Yumi Folem Jisas Kraes taem Yumi Stap Joenem Hem long Wok blong Hem

Yumi tekpat long wok blong Sevya taem yumi helpem tu ol pikinini blong God blong kam olsem ol fetful disaepol blong Jisas Kraes. Hemia i i tekem tu, fasin blong stap serem gospel blong Hem, we i blong karem i kam tugeta Isrel we i seraot, blong stap mekem i hapen ol responsabiliti insaed long Jos blong Sevya mo blong stap traehad blong kam olsem Hem. “Sakses blong yumi [long wok blong Hem] i no dipen long hamas ol narawan oli ansa long yu long ol invitesen blong yu[yumi], o long ol invitesen blong yu [yumi], o we i kam wetem aksen blong soem fasin [yumi] blong stap kaen.” Presiden Russell M. Nelson i tijim, “Eni taem yu mekem eni samting we i helpem eniwan—long tugeta saed blong vel—tekem wan step fored blong stap mekem ol kavenan wetem God mo stap kasem baptaes mo tempol odinens we i nid long bihaf blong olgeta, yu stap help blong karem Isrel i kam tugeta.”

Blong mekem wok blong Sevya i wok blong yumi, yumi lukluk nomo long ol stamba tingting blong Hem, obei ol komanmen blong Hem, mo lavem wanwan long yumi. Taem yumi mekem wok blong Hem folem wei blong Hem (luk long Doktrin mo Ol Kavenan 51:2), be sam samting i no stap mo bae yumi faenem aot yumiwan. Sevya i bin talem long ol Sent we oli kam tugeta long Jackson County, Missouri.

“From luk, hem i no stret blong mi talemaot evri samting blong mekem; from hem we mi mas fosem hem long evri samting, hem i wan les man mo i no wan waes wokman; taswe, hem i no save kasem wan praes.

“I tru mi talem, ol man oli mas wok wetem strong tingting long wan gud wok, mo mekem plante samting long tingting blong olgetawan nomo, mo mekem plante stret mo gud wok oli kamtru;

“From paoa ia i stap long olgeta, we i mekem olgeta oli fri blong mekem samting olgetawan nomo. Mo sapos ol man oli gohed blong mekem gud, bae oli no save lusum praes blong olgeta nating” (Doktrin mo Ol Kavenan 58:26-28).

Taem yumi folem Sevya, joenem Hem long wok blong Hem, mo helpem ol narawan blong kam ol fetful disaepol blong Hem, yumi stap tijim wanem we Hem bae i tijim. From se yumi nogat raet blong tijim eni samting nating (luk long Doktrin mo Ol Kavenan 52:9, 36), yumi lukluk nomo mo hang strong long doktrin blong Hem (luk long Doktrin mo Ol Kavenan 68:25). Blong ademap, yumi lukluk moa mo tingting speseli long olgeta we oli pua, stap long nid, mo olgeta we nid blong olgeta i series (luk long Doktrin mo Ol Kavenan 52:40). Ol samting ia oli mekem i kam klia taem Sevya i kwotem Aesea long wan ples blong wosip long Nasaret:

“Hae God i jusumaot mi, mo paoa blong Spirit blong hem i kam fulap long mi blong mi talemaot gud nius long ol puaman. Hem i sanem mi blong mi talemaot long ol man we oli stap long kalabus se, ‘Yufala i go fri,’ mo blong mi talemaot long ol man we oli blaen se, ‘Ae blong yufala i save kam gud,’ Hem i sanem mi blong mi mekem ol man we oli stap harem nogud andanit long han blong narafala man oli go fri,

“Mo blong mi talemaot se taem i kam finis we Hae God bambae i sevem ol man Hem” (Luk 4:18–19; luk tu long Aesea 61:1–2).

Taem we Lod i akseptem i stap minim taem we evri blesing blong ol kavenan God bae oli hipimap long ol pipol blong Hem. Yumi folem Jisas Kraes taem yumi invaetem ol narawan blong kasem ol blesing blong mekem mo kipim kavenan wetem God mo blong stap kea long olgeta we oli pua o stap lo nid.

Blong stap joenem Jisas Kraes long wok blong Hem i stap mekem wan i glad from se ol wok blong Hem, mo ol plan, mo ol stamba tingting blong hem bae “oli no save stopem ol samting ia blong hapen.” (Doktrin mo Ol Kavenan 3:1). Long olgeta we oli filim se tingting blong olgeta i i kam slak: “Yufala i no taed blong mekem gud samting, from we yufala i stap putum fandesen blong wan bigfala wok. Mo aot long ol smol samting ol samting we oli bigwan oli kamaot” (Doktrin mo Ol Kavenan 64:33). Yumi letem Lod i wari abaot taem ol kaekae long oli rere blong karemaot long garen, mo yumi mekem pat blong yumi we i simpol.

Blong stap mekem pat blong yumi hem i moa simpol bitim wanem we yumi pikjarem long maen blong yumi from se, yumi tekem i kam ol naesfala talen o ol paoa mo skil we God i givim, blong mekem wok blong Lod. Hem i nidim wan simpol komitmen mo tingting blong wantem mekem samting. Long i talem long Ol Sent long Ketlan, Ohaeo, “Lod i askem blong mas gat wan hat mo wan maen we i wantem mekem samting.” (Doktrin mo Ol Kavenan 64:34). Lod i save mekem hem we i wantem mekem samting i save mekem, be Hem i no save, o bae Hem i no mekem hem we i save mekem, blong i wantem blong mekem. Long narafala toktok, sapos yumi gat strong tingting mo gat wan hat mo wan maen we i wantem mekem samting, Hem i save yusum yumi. Be nomata se yumi gat gudfala talen, Hem bae i no save yusum yumi be sapos nomo yumi gat strong tingting blong mekem wok blong Hem mo wantem blong helpem Hem.

Samuel mo Anna-Maria Koivisto i soem tugeta komitmen mo wan hat mo wan maen blong wantem mekem samting. I no longtaem afta long mared blong tufala, tufala i muvaot long Jyväskylä, Finlan, i go long Göteborg, Swiden, lukaotem ol janis blong kasem wok. Afta we tufala i kasem ples ia, brata Koivisto i kasem invitesen blong visitim Presiden Leif G. Mattsson, wan kaonsela blong Stek presidensi long Göteborg Swiden. From se Samuel i no save toktok lanwis blong Swiden, intaviu ia oli mekem long Inglis.

Folem sot visit ia, Presiden Mattsson i askem Samuel blong givim seves olsem wod misin lida long Utby Wod. Samuel i poenemaot klia se: “Be mi no save toktok lanwis blong Swiden.”

Presiden Mattsson i lukluk ova long desk blong hem mo askem, “?Be mi askem yu sapos yu save toktok long lanwis blong Swiden o sapos yu wantem blong givim seves long Lod?”

Samuel i ansa, “Yu askem sapos mi wantem blong givim seves long Lod. Mo bae mi mekem”.

Samuel i akseptem koling ia. Anna-Maria tu i akseptem ol koling. Tufala tugeta i givim wan fetful seves mo lanem blong toktok long naesfala lanwis blong Swiden truaot long taem ia.

Komitmen mo tingting ia blong wantem givim seves long Lod i soem stret fasin mo laef blong Samuel mo Anna-Maria. Tufala i ol simpol hiro insaed long Jos. Tufala i fetful evri taem blong givim seves taem oli askem tufala blong mekem. Tufala i bin tijim mi se taem yumi givim seves, yumi yusum ol talen we yumi gat (luk long Doktrin mo Ol Kavenan 60:13), mo afta Lod bae i helpem yumi mekem ol stamba tingting blong Hem oli hapen.

Taem yumi gat wan hat mo wan maen we i wantem blong givim seves, yumi traehad blong no komplen o talem se i had, from se, yumi no wantem blong lusum seves blong yumi long eni wei. Blong stap komplen i wan saen blong gat tingting we i no strong, o se lav blong yumi long Sevya i no inaf olsem we i mas gat. Sapos yumi no luksave, fasin blong stap komplen bae i progres i kam long fasin blong agensem Lod. Fasin blong progres ia oli save luk long laef blong Ezra Booth, wan fas konvet long Jos long Ohio we oli bin singaotem hem olsem wan misinari blong go long Misuri.

Taem hem i leko Ohio long Jun 1831, Ezra i wari se sam misinari oli save yusum wagun be hem bae i mas wokbaot long hot san, mo stap prijim gospel folem rod Hem i bin komplen. Taem hem i kasem long Misuri, kwiktaem hem i lusum hop. Misuri i no bin wanem we hem i bin stap tingting long hem. Be, hem i lukluk raon mo luk se “hop we hem i bin gat i stat blong lusum laet.”

Ezra i stat blong kam antap long fasin blong gat tu tingting mo no agri long ples ia. Taem hem i stap lego Misuri, hem i nomo prij taem hem i stap go, olsem we oli bin askem hem blong mekem, hem i gobak long Ohaeo kwiktaem. Fasin blong hem blong stap komplen olsem long stat i stat mekem hem i seksek mo long en, i stat blong lusum tras long ol fas eksperiens we hem i bin kasem long saed blong spirit. I no longtaem afta we Ezra i lego Jos mo “long en i ‘lego fasin blong stap Kristin man mo i kam wan man we i nomo gat bilif se i gat wan God.’”

Semmak fasin ia i save hapen long yumi sapos yumi no lukaot gud. Sapos yumi no holemtaet wan lukluk long saed blong spirit we i no save finis, mo stap rimaenem yumiwan se wok ia i blong huia stret, maet bae yumi save komplen, gat tu tingting, mo long en bae yumi lusum fet we yumi gat.

Mi prea se bae yumi save jusum blong folem Jisas Kraes taem yumi stap joenem Hem long wok blong Hem. Taem yumi mekem hemia, bae oli givim long yumi “ol bigfala mo gudfala promes”(2 Pita 1:4). Ol blesing ia i gat tu fasin blong fogivim ol sin (luk long Doktrin mo Ol Kavenan 60:7; 61:2, 34; 62:3; 64:3), plan ia blong sevem man (luk long Doktrin mo Ol Kavenan 6:13; 56:2), Mo fasin blong kam olsem wan god (luk long Doktrin mo Ol Kavenan 58:3–11; 59:23). I tru, oli bin promesem yumi bigfala presen we God i save givim—laef ia we i no save finis.