“We Follow Jesus Christ by Joining Him in His Work,” Liahona, June 2025.
ຂ່າວສານປະຈຳເດືອນ Liahona, ເດືອນມິຖຸນາ 2025
ເຮົາຕິດຕາມພຣະເຢຊູຄຣິດໂດຍ ການເຂົ້າຮ່ວມກັບພຣະອົງໃນວຽກງານຂອງພຣະອົງ
ເຮົາມີສ່ວນຮ່ວມໃນວຽກງານຂອງພຣະຜູ້ຊ່ວຍໃຫ້ລອດ ເມື່ອເຮົາສຸມໃຈໃສ່ຈຸດປະສົງຂອງພຣະອົງ, ຮັກສາພຣະບັນຍັດຂອງພຣະອົງ, ແລະ ຮັກຊຶ່ງກັນແລະກັນ.
ລາຍລະອຽດຈາກ Christ and the Rich Young Ruler [ພຣະຄຣິດ ແລະ ເຈົ້ານາຍມະຫາເສດຖີໜຸ່ມ], ໂດຍ ເຮັນຣິກ ຮ໊ອບແມນ
ເມື່ອເຮົາຮັບບັບຕິສະມາ, ເຮົາເລີ່ມຕົ້ນຂະບວນການຮັບເອົາພຣະນາມຂອງພຣະເຢຊູຄຣິດ. ສ່ວນໜຶ່ງຂອງຂະບວນການນີ້ບົ່ງບອກວ່າ ເຮົາເຂົ້າຮ່ວມກັບພຣະຜູ້ຊ່ວຍໃຫ້ລອດໃນວຽກງານຂອງພຣະອົງ. ປະທານດາລິນ ເອັຈ ໂອກສ໌, ທີ່ປຶກສາທີໜຶ່ງໃນຝ່າຍປະທານສູງສຸດ, ໄດ້ຂຽນວ່າ, “ຄວາມໝາຍທີ່ສຳຄັນທີ່ສຸດຢ່າງໜຶ່ງຂອງການຮັບພຣະນາມຂອງພຣະຄຣິດ [ແມ່ນ] ຄວາມເຕັມໃຈ ແລະ ຄຳໝັ້ນສັນຍາທີ່ຈະຮັບເອົາວຽກງານຂອງພຣະຜູ້ຊ່ວຍໃຫ້ລອດ ແລະ ອານາຈັກຂອງພຣະອົງ.”
ວຽກງານຂອງພຣະຜູ້ຊ່ວຍໃຫ້ລອດແມ່ນ “ການທີ່ຈະເຮັດໃຫ້ເກີດຄວາມເປັນອະມະຕະ ແລະ ຊີວິດນິລັນດອນຂອງມະນຸດ” (ໂມເຊ 1:39). ຄວາມເປັນອະມະຕະເປັນຂອງຂວັນທີ່ບໍ່ມີເງື່ອນໄຂ ຊຶ່ງພຣະເຢຊູຄຣິດໄດ້ຮັບຮອງໄວ້ແລ້ວ ຜ່ານທາງການຟື້ນຄືນພຣະຊົນຂອງພຣະອົງ. ເຖິງຢ່າງໃດກໍຕາມ, ຊີວິດນິລັນດອນບໍ່ຄືກັນກັບຄວາມເປັນອະມະຕະ. ຊີວິດນິລັນດອນແມ່ນຂອງຂວັນທີ່ຍິ່ງໃຫຍ່ທີ່ສຸດ ທີ່ພຣະເຈົ້າສາມາດປະທານໃຫ້ແກ່ມວນມະນຸດ (ເບິ່ງ ຄຳສອນ ແລະ ພັນທະສັນຍາ 14:7). ມັນແມ່ນການມີຊີວິດຕະຫລອດໄປ ເປັນຄອບຄົວໃນທີ່ປະທັບຂອງພຣະອົງ. ເພື່ອທີ່ເຮົາຈະໄດ້ຮັບຊີວິດນິລັນດອນ, ເຮົາຕ້ອງກາຍເປັນສານຸສິດທີ່ຊື່ສັດຂອງພຣະເຢຊູຄຣິດ. ນີ້ໝາຍຄວາມວ່າ ເຮົາໄດ້ຮັບພຣະກິດຕິຄຸນທີ່ຖືກຟື້ນຟູ ໂດຍການມີສັດທາໃນພຣະຜູ້ຊ່ວຍໃຫ້ລອດ ແລະ ການຊົດໃຊ້ຂອງພຣະອົງ, ການກັບໃຈ, ການຮັບບັບຕິສະມາ, ການຮັບເອົາຂອງປະທານແຫ່ງພຣະວິນຍານບໍລິສຸດ, ການເຮັດ ແລະ ຮັກສາພັນທະສັນຍາພຣະວິຫານ, ແລະ ການອົດທົນຈົນເຖິງທີ່ສຸດ. ການອົດທົນຈົນເຖິງທີ່ສຸດແມ່ນລວມທັງການເຂົ້າຮ່ວມກັບພຣະຜູ້ຊ່ວຍໃຫ້ລອດໃນວຽກງານຂອງພຣະອົງ.
ການມີສ່ວນຮ່ວມຢ່າງກະຕືລືລົ້ນ
ເຮົາມີສ່ວນຮ່ວມໃນວຽກງານຂອງພຣະຜູ້ຊ່ວຍໃຫ້ລອດ ເມື່ອເຮົາຊ່ວຍລູກໆຂອງພຣະເຈົ້າໃຫ້ກາຍເປັນສານຸສິດທີ່ຊື່ສັດຂອງພຣະເຢຊູຄຣິດ. ນີ້ແມ່ນລວມທັງການແບ່ງປັນພຣະກິດຕິຄຸນຂອງພຣະອົງ, ໂດຍວິທີນີ້ ຈະເຕົ້າໂຮມອິດສະຣາເອນທີ່ກະຈັດກະຈາຍ, ໂດຍການເຮັດໜ້າທີ່ຮັບຜິດຊອບໃນສາດສະໜາຈັກຂອງພຣະຜູ້ຊ່ວຍໃຫ້ລອດ ແລະ ໂດຍການພະຍາຍາມທີ່ຈະເປັນເໝືອນດັ່ງພຣະອົງ. “ຄວາມສຳເລັດ [ຂອງເຮົາໃນວຽກງານຂອງພຣະອົງ] ບໍ່ໄດ້ຂຶ້ນກັບວິທີທີ່ຄົນອື່ນເລືອກທີ່ຈະຕອບຮັບ [ເຮົາ], ຕອບຮັບຄຳເຊື້ອເຊີນ [ຂອງເຮົາ], ຫລື ຕອບຮັບການສະແດງຄວາມເມດຕາຢ່າງຈິງໃຈ [ຂອງເຮົາ].” ປະທານຣະໂຊ ເອັມ ແນວສັນ ໄດ້ຢືນຢັນວ່າ: “ທຸກເທື່ອ ທີ່ທ່ານເຮັດ ສິ່ງ ທີ່ຊ່ວຍ ບາງຄົນ—ຢູ່ທັງສອງຟາກມ່ານ—ເພື່ອເຮັດ ແລະ ຮັກສາພັນທະສັນຍາກັບພຣະເຈົ້າ ແລະ ຮັບເອົາການບັບຕິສະມາ ແລະ ພິທີການຂອງພຣະວິຫານທີ່ຈຳເປັນ, ແລ້ວທ່ານກໍໄດ້ຊ່ວຍເຕົ້າໂຮມອິດສະຣາເອນ.
ເພື່ອໃຫ້ວຽກງານຂອງພຣະຜູ້ຊ່ວຍໃຫ້ລອດເປັນວຽກງານຂອງເຮົາ, ເຮົາຕ້ອງສຸມໃຈໃສ່ຈຸດປະສົງຂອງພຣະອົງ, ຮັກສາພຣະບັນຍັດຂອງພຣະອົງ, ແລະ ຮັກຊຶ່ງກັນແລະກັນ. ຂະນະທີ່ເຮົາເຮັດວຽກງານຂອງພຣະອົງໃນວິທີຂອງພຣະອົງ (ເບິ່ງ ຄຳສອນ ແລະ ພັນທະສັນຍາ 51:2), ຍັງມີບາງສິ່ງທີ່ເຮົາຕ້ອງຄິດເອງ. ພຣະຜູ້ຊ່ວຍໃຫ້ລອດໄດ້ບອກໄພ່ພົນຜູ້ທີ່ໄດ້ເຕົ້າໂຮມກັນຢູ່ໃນເຂດແຈ໊ກສັນ, ລັດມີເຊີຣີວ່າ:
“ເພາະຈົ່ງເບິ່ງ, ມັນບໍ່ສົມຄວນທີ່ເຮົາຈະບັນຊາໃນທຸກສິ່ງ; ເພາະຄົນໃດທີ່ຖືກບັງຄັບໃນທຸກສິ່ງ, ຄົນໆນັ້ນເປັນຜູ້ຮັບໃຊ້ທີ່ກຽດຄ້ານ ແລະ ບໍ່ສະຫລາດ; ດັ່ງນັ້ນ ເຂົາຈຶ່ງບໍ່ໄດ້ຮັບລາງວັນເລີຍ.
“ຕາມຈິງແລ້ວ ເຮົາກ່າວວ່າ ມະນຸດຄວນທຸ້ມເທຢ່າງກະຕືລືລົ້ນໃນອຸດົມການດີ, ແລະ ເຮັດຫລາຍສິ່ງຫລາຍຢ່າງດ້ວຍຄວາມສະໝັກໃຈຂອງຕົນເອງ, ແລະ ເຮັດໃຫ້ເກີດຄວາມຊອບທຳຢ່າງຫລວງຫລາຍ;
“ເພາະ ພະລັງຢູ່ໃນຕົວເຂົາ, ຊຶ່ງໃນການນີ້ເຂົາເປັນຕົວແທນອິດສະລະພາບຂອງຕົນເອງ. ແລະ ຕາບໃດທີ່ມະນຸດເຮັດຄວາມດີ ເຂົາຈະບໍ່ມີທາງສູນເສຍລາງວັນຂອງຕົນໄປຈັກເທື່ອ” (ຄຳສອນ ແລະ ພັນທະສັນຍາ 58:26–28).
ເມື່ອເຮົາຕິດຕາມພຣະຜູ້ຊ່ວຍໃຫ້ລອດ, ເຂົ້າຮ່ວມກັບພຣະອົງໃນວຽກງານຂອງພຣະອົງ, ແລະ ຊ່ວຍຄົນອື່ນໃຫ້ກາຍເປັນສານຸສິດທີ່ຊື່ສັດຂອງພຣະອົງ, ເຮົາສິດສອນສິ່ງທີ່ພຣະອົງຈະສິດສອນ. ເພາະວ່າເຮົາບໍ່ໄດ້ຮັບອະນຸຍາດໃຫ້ສິດສອນສິ່ງອື່ນໃດ (ເບິ່ງ ຄຳສອນ ແລະ ພັນທະສັນຍາ 52:9, 36), ເຮົາຈຶ່ງສຸມໃຈໃສ່ຄຳສອນຂອງພຣະອົງຢ່າງບໍ່ປ່ຽນແປງ (ເບິ່ງ ຄຳສອນ ແລະ ພັນທະສັນຍາ 68:25). ນອກຈາກນັ້ນ, ເຮົາເອົາໃຈໃສ່ເປັນພິເສດຄົນທີ່ຍາກຈົນ, ຄົນຂັດສົນ, ແລະ ຜູ້ເປາະບາງ (ເບິ່ງ ຄຳສອນ ແລະ ພັນທະສັນຍາ 52:40). ການເນັ້ນຍ້ຳເຫລົ່ານີ້ແມ່ນຊັດເຈນ ເມື່ອພຣະຜູ້ຊ່ວຍໃຫ້ລອດໄດ້ອ້າງຖ້ອຍຄຳຂອງເອຊາຢາ ໃນທຳມະສາລາແຫ່ງໜຶ່ງໃນເມືອງນາຊາເຣັດ:
“ພຣະວິນຍານຂອງພຣະຜູ້ເປັນເຈົ້າສະຖິດຢູ່ເທິງຂ້ານ້ອຍ, ເພາະພຣະອົງໄດ້ຫົດສົງແຕ່ງຕັ້ງຂ້ານ້ອຍໄວ້ໃຫ້ປະກາດຂ່າວປະເສີດແກ່ຄົນຍາກຈົນ; ພຣະອົງໃຊ້ຂ້ານ້ອຍໄປ [ປິ່ນປົວຫົວໃຈທີ່ຊອກຊ້ຳ], ປະກາດອິດສະລະພາບແກ່ຄົນທັງຫລາຍທີ່ຖືກຈຳຈອງ, ແລະ ຄົນຕາບອດຈະເຫັນຮຸ່ງອີກ, ປົດປ່ອຍຜູ້ຖືກກົດຂີ່ໃຫ້ເປັນອິດສະລະ,
“ໃຫ້ປະກາດປີທີ່ພຣະຜູ້ເປັນເຈົ້າຈະເມດຕານັ້ນ” (ລູກາ 4:18–19; ເບິ່ງ ເອຊາຢາ 61:1–2 ນຳອີກ).
ປີທີ່ພຣະຜູ້ເປັນເຈົ້າຈະເມດຕານັ້ນໝາຍເຖິງເວລາທີ່ພອນທັງໝົດຂອງພັນທະສັນຍາຂອງພຣະເຈົ້າຈະຖືກປົກຄຸມຢູ່ເທິງຜູ້ຄົນຂອງພຣະອົງ. ເຮົາຕິດຕາມພຣະເຢຊູຄຣິດ ໂດຍການເຊື້ອເຊີນຄົນອື່ນໃຫ້ຮັບເອົາພອນຂອງການເຮັດ ແລະ ຮັກສາພັນທະສັນຍາກັບພຣະເຈົ້າ ແລະ ໂດຍການດູແລຄົນຍາກຈົນ ຫລື ຄົນຂັດສົນອື່ນໆ.
ການເຂົ້າຮ່ວມກັບພຣະເຢຊູຄຣິດໃນວຽກງານຂອງພຣະອົງເປັນສິ່ງທີ່ໜ້າຍິນດີ ເພາະວຽກງານ, ການອອກແບບ, ແລະ ຈຸດປະສົງຂອງພຣະອົງ “ຈະລົ້ມເຫລວບໍ່ໄດ້, ທັງບໍ່ໄຮ້ປະໂຫຍດ” (ຄຳສອນ ແລະ ພັນທະສັນຍາ 3:1). ສຳລັບຜູ້ທີ່ຮູ້ສຶກທໍ້ຖອຍໃຈ, ພຣະຜູ້ເປັນເຈົ້າໄດ້ແນະນຳວ່າ: “‘ດັ່ງນັ້ນ, ຢ່າເມື່ອຍລ້າໃນການເຮັດວຽກງານດີ, ເພາະພວກເຈົ້າພວມວາງຮາກຖານຂອງວຽກງານອັນຍິ່ງໃຫຍ່. ແລະ ຈາກສິ່ງເລັກນ້ອຍ ສິ່ງຍິ່ງໃຫຍ່ຈະເກີດຂຶ້ນ” (ຄຳສອນ ແລະ ພັນທະສັນຍາ 64:33). ເຮົາປ່ອຍໃຫ້ພຣະຜູ້ເປັນເຈົ້າກັງວົນກ່ຽວກັບການເກັບກ່ຽວ, ແລະ ເຮົາພຽງແຕ່ເຮັດສ່ວນຂອງເຮົາ.
ຫົວໃຈ ແລະ ຈິດໃຈທີ່ເຕັມໃຈ
ການເຮັດພາກສ່ວນຂອງເຮົາແມ່ນງ່າຍກວ່າທີ່ເຮົາອາດຈະຈິນຕະນາການໄດ້ ເພາະເຮົາບໍ່ຈຳເປັນຕ້ອງນຳພອນສະຫວັນ ຫລື ຄວາມສາມາດພິເສດມາສູ່ວຽກງານຂອງພຣະຜູ້ເປັນເຈົ້າ. ຂໍ້ກຳນົດຂອງພຣະອົງແມ່ນພຽງຄຳໝັ້ນສັນຍາ ແລະ ຄວາມເຕັມໃຈເທົ່ານັ້ນ. ພຣະຜູ້ເປັນເຈົ້າໄດ້ກ່າວກັບໄພ່ພົນຢູ່ໃນເມືອງເຄີດແລນ, ລັດໂອໄຮໂອວ່າ, “ຈົ່ງເບິ່ງ, ພຣະຜູ້ເປັນເຈົ້າຮຽກຮ້ອງຫົວໃຈ ແລະ ຈິດໃຈທີ່ເຕັມໃຈ” (ຄຳສອນ ແລະ ພັນທະສັນຍາ 64:34). ພຣະຜູ້ເປັນເຈົ້າສາມາດເຮັດໃຫ້ຄົນທີ່ເຕັມໃຈສາມາດເຮັດ, ແຕ່ພຣະອົງບໍ່ສາມາດ ຫລື ຈະບໍ່ເຮັດໃຫ້ຄົນທີ່ມີຄວາມສາມາດເຕັມໃຈໄດ້. ໃນອີກຄຳໜຶ່ງ, ຖ້າຫາກເຮົາມີຄຳໝັ້ນສັນຍາ ແລະ ເຕັມໃຈ, ພຣະອົງສາມາດໃຊ້ເຮົາໄດ້. ແຕ່ ບໍ່ວ່າເຮົາຈະມີຄວາມສາມາດຫລາຍພຽງໃດ, ພຣະອົງຈະບໍ່ໃຊ້ເຮົາ ເວັ້ນເສຍແຕ່ເຮົາຈະມີຄຳໝັ້ນສັນຍາໃນວຽກງານຂອງພຣະອົງ ແລະ ເຕັມໃຈທີ່ຈະຊ່ວຍເຫລືອພຣະອົງ.
ແຊມໂຍ ແລະ ແອນນາ-ມາເຣຍ ໂຄອິວິສໂຕ ໄດ້ສະແດງໃຫ້ເຫັນເຖິງທັງຄຳໝັ້ນສັນຍາ ແລະ ຄວາມເຕັມໃຈ. ບໍ່ດົນຫລັງຈາກການແຕ່ງງານຂອງເຂົາເຈົ້າ, ຄອບຄົວໂຄອິວິສໂຕໄດ້ຍ້າຍຈາກເມືອງຍູແວສ໌ກູລາ, ປະເທດແຟງລັງ, ໄປຢູ່ເມືອງໂກເທນເບີກ, ປະເທດສະວີເດັນ, ເພື່ອສະແຫວງຫາໂອກາດໃນອາຊີບການງານ. ຫລັງຈາກໄປຮອດ, ບຣາເດີ ໂຄອິວິສໂຕ ໄດ້ຖືກເຊື້ອເຊີນໃຫ້ໄປຢ້ຽມຢາມກັບປະທານເລັຟ ຈີ ແມດສັນ, ທີ່ປຶກສາໃນຝ່າຍປະທານສະເຕກໂກເທນເບີກ ສະວີເດັນ. ເນື່ອງຈາກວ່າແຊມໂຍເວົ້າພາສາສະວີເດັນບໍ່ໄດ້, ການສຳພາດຈຶ່ງຖືກດຳເນີນເປັນພາສາອັງກິດ.
ຫລັງຈາກການຢ້ຽມຢາມສັັ້ນໆ, ປະທານແມດສັນໄດ້ຂໍໃຫ້ແຊມໂຍຮັບໃຊ້ເປັນຜູ້ນຳເຜີຍແຜ່ປະຈຳຫວອດ ໃນຫວອດອຸດບີ. ແຊມໂຍໄດ້ຊີ້ໃຫ້ເຫັນສິ່ງທີ່ຊັດເຈນວ່າ: “ແຕ່ຂ້ອຍເວົ້າພາສາສະວີເດັນບໍ່ໄດ້.”
ປະທານແມດສັນໄດ້ເນີ້ງຕົວໄປເທິງໂຕະຂອງເພິ່ນ ແລະ ໄດ້ຖາມຢ່າງເຈາະຈົງວ່າ, “ຂ້ອຍຖາມວ່າເຈົ້າເວົ້າພາສາສະວີເດັນໄດ້ບໍ ຫລື ເຈົ້າເຕັມໃຈທີ່ຈະຮັບໃຊ້ພຣະຜູ້ເປັນເຈົ້າຫລືບໍ່?”
ແຊມໂຍໄດ້ຕອບວ່າ, “ເຈົ້າໄດ້ຖາມວ່າ ຂ້ອຍເຕັມໃຈທີ່ຈະຮັບໃຊ້ພຣະຜູ້ເປັນເຈົ້າຫລືບໍ່. ແລະ ຂ້ອຍກໍເຕັມໃຈ.”
ແຊມໂຍໄດ້ຮັບເອົາການເອີ້ນນັ້ນ. ແອນນາ-ມາເຣຍກໍໄດ້ຮັບເອົາການເອີ້ນເຊັ່ນກັນ. ທັງສອງໄດ້ຮັບໃຊ້ຢ່າງຊື່ສັດ ແລະ ໄດ້ຮຽນເວົ້າພາສາສະວີເດັນຢ່າງສວຍງາມໄປພ້ອມກັນ.
ຄຳໝັ້ນສັນຍາ ແລະ ຄວາມເຕັມໃຈທີ່ຈະຮັບໃຊ້ພຣະຜູ້ເປັນເຈົ້າໄດ້ສະແດງໃຫ້ເຫັນໃນຊີວິດຂອງແຊມໂຍ ແລະ ແອນນາ-ມາເຣຍ. ເຂົາເຈົ້າເປັນວິລະຊົນທຳມະດາໃນສາດສະໜາຈັກ. ເຂົາເຈົ້າໄດ້ຮັບໃຊ້ຢ່າງຊື່ສັດທຸກຄັ້ງທີ່ເຂົາເຈົ້າຖືກຮ້ອງຂໍ. ເຂົາເຈົ້າໄດ້ສິດສອນຂ້າພະເຈົ້າວ່າ ເມື່ອເຮົາຮັບໃຊ້, ເຮົາໃຊ້ພອນສະຫວັນທີ່ເຮົາມີ (ເບິ່ງ ຄຳສອນ ແລະ ພັນທະສັນຍາ 60:13), ແລະ ຈາກນັ້ນພຣະຜູ້ເປັນເຈົ້າຈະຊ່ວຍເຮົາບັນລຸຈຸດປະສົງຂອງພຣະອົງ.
ເມື່ອເຮົາເຕັມໃຈທີ່ຈະຮັບໃຊ້, ເຮົາພະຍາຍາມທີ່ຈະບໍ່ຈົ່ມ ຫລື ເວົ້າພຶມພຳ, ເພາະເຮົາບໍ່ຢາກເຮັດໃຫ້ການຮັບໃຊ້ຂອງເຮົາມົວໝອງໃນທາງໃດທາງໜຶ່ງ. ການຈົ່ມອາດເປັນສັນຍານຂອງຄຳໝັ້ນສັນຍາທີ່ບໍ່ແນ່ນອນ, ຫລື ວ່າຄວາມຮັກຂອງເຮົາທີ່ມີຕໍ່ພຣະຜູ້ຊ່ວຍໃຫ້ລອດບໍ່ເປັນຢ່າງທີ່ຄວນຈະເປັນ. ຖ້າຫາກປ່ອຍໄວ້ໂດຍບໍ່ມີການຄວບຄຸມ, ການເວົ້າພຶມພຳສາມາດກ້າວໄປສູ່ການກະບົດຕໍ່ພຣະຜູ້ເປັນເຈົ້າ. ຄວາມຄືບໜ້ານີ້ແມ່ນເຫັນໄດ້ໃນຊີວິດຂອງເອຊະຣາ ບູທ໌, ຜູ້ປ່ຽນໃຈເຫລື້ອມໃສໃນສາດສະໜາຈັກ ໃນລັດໂອໄຮໂອ ຊ່ວງເລີ່ມຕົ້ນ ທີ່ໄດ້ຖືກເອີ້ນໃຫ້ເປັນຜູ້ສອນສາດສະໜາຢູ່ລັດມີເຊີຣີ.
ເມື່ອລາວອອກຈາກລັດໂອໄຮໂອໃນເດືອນມິຖຸນາ ປີ 1831, ເອຊະຣາຮູ້ສຶກເສຍໃຈທີ່ຜູ້ສອນສາດສະໜາບາງຄົນສາມາດເດີນທາງດ້ວຍກວຽນ ໃນຂະນະທີ່ລາວຕ້ອງຍ່າງໄປທ່າມກາງຄວາມອົບເອົ້າຂອງລະດູຮ້ອນ, ເທດສະໜາໄປຕະຫລອດທາງ. ລາວໄດ້ຈົ່ມ. ເມື່ອລາວໄປເຖິງລັດມີເຊີຣີ, ລາວຮູ້ສຶກບໍ່ພໍໃຈ. ລັດມີເຊີຣີບໍ່ໄດ້ເປັນຢ່າງທີ່ລາວຄາດໄວ້. ກົງກັນຂ້າມ, ລາວໄດ້ເບິ່ງຮອບໆ ແລະ ສັງເກດເຫັນວ່າ “ອະນາຄົດເບິ່ງຄືຈະມືດມົນ.”
ເອຊະຣາໄດ້ເລີ່ມເວົ້າເຍາະເຍີ້ຍ, ເວົ້າປະຊົດປະຊັນ, ແລະ ເວົ້າດູຖູກຫລາຍຂຶ້ນເລື້ອຍໆ. ເມື່ອອອກຈາກລັດມີເຊີຣີ, ແທນທີ່ຈະເທດສະໜາໄປເລື້ອຍໆ, ຕາມທີ່ລາວຖືກຂໍໃຫ້ເຮັດ, ລາວໄດ້ກັບຄືນໄປລັດໂອໄຮໂອຢ່າງໄວ ເທົ່າທີ່ຈະເຮັດໄດ້. ການເວົ້າພຶມພຳໃນຕອນຕົ້ນຂອງລາວໄດ້ປ່ຽນເປັນຄວາມຫວັ່ນໄຫວ ແລະ ໃນທີ່ສຸດກໍສູນເສຍຄວາມໝັ້ນໃຈໃນປະສົບການທາງວິນຍານກ່ອນໜ້ານີ້ຂອງລາວ. ບໍ່ດົນເອຊະຣາກໍໄດ້ອອກຈາກສາດສະໜາຈັກ ແລະ “ໃນທີ່ສຸດກໍ ‘ປະຖິ້ມສາດສະໜາຄຣິດສະຕຽນ ແລະ ກາຍເປັນຜູ້ບໍ່ເຊື່ອວ່າມິພຣະເຈົ້າ.’”
ສິ່ງດຽວກັນນີ້ສາມາດເກີດຂຶ້ນກັບເຮົາໄດ້ ຖ້າຫາກເຮົາບໍ່ລະມັດລະວັງ. ຖ້າຫາກເຮົາບໍ່ຮັກສາທັດສະນະຄະຕິນິລັນດອນ, ໂດຍເຕືອນຕົວເອງວ່າ ນີ້ຄືວຽກງານຂອງໃຜກັນແທ້, ເຮົາອາດຈົ່ມ, ຫວັ່ນໄຫວ, ແລະ ແມ່ນແຕ່ສູນເສຍສັດທາທີ່ເຮົາມີ.
ຂ້າພະເຈົ້າອະທິຖານວ່າ ເຮົາສາມາດເລືອກທີ່ຈະຕິດຕາມພຣະເຢຊູຄຣິດ ໂດຍການເຂົ້າຮ່ວມກັບພຣະອົງໃນວຽກງານຂອງພຣະອົງ. ເມື່ອເຮົາເຮັດ, ເຮົາຈະໄດ້ຮັບ “ຄຳສັນຍາປະເສີດອັນໃຫຍ່ຫລວງ” (2 ເປໂຕ 1:4). ພອນເຫລົ່ານີ້ແມ່ນລວມທັງການໃຫ້ອະໄພບາບ (ເບິ່ງ ຄຳສອນ ແລະ ພັນທະສັນຍາ 60:7; 61:2, 34; 62:3; 64:3), ຄວາມລອດ (ເບິ່ງ ຄຳສອນ ແລະ ພັນທະສັນຍາ 6:13; 56:2), ແລະ ຄວາມສູງສົ່ງ (ເບິ່ງ ຄຳສອນ ແລະ ພັນທະສັນຍາ 58:3–11; 59:23). ແນ່ນອນ, ເຮົາໄດ້ຮັບສັນຍາວ່າຈະໄດ້ຮັບຂອງຂວັນທີ່ຍິ່ງໃຫຍ່ທີ່ສຸດທີ່ພຣະເຈົ້າສາມາດປະທານໃຫ້—ຊີວິດນິລັນດອນ.
© 2025 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Monthly Liahona Message, June 2025. Laotian. 19610 331