Na Rai Calame Baleta na Kalou

Sai Koya na Tamada, e totoka cake mai na tamada vakavuravura uasivi duadua o rawa ni raitayaloyalotaka. E dina ga nida sega ni nanuma rawa na noda bula taumada vata kei Koya, ia o Koya e kilai keda vakayadudua ka vakataucoko sara. Na yagona uasivi sara e vakalewe ka vakasui, ka da sa ucui Koya.

Kevaka o sasaga mo raitayaloyalotaka se vakacava tu na Kalou, e tiko edua na ivakaraitaki uasivi sara: Na Luvena, o Jisu Karisito. A kaya o Karisito, “Oi au na sala, kei na vu ni dina, kei na vu ni bula: sa sega ni torovi Tamaqu walega edua na tamata, ena vukuqu ga. “Kevaka dou sa kilai au, dou sa kilai Tamaqu talega” (Joni 14:6–7). Ena dua tale na kena itukutukuni, kevaka eda via kila na kena ituvaki na Tamada Vakalomalagi, e rawa nida vulica mai na ituvaki kei Jisu Karisito! Erau duavata vakataucoko ena nodrau inaki.

Na kena dina ni, Nona vukei iko mo rawata na bula tawamudu sa Nona cakacaka kei na Nona lagilagi. O iko na Nona naba 1 ni vakanamata! E sega ni vauci o Koya ena gauna me vakataki keda. Gole yani Vua ena masu ena gauna cava ga. Qai vakarogoca na sala e vuqa e sausaumi mai kina o Koya.

O Elder Dale G. Renlund ena Kuoramu ni iApositolo Lewe Tinikarua a vakavulica, “Na lalawa vakaitubutubu nei Tamada Vakalomalagi e sega ni nodra cakava ga na luvena na ka dodonu; ia mera digitaka na Luvena me cakava na ka dodonu ka yaco mera vakataki Koya.” Ena sureti iko o Koya, vakasalataki iko, ka vakavulica vei iko na dina, ia ena sega ni kauta tani o Koya na nomu galala ni digidigi ena nona vakasaurarataki mo muri Koya.

Ia, me vaka a cavuta o Elder Patrick Kearon ena Kuoramu ni iApositolo Le Tinikarua, “Sa dau vakasaqarai iko tiko ga na Kalou,” kena ibalebale ni na sega vakadua ni guce me vukei iko mo lesu tale Vua. E kila o Koya nida na sotava kece na veika dredre nida caka cala. Sa vakarautaka kina o Koya edua na sala vei keda meda vakasavasavataki kina mai na ivalavala ca ka kunea na kaukauwa ena Veisorovaki ni Luvena.

E tawamudu na Nona lomani iko. O Koya e lomani iko ena gauna sara ga oqo, nio sega ni se uasivi sara! O Peresitedi Jeffrey R. Holland, na Peresitedi Vakatawa ni Kuoramu ni iApositolo Le Tinikarua, e vakamatatataka vakavinaka na dina oqo: “‘Mo toro mai ena itutu ni bula ga o tu kina,’ e kaya vei keda yadua edua na Tama dauloloma, ia e tomana o Koya, ‘Kua ni nanuma mo na vaka tu ga oqori.’ Eda matadredre ka nanuma ni Kalou e vinakata me vukei keda meda vinaka cake mai na ka eda nanuma meda vakataka.” Ena loloma uasivi kei na veivakauqeti, e tovolea tiko na Tamada Vakalomalagi me vukei iko mo vakataki Koya ka ciqoma na veika kece e tu Vua, dua na ikalawa ena dua na gauna.

Na sala vinaka duadua mo kila kina na Tamamu Vakalomalagi sai koya mo vakayagataka e levu na gauna vata kei Koya. E caka vacava? Vulica na veika baleti Koya kei na Luvena mai na ivolanikalou kei na nodra vosa na parofita bula. Masu Vua. Muria na Nona iVakaro. Mo vakanomodi, ena gauna ni nomu sokalou Vua vakai iko e valenilotu, ena valetabu, kei na veivanua tabu tale eso. Cakava ka maroroya na veiyalayalati vata kei Koya. Ena vukei iko o Koya mo kila se o cei o Koya kei na veika e nanuma o Koya me baleti iko.