan 88:32).

Ahi preseden en misino, Elder Marion D. Hanks (1921–2011), me iang pwukoah nan Pwihn en me Isiakano, padahkiong nah misinerihko me pekipengki dahme kitail inengieng alehdi oh paieki iei wiepe ehu me kitail kak kasawih iawasa kitail mihmi ie nan seilok en palingenatail. “Pwe ia katepe ong aramas men ma kisakis ehu kohieng, oh e ahpw sohte alehdi kisakiso?” Ni atail kin alehdi Sapwellimen Sounkomouro kisakis kan sang ni atail kin rapahki oh idawehn Ih, kitail pahn perenki koapwoaropwoar en mour soutuk oh “rehn Ih me ketkihdo kisakiso” (Padahk oh Inou kan 88:33). Kisakis wet me E ketkihdo ni limpoak “iei me keieu lapalap sang Sapwellimen Koht kisakis teikan koaros” (Padahk oh Inou kan 14:7).

Koht iei Samatail Nanleng. E mwahngih oh poakong kitail. Ni atail pahn sohpeihong Ih ni atail rapahki mehlelo, kitail kak poadidihong loalokong, alehdi erepit, kolehdi mehlel, poakohng mwakelekel, oh poadidihong marain me kin ketsang Ih (kilang Padahk oh Inou kan 88:40). Kitail pahn doulahte nan atail mour lau “rahno pahn leledo me [kitail] pahn wehwehkihla Koht, ni atail kakehlaka sang ih” (Padahk oh Inou kan 88:49).

Rahno pahn wia rahn inenen kaselel oh kaperen ehu.