Ewe Ennet ussun Manauach

Ach Kutta Ennet

Non ei fansoun sia manau non, chommong ennetin porous a kawor ngeni kich nap seni me mwan. Non ewe fansoun nom, ika ka mochen sinei mettoch, kopwe no ngeni ewe library me kutta. Ikenai ewe internet me kewe pisek sia komoch ra awora tufichin ach sipwe tonong non arapakan porous ese much sia tongeni mwitir kuna.

Ewe Samon a pwapwa nupwen sia forochu nounoun ekkewe pisek mi kawor ngeni kich, nge I a fen awora ei kapasen ourour ese wor nepopun o soponon: “Achocho kutter me osukuna fengenikemi ekkewe kapasen mirit; kutta om kopwe sinei, pwan mo ren kaeo me pwan ren nuku” (Doctrine and Covenants 88:118) I a pesekich ach sipwe kaeo ussun ewe fonufan mi rokopwanikich (nengeni Doctrine and Covenants 88:79; 93:53), nge non ach kutta ewe ennet, sipwe nengeni Kot, ewe a “weweiti mettoch meinisin, me mettoch meinisin ra nom mwen i, … me i a nom asen mettoch meinisin, … me mettoch meinisin seni i, me ren i” (Doctrine and Covenants 88:41).

Me nein ekkewe ennet Kot a fen ngeni kich, ew me nein ewe ouchean nongonongun manauach won fonufan pwe I Samach won Nang. Kich Noun at me nengin non ngun. I a sinei kich me unusoch an tongeikich. Me ren kich Noun semirit non ngun, a wor rech ew napanapen nonomuch me fetanin manauach meren Kot. Weweiti me etiwa ekkei ennet ese much a ngeni kich ika kich ion, aucheach, me popun a efeiochu me emwenikich non ach manau mwen ei manau won fonufan me epwe sopweno ne fori iei me feinfeino.

Kich Sia Nom ren Samach we me Nepoputan

Nupwen sia kutta ennetin kewe mettoch “ussur me akkom,” sia kuna ekkei kapas seni Ach Chon Amanau, Jises Kraist: “Iwe iei, ennet ua apasa ngenikemi, Ua nom nepoputan ren ewe Sam, me ngang ewe Mwanichi,” me “ami ouwa pwan nom nepoputan ren ewe Sam” (Doctrine and Covenants 93:21, 23).

Mwen ach manauach won fonufan, sia fiti ew mwich non nang ikewe Samach won Nang a awora An ewe watten kokkotun pwapwa. Ewe Soufos Joseph Smith a afanafana pwe an Kot otot ren An kokot an epwe ngeni kich “ew tufich ach sipwe fefeita [me] … sipwe fiti i non ning me tekia.” An angang me ning an “epwe wato manau me manau ese much ngeni aramas” (Moses 1:39).

Sia anganga ach pungun finata me fini ach sipwe tapweno mwirin an Samach won Nang kokkot. Sia fen feioch ne upunong non ei manau, ikewe sia sopweno ne ani pungun finata me tongeni sinei manauach iei, kaeo, me fefeita ngeni manau ese much.

Fansoun fetanin ach manau, sipwe sinei ekkewe sosot me osukosuk. Nge ese auchea ach sipwe anamon ne mesengeni weiresin osukosuk. Joseph Smith a aiti kich pwe Samach won Nang, “ewe Murinon Sam seni unusen ewe fonufan[,] a nenengeni unusen ewe faminien aramas fiti ew an sam tumun me aninis me an emon sam memef murinno ngeni emon noun.”

Samach won Nang, “ewe Sam mi umoumoch, me ewe Kot ach aninis meinisin ra feitto seni,” epwe efeiochu kich, seikakicheta, me oururu kich “non ach riaffou meinisin, pwe sipwe tongeni anisir ekkewe ra nom non sokkun riaffou meinisin, ren ewe chok sokkun aninnis sia fen angei seni Kot” (2 Corinthians 1:3–4). Ussun ew auchean kinikinin An kokkot, Samach won Nang a fen awora ewe anen ar sipwe niwin sefan ngeni I.

Ewe An ngeni Samach

Ewe ennet “ussun ekkewe mettoch ussun wesewesen nononnomur” (Jacob 4:13) mi fat: sise tongeni tori unusen ach tufichin sipwe winiti noun Samach won Nang semirit. Jises Kraist, ewe Mwanichi noun ewe Sam non ewe ngun a pwon pwe epwe ach Chon Amanau me Chon Angasano.

Jises Kraist, “ewe Anamon Noun Kot, mi uren chen me ennet, pwan mwo ewe Ngunun ennet, … a feitto me tonong non ewe inis, me tonong neich” (Doctrine and Covenants 93:11). I a feitto an epwe pwar ngeni kich ewe an ach sipwe kuna pwapwa, wewen, me uren kinamwe non ei manau me feinfeino.

“Pun Kot a fakkun tongei chon fonufan, ina minne a fangeno Noun we anamon, pun iteiten aramas mi nuku i resap mano nge repwe kuna manau ese much.”

“Pun Kot ese tinatiw Noun we won fonufan pwe epwe apungu fonufan, nge epwe chon amanaua.” (John 3:16–17).

An ewe Chon Amanau mokutukut me fonufan mi auchea. I “ese angei unusan ren ewe aewin, nge a angei chen ren chen” (Doctrine and Covenants 93:12). I a marita tori “an epwe angei unusen ewe ningen ewe Sam” me “meinisin manaman, non ir me ruu non nang me won fonufan, me ewe ningen ewe Sam a nom ren, pun i a nom non i” (Doctrine and Covenants 93:16–17). Ewe Chon Amanau a aiti:

“Ua ngenikemi ekkei kapas pwe oupwe weweiti me sinei ifa ussun oupwe fel ngeni, me sinei met ouwa fel ngeni, pwe oupwe feitto ren ewe Sam non itei, me nupwen epwe tori ewe fansoun angei unusen an.

“Pun ika kopwe aponueta ai kewe annuk kopwe angei unusen an, me kopwe ningeno non ngang ussun ngang non ewe Sam; ina minne, ua apasa ngonuk, kopwe angei chen ren chen” (Doctrine and Covenants 93:19–20).

Non ewe Atake Gethsemane me won ewe irapenges, Jises Kraist a wata won Inisin ekkewe tipisin fonufan me riaffouni meinisin netipeta me “metek me sokopaten sosot meinisin” (Alma 7:11) Ei a “fisingeni [I], … ewe a napanap seni meinisin, an epwe chech pokiten metek me cha a pupu seni inisin meinisin,” (Doctrine and Covenants 19:18). Seni chok Jises Kraist me An Achasefan me Manausefan ir tufichin amanaua me manau mi tekia

Seni an ewe Chon Amanau chen me asoren achasefan, sia tufichin marita tori ach sipwe angei ew unusan me ew ran sia tongeni unusoch. Ika pwe sipwe apiru ewe minen apiru an ewe Chon Amanau me anneasosichi An kewe annuk, I epwe emweni me eweinakich won ach an sefan ngeni ewe ningen mwen mesen Samach won Nang.

Kraist won ewe an ngeni Jerusalem, seni Michael Coleman, meni esap kapi

Kopwe Angei An Niffang?

Nein ekkewe ennet “ren kewe mettoch ussun wesewesen nononnomur” (Jacob 4:13), sia kaeo pwe ach sinei non fansoun ese much epwe ponueta seni ach finata ne tapweno mwirin Jises Kraist me angei kewe niffang a awora. Ekkewe pukefel ra aiti kich pwe sipwe “ani apwapwan minne [sia] mochen sipwe angei.” Netipengawan, ekkoch resap “mochen repwe ani pwapwan minne repwe angei” (Doctrine and Covenants 88:32).

Nei ewe presetenin Misin, Elter Marion D. Hanks (1921–2011), ewe a angang ussun emon Fik Meinap Unus, a aiti noun kewe misineri pwe tingor ren met sia mochen ach sipwe angei me ani pwapwan ina ew anen ach tongeni apungu ian sia nom ian non ach sai non pekin ngun. “Epwe meta namotan ngeni emon aramas ika ew niffang a kawor ngeni, nge ese angei ewe niffang?” Nupwen sia angei kewe niffang an ewe Chon Amanau ren ach achocho kutta me tapweno mwirin I, sipwe pwapwa non ewe epinukunukun manau ese much “non i ewe chon awora [ena] niffang” (Doctrine and Covenants 88:33 Ewe niffang a fangeno fiti tong “mi ewe auchean me nein niffang an Kot” (Doctrine and Covenants 14:7).

Kot i Semach won Nang. I mi sinei me a tongekich. Nupwen sia kun ngeni I non ach kukuta ewe ennet, sia tongeni pachengeni tipachem, angei mirit, etiwa ennet, tongei umoumoch, me pachenongeni saram a feitto seni I (nengeni Doctrine and Covenants 88:40). Sia pwan soposopono non unusen manauach tori “ewe ran epwe feitto nupwen [kich] sipwe weweiti pwan mo Kot, a mwittir non i me seni i” (Doctrine and Covenants 88:49).

Ina epwe ew amwararen me apwapwan ran.