Wie God Nié Is Nie

Hy is ons Vader, wonderliker as selfs die beste aardse vader wat jy jou kan voorstel. Alhoewel ons nie ons vooraardse lewe saam met Hom kan onthou nie, ken Hy ons individueel en volmaak. Hy het ʼn volmaakte liggaam van vlees en been, en ons is na sy beeld geskape.

As jy sukkel om jou voor te stel hoe God is, is daar ʼn volmaakte voorbeeld: Sy Seun, Jesus Christus. Christus het gesê: “Ek is die weg en die waarheid en die lewe; niemand kom na die Vader behalwe deur My nie. As julle my geken het, sou julle my Vader ook geken het” (Johannes 14:6–7). Met ander woorde, as ons wil weet hoe Hemelse Vader is, kan ons leer oor hoe Jesus Christus is! Hulle is volkome verenig in doel.

Trouens, om jou te help om die ewige lewe te hê, is sy werk en sy heerlikheid. Jy is sy #1 fokus! Hy is nie gebonde aan tyd soos ons is nie. Reik enige tyd uit na Hom in gebed. Luister dan na die baie maniere waarop Hy antwoord.

Ouderling Dale G. Renlund van die Kworum van die Twaalf Apostels het eenkeer geleer: “Ons Hemelse Vader se doel met ouerskap is nie om sy kinders te laat doen wat reg is nie; dit is om sy kinders te laat kies om te doen wat reg is en uiteindelik soos Hy te word.” Hy sal jou nooi, met jou praat en jou die waarheid leer, maar Hy sal nie jou handelingsmag wegneem deur jou te dwing om Hom te volg nie.

In plaas daarvan, soos Ouderling Patrick Kearon van die Kworum van die Twaalf Apostels dit gestel het: “God volg jou meedoënloos,” wat beteken dat Hy nooit sal ophou om jou te probeer help om na Hom terug te keer nie. Hy weet dat ons almal natuurlik moeilike dinge in die gesig staar wanneer ons foute maak. Hy voorsien dus ʼn manier vir ons om rein gemaak te word van sonde en krag te vind deur sy Seun se Versoening.

Sy liefde vir jou is oneindig. Hy is nóú lief vir jou, so onvolmaak soos jy is! President Jeffrey R. Holland, Waarnemende President van die Kworum van die Twaalf Apostels, gee ʼn kragtige verduideliking oor hierdie waarheid: “‘Kom soos julle is,’ sê ʼn liefdevolle Vader vir elkeen van ons, maar Hy voeg by: ‘Moenie beplan om te bly soos julle is nie.’ Ons glimlag en onthou dat God vasbeslote is om meer van ons te maak as wat ons gedink het ons kan wees.” Met volmaakte liefde en aanmoediging probeer Hemelse Vader jou help om soos Hy te word en alles wat Hy het, een tree op ʼn slag te ontvang.

Die beste manier om jou Hemelse Vader te leer ken, is om aan te hou om ervarings met Hom te hê. Hoe? Leer van Hom en sy Seun uit die skrifture en woorde van lewende profete. Bid tot Hom. Onderhou sy gebooie. Spandeer stil, persoonlike tyd deur Hom by die kerk, in die tempel en in ander heilige plekke te aanbid. Sluit en onderhou verbonde met Hom. Hy sal jou help om te weet wie Hy is en hoe Hy oor jou voel.