Ang Kamatuoran sang Aton mga Kabuhi

Ang Pagpangita Naton sang Kamatuoran

Sa sining panahon nga ginaestaran naton, mas madali naton matigayon ang ihibalo sangsa sang una. Sang una, kon may gusto ka mahibal-an, kinahanglan mo magkadto sa librarya para pangitaon ini. Sa karon, ang internet kag mga gadyet nagahatag sa aton sang halos wala katapusan nga impormasyon nga madasig lang naton pangitaon.

Malipayon ang Ginuo kon maalam naton nga ginagamit ang mga resources naton, pero naghatag Sia sining wala-nagaliwat nga laygay: “Magtinguha sing matutum kag tudloi ang isa kag isa sang mga pulong sang kaalam; huo, magpangita kamo halin sa pinakamaayo nga mga libro sang mga pulong sang kaalam; magtinguha sa pag-angkon sang ihibalo, bisan pa paagi sa pagtuon kag paagi man sa pagtuo” (Doktrina kag mga Kasugtanan 88:118). Ginapaisog Niya kita nga magtuon parte sa kalibutan sa palibot naton (tan-awa sa Doktrina kag mga Kasugtanan 88:79; 93:53), pero sa pagpangita naton sang kamatuoran, kinahanglan naton magtulok sa Dios, nga “nakahibalo sang tanan nga butang, kag ang tanan nga butang yara sa atubang niya, … kag yara sia sa ibabaw sang tanan nga butang, … kag ang tanan nga butang paagi sa iya, kag halin sa iya” (Doktrina kag mga Kasugtanan 88:41).

Sa tanan nga mga kamatuoran nga ginhatag sa aton sang Dios, isa sa pinakapundasyon sang aton kabuhi sa duta amo nga Sia ang aton Amay nga Langitnon. Iya kita mga espiritu nga anak nga lalaki kag babayi. Kilala kag palangga Niya kita sing perpekto. Kag bilang espiritu Niya nga mga anak, may diosnon kita nga kinaiya kag kapalaran. Ang pag-intiendi kag pagbaton sining wala katapusan nga mga kamatuoran nagahatag sa aton sang aton pagkatawo, balor, kag katuyuan nga nagbugay kag naggiya sa aton antes sa kabuhi naton diri sa duta kag magapadayon sa karon kag sa katubtuban.

Upod Naton ang Amay sang Ginsuguran

Sa pagpangita naton sang kamatuoran sang mga butang “sadto,” madiskubrehan naton ining mga tinaga halin sa aton Manluluwas nga si Jesucristo: “Kag karon, sa pagkamatuod ginasiling ko sa inyo, ako sa ginsuguran kaupod sa Amay, kag ako ang Panganay,” kag “kamo man sa ginsuguran kaupod sa Amay” (Doktrina kag mga Kasugtanan 93:21, 23).

Antes sang aton kabuhi sa duta, nagkadto kita sa konseho sa langit kon diin ginpresentar sang aton Amay nga Langitnon ang Iya dako nga plano sang kalipayan. Gintudlo ni Propetang Joseph Smith nga ang motibasyon sang Dios sa Iya plano amo nga hatagan kita sang “pribelihiyo nga mag-uswag pareho sa iya [kag] … mapahitaas upod sa iya.” Ang Iya buluhaton kag himaya amo ang “ipahanabo ang pagkawala’y kamatayon kag kabuhi nga wala’y katapusan sang tawo” (Moises 1:39).

Gingamit naton ang aton kahilwayan sa pagpili kag ginpili nga sundon ang plano sang Amay nga Langitnon. Ginbugayan kita nga mabun-ag sa sining kabuhi, kon diin padayon kita nga may kahilwayan sa pagpili kag makaeksperiyensya sang mortalidad, magtuon, kag magprogreso padulong sa kabuhi nga wala’y katapusan.

Sa aton dutan-on nga pagpanglakaton, makaeksperiyensya kita sang mga hangkat kag problema. Pero indi naton kinahanglan nga atubangon ang mga kabudlayan sang kabuhi nga nagaisahanon. Gintudlo ni Joseph Smith nga ang aton Amay nga Langitnon, “ang Dungganon nga Ginikanan sang uniberso[,] nagatulok sa bug-os nga tawhanon nga panimalay nga may pag-atipan kag pag-ulikid sang isa ka amay.”

Ang aton Amay nga Langitnon, “ang Amay sang mga kaluoy, kag ang Dios sang tanan nga [kaumpawan],” magabugay sa aton, magaalsa sa aton, kag magapaumpaw sa aton “sa tanan naton nga mga kalisdanan, agud nga paagi sa bulig nga aton nabaton sa Dios, makabulig man kita sa iban sa tanan nila nga mga kalisdanan” (2 Mga Taga-Corinto 1:3–4). Bilang importante nga bahin sang Iya plano, nagtigana ang Amay nga Langitnon sang paagi para makabalik kita sa Iya.

Ang Dalan padulong sa Aton Amay

Ang kamatuoran “sang mga butang suno sa kon ano gid ang mga ini” (Jacob 4:13) klaro: indi naton malambot ang bug-os naton nga potensyal bilang mga anak sang aton Amay nga Langitnon nga kita lang. Si Jesucristo, ang Panganay nga Anak sang Amay sa espiritu, nakigsaad nga mangin aton Manluluwas kag Manunubos.

Si Jesucristo, “[ang] Bugtong nga Anak sang Amay nga puno sang grasya kag kamatuoran, ang Espiritu sang kamatuoran, … nagkari kag nagpuyo sa unod, kag nagpuyo upod sa amon” (Doktrina kag mga Kasugtanan 93:11). Nagkari Sia para ipakita sa aton ang dalan sa pagpangita sang kalipayan, kahulugan, kag kalipay sa sining kabuhi kag sa wala katubtuban.

“Kay ginhigugma gid sang Dios ang kalibutan sa bagay nga ginhatag niya ang iya bugtong nga Anak, agud nga ang tagsatagsa nga nagatuo sa iya indi na mapatay, kundi may kabuhi nga wala sing katapusan.

“Kay wala ginpadala sang Dios ang iya Anak sa kalibutan sa paghukom sang kalibutan, kundi sa pagluwas sang kalibutan paagi sa iya” (Juan 3:16–17).

Ang dutan-on nga eksperiyensya sang Manluluwas importante. “Sa umpisa wala niya nabaton ang kabug-osan apang nagbaton sing grasya sa grasya” (Doktrina kag mga Kasugtanan 93:12). Nagtubo Sia hasta nga “nabaton niya ang kabug-osan sang himaya sang Amay” kag “ang tanan nga gahum sa langit pati sa duta, kag ang himaya sang Amay yara sa iya kay nagpuyo sia sa iya” (Doktrina kag mga Kasugtanan 93:16–17). Ang Manluluwas nagtudlo:

“Ginahatag ko sa inyo ining mga kasugoan agud mahangpan ninyo kag mahibaloan kon paano magsimba, kag mahibaloan kon ano ang inyo ginasimba agud nga makakari kamo sa Amay sa akon ngalan, kag sa nagakaigo nga tion makabaton sang iya kabug-osan.

“Kay kon tumanon ninyo ang akon mga kasugoan mabaton ninyo ang iya kabug-osan, kag mahimaya sa akon pareho nga nahimaya ako sa Amay; gani, ginasiling ko sa inyo, magabaton kamo sang grasya sa grasya” (Doktrina kag mga Kasugtanan 93:19–20).

Sa Hardin sang Getsemani kag sa krus, gindala ni Jesucristo sa Iya Kaugalingon ang mga sala sang kalibutan kag gin-antos ang tanan nga kasubo kag “kasakit kag mga pag-antos kag mga pagsulay sang tagsa ka sahi” (Alma 7:11). Ini “nagpakurog sa [Iya] … nga pinakagamhanan sa tanan, bangod sa kasakit, kag nagwa ang dugo halin sa tagsa ka buho-buho sang panit” (Doktrina kag mga Kasugtanan 19:18). Paagi lamang kay Jesucristo kag sa Iya Pagbayad-Sala kag Pagkabanhaw nga nangin posible ang kaluwasan kag pangkahitaasan.

Paagi sa grasya kag nagabayad-sala nga sakripisyo sang Manluluwas, pwede kita magtubo hasta nga mabaton naton ang kabug-osan kag pila ka adlaw malab-ot ang pagkaperpekto. Kon sundon naton ang ehemplo sang Manluluwas kag sundon ang Iya mga kasuguan, pangunahan Niya kita kag giyahan sa aton alagyan pabalik sa mahimayaon nga presensya sang aton Amay sa Langit.

Christ on the Road to Jerusalem [Si Cristo sa Dalanon padulong sa Jerusalem], ni Michael Coleman, indi pwede kopyahon

Batunon Mo Bala ang Iya Regalo?

Upod sa mga kamatuoran sang “mga butang suno sa mangin kon ano gid ang mga ini” (Jacob 4:13), matun-an naton nga ang aton eksperiyensya sa wala katubtuban magadepende sa aton pagpili nga sundon si Jesucristo kag batunon ang mga dulot nga Iya ginatanyag. Ginatudlo sa balaan nga kasulatan nga kita “[magapangalipay] sa sinang handa lang [naton] nga batonon.” Ang masubo, may mga tawo nga indi “handa sa pagpangalipay sa sinang mahimo nila tani mabaton” (Doktrina kag mga Kasugtanan 88:32).

Ang akon mission president nga si Elder Marion D. Hanks (1921–2011), nga nagserbisyo bilang General Authority Seventy, nagtudlo sa iya mga misyonero nga ang pagpangayo sinang handa kita sa pagbaton kag pagpangalipay isa ka paagi nga mahukman naton kon diin na kita dapit sa aton espirituhanon nga pagpanglakaton. “Kay ano bala ang kaayuhan sa isa ka tawo kon hatagan sia sang regalo, kag indi niya pagbatunon ang regalo?” Sa pagbaton naton sang mga regalo sang Manluluwas paagi sa pagpangita kag pagsunod sa Iya, magakasadya kita sa paglaum sang kabuhi nga wala’y katapusan kag “sa iya nga taghatag [sinang] regalo” (Doktrina kag mga Kasugtanan 88:33). Ining regalo nga mapinalanggaon kaayo nga ginahatag “ang pinakadako sa tanan nga dulot sang Dios” (Doktrina kag mga Kasugtanan 14:7).

Ang Dios amo ang aton Amay nga Langitnon. Kilala kag palangga Niya kita. Kon magliso kita sa Iya sa pagpangita naton sang kamatuoran, pwede kita magpanguyapot sa ihibalo, magbaton sang kaalam, maghakos sa kamatuoran, magpalangga sang pagkamatarong, kag magpanguyapot sa kasanag nga nagahalin sa Iya (tan-awa sa Doktrina kag mga Kasugtanan 88:40). Dayon magapadayon kita sa bilog naton nga kabuhi hasta nga “magaabot ang adlaw nga mahangpan [naton] sa pagkamatuod ang Dios, nga ginabuhi kamo sa iya kag paagi sa iya” (Doktrina kag mga Kasugtanan 88:49).

Mangin pinakamahimayaon kag malipayon ina nga adlaw.