M̧ool eo kōn Mour ko Ad

Ad Pukot M̧ool eo

Ilo epepen in jej mour ie, eļapļo̧k jeļāļo̧kjen epād n̄an kōj jān kar m̧okta. Kar m̧okta, eļan̄n̄e kwar kōņaan jeļā juon men, kwōj aikuj in kar etal n̄an juon ļaibrāre im kappukote. Rainin internet im device ko jej jibwi rej letok iaļ n̄an meļeļe ko enan̄n ejjeļo̧k jem̧ļo̧kier me jemaron̄ loi enan̄n kiiō wōt.

Irooj ej m̧ōņōņō n̄e jej kōjerbal kein jipan̄ kein repād n̄an kōj ilo māletlet, ak E ekar letok kapilōk in ejjeļo̧k jem̧ļo̧kin: “Kom̧in kappukot ilo niknik im katakin doon naan ko in mālōtlōt; aaet, kom̧in kappukot jān bok ko rem̧m̧antata naan ko in mālōtlōt; kappukot jeļā, em̧ool jān katak im barāinwōt jān tōmak.” (Katak im Bujen Ko 88:118). E ej kōketak kōj n̄an katak kōn laļ in epeļaakid (lale Katak im Bujen Ko 88:79; 93:53), ak ilo ad pukōt m̧ool eo, jej aikuj reilo̧k n̄an Anij, eo “E meļeļe aolep men otemjeļo̧k, im aolep men otemjeļo̧k rej pād Im̧aan, … im E ej ilōn̄in aolep men otemjeļo̧k, … im aolep men otemjeļo̧k rej jān E, im kōn E” (Katak im Bujen Ko 88:41).

Ibwiljin aolep m̧ool ko Anij ar letok n̄an kōj, eo eļaptata pedped in ilo mour kein ad ioon laļ ej bwe E ej Jemāedwōj Ilan̄. Jej ajri in jetōb ro Nejin. E ejeļā im eweppān an iakwe kōj. Im āinwōt ajri in jetōb ro Nejin, ewōr juon nememeid im mejān kajjik ekwojarjar. Meļeļe im karoōk m̧ool kein indeeo rej letok n̄an kōj kadkadid, aorōkid, im ad jibadbad me rekar kōjeraam̧m̧an im tōl kōj ilo mour eo ad m̧okta im enaaj wōnm̧aanļo̧k wōt im kōm̧m̧an āindein kiiō im indeeo.

Kōj Jaar Pād Ippān Jemād ilo Jinoin

Ilo ad kappukot m̧ool eo an men ko “āinwōt aer kar waļo̧k,” jej lo naan kein jān Rilo̧mo̧o̧r eo ad, Jisōs Kraist: “Im kiiō, em̧ool Ij ba n̄an kom̧, Iaar pād ilo jinoin ippān Jemān, im ij M̧aanje eo,” im “kom̧ ar barāinwōt ilo jinoin ippān Jemān” (Katak im Bujen Ko 93:21, 23).

M̧okta jān mour eo ad ioon laļ in, jekar pād ilo juon iien kweilo̧k ilo lan̄ ijo Jemādwōj Ilan̄ ekar kwaļo̧k karōk in m̧ōņōņō eo An eļap. Rikanaan Josep Smith eaar katakin bwe jibadbad in karōk eo an Anij ej n̄an letok n̄an kōj “juon iien em̧m̧an n̄an kajjieon̄ āinwōt emake [im] … n̄an weeppān āinwōt e.” Jerbal im aiboojoj eo An rej “n̄an kakūrm̧ool jab wabanban im mour indeeo an armej” (Moses 1:39).

Jej kōjerbal anemkwōj eo ad im kāālet n̄an ļoor karōk eo an Jemādwōj Ilan̄. Jekar jeraam̧m̧an n̄an ļotak tok ilo mour in, ijin me ej wōr wōt ad anemkwoj im jemaron̄ en̄jake mour in kanniōk, katak, im eddōkļok n̄an mour indeeo.

Ilo iaļ in ad lo mour in kanniōk, jenaaj en̄jake apan̄ im mennin ļon̄jak ko. Bōtaap jejjab aikuj make jelm̧ae apan̄ ko an mour in makeļo̧k. Josep Smith ekar katakin bwe Jemādwōj Ilan̄.”Eo Jemān laļin ekajoor[,] ej kalimjōk aolep armej kōn mejan jemad eo ad kea.”

Jemādwōd Ilan̄, “Jemān tūriam̧okake, im Anij in aenōm̧m̧an otemjej,” enaaj kōjeraam̧m̧an kōj, ļōn̄aj kōj, im kaenōm̧m̧an kōj “ilo am jorrāān otemjej, bwe kōmin maron̄ in kaaenōm̧m̧ane ro rej pād ilo jabdewōt jorrāān, kōn aenōm̧m̧an eo kōmij make aenōṃṃan kake jān Anij” (2 Korint 1:3–4). M̧ōttan eo eaorōktata ilo karōk eo An, Jemādwōj Ilan̄ ekar letok iaļ n̄an ad jepļaak n̄an Ippān.

Iaļ Eo n̄an Jemād

M̧ool eo “an men ko āinwōt aer lukkuun waļo̧k,” (Jekab 4:13) ej alikkar: jejjab maron̄ tōpar em̧m̧antata eo ad āinwōt ro nejin Jemādwōj Ilan̄ makeļo̧k. Jisōs Kraist, M̧aanje eo Nejin Jemād ilo jetōb, ekar bujen n̄an erom Rilo̧mo̧o̧r im Ripinmuur eo ad.

Jisōs Kraist, “eo Nejin Emake Keotake in Jemān, obrak kōn jouj im m̧ool, em̧ool Jitōbōn m̧ool, … eaar itok im jokwe ilo kanniōk, im kar jokwe ilubwiljim” (Katak im Bujen Ko 93:11). E ekar itok n̄an kwaļo̧k n̄an kōj iaļ eo n̄an lo m̧ōņōņō, meļeļe in, im lan̄lōn̄ ilo mour in im indeeo.

“Bwe kōn an Anij yokwe laļ, Ear letok juon wōt Nejin Ear keotak, bwe jabdewōt eo ej lōke E en jab jako, a en mour indeeo.

“Bwe Anij eaar jab jilkintok Nejin n̄an laļ bwe en ekajet laļ; a bwe laļ en mour kōn e.” (Jon 3:16–17).

Iien eo an Rilo̧mo̧o̧r eo ioon laļ in ej aorōk. E “Eaar jab bōk tarlep eo ilo jinoin, a Eaar bōk jouj kōn jouj” (Katak im Bujen Ko 93:12). E eaar eddōkļo̧k m̧ae “eaar bōk tarlep in aiboojoj eo an Jemān” im “aolep kajoor, jim̧or ilo lan̄ im ioon laļ, im aiboojoj eo an Jemān eaar pād Ippān, bwe Eaar pād ilo E” (Katak im Bujen Ko 93:16–17). Rilo̧mo̧o̧r eo eaar katakin:

“Ij lewōj n̄an kom̧ ennaan kein bwe kom̧in maron̄ meļeļe im jeļā ekōjkan kabun̄-jar, im jeļā ta kom̧ij kabun̄-jar n̄an e, bwe kom̧in maron̄ itok n̄an Jemān ilo Eta, im ilo iien eo ejim̧we bōk tarlep eo An.

“Bwe eļan̄n̄e kom̧ij kōjparok kien ko Aō kom̧ naaj bōk tarlep eo An, im aiboojoj ilo N̄a āinwōt N̄aij ilo Jemān; kōn menin, Ij ba n̄an kom̧, kom̧ naaj bōk jouj kōn jouj” (Katak im Bujen Ko 93:19–20).

Ilo Jikin Kallib Gethsemane im ioon debwāāl eo, Jisōs Kraist ekar bōk ioon E make jerawiwi ko an laļ in im kar en̄taan kōn aolep būrom̧ōj ko im “en̄taan kōn metak ko im kaen̄tanaan ko im kapo ko otemjeļo̧k” (Alma 7:11). Menin “ekar kōm̧m̧an bwe [E], … eo eļaptata jān aolep, n̄an wūdiddid kōnke metak eo, im n̄an bōtōktōk ilo aolepān ānbwinn” (Katak im Bujen Ko 19:18). Kōn wōt Jisōs Kraist im Pinmuur eo An im Jerkakpeje eo rej lo̧mo̧o̧r im mour ijo eutiej tata remaron̄ in pidodo.

Kōn jouj eo an Rilo̧mo̧o̧r im en̄taan in pinmuur eo, jemaron̄ eddōkļo̧k m̧ae iien eo jej bōk juon tarlep im maron̄ juon raan bōk weppāān. Eļan̄n̄e jenaaj ļoor waanjon̄ak eo an Rilo̧mo̧o̧r im pokake kien ko An, E enaaj tōl kōj ilo iaļ eo ad ļo̧k n̄an aiboojoj eo Jemād ilo Lan̄.

Christ on the Road to Jerusalem [Kraist ilo Iaļ eo n̄an Jerusalem], jān Michael Coleman, jab maron̄ kapeiki

Kwonaaj Ke Bōk Mennin Letok Eo An?

Ibwiljin m̧ool ko an “men ko āinwōt aer lukkuun waļo̧k,” (Jekab 4:13), jej katak bwe en̄jake eo ad ilo indeeo enaaj kōmlet jān kāālet eo ad n̄an ļoor Jisōs Kraist im bōk mennin letok ko E ej letok. Jeje ko rekwojarjar rej katakin bwe jenaaj “lan̄lōn̄ [wōt] ioon men eo me [jej] kōņaan bōke.” Ekabūrom̧ōjm̧ōj, et rejjāmin “m̧ōņōņō n̄an lan̄lōn̄ ilo men eo me remaron̄ kar bōke” (Katak im Bujen Ko 88:32).

Mijen būreejtōn eo aō, Elder Marion D. Hanks (1921–2011), eo ear jerbal āinwōt juon Ritōl Eutiej Jiljilimjuonn̄oul, ekar katakin mijenede ro an bwe kajjitōk kōn ta eo jej m̧ōņōņō in bōk im lan̄lōn̄ kake ej juon wāween jemaron̄ etale ia eo jepād ie ilo iaļ in jetōb eo ad. “Bwe ta em̧m̧an eo n̄an juon armej eļan̄n̄e mennin leļo̧k eo likūti ioon, im e ej jab bōk mennin leļo̧k eo?” Ilo ad bōk mennin letok ko an Rilo̧mo̧o̧r ilo kijejeto in kappukot im ļoor E, jenaaj lan̄lōn̄ ilo kōjatdikdik kōn mour indeeo im “ilo e eo rileļo̧k eo an mennin leļo̧k eo.” (Katak im Bujen Ko 88:33). Mennin letok in kar letok kōn eļap iakwe “eo ej mennin letok eo eļaptata ian mennin letok ko an Anij” (Katak im Bujen Ko 14:7).

Anij ej Jemādwōj Ilan̄. E jeļā kajjied im iakwe kōj. Ilo ad oktakļo̧k n̄an E ilo ad kappukot m̧ool eo, jemaron̄ atartar ilo jeļāļo̧kjen, bōk māletlet, karuwanene m̧ool, iakwe erreo, im atartar ilo meram eo ej itok jān E (lale Katak im Bujen Ko 88:40). Innām jej wōnm̧anļo̧k ilo aolepān mour ko ad m̧ae “raan eo enaaj itok n̄e kom̧ naaj meļeļe em̧ool Anij, kōnke kom̧ naaj kōmour ilo E im jān E” (Katak im Bujen Ko 88:49).

Raan eo enaaj aiboojoj tata im lem̧ōņōņō tata.