Indi Amo Sini ang Dios

Sia ang aton Amay, mas manami pa sangsa pinakanami nga tatay sa duta nga imo mahunahuna. Bisan indi naton madumduman ang aton kabuhi sadto upod sa Iya, kilala Niya kita sing tag-isaisa kag lubos. May perpekto sia nga lawas sang unod kag tul-an, kag sunod kita sa Iya imahe.

Kon ginabudlayan ka magpamensar kon daw ano ang Dios, may ara isa ka perpekto nga ehemplo: ang Iya Anak nga si Jesucristo. Siling ni Cristo, “Ako amo ang dalan, ang kamatuoran, kag ang kabuhi: wala sing may makakadto sa Amay kon indi paagi sa akon. Kon nakakilala kamo sa akon, nakakilala [man] kamo kuntani sa akon Amay” (Juan 14:6–7). Buot silingon, kon gusto naton mahibal-an kon daw ano gid ang Amay nga Langitnon, pwede naton tun-an kon daw ano gid si Jesucristo! Lubos Sila nga nagaisa sa katuyuan.

Ang matuod, ang pagbulig sa imo nga makaangkon sang kabuhi nga wala katapusan amo ang Iya buluhaton kag Iya himaya. Ikaw ang Iya #1 nga ginatutokan! Wala Sia nahigot sa oras pareho sa aton. Makig-angot sa Iya sa pangamuyo bisan ano nga oras. Dayon pamatii ang madamo nga paagi nga nagasabat Sia.

Si Elder Dale G. Renlund sang Korum sang Dose ka Apostoles nagtudlo isa ka bes, “Ang katuyoan sang aton Amay nga Langitnon sa pagkaginikanan indi agud nga ipahimo sa Iya mga anak ang husto; kundi agud nga papilion ang Iya mga anak nga himuon ang husto kag sa ulihi mangin pareho sa Iya.” Hagaron ka Niya, laygayan ka, kag tudloan ka sang kamatuoran, pero indi Niya pagkuhaon ang imo kahilwayan sa pagpili paagi sa pagpilit sa imo nga sundon Sia.

Sa baylo, suno sa hambal ni Elder Patrick Kearon sang Korum sang Dose ka Apostoles, “Ang Dios wala nagauntat sa pagsunod sa imo,” buot silingon indi Sia magauntat sa pagtinguha nga buligan ka nga makabalik sa Iya. Kabalo Sia nga tanan kita magaatubang sang mga kabudlayan kon maghimo kita sang sala. Gani naghatag Sia sang paagi para matinloan kita sa sala kag makabaton sang kusog paagi sa Pagbayad-Sala sang Iya Anak.

Wala katapusan ang Iya pagpalangga sa imo. Palangga ka Niya subong, bisan indi ka perpekto! Si Pangulong Elder Jeffrey R. Holland, Akting nga Pangulo sang Korum sang Dose ka Apostoles, nagahatag sa aton sang mabaskog nga pagklaro sining kamatuoran: “‘Kari kon ano lang kamo,’ siling sang mapinalanggaon nga Amay sa tagsa sa aton, pero dugang Niya, ‘Indi magtuyo nga magpibilin kon ano lang kamo.’ Nagayuhum kita kag ginadumdum nga ang Dios desidido nga himuon kita sing labaw pa sangsa ginapanumdum naton nga aton malab-otan.” Upod ang perpekto nga pagpalangga kag pagpaisog, ginatinguhaan sang Amay nga Langitnon nga buligan ka nga mangin pareho sa Iya kag mabaton ang tanan nga ara sa Iya, sing amat-amat.

Ang pinakamaayo nga paagi para makilala ang imo Amay nga Langitnon amo ang padayon nga pag-angkon sang mga eksperiyensya upod sa Iya. Paano? Magtuon parte sa Iya kag sa Iya Anak halin sa balaan nga mga kasulatan kag sa pulong sang buhi nga mga propeta. Magpangamuyo sa Iya. Tumana ang Iya mga kasuguan. Maghatag sang malinong, personal nga oras sa pagsimba sa Iya sa simbahan, sa templo, kag sa iban pa nga balaan nga mga lugar. Maghimo kag magtuman sang mga kasugtanan upod sa Iya. Buligan ka Niya nga makilala Sia kag kon ano ang Iya nabatyagan para sa imo.