Kitail Idawehn Sises Krais sang ni atail Ieiang Ih nan Sapwellime Doadoahk

Kitail en patehng sapwellimen Sounkomouro doadoahk ni atail pahn sewese sapwellimen Koht serihkan en wiahla tohnpadahk en Sises Krais pwoson kei. Met me iangahki ehukihwei Sapwellime rongamwahuo, iang kapwurepene mehn Isrehl me mwerpeseng kan,sang ni kapwaiada pwukoah kan nan sapwellimen Sounkomouro Mwomwohdiso oh sang ni nanantihong pwe en duwehla Ih. Atail “pweida [nan Sapwellime doadoahk] kaidehn sang ni dahme mehteikan pahn pilada en sapeng kin [kitail], ong [atail] luhk kan, [atail] wiewia mehlel en kadek kan.” President Russell M. Nelson masanih, “Ansou koaros me ke wia mehkot me pahn sewese emen emen—paliet oh palio peilo—ni omw pahn kahkewei mwowe wiahda inou kan ong Koht pepdaiskiniraila oh wihda tihak sarawihkan nan tehpas sarawi, met ke sewsewese kapwurepene mehn Isrehl kan.”

Pwe kitail en wiakihla sapwellimen Sounkomouro doadoahk atail doadoahk, kitail anahne kilengwohngete dahme E ketin kupwurki kitail en wia, kolokol Sapwellime kosonned akan, oh poakohng emen emen. Ansou me kitail pahn wia Sapwellime doadoahk ni dahme E ketin kupwurki (kilang Doctrine and Covenants 51:2), ekei mehkot pahn luwehdi ong kitail pwe kitail en pein koasoanehdi. Sounkomouro masanihong souleng kan me kohpene nan Jackson County, Missouri:

“Oh kilang, kaidehnte Ngehi me pahn kin koasoanehdi soahng koaros; me kin awiawiete ruwes ong soahng, pil duwehte sounpapah dangapaur oh pweipwei men; ni mehlel e sohte pahn ale ketingpe.

“E pil mahsanih, aramas anahne kin pwerisek iong mehkot mwahu, oh wia soahng tohto ni pein arail nsenen pilipil, oh wahdo me tohto en pwungila.

“Pwe manamano mihmier loalarail, eri miehier pein arail saledek en pilipil. Oh ni uwen dahme aramas pahn wiahda me mwahu irail sohte pahn katiasang ketingparail” (Doctrine and Covenants 58:26–28).

Ni atail pahn idawehn Sounkomouro, iang Ih nan Sapwellime doadoahk, oh sewese mehteikan irail en wiahla Sapwellime tohnpadahk pwoson kei, kitail pahn padahki dahme E kin ketin padahki. Pwehki e wia koasoandi ehu me kitail sohte kak padahki ehu soahng torohr (Doctrine and Covenants52:9, 36), kitail kilkilengwohngete Sapwellime padahk mehlel akan, (kilang Doctrine and Covenants 68:25). Me pil patehng, kitail pil kin tehk mwahu irail me semwehmweh kan, me mie arail anahn, oh me mihmi nan kahpwal (kilang Doctrine and Covenants 52:40). Ire kesempwal pwukat sansal mwahu ni ansou me Sounkomouro kapwurehiong mahsen en Aiseia nan sinakoke en Nahsared:

“Ngehn en Kauno ketier rehi, E ketin keieiehdier pwe I en kapahrengkiong me semwehmwe kan rongamwahu; E ketin poareneiedohr pwe I en lohkiong me sensel kan ar saledek, oh ong me maskun kan ar kakehr kilangada wasa, oh pwe I en kasaledekiala irail kan me mihmi nan apwal,

“Lokihda me ansou en Kauno leledohr” (Luk 4:18–19; pil kilang Aiseia 61:1–2).

Ansou en Kauno leledohr iei ansou me kapai kan en sapwellimen Koht inou kan pahn mwerediong pohn Sapwellime aramas akan. Kitail idawehn Sises Krais sang ni atail pahn luke mehteikan en alehda kapai kan en wiahda oh kolokol inou kan ong Koht oh apwali me semwehmwe kan de irail me anahn akan.

Ieiang Sises Krais nan Sapwellime doadoahk me kaperen pwehki Sapwellime doadoahk, wiepe, oh kahrepe kan “sohte kak kansensuwedihkitail la, de pil kihong kitail mehkot sohte katepe” (Doctrine and Covenants 3:1). Ong kumwail kan me kin sohla amwail kopworopwor, Kauno masanihier: “Eri, kumwail dehr pwunodiki amwail wiewi-mwahu kan, pwe kumwail poahpoasoanehda doadoahk mwahu ehu. Oh sang ni mehkot tikitik kan kin wekiong mehkot laud” (Doctrine and Covenants 64:33). Kitail mweidohng Kauno en pwukoahki palien dondol, oh kitail wia atail pwukoah.

Wihwia atail pwukoah mengei sang dahme kitail kin medewe pwe kitail sohte anahne wahdo atail koahiek de semen en wia sapwellimen Kauno doadoahk. Dahme kupwure iei uwen atail kak oh inengieng. Kauno masanihong irail Souleng kan en Kirtland, Ohio, “Kilang, Kauno kin ketin kupwure mohngiong oh madamadau me kin inangih“ (Doctrine and Covenants 64:34). Kauno kak wiahda pwe me inengieng kan en pweida, ahpw E sohte kak de pahn wiahda me sohte inengieng en pweida. Ni koasoai, ma kitail wia uwen atail kak oh inengieng, E kak ketin doadoahngkin kitail. Ahpw sohte lipilipil iawen koahiek me kitail ahneki, E sohte pahn ketin doadoahngkin kitail lao kitail pahn wia wen atail kak en wia Sapwellime doadoahk oh inengieng sewese Ihr,

Samuel oh Anna-Maria Koivisto kasalehda uwen ara kak oh inengieng. Mwurinte ara kopwopwoudlao, Koivistos ko kosoula sang Jyväskylä, Finland, ong Göteborg, Sweden, ira en alehdi ara pwukoah doadoahk. Mwurin ara peidier mwo, Brother Koivisto alehdi luhk ehu en tuhong Presiden Leif G. Mattsson, counselor nan Göteborg Sweden Stake presidensi. Pwehki Samuel sohte ese lokaiahn Swedish, interpiuo wiawi ni lokaiahn Wai.

Ni tuhpenehu, Preseden Mattson peki rehn Samuel en wia pwukoahn ward mission leader nan ward en Utby. Samuel kasalehda ni sansal: “Ahpw I sehse lokaiahn Swedish.“

Preseden Mattson pengla pohn tehpelo oh idek, “I idek ma ke kak lokaiahn Swedish, de ke inengieng en papah Kauno?“

Samuel sapeng, “Ke idek ma I inengieng en papah Kauno. Oh I men.”

Samuel alehda pwukoahu. Anna-Maria pil alehda pwukoah kan. Ira koaros papah ni pwoson oh maiengala lokaiahn Swedish.

Uwen kak oh inengieng en papah Kauno wekidala mour en Samuel oh Anna-Maria Ira wia aramas kaidehn mehn mmwamwahl nan Mwomwohdisoh. Ira kin papah ni pwoson ansou koaros me pwukoah kin kohirng ira. Ira padahkiongie me ansou me kitail papah, kitail doadoahngki koahiek me kitail ahneki (kilang Doctrine and Covenants 60:13). eri Kauno ahpw pahn seweseikitail en pweida ni dahme e ketin kupwkupwre ong kitail.

Ansou me kitail kin inengieng en papah, kitail kin nantihong oh sohte komplein de uhweng, pwehki kitail sohte kin men luhs sang atail men papah ni soangsoangen wiepeh. Komplein wia kilel en katikitikiala uwen atail kak, de atail limpoak ong Kauno kin sohla mi ni pwungih. Ma kitail sohte udihsang, mwenginingin suwed kan me wihwiawi kak kalaudehla soahng suwed kan me kin uhwong Kauno. Mwekid wet kitail kilangehr nan mour en Ezra Booth, me mwadangete iangala Mwomwohdisoh nan Ohio me aledier pwukoah doadoahk en misiner nan Missouri.

Ni ansou me e mwesel sang Ohio nan 1831[kid welipwiki silihsek ehu], Ezra nsensuwedki ekei misineri arail iang kuruma ah ih e alialu nan soamer karakar, padpadahk kohwei pohn ahl. E mwengininginki. Ansou me e lel nan Missouri, e nsensuwedla. Missouri kaidehn ihme e kasik. Ihme uhd wiawi, e kilengseli oh wiahla aramas emen me “ah koapworopwoar tikitikla.“

E wiahla aramas kosoulikilik men, sarwaru, oh uhwong. E mwesel sang Missouri, sohte padahk pwe ihme e kokihla, ihme koasoandi en wia, e mwadangete pwurala Ohio uwen ah kak. E tapidahr mwengmwenginingin e ahpw wialahr mehkot oh karehda e luhsangehr dahme e kak ese sang ni kaweid kan en ngehno. Ezra mwadangete kokolahsang Mwomwohdisoh oh ”ni imwilao ‘kamahmkihla ah pwoson oh wiahla aramas emen me sehse Kauno.

Soahngo kak wiawihiong kitail ma kitail sohte pahn tehk mwahu. Ma kitail sohte pahn kalaudehla atail wehweki duwen nanleng, katkatamankin kitail ahn ihs doadoahk met, kitail pahn koamplein, mwekidida, oh pil kakete luhsang pwoson me kitail ahneki.

I kapakapki me kitail pahn kak pilada idawehn Sises Krais sang ni ieiangih nan Sapwellime doadoahk. Ni atail pahn wia met, kitail pahn alehdi “inou kaselel me keieu laudo” (2 Peter 1:4). Kapai pwukat me iangahki mahkepen dipatail kan (kilang Doctrine and Covenants 60:7; 61:2, 34; 62:3; 64:3), salvation (see Doctrine and Covenants 6:13; 56:2), and exaltation (see Doctrine and Covenants 58:3–11; 59:23). Ni mehlel, Kauno inoukiong kitail me E pahn ketkiong kitail kisakis keieu laudo—mour soutuk.