“Trutok blong Laef Blong Yumi,” Liahona, Ogis 2025.
Liahona Mesej blong Evri Manis, Ogis 2025
Trutok blong Laef Blong Yumi
Papa blong yumi long Heven we i lavem yumi tumas, i bin talemaot ol trutok abaot laef blong yumi bifo, naoia, mo laef we bae i kam, wetem olsem wanem yumi save kasem presen ia blong laef we i no save finis.
Antap long wan smol rum we oli arenjem gud, long stoa blong Newel K. Whitney long Ketlan, Ohaeo, long Jenuware 22, 1833, ol elda blong Jos oli kam tugeta wetem Profet Josef Smit. Long Disemba blong yia we i bin pas, Josef i bin kasem wan revelesen, we hem i mas mekem wan skul blong helpem mo rere ol brata blong go long ol misin.
“Mi givim long yufala wan komanmen,” Lod i talem, “se yufala i mas tijim wanwan long yufala abaot doktrin blong kingdom.
“Yufala i tij gud wetem strong tingting, mo gladhat blong mi bae i stap wetem yufala, blong mi tijim yufala stret moa long saed blong fasin, long saed blong prinsipol, long saed blong doktrin, long saed blong loa blong gospel, long saed blong evri samting we i abaot kingdom blong God, we i nid blong yufala i andastanem; …
“Blong yufala i rere long saed blong evri samting taem bae mi sendem yufala bakegen blong givim ona mo wok strong long koling ia we mi bin singaotem yufala long hem, mo misin ia we mi bin givim long yufala wetem atoriti” (Doktrin mo Ol Kavenan 88:77–78, 80).
“Skul blong ol Profet,” ia olsem we oli singaotem, i givim wan naesfala paoa we i gud tumas long saed blong spirit. Plante long ol lida blong Jos bifo oli bin tijim olgeta long ples ia. Tedei wol i wan defren ples olgeta, be fasin blong lid ia we i kam long Lod long taem ia, i stap hapen yet long taem tedei. Yumi, tu, i mas lukaotem save mo trutok “blong ol samting olsem we oli stap, mo olsem we oli bin stap, mo olsem we bambae oli kam blong stap” (Doktrin mo Ol Kavenan 93:24).
Rod Blong Yumi blong Lukaotem Trutok
Long yia we yumi laef long hem, i gat moa save i stap blong yumi bitim bifo. Bifo, sapos yu wantem blong save samting, yu mas go long laebri mo lukaotem. Tedei intanet mo ol mobael fon we yumi holem oli gat kolosap evri infomesen insaed we yu save faenem hariap nomo.
Lod i glad taem yumi yusum wetem waes ol risos we oli stap blong yumi, be Hem i givim yumi wan kaonsel ia we bae i stap oltaem: “Yufala i lukaotem wetem strong tingting mo tijim long wanwan long yufala bakegen, ol toktok blong waes tingting; yes, lukaotem ol toktok blong waes tingting insaed long ol buk we oli moa gud; lukaotem blong lanem samting, tru long stadi, mo tu, tru long fet.” (Doktrin mo Ol Kavenan 88:118). Hem i leftemap tingting blong yumi blong lanem abaot wol we i raonem yumi (luk long Doktrin mo Ol Kavenan 88:79; 93:53), be long rod blong yumi blong lukaotem trutok, yumi mas lukluk long God, Hem we “, i andastanem evri samting mo evri samting i stap long fored blong hem, … mo hem i stap antap long evri samting, … mo evri samting oli kam tru long hem, mo long hem” (Doktrin mo Ol Kavenan 88:41).
Aot long ol trutok we God i givim long yumi, wan we i stamba blong laef blong yumi long wol ia, i we Hem i Papa blong yumi long Heven. Yumi ol spirit pikinini boe mo gel blong Hem. Hem i save mo lavem yumi stret mo gud evriwan. Mo olsem ol spirit pikinini blong Hem, yumi gat wan tabu wok mo rod blong folem. Blong andastanem mo lukaotem gud ol trutok ia we i no save finis i givim yumi aedentiti, valiu, mo stamba tingting blong blesem mo lidim yumi long laef blong yumi bifo laef long wol ia mo bae i gohed olsem naoia mo oltaem.
Yumi Stap wetem Papa long Stat
Taem yumi lukaotem trutok blong ol samting “olsem we oli stap,” yumi kam blong faenemaot ol toktok blong Sevya blong yumi, Jisas Kraes: “Mo naoia, i tru mi talem long yufala, mi bin stap long stat wetem Papa, mo mi mi Fasbon,” mo “yufala i bin stap tu long stat wetem Papa” (Doktrin mo Ol Kavenan 93:21, 23).
Bifo laef blong yumi long wol, yumi stap long wan kaonsel long heven we Papa long Heven i presentem bigfala plan blong Hem ia blong stap hapi. Profet Josef Smit i tijim se plan ia blong God i blong givim yumi “wan janis blong kam olsem Hemwan [mo] … kam antap gud wetem help blong Hem.” Wok mo glori blong Hem, i blong “mekem man i nomo save ded mo i kasem laef we i no save finis” (Moses 1:39).
Yumi eksasaesem fasin blong jus blong yumi mo folem plan blong Papa long Heven. Yumi kasem blesing ia blong save bon i kam long wol ia, we yumi gohed blong gat fasin blong jus mo save eksperiensem laef mo ded, lanem samting, mo progres i go long laef we i no save finis.
Long laef blong yumi long wol ia, bae yumi eksperiensem ol jalenj mo ol hadtaem. Be yumi no nidim blong go tru long ol hadtaem ia yumiwan. Josef Smit i tijim se Papa long Heven, “Hae Papa blong yunives i lukluk long ful famli blong ol man wetem kea blong wan papa, mo lukluk blong wan papa.”
Papa blong yumi long heven, “Hem i Papa we i gat sore, hem i God we i stamba blong fasin blong givhan,” bae i blesem mifala, leftemap mifala, mo kamfotem mifala “long olgeta trabol blong mifala, blong mekem mifala i harem gud. Nao taem ol narafala man oli gat trabol, mifala i save givhan long olgeta, blong mekem olgeta oli harem gud long sem fasin, from we God i givhan finis long mifala” (2 Korin 1:3–4). Olsem wan impoten pat blong plan blong Hem, Papa long Heven i givim wan wei long yumi blong gobak stap wetem Hem.
Rod Ia We I Go Long Papa blong Yumi
Trutok “blong ol samting olsem we i stap” (Jekob 4:13) i klia: yumi no save kasem ful paoa blong yumi olsem ol pikinini blong Papa long Heven yumiwan. Jisas Kraes, Fasbon Pikinini blong Papa long spirit, we i bin mekem promes ia blong stap olsem Sevya mo Ridima blong yumi.
Jisas Kraes, “Wan Stret Pikinini Ia Nao blong Papa, we i fulap long gladhat mo trutok, we i Spirit blong trutok, we i bin kam mo i bin stap wetem yumi long bodi blong mit, mo i bin stap long medel blong yumi” (Doktrin mo Ol Kavenan 93:11). Hem i bin kam blong soem long yumi rod ia blong faenem hapines, stret mining, mo glad long laef ia mo taem we i no save finis.
“God i lavem tumas ol man long wol, nao hem i givim mi, mi stret Pikinini blong hem, mi wan nomo we hem i gat, blong olgeta man we oli bilif long mi bambae oli no save lus, oli gat laef we i no save finis”
“God i no sanem mi, mi Pikinini blong hem, mi kam long wol ya blong mi jajem ol man long wol. Hem i sanem mi blong mi wok blong hem blong mekem rod blong sevem olgeta” (Jon 3:16–17).
Eksperiens blong Sevya long wol ia i impoten. Hem “i no bin kasem ful paoa mo glori long wantaem, be hem i bin kasem gladhat from wan gladhat” (Doktrin mo Ol Kavenan 93:12). Hem i groap kasem “i bin kasem glori, we i fulwan, blong Papa;” mo “evri paoa, tugeta long heven mo long wol, mo glori blong Papa i bin stap wetem hem, from hem i bin stap insaed long hem” (Doktrin mo Ol Kavenan 93:16–17). Sevya i bin tijim:
“Mi givim long yufala ol toktok ia blong yufala i andastanem mo save olsem wanem blong wosipim mi, mo save wanem nao yufala i stap wosipim, blong yufala i kam long Papa tru long nem blong mi, mo long stret taem, kasem ful paoa mo glori blong hem.
From we sapos yufala i stap obei long ol komanmen blong mi, bambae yufala i kasem ful paoa mo glori blong hem, mo gat glori tru long mi olsem we mi gat glori tru long Papa; taswe, mi talem long yufala, bambae yufala i kasem gladhat from wan gladhat” (Doktrin mo Ol Kavenan 93:19–20).
Long Garen blong Getsemane mo long kros, Jisas Kraes i tekem long Hemwan ol sin blong wol ia mo safa from ol harem nogud mo “ol soa blong bodi mo fulap hadtaem mo temtesen blong evri kaen” (Alma 7:11). Hemia “we i mekem [Hem], … we i hae long evriwan, blong seksek from soa long bodi, mo blad i ronaot long evri hol blong skin” (Doktrin mo Ol Kavenan 19:18). Tru long Jisas Kraes mo Atonmen mo Resureksen blong Hem i mekem wok blong fasin blong sevem man mo fasin blong kam olsem god i posibol.
Tru long gladhat blong Sevya mo tabu sakrifaes blong Hem, yumi save gro kasem yumi, kasem ful paoa mo glori mo wan dei bae yumi save kam stret gud evriwan. Sapos yumi folem eksampol blong Sevya mo obei ol komanmen blong Hem, Hem bae i lidim mo givhan long yumi long rod blong yumi i gobak stap wetem Papa long Heven we i gat olgeta glori.
Kraes long rod blong Jerusalem, i kam long Michael Coleman, bae yu no save kopi
?Bae Yu Akseptem Presenblong Hem?
Aot long ol trutok ia “ol samting olsem we oli rili stap” (Jekob 4:13), yumi lanem se eksperiens blong yumi long taem we i no save finis, i kam folem wanem we yumi jusum blong mekem, blong folem Jisas Kraes mo kasem ol presen we Hem i gat blong givim. Ol skripja oli tijim se bae yumi “glad long wanem [yumi] wantem blong kasem.” Sore tumas, bae i gat sam we bae i no “ glad long wanem we oli naf blong kasem” (Doktrin mo Ol Kavenan 88:32).
Misin presiden blong mi, Elda Marion D. Hanks (1921–2011), we i bin givim seves olsem wan Jeneral Atoriti Seventi, i bin tijim ol misinari blong hem se blong askem wanem we yumi glad blong kasem mo blong stap glad i wan wei we yumi save jajem wea ples ia nao yumi stap long hem, long laef blong yumi long saed blong spirit. “From, ?wanem nao i gud long wan man, sapos oli givim wan presen long hem, mo hem i no [akseptem] presen ia?” Yumi akseptem ol presen blong Sevya taem yumi lukaotem wetem tru tingting mo folem Hem, bae yumi glad long hop ia blong laef we i no save finis mo “long man ia we i givim presen ia” (Doktrin mo Kavenan 88:33). Presen ia oli givim wetem lav we “i moa bigwan long evri narafala presen blong God” (Doktrin mo Ol Kavenan 14:7).
God hem i Papa blong yumi long Heven. Hem i save mo i lavem yumi. Taem yumi tanem yumi i go long Hem blong lukaotem trutok, yumi save folem waes, kasem waes tingting, lavem trutok, gat lav mo sore, mo folem laet ia we i kam long Hem (luk long Doktrin mo Ol Kavenan 88:40). Afta bae yumi gohed wetem laef blong yumi kasem “dei bambae i kam, taem bae [yumi] andastanem God, from we [yumi] laef long hem mo tru long hem” (Doktrin mo Ol Kavenan 88:49).
Hemia bae i wan bigfala dei blong glori mo glad.
© 2025 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/19. Oli letem long translesen: 6/19. Translesen blong Liahona Mesej blong Evri Manis, Ogis 2025. Bislama. 19613 852