Tē pe’e nei tātou ia Iesu Mesia nā roto i te ’āmuira’a atu iāna i roto i tāna ’ohipa

E rave tātou i te hō’ē tuha’a o te ’ohipa a te Fa’aora ’a tauturu ai tātou i te mau tamari’i a te Atua ’ia riro ato’a ’ei pipi ha’apa’o maita’i nā Iesu Mesia. ’Oia ho’i te fa’a’itera’a i tāna ’evanelia, nā roto i te ha’aputuputura’a ia ’Īserā’ela i ha’apūrarahia, nā roto i te ravera’a i te mau hōpoi’a i roto i te ’Ēkālesia a te Fa’aora ’e nā roto i te tūtavara’a ’ia riro mai iāna te huru. ’Aita tō tātou « manuiara’a [i roto i tāna ’ohipa] i ni’a i te huru vetahi ’ē e mā’iti e pāhono mai ia [tātou], i tā [tātou] mau tītaura’a manihini, ’aore rā i tā [tātou] mau ’ohipa ateate ’e te hāmani maita’i. » ’Ua parau te peresideni Russell M. Nelson : « I te mau taime atoʼa e rave ʼoutou i te tahi mea ʼo tē tauturu i te mau taʼata atoʼa—i nā pae e piti o te pāruru—ʼia tu’u hō’ē ta’ahira’a i mua nō te ravera’a i te mau fafauraʼa e te Atua ʼe te fa’ariʼiraʼa i tō rātou mau ʼōroʼa faufaʼa rahi nō te bāpetizoraʼa ʼe nō te hiero, tē tauturu ra ïa ʼoutou i te haʼaputuputura’a ia ’Īserāʼela. »

Nō te fa’ariro i te ’ohipa a te Fa’aora ’ei ’ohipa nā tātou, e rōtahi tātou i ni’a i tāna mau ’ōpuara’a, e ha’apa’o i tāna mau fa’auera’a, ’e e here i te tahi ’e te tahi. ’A rave ai tātou i tāna ’ohipa ’ia au i tāna ravera’a (hi’o Te Ha’api’ira’a Tumu ’e te mau Fafaura’a 51:2), e mau mea tei vaiihohia nā tātou iho e feruri. ’Ua parau te Fa’aora i te Feiā Mo’a ’o tei ha’aputuputu i te mata’eina’a nō Jackson, i Missouri :

« Inaha ho’i, e ’ere i te mea ti’a iā’u ’ia fa’aue atu i te mau mea ato’a ; nō te mea ’o ’oia ’o tē fa’ahepohia i roto i te mau mea ato’a, e tāvini fa’atau ïa ’oia, e ’ere ho’i i te mea pa’ari ; nō reira, ’aita ’oia e fa’ari’i i te utu’a maita’i.

« ’Oia mau tē parau atu nei au, e mea ti’a i te ta’ata nei ’ia rave ’ana’anatae i te ’ohipa maita’i, ’e ’ia rave ho’i i te mau ’ohipa e rave rahi nā roto i tō rātou iho hinaaro, ’e ’ia fa’atupu fa’arahi ho’i i te parauti’a ;

« Tei roto ho’i ia rātou te mana, i riro ai rātou ’ei ti’a’au ia rātou iho. ’E mai te mea e rave te ta’ata nei i te maita’i e ’ore roa rātou e ’ere i te utu’a maita’i » (Te Ha’api’ira’a Tumu ’e te mau Fafaura’a 58:26–28).

’A pe’e ai tātou i te Fa’aora, ’a ’āmui ai iāna i roto i tāna ’ohipa, ’e ’a tauturu ai ia vetahi ’ē ’ia riro ’ei pipi ha’apa’o maita’i nāna, tē ha’api’i ra ïa tātou i te ta’ata i te mea tāna e ha’api’i atu. Nō te mea ’aita tātou e fa’ati’ahia e ha’api’i i te tahi atu mea (hi’o Te Ha’api’ira’a Tumu ’e te mau Fafaura’a 52:9, 36), e rōtahi tāmau ïa tātou i ni’a i tāna ha’api’ira’a tumu (hi’o Te Ha’api’ira’a Tumu ’e te mau Fafaura’a 68:25). Hau atu, e ha’apa’o ta’a ’ē tātou i te feiā veve, i te feiā tei hina’aro i te tauturu ’e i te feiā pāruru ’ore (hi’o Te Ha’api’ira’a Tumu ’e te mau Fafaura’a 52:40). ’Ua ha’apāpū-maita’i-hia teie mau parau i te taime ’a fa’ahiti ai te Fa’aora ia Isaia i roto i te hō’ē sunago i Nazareta :

« Tei ni’a iho iā’u te Vārua o te Fatu, ’oia i fa’atāhinu mai iā’u ’ei poro haere i te parau maita’i i te ta’ata ri’i, ’ua tono mai ’oia iā’u ’ei fa’aora i te feiā ’ā’au ’oto, ’ei poro haere i te ora nō te tītī, ’e ’ia hi’o fa’ahou te matapō, ’e ’ei tu’u ho’i i te feiā i paruparu,

« ’Ei poro haere i te matahiti e ’itehia mai ai e te Fatu ra » (Luka 4:18–19 ; hi’o ato’a Isaia 61:1–2).

Te matahiti e ’itehia mai ai e te Fatu ’o te taime ïa e ha’apu’ehia mai ai te mau ha’amaita’ira’a ato’a o te fafaura’a a te Atua i ni’a i tōna mau ta’ata. E pe’e tātou ia Iesu Mesia nā roto i te anira’a ia vetahi ’ē ’ia fa’ari’i i te mau ha’amaita’ira’a nō te ravera’a ’e te ha’apa’ora’a i te mau fafaura’a i mua i te Atua, ’e nā roto i te aupurura’a i te feiā veve ’aore rā tei hina’aro ato’a i te tauturu.

E mea fa’a’ana’anatae mau te ’āmuira’a ia Iesu Mesia i roto i tāna ’ohipa nō te mea « e ’ore roa e ti’a i te mau ’ohipa, ’e te mau ’ōpuara’a, ’e te mau hina’aro tumu o te Atua ’ia fa’a’orehia, e ’ore ato’a ho’i te reira e mou » (Te Ha’api’ira’a Tumu ’e te mau Fafaura’a 3:1). Nō te feiā tei paruparu te mana’o, ’ua a’o te Fatu : « Nō reira, ’eiaha e fiu i te ravera’a i te ’ohipa maita’i, nō te mea tē ha’amau nei ’outou i te niu nō te hō’ē ʼohipa faufa’a rahi roa. ’E nā roto i te mau mea iti nei e tupu mai ai tei rahi roa ra » (Te Ha’api’ira’a Tumu ’e te mau Fafaura’a 64:33). E vaiiho tātou i te Fatu ’ia ha’ape’ape’a nō te ’auhune, e rave noa tātou i tā tātou tuha’a.

E mea ’ōhie a’e te ravera’a i tā tātou tuha’a i tā tātou e mana’o ra, nō te mea ’aita e tītauhia ’ia hōpoi mai i te mau tārēni fa’ahiahia ’aore rā te mau ’aravihi fa’ahiahia nō te ’ohipa a te Fatu. Tāna tītaura’a ’o tō tātou noa parau fafau ’e te ineine ’ia rave. ’Ua parau te Fatu i te Feiā Mo’a i Kirtland, i Ohio : « Inaha, tē tītau nei te Fatu i te ’ā’au ’e te mana’o ’ana’anatae » (Te Ha’api’ira’a Tumu ’e te mau Fafaura’a 64:34). E nehenehe te Fatu e fa’atupu i te ’aravihi i roto i tei ineine ’ia rave, e’ita rā tāna e nehenehe, ’e e’ita ’oia, e fa’atupu i te ineine ’ia rave i roto i tei ’aravihi. ’Oia ho’i, mai te mea e parau fafau ’e te hina’aro mau tō tātou, e nehenehe tāna e fa’a’ohipa ia tātou. Noa atu rā te rahi o tā tātou mau tārēni, e’ita ’oia e fa’a’ohipa ia tātou maori rā e pūpū tātou ia tātou iho i tāna ’ohipa ma te ’ana’anatae i te tauturu iāna.

’Ua fa’a’ite ’o Samuel ’e ’o Anna-Maria Koivisto i te parau fafau ’e te ineine ’ia rave. I muri noa a’e i tō rāua fa’aipoipora’a, ’ua fa’aru’e ’o Koivisto mā ia Jyväskylä, i Firirane, nō te haere i Gōteborg, i Tuete, nō te ’imi i te mau rāve’a rahi a’e nō te tōro’a ’ohipa. I muri a’e i tō rāua taera’a atu, ’ua anihia i te taea’e Koivisto ’ia haere e fārerei i te peresideni Leif G. Mattsson, e tauturu i roto i te peresidenira’a titi nō Göteborg i Tuete. Nō te mea ’aita ’o Samuel e paraparau i te reo tuete, ’ua ravehia te uiuira’a nā roto i te reo peretāne.

I muri a’e i te hō’ē fārereira’a poto, ’ua ani te peresideni Mattsson ia Samuel ’ia tāvini ’ei fa’atere misiōni pāroita i roto i te pāroita nō Utby. ’Ua fa’aha’amana’o atu Samuel i te mea ē : « ’Aita rā vau e paraparau nei i te reo tuete. »

’Ua pi’o te peresideni Mattsson i ni’a i tāna ’iri ’ohipara’a ’e ’ua ui atu : « ’Ua anei ānei au e nehenehe ānei ’oe e paraparau nā roto i te reo tuete, ’aore rā ’ua ineine ānei ’oe e tāvini i te Fatu ? »

Pāhono atu ra Samuel : « ’Ua ani mai ’oe ē ’ua ineine ānei au e tāvini i te Fatu. ’E ’ua ineine au. »

’Ua fa’ari’i Samuel i taua pi’ira’a ra. ’Ua fa’ari’i ato’a Anna-Maria i te mau pi’ira’a. ’Ua tāvini rāua to’opiti ma te ha’apa’o maita’i ’e ’ua ha’api’i mai ’ia paraparau i te reo tuete ma te nehenehe i te roara’a o tā rāua tāvinira’a.

’O te parau fafau ’e te ineine ’ia tāvini i te Fatu te fa’ahōho’ara’a o te orara’a o Samuel ’e ’o Anna-Maria. E mau ’aito mātarohia rāua i roto i te ’Ēkālesia. ’Ua tāvini rāua ma te ha’apa’o maita’i i te mau taime ato’a e anihia ia rāua. ’Ua ha’api’i mai rāua iā’u ē ’ia tāvini ana’e tātou, e fa’a’ohipa tātou i tā tātou mau tārēni e vai ra (hi’o Te Ha’api’ira’a Tumu ’e te mau Fafaura’a 60:13), ’e i muri iho e tauturu te Fatu ia tātou ’ia fa’atupu i tāna mau ’ōpuara’a.

’Ia ineine ana’e tātou ’ia tāvini, e tūtava tātou ’eiaha e amuamu ’aore rā e mutamuta, nō te mea ’aita tātou e hina’aro ’ia marau noa atu tā tātou tāvinira’a. E nehenehe te amuamura’a e riro ’ei tāpa’o nō te parau fafau fē’a’a, ’aore rā e tāpa’o ē ’aita tō tātou here i te Fa’aora i tae i te fāito i tītauhia. ’Ia ’ore te reira ’ia ha’apa’ohia, e nehenehe te mutamutara’a e riro mai ’ei ’ōrurera’a hau i ni’a i te Fatu. ’Ua ’itehia teie nu’ura’a i roto i te orara’a o Ezra Booth, te hō’ē melo fa’afāriu mātāmua nō te ’Ēkālesia i Ohio, tei pi’ihia ’ei misiōnare i Missouri.

I tōna fa’aru’era’a ia Ohio i te ’āva’e Tiunu 1831, ’ua riri Ezra i te mea e nehenehe i te tahi mau misiōnare e tere nā ni’a i te pere’o’o hutihia e te pua’ahorohenua ’āre’a ’ōna, e mea nā raro noa ïa i roto i te ahu o te pu’e tau ve’ave’a, ’a poro haere atu ai. ’Ua mutamuta ’oia. I tōna taera’a atu i Missouri, e mana’o ’aravī tōna. E ’ere ’o Missouri mai tāna i mana’o. ’Ua hi’o rā ’ōna ’ati a’e iāna ’e ’ua ’ite ’oia ē « e mea huru fifi ri’i te hi’ora’a i mua. »

Rahi roa atu ra tō Ezra puri, te parau fa’a’ino ’e te mana’o fa’ahapahapa. I tōna fa’aru’era’a ia Missouri, ’aita ’oia i poro haere mai tei anihia iāna ’ia rave, ’ua ho’i ’oi’oi atu ’oia i Ohio, ’aita e ha’amarirau. ’Ua riro tāna mutamutara’a mātāmua ’ei fē’a’ara’a ’e i te pae hope’a ’ua ’ere i tōna ti’aturira’a i tōna mau ’itera’a pae vārua mātāmua. ’Aita i maoro roa ’ua fa’aru’e Ezra i te ’Ēkālesia ’e « i te hope’a ‘’ua fa’aru’e ’oia i te fa’aro’o keresetiano ’e ’ua riro mai ’ei ta’ata ti’aturira’a ’ore.’ »

E nehenehe ato’a te reira e tupu i ni’a ia tātou mai te mea e’ita tātou e ha’apa’o maita’i. Mai te mea ē, e’ita tātou e tāpe’a i te hi’ora’a ātea mure ’ore, ma te fa’aha’amana’o ia tātou iho ē nā vai mau teie ’ohipa, e riro ē, e amuamu tātou, e fē’a’a ’e i te pae hope’a e mo’e roa tō tātou fa’aro’o.

Tē pure nei au ’ia nehenehe ia tātou ’ia mā’iti ’ia pe’e ia Iesu Mesia nā roto i te ’āmuira’a iāna i roto i tāna ’ohipa. ’A nā reira ai tātou, e « hōro’ahia mai ai te maita’i rahi roa i parauhia mai ra » (2 Petero 1:4). Tei roto i teie mau ha’amaita’ira’a te fa’a’orera’a hara (hi’o Te Ha’api’ira’a Tumu ’e te mau Fafaura’a 60:7 ; 61:2, 34 ; 62:3 ; 64:3), te fa’aorara’a (hi’o Te Ha’api’ira’a Tumu ’e te mau Fafaura’a 6:13 ; 56:2), ’e te fa’ateiteira’a (hi’o Te Ha’api’ira’a Tumu ’e te mau Fafaura’a 58:3–11 ; 59:23). ’Oia mau, ’ua parau-fafau-hia mai ia tātou te hōro’a rahi roa a’e tā te Atua e nehenehe e hōro’a—te ora mure ’ore.