Dza Nyankopɔn Nnyɛ

Ɔyɛ hɛn Egya, ɔyɛ nwanwafo mpo kyɛn asaase do egya papa paa ibotum esusu. Yɛnnkaa hɛn abrabɔ ansaana yɛreba asaase do a nna yɛnye No wɔ hɔ no dze, naaso Onyim hɛn ankorankor na emudzi mu ara. Ɔwɔ honandua na mbiew a odzi mu, na wɔbɔɔ hɛn wɔ No su do.

Sɛ eper dɛ ibosusu mbrɛ Nyankopɔn si tse a, fasusu a odzi mu wɔ hɔ: Ne ba, Jesus Christ. Christ see dɛ, “Emi nye ɔkwan no, nye nokwar no, nye nkwa no; obi mmba Egya no hɔ, gyedɛ ɔnam mo do. Sɛ hom enya ehu me a, nkyɛ hom ehu m’Egya no so” (John 14:6–7). Anaa dɛ, sɛ yɛpɛ dɛ yehu mbrɛ Ɔsor Egya si tse a, yebotum esũa afa mbrɛ Jesus Christ tse ho! Wɔyɛ kor wɔ botae mu emudzi mu ara.

Nokwar nye dɛ, Ɔroboa wo ma enya onnyiewiei nkwa nye N’edwuma na N’enyimnyam. Eyɛ N’ehiadze tsitsir. Mber nntsia no dɛ ma mber tsia hɛn no. Kɔ No hɔ wɔ mpaabɔ mu aber biara. Nkyii tsie akwan horow a Ɔfa do yi ano.

Elder Dale G. Renlund a ɔkã Asomafo Duebien no hɔn Quorum no ho kyerɛkyerɛɛ dɛ, “Hɛn Ɔsor Egya no botae wɔ ɔwofoyɛ ho nnyɛ Ɔbɛma Ne mba ayɛ dza oye; ɔyɛ Ɔbɛma Ne mba asan mu eyi dɛ wɔbɛyɛ dza oye na ewiei no wɔabɛyɛ tse dɛ Ɔno.” Ɔbɔto nsa afrɛ wo, nye wo afa apam, na Ɔakyerɛkyerɛ wo nokwar, mbom Ɔrenngye wo pɛ mmfi wo nsamu dɛ Ɔrehyɛ wo ma aka No do.

Mbom, dɛ ma Elder Patrick Kearon a ɔkã Asomafo Duebien no hɔn Quorum no ho kãa no, “Nyame rohwehwɛ nye wo enya nkitahodzi daa daa,” a ɔkyerɛ dɛ Ɔremmpa abaw da dɛ Ɔroboa wo ma asan aba No hɔ. Onyim dɛ ntɔyɛɛ mu ara hɛn nyinara behyia dza ɔyɛ dzen sɛ yɛfom a. Ntsi Ɔbɔɔ kwan maa hɛn dɛ hɛnho bɛsan efi bɔn ho na yeenya ahoɔdzen a odua Ne Ba no no Werdambɔ do.

No dɔ ma wo no mmbɔ adze da. Ɔdɔ wo seseiara, dɛ mbrɛ etse yi a nndzi mu no! President Jeffrey R. Holland, Asomafo Duebien no hɔn Quorum Presiednt n’ananmusinyi, maa nkyerɛmu a ɔyɛ ndam fa dɛm nokwar yi ho: “Egya dɔfo kã kyerɛ hɛn mu kor biara, ‘mbrɛ etse biara bra,’ mbom Ɔdze kã ho, ‘Mma nnhyehyɛ dɛ ebɛtsena wo dadaw mu.’ Yɛyerɛw hɛn ano na yɛkaa dɛ Nyankopɔn esi pi dɛ Ɔbɛyɛ hɛn akyɛn dza yɛdwen ho dɛ yebotum abɛyɛ koraa.” Ɔdze dɔ a odzi mu na nkuranhyɛ no, Ɔsor Egya robɔ mbɔdzen dɛ Ɔbɔboa wo ma abɛyɛ dɛ Ɔno na wo nsa aka dza Ɔwɔ nyina, nkakrankakra.

Kwan papa paa a ibotum afa do dze ehu wo Sor Egya nye dɛ ebɔkɔ do nye No enya nkitahodzi. Ebɛn kwan do? Sũa Ɔno na Ne Ba hɔn ho asɛm fi kyerɛwsɛm no mu na nkɔnhyɛfo atseasefo hɔn nsɛm mu. Bɔ mpaa ma No. Dzi Ne mbrasɛm do. Dzi ankorankor, mber komm fa som No wɔ asɔr, wɔ temple na mbea krɔnkrɔn binom so mu. Enye No ndzi ahyɛmu na sie. Ɔbɔboa wo ma ehu nyia Ɔyɛ na mbrɛ Osi tse nkã fa wo ho.