Ae Tiaki Aron te Atua

Bon ngaia Tamara, ae tamaroa riki nakon te kabane n raoiroi n tama iaon te aba ae ko kona n iangoia. E ngae ngkana ti aki kona n uringa maiura ma Ngaia i mwain te maiu aei, E kororaoi kinaakira irouna n tatabemaniira nako. Iai rabwatana ae kororaoi ae te iriko ma te rii, ao ti karikaki ni Katotongana.

Ngkana e kangaanga katamneiana bwa aekakira te Atua iroum, iai te banna ni katooto ae kororaoi: Natina, Iesu Kristo. E taku Kristo, “Boni Ngai te kawai, te koaua, ao te maiu: akea ane nako n te Tama, ba ti mai irou. “Ngke tao kam a tia n atai, ao kam ata naba Tamau.” (Ioane 14:6–7). N taekana teuana, ngkana ti tangiria n kina bwa aekara Tamara are i Karawa, ti kona ni kina bwa aekara Iesu Kristo! A katiteuanaaki n aia kaantaniga.

N koauana, buokam ni karekea te maiu ae akea tokina bon Ana mwakuri ao Mimitongina. Ngkoe # 1 Irouna! E aki kabaeaki n te tai n ai arora. Reitiko Nakoina n te tataro n taai nako. Ao ngkanne ongora nakon anga aika bati are E na kaekako iai.

E reireiniira ngkoa Unimwaane Dale G. Renlund man te Kooram n Abotoro n Tengaun ma Uoman, “Ana kouru Tamara arei i Karawa n nakoana ni karo tiaki anganakiia Natina bwa a na karaoa ae eti; ma kariaiakaia Natina bwa a na rineia ni karaoa ae eeti ao n riki n ai Arona.” E na kaoko, ni marooro ma ngkoe, ao n reiakiniko te koaua, ma E na bon aki kabuaa inaomatam n rinerine man kairoroakim bwa kona Iriria.

Ma, n aron are e taekinna Unimwaane Patrick Kearon man te Kooram n Abotoro ake Tengaun ma Uoman, “E reitinako te Atua ni kan rereitaki ma ngkoe,” are nanonaki bwa E na bon aki bwabwara nanona ni kataia n buokira n oki Nakoina. E ataira ngaira ni kabane ti na bon aitara ma bwaai aika rawawata ngkana ti karaoi kaairua. Ngaia are E katauraoa te anga bwa ti na kona n itiaki man ara bure ao ni karekea te kakorakoraaki rinanon Ana Mwakuri ni Kamaiu Natina.

Akea tokin ana tangira ibukira. E tangiriko n te tai aio, n arom n aki kororaoi! Beretitenti Jeffrey R. Holland, Bonomwi n Beretitenti n te Kooram n te Tengaun ma Uoman e anga te kamataata ae korakora ibukin te koaua aio: “Roko ni bon arom ngkai,’ e taku Tamara ae tatangira, ma E reitia, ‘Tai tiku n arom ae ngkai.’ Ti wiingare ao n uringa ae te Atua e teimatoa n tangiria bwa E na karaoira nakon are ti taku bwa ti kona n riki nako iai.” Ma te tangira ae kororaoi ao taeka ni kaunganano, Tamara are i Karawa e kataia n buokiira n riki n ai Arona ao ni karekei ni kabane ake Irouna, teutana imwin teuana.

Te kawai ae tamaroa n kinaan raoi Tamara are i Karawa bon karekean taneiai ma Ngaia. Ni kanga? Reiakina Taekana ao Natina man koroboki aika tabu ao aia taeka burabeti aika maiu. Tatara Nakoina. Kawakin Ana Tua. Kabanea am tai inanon te aki beroro, ae bon oin am tai n Neboia n te taromauri, n te tembora, ao taabo aika tabu. Karaoi ao kawakin berita aika tabu ma Ngaia. E na buokiko bwa kona Kinaa ao n ataa Ana namakin ibukim.