Na Dina me Baleta na Noda Bula

Noda Vakasaqara na Dina

Ena itabayabaki eda bula tiko kina oqo, sa levu cake na kila ka e vakarautaki tu vei keda me vakatauvatani kei na veigauna sa oti. Mai liu, kevaka o vinakata mo kila edua na ka, o na gole kina valenivola mo lai vakaraica kina. Nikua na initaneti kei na veiyaya veikauyaki e vakarautaka tu na itukutuku tawayalani ka rawa nida kunea vakatotolo sara.

Na Turaga e marautaka na noda vakayagataka vakavuku na veiivurevure eso e tu vei keda, ia sa vakarautaka tu o Koya na ivakasala tawayalani oqo: “Dou gumatua sara mo dou veivakavulici vakataki kemudou ena vosa ni yalomatua; io, dou vakasaqara mai na ivola vinaka na vosa ni yalomatua; dou vakasaqara na kila ka, io ena vuli kei na vakabauta” (Vunau kei na Veiyalayalati 88:118). O Koya e vakauqeti keda meda vulica na veika e yaco wavoliti keda tu e vuravura (raica na Vunau kei na Veiyalayalati 88:79; 93:53), ia ena noda vakasaqara na dina, e dodonu meda vakanamata vua na Kalou, o Koya “sa kila na ka kecega; ka sa tu e matana na ka kecega, io sa uasivita na veika kecega, … raica sa mai vua na ka kecega, ka sa baleti koya” (Vunau kei na Veiyalayalati 88:41).

Ena kedra maliwa na dina sa solia tu vei keda na Kalou, edua ka yavu bibi ni noda bula e vuravura oya nio Koya e Tamada Vakalomalagi. O keda na Luvena tagane kei na yalewa vakayalo. O Koya e kilai keda ka lomani keda vakataucoko sara. Ka sa tiko na keda ituvaki kei na icavacava vakalou, baleta nida sa Luvena vakayalo. Na kilai kei na ciqomi ni veidina tawamudu oqo e solia vei keda na ivakatakilakila, yavunibula, kei na inaki eda a vakalougatataki ka dusimaki kina ni bera noda mai bula e vuravura ka na tomani tiko ena gauna oqo ka tawamudu.

Eda A tiko vata kei Tamada mai na iVakatekivu

Nida vakasaqara na dina ni veika baleta “na kedra ituvaki ena veigauna sa oti,” eda kunea na veivosa oqo mai vua na noda iVakabula, o Jisu Karisito: “Ia oqo, au sa kaya vakaidina vei kemudou, Au a tiko vata kei Tamaqu mai na ivakatekivu, ka ni sai au na Ulumatua,” ka “dou a bula vata tale ga kei na Tamada mai na ivakatekivu” (Vunau kei na Veiyalayalati 93:21, 23).

Ni bera noda mai bula e vuravura, eda a tiko ena dua na matabose mai lomalagi ka vakaraitaka kina na Tamada Vakalomalagi na Nona ituvatuva cecere ni marau. Na Parofiita o Josefa Simici e vakatavuvulitaka ni inaki ni Kalou ena Nona ituvatuva oya me solia vei keda “edua na madigi meda vakatorocaketaki me vakataki Koya [ka] bula vakacerecerei me vakataki Koya.” Sa Nona inaki kei na lagilagi “me vakavuna na tawamate rawa kei na bula tawamudu ni tamata” (Mosese 1:39).

Eda a vakayagataka na noda galala ni digidigi ka digitaka meda muria na nona ituvatuva na Tamada Vakalomalagi. Eda vakalougatataki meda sucu mai kina bula oqo, ka tomani tiko na noda galala ni digidigi ena bula vakayago, vuli, ka toso yani kina bula tawamudu.

Ena noda ilakolako ena bula oqo, eda na sotava kina na bolebole kei na veidredre eso. Ia e sega ni gadrevi meda na sotava duadua na dredre ni bula. O Josefa Simici a vakavulica ni Tamada Vakalomalagi, “O Koya na Tamadra na veivuravura kecega[,] e raica sobu tu mai na vuvale ni matatamata kece ena yalololoma kei na veikauwaitaki dina vakatama.”

Na Tamada Vakalomalagi, “na Tama ni loloma, kei na Kalou ni veivakacegui kecega,” ena vakalougatataki keda, laveti keda, ka vakacegui keda “ena noda rarawa kecega, meda vakacegui ira rawa era sa rarawa ena dua na ka, ena veivakacegui eda sa vakacegui kina mai vua na Kalou” (2 Korinica 1:3–4). Sa vakarautaka vei keda na Tamada Vakalomalagi na sala meda lesu tale kina Vua, ni oqo edua na tiki bibi ni Nona ituvatuva.

Na Sala vei Tamada

Na dina ni “veika me vaka na kena ituvaki dina” (Jekope 4:13) e matata: me vaka nida luvena na Tamada Vakalomalagi, eda na sega ni rawa ni yacova duadua na vanua eda rawa ni yacova. O Jisu Karisito, na Ulumatua nei Tamada vakayalo, a veiyalayalatitaka me noda iVakabula ka Dauveivueti.

O Jisu Karisito, “na Le Duabau ga nei Tamana, a sa sinai ena loloma soliwale kei na dina, io na Yalo ni ka dina, … sa lako sobu mai ka mai bula vakayago, ka tiko vata kei keda” (Vunau kei na Veiyalayalati 93:11). A lako mai o Koya me vakaraitaka vei keda na sala meda kunea kina na marau, inaki ni bula, kei na reki ena bula oqo kei na tawamudu.

“Ni sa lomani ira na kai vuravura vakaoqo na Kalou, me solia kina na Luvena e duabau ga sa vakatubura, me kakua ni rusa ko ira yadua era sa vakabauti koya, mera rawata ga na bula tawamudu.

“Ni sa sega ni tala mai na Luvena ki vuravura na Kalou me cudruvi ira na kai vuravura; me bula ga koi ira na kai vuravura ena vukuna” (Joni 3:16–17).

E bibi na veika a mai sotava e vuravura na iVakabula. Sa “sega ni rawata na kena taucoko ena imatai ga ni gauna, ia sa rawata mai na iloloma soli wale kina iloloma soli wale” (Vunau kei na Veiyalayalati 93:12). A tubu me yacova ni sa “rawata na taucoko ni lagilagi nei Tamana” kei na “kaukauwa kecega, mai lomalagi kei vuravura, ka sa tiko vata kei koya na lagilagi nei Tamana, ni sa tiko vata kei koya” (Vunau kei na Veiyalayalati 93:16–17). Na iVakabula a vakavulica:

“Au sa tukuna vei kemudou na veika oqo mo dou kila kina na ivakarau mo dou qaravi koya kina, ka kilai koya dou sa qarava, mo dou lako yani kina vei Tamaqu ena yacaqu, ka rawata na nona veivakataucokotaki ena kena gauna.

Ia kevaka dou sa muria na noqu ivakaro dou na veivakataucokotaki, ka vakalagilagi ena vukuqu me vaka niu sa vakalagilagi ena vukui Tamaqu; o koya, au sa kaya vei kemudou, dou na rawata kina mai na iloloma soli wale ki na iloloma soli wale”.(Vunau kei na Veiyalayalati 93:19–20).

Ena Were o Kecisemani kei na kauveilatai, a colata vakai Koya o Jisu Karisito na ivalavala ca ni vuravura ka sotava na rarawa kecega kei “na mosi kei na veivakararawataki kei na veivakatovolei kecega” (Alama 7:11). Oqo “sa vakavuna [Vua], … ko koya sa kaukauwa sara, me sautaninini ena vuku ni mosi, sa titiri kina na dra mai na qara kecega ni yagona” (Vunau kei na Veiyalayalati 19:18). Ena vuku duadua ga i Jisu Karisito kei na Nona Veisorovaki kei na Tucaketale sa rawati kina na veivakabulai kei na bula vakacerecerei.

Mai na loloma soliwale kei na solibula ni veivakaduavatataki ni iVakabula, sa rawa nida tubu me yacova nida sa taucoko ka rawa ni yaco me uasivi sara ena dua na siga. Kevaka eda muria na ivakaraitaki ni iVakabula ka muria na Nona ivakaro, ena tuberi keda ka dusimaki keda o Koya ena noda sala lesu kina iserau lagilagi nei Tamada mai Lomalagi.

Christ on the Road to Jerusalem [Karisito ena Sala ki Jerusalemi], mai vei Michael Coleman, me kakua ni lavetaki

Ona Ciqoma Beka Na Nona iSolisoli?

Ena kedra maliwa na dina “ni ituvaki dina ni veika ena qai yaco mai” (Jekope 4:13), eda vulica kina ni veika eda na sotava ena veigauna tawamudu ena vakatau ena noda digitaka meda muri Jisu Karisito ka ciqoma na isolisoli e solia tu o Koya. E vakavulica na ivolanikalou nida na “marautaka na veika [eda] vinakata me rawata.” E ka ni rarawa, ni so era na sega ni “marautaka na kena a dodonu mera rawata” (Vunau kei na Veiyalayalati 88:32).

O Elder Marion D. Hanks (1921–2011) na noqu peresitedi ni kaulotu, ka veiqaravi vaka Vitusagavulu Raraba, a vakavulica vei ira na nona daukaulotu ni noda kerea na veika eda tu vakarau meda ciqoma ka marautaka, edua na sala eda na kila kina na vanua eda sa tiko kina ena noda ilakolako vakayalo. “A cava na kena yaga vua na tamata kevaka sa soli tu na isolisoli me nona, ka qai sega ni taura?” Nida ciqoma na isolisoli ni iVakabula ena noda vakasaqarai Koya ka muri Koya vagumatua, eda na rekitaka na inuinui ni bula tawamudu “kei koya sa solia na isolisoli [oya]” (Vunau kei na Veiyalayalati 88:33). Na isolisoli oqo ka soli ena yalololoma e “isolisoli uasivi duadua vei ira na isolisoli uasivi ni Kalou” (Vunau kei na Veiyalayalati 14:7).

Na Kalou e Tamada Vakalomalagi. E kilai keda ka lomani keda. Ni da gole Vua ena noda vakasaqara na dina, eda na rawa ni taura matua na veika vuku, ciqoma na yalomatua, rekitaka na dina, taleitaka na ivalavala savasava, ka ciqoma na rarama e lako mai Vua (raica na Vunau kei na Veiyalayalati 88:40). Eda na qai tomana tiko na noda bula me yacova “na siga [eda] na kila kina na Kalou, ni dou sa vakabulabulataki ki vua mai vua” (Vunau kei na Veiyalayalati 88:49).

Oqori ena dua na siga lagilagi ka rekitaki duadua.