Ti Iriira Iesu Kristo man Irirana rinanon Ana Mwakuri

Ti ira buakon ana mwakuri te Tia Kamaiu ngkana ti buokiia natin te Atua n riki naba bwa taan iriira Iesu Kristo aika a kakaonimaki. E irianaki aio ma tibwauaan Ana euangkerio, are e a ikoikotaki iai te bata are Iteraera are e uamaenako, man kakoroan nanon katabeakira n ana Ekaretia te Tia Kamaiu ao man kekeiakira n riki n ai Arona. Ara “tokanikai [n Ana mwakuri] e aki tiku iai bwa kanga tabeman n rineiko ni kaeka [nakoira], nakon [ara] kakao, ke nakon [ara] mwakuri ni koaua n akoi.” E reirei Beretitenti Nelson: “N te tai are ko karaoa iai te bwai teuana are buoka temanna—n iteran te rabuna are teuana—ni karaoi berita aika tabu ma te Atua ao ni karekei aia otenanti ni bwabetito ao n te tembora aika kakawaki, ko buokia ni ikota te bata are Iteraera.”

Karikan ana mwakuri te Tia Kamaiu bwa ara mwakuri, ti na kabanei ara iango iaon Ana kaantaniga, kawakin Ana Tua, ao n tangiriia raora. Inanon karaoan Ana mwakuri n Ana kawai (taraa Reirei a Berita aika Tabu 51:2), tabeua bwaai aika a katukaki nakoira bwa ti na bon iangoi karaoakiia ibon iroura. Te Tia Kamaiu e tuangiia Aika Itiaki ake a botaaki i Jackson County, Missiouri:

“Bwa nooria, e aki riai bwa N na tuangko bwaai ni kabane; bwa ane e kairoroaki ni bwaai ni kabane, bon te tia mwakuri ngaia ae taningaroti ao e aki wanawana; mangaia are e na bon aki karekea kanuangana.

“E koaua ae I taku, aomata a na riai ni ingainga ni kan karaoa te waki ae e raoiroi, ao ni karaoi bwai aika a mwaiti n oin nanoia, ao ni kakoroa bukin te raoiroi ae e mwaiti;

“Bwa e mena te mwaaka irouia, ngaia are a inaomata ni karaoa are a taku. Ao ngkana a karaoa ae e raoiroi aomata ao a na bon aki kona ni kabua kanuangaia” (Reirei ao Berita aika Tabu 58:26–28).

Ngkana ti iriira te Tia Kamaiu, n Iriiria n Ana mwakuri, ao n buokiira tabeman bwa ana riki bwa Ana reirei aika kakaonimaki, ti reireia are E na reireia. Bukina bwa ti aki kariaiakaki bwa ti na reireinii bwaai riki tabeua (taraa Reirei ao Berita aika Tabu 52:9, 36), ti aki tiotionako man Ana reirei (taraa Reirei ao Berita aika Tabu 68:25). Ao n raonaki ma anne, e bati ara atai ae ti na anganiia aika akea aia bwai, kainnano, kai rootaki (taraa Reirei ao Berita aika Tabu 52:40). Bwaai aika a katuruturuaki aika a kamataataki ngke te Tia Kamaiu e taekina ana taeka Itaia n te tinakaoke i Natareta:

“E mena Tamnein te Uea iaou, bukina bwa e a tia ni kabirai bwa n na tataekina te euangkerio nakoia akana aki kaubwai, e kanakomaiai bwa n na tuangiia taenikai te kanakoaki, ao a kana a mataki te manga nooraba, ao bwa n na kainaomataia akana a uruaki nanoia,

“Bwa N na tataekina te euangkerio ma n tua ririkin akoan te aba iroun Iehova” (Ruka 4:18–19; taraa naba Itaia 61:12).

N ririkin akoan te aba iroun Iehova e nanonaki n te tai are ni kabane kakabwaia ake e beritanna te Atua a na bwakariia Ana aomata. Ti iriira Iesu Kristo man kaoaia aomata bwa ana karekei kakabwaian karaoan ao kawakinan berita aika tabu ma te Atua ao n buokaia ake a akea aia bwai ke aika a kainnano.

Iriiran Ana mwakuri Iesu Kristo e kamaiu bukina bwa Ana mwakuri, iango, ao ana waaki “aki kona n totokoaki, ke n akea bonganaia.” (Reirei ao Berita aika Tabu 3:1). Ibukiia ake a namakina te bwarannano, e taekinna te Uea: “Mangaia are, tai kua ni karaoan ae raoiroi, bwa kam kawenea aan te mwakuri ae korakora. Ao man bwaai aika uarereke e kaoti te bwai ae korakora” (Reirei ao Berita aika Tabu 64:33). Ti kariaia bwa te Uea e na tabeaianga n tain te uaa, ao ngaira ti na karaoi tabera.

Karaoan tabera e bebete riki nakon are ti kaantaningaia bukina bwa ti aki kainnanoia bwa ti na uoti ara tarena ake konabwaira aika rianako aroia ni karaoan ana mwakuri te Uea. Ae E kainnanoia bon ti ara motinnano ma nanora ae tauraoi. Te Uea e taekinna nakoia Aika Itiaki i Kirtland Ohio, “Nooria, te Uea e kainnanoa te nano ao te iango ae tatauraoi” (Reirei ao Berita aika Tabu 64:34). Te Atua e kona ni karaoiia ake a kukurei bwa a na konaa, ma E aki kona ke ni karaoiia ake a konaa ni kukurei ni karaoia. N taekana riki teuana, ngkana ti motinnanoia man tauraoi , E na kona n kabonganaira. Ma e ngae ngkana ti tarena, E na bon aki kabonganaira ma ti ngkana ti kakaonimaki nakon Ana mwakuri ao n tauraoi n Buokia.

Samuel ao Anna‑Maria Koivisto a kaota te motinnano ma te tatauraoi. Tabeua te tai imwiin ieiniia, te utu ae Koivistos a mwaing mai Jyväskylä, Finland, nako Göteborg, Sweden, ibukin karekean aia mwakuri. Imwiin rokoia, Te Tari Koivisto e kaoaki bwa ena kawara President Leif G. Mattsson, te kauntira n te Titeiki Beretitentii i Göteborg Sweden. Bukina bwa Samuel e kabi n taetae n Swedish, te intawiu e karaoki n te taetae n Ingiriti.

Imwiin te kaitibo ae uarereke, Beretitenti Mattsson e wetea Samuel bwa e na beku bwa te tia kairiiri ibukin te mition n te uoote i Utby Uoote. E katerea Samuel te bwai ae otara: “Ma I kabi n taetae n Swedish.”

Beretitenti Mattsson e rara riaon ana taibora ao n titirakinna, “I titirakiniko bwa ko rabakau n taetae n Swedish, ke ko tauraoi n beku ibukin te Uea?”

E kaeka Samuel, “Ko titiraki ngkana I tauraoi n beku ibukin te Uea. Ao bon Ngai.”

E butimwaea te wewete Samuel. Anna‑Maria e butimwaai naba weteana. A uaia ni kakaonimaki n beku ma n reiakina te taetae n Swedish inanon taina.

Te motinnano ma te tatauraoi ni beku ibukin te Uea e a tia n kabwarabwaraa maiuia Samuel ao Anna‑Maria. Bon aomata aika a mangori ma a ninikoria n te Ekaretia. A tia ni kakaonimaki n beku ni katoa tai are a weteaki iai. A reireinai bwa ngkana ti beku, ti kabonganai ara tarena ake iai iroura (taraa Reirei ao Berita aika Tabu 60:13), ao te Uea e buokiira ni kakoroi nanon Ana kaantaninga.

Ngkana ti tauraoi n beku, ti kekeiaki n aki tanginako man meremere, bukina bwa ti aki tangiria n kabaeraka ara beku n angaa nako. Te meremere bon kanikinaean te motinnano ae aki nene, ke ara tangira ibukin te Tia Kamaiu e aki koaua. Ngkana e tiku n aki mwakuriiaki, te meremere e na rikirake ao n riki bwa te kaitara nakon te Uea. Te rikirake n aron aei e noraki n maiun Ezra Booth, temanna moan kain te Ekareti i Ohio are e weteaki bwa e na mitinare i Missouri.

Ngke e kitana Ohio n Tuun 1831, Ezra e aki kukurei ngke tabeman mitinare a kona n mwamwananga n te anikaa ao ngaia e na rianna iaan te kabuebue, n taetaekina te euangkerio inanon kawaina. E meremere. Ngke e a roko i Missouri, e namakinna te bwarannano. E aki bootau Missouri ma are e kaantaningaia. E ngae n anne, e taratara nako ao e taekiina bwa “e taraa n kabwaranano tarakina.”

Ezra e rikirake n aki onimaki, kakaitara, ao n momotikitaeka. Imwiin kitanan Missouri, n aki tabe ni kan tibwauaa te euangkerio iaon kawaina, n aron are e tuangaki bwa e na karaoia, e waekoa n okirikaaki nako Ohio. Meremerena are n te moan e riki bwa memerena ao n tokina e bua onimakinan ara taneiai n te tamnei aree a tia ngkoa ni karekei. E aki maan ao Ezra e a kitana te Ekaretia ao n “tokin te tai ‘katannako man te maiu n Kiritian ao n riki bwa te aomata ae akea ataakin te Atua irouna.’”

E na riki naba anne iroura ngkana ti aki taratara raoi. Ngkana ti aki kateimatoaa ara taratara nakon baika akea tokiia, ni kakauringiira bwa antai ana mwakuri aio, ti na kona n meremere, mamara, ao n tokin te tai n kabuaa te onimaki are iroura.

I tataro bwa ti na kona n rinea iriiran Iesu Kristo man Irirana n Ana mwakuri. Ngkana ti karaoa aio, ti anganaki “taeka n akoi ake a kakawaki ma ni moa ni kakannato” (2 Betero 1:4). Kakabwaia aikai teuana ibuakoia kabwaraakin ara bure (taraa Reirei ao Berita aika Tabu 60:7; 61:2, 34; 62:3; 64:3), kamaiuaki (taraa Reirei ao Berita aika Tabu 6:13; 56:2), ao te karietataaki (taraa Reirei ao Berita aika Tabu 58:3–11; 59:23). Eng, ti beritanaki ana kabanea n tamaroa n bwaintituaraoi te Atua ae kona n anga—te maiu ae akea tokina.