Wōn eo Anij Ejjab

E ej Jemād, eļapļo̧k an em̧m̧an jān baba eo em̧m̧antata ilo laļ kwomaron̄ ļōmņake. Mekarta jejjab keememej mour eo ad m̧okta Ippān, E jeļā kajjied kajjojo im ilo weppān. E ewōr juon ānbwinnin kanniōk im di ko rōweppān, im kōj jej pād ilo nememen in wōt E.

Eļan̄n̄e epen am̧ pijaikļo̧k ewi wāween Anij, ewōr juon waanjon̄ok ejejtjet: Nejin, Jisōs Kraist. Kraist ar ba, “N̄a ij iaļ eo, m̧ool eo, im mour eo: ejjeļo̧k armij enaj itok n̄an Jema, elan̄n̄e jab kōn n̄a. Eļan̄n̄e kom̧ ar jeļā N̄a, barāinwōt kom̧ naaj kar jeļā Jema” (Jon 14:6–7). Ilo bar juon wāween ba, eļan̄n̄e jej kōņaan jeļā ewi wāween Jemādwōj Ilan̄, jemaron̄ katak kōn ewi wāween Jisōs Kraist! Er rej koba ippān doon ilo jibadbad.

Ilo m̧ool, jipan̄ eok bōk mour indeeo ej jerbal eo An im aiboojoj eo An. Kwōj mije eo An #1! Ejjab lokjak kōn iien āinwōt kōj. Pukot E ilo jar jabdewōt iien. Innām ron̄jake wāween ko rellōn̄ E ej uwaak.

Elder Dale G. Renlund jan Doulul eo an Jon̄oulruo Rijilōk ro ekar katakin, “Kōttōpar eo an Jemedwōj Ilan̄ ilo kōkaajriri ejjab n̄an ajri ro Nejin bwe ren kōm̧m̧ane ta eo ejim̧we; bwe ren kāālet n̄an kōm̧m̧ane ta eo ejim̧we im āliktata n̄an erom āinwōt E.” E naaj karuwanene eok, kapilōk ippam̧, im katakin eok m̧ool eo, ak E ejjamin naaj bōk anemkwoj eo am̧ kōn kipel eok n̄an ļoor E.

Ijello̧kin, āinwōt an Elder Patrick Kearon jān Doulul eo an Jon̄oulruo Rijilōk ro kar ba, “Anij ej kajjieon̄ aolep iien n̄an kōtōbrak eok,” meļeļe in E ejjamin bōjrak An jiban̄ eok n̄an jepļaak n̄an Ippān. E ejeļā kōj aolep jenaaj jelm̧ae men ko reppen n̄e jej kōm̧m̧an bōd. Kōn menin E ejkōpooj juon iaļ n̄an ad bar erreo jān jerawiwi im kappukot kajoor ilo Pinmuur eo an Nejin.

An iakwe n̄an eok ejjeļo̧k jem̧ļo̧kin. E ej iakwe eok kiiō, āinwōt am̧ jab wānōk! Būreejtōn Jeffrey R. Holland, Ripinej Jenkwan Būreejtōn eo an Doulul eo an Jon̄ouruo Rijilōk ro, ej letok juon kalikkar kōn m̧ool in: “‘Itok,’ Jemed ej ba n̄an kōj kajjojo, ak Ekar bar ba, ‘Jab ļōmņak in pād wōt ijin.’ Jej ettōn̄dikdik im kile bwe Anij ej ļōmņak kake kōj eļapļo̧k jen ad ļōmņake.” Kōn iakwe eweeppan im naan in kōketak, Jemādwōj Ilan̄ ej kajjieon̄ jipan̄ eok erom āinwōt E im bōk aolep men ko ewōr Ippān, juon būn̄tōn ilo juon iien.

Wāween eo em̧m̧an tata n̄an jeļā kōn Jemam̧ Ilan̄ ej n̄an wōnm̧aanļo̧k wōt im bōk en̄jake ko Ippān. Ekōjkan? Katak kōn E im Nejin jān jeje ko rekwojarjar im naan ko an rikanaan ro remour. Jar n̄an E. Kōjparok kien ko An. Joļo̧k ko relur, am̧ make ilo kabun̄ jar n̄an E ilo m̧ōn jar eo, ilo tampeļ eo, im ilo jikin ko jet rekwojarjar. Kōm̧m̧an im kōjparok bujenko Ippān. E enaaj jipan̄ eok jeļā wōn E im ekōjkan An en̄jake kōn kwe.