We I No God

Hem i Papa blong yumi, we i gud tumas iven wan bes papa blong yumi long wol ia we yumi save tingbaot. Iven yumi no save tingbaot laef blong yumi bifo wetem Hem, Hem i save gud wanwan long yumi. Hem i gat wan bodi blong mit mo bun, mo yumi i semmak long Hem.

Sapos yu traehad blong wantem save se God i olsem wanem, i gat wan gudfala eksampol: Pikinini blong Hem, Jisas Kraes. Kraes i talem, “Mi nao rod ia, mo mi mi stamba blong trutok, mo mi stamba blong laef. I no gat man i save kam long Papa blong mi sapos mi no tekem hem i kam. From se sapos yufala i bin save mi, bambae yufala i save Papa blong mi tu.”(Jon 14:6–7). Long narafala toktok, sapos yumi wantem save se Papa long Heven i olsem wanem, yumi save lanem abaot Jisas Kraes se Hem i olsem wanem! Tufala i wan from wan stamba tingting we i gud.

Be, wok mo glori blong Hem i blong helpem yu kasem laef we i no save finis. Yu yu #1 long lis blong Hem! Hem i no wok long taem olsem yumi. Toktok long Hem long prea eni taem. Afta lisin long plante wei we Hem i ansa.

Elda Dale G. Renlund blong Kworom blong Olgeta Twelef Aposol i tijim se, “Gol blong Papa blong yumi long Heven long saed blong stap papa mo mama, i no blong gat ol pikinini we oli mekem wanem we i raet; hem i blong gat ol pikinini blong Hem oli jusum blong mekem wanem we i raet, mo long en, blong kam olsem Hem.” Hem bae i invaetem yu, toktok wetem yu, mo tijim yu trutok, be Hem bae i no karemaot fasin blong jus blong yu blong fosem yu blong folem Hem.

Be long hemia, olsem Elda Patrick Kearon blong Kworom blong Olgeta Twelef Aposol i talem, “God i stap gohed blong wantem blong gat rilesensip wetem yu,” i minim se Hem bae i no save givap blong traem blong helpem yu kambak long Hem. Hem i save yumi evriwan bae i go tru long ol had samting taem yumi mekem ol mistek. Mekem se Hem i mekem wan wei blong mekem yumi kam klin aot long sin mo faenem paoa tru long Atonmen blong Pikinini blong Hem.

Lav blong Hem long yu bae i neva en. !Hem i lavem yu naoia, sapos yu no stret gud evriwan! Presiden Jeffrey R. Holland Akting Presiden blong Kworom blong Olgeta Twelef Aposol, i givim wan klia toktok we i gat paoa abaot trutok ia: “‘Kam olsem yu,’ wan Papa we i lavem yumi i talem long wanwan long yumi, Hem i talem, ‘No plan blong stap olsem we yu stap.’ Yumi smael mo tingbaot se God i wantem tumas blong mekem yumi wanwan i kam moa long wanem yumi ting se bae yumi kam.” Wetem stret lav mo fasin blong leftemap tingting, Papa long Heven i stap traem blong helpem yu kam olsem Hem mo kasem evri samting we Hem i gat, slo slo i go.

Bes wei blong kam blong save Papa long Heven i blong gohed blong gat ol eksperiens wetem Hem. ?Olsem wanem? Lanem abaot Hem mo Pikinini blong Hem long ol skripja mo ol toktok blong ol profet we oli stap laef. Prea long Hem. Obei Ol Komanmen blong Hem. Spenem kwaet, taem blong yuwan blong wosipim Hem long jos, long tempol, mo long ol narafala tabu ples. Mekem mo kipim ol kavenan wetem Hem. Bambae Hem i helpem yu blong save huia Hem mo olsem wanem Hem i filim abaot yu.