Tauturu nō ’ō mai ia Iesu Mesia : Te nō te aha ’e te nāhea

I tōna fa’a’oroma’ira’a i tāna tusia tāra’ehara, ’ua rave te Fa’aora e toru ’ohipa faufa’a roa :

1. ’Ua upo’oti’a ’oia i ni’a i te pohe, e ti’a ai ia tātou ’ia ti’afa’ahou mai.

2. ’Ua ’aufau ’oia i te ho’o nō te mau hara ato’a, e ti’a ai ia tātou ’ia tātarahapa, ’ia tupu i te rahi, ’e ’ia ho’i i te Atua ra. E tauturu ato’a te reira ia tātou ’ia fa’a’ore i te hapa a vetahi ’ē ’ia hara ana’e rātou, nō te mea ’ua rave te Mesia i tā rātou mau hara i ni’a iāna iho.

3. ’Ua fa’aruru ’oia i te mau māuiui ato’a, te mau ’ati, te mau fa’ahemara’a, te mau ma’i ’e te mau paruparu ato’a (hi’o Alama 7:11–13). Te aura’a ra ’ua ’ite pāpū ’oia nāhea i te tauturu ’e i te fa’aora ia ’outou ’e e nehenehe tāna e ha’apūai ia ’outou nō te fa’a’oroma’i i te mau tāmatara’a ’e nō te tūtava ’ia riro ’ei ta’ata maita’i a’e.

’A mā’iti i te hō’ē noa atu fifi, ’e e nehenehe ’outou e fa’atū’ati i te rāve’a i ni’a i te hō’ē ’aore rā hau atu o teie nā parau mau e toru.

Te veve ? Nō te mea ’ua fa’aruru Iesu Mesia i te mau mea ato’a, ’ua ’ite pāpū ’oia i te huru o te reira. E’ita ’oia e tātara i te fifi i te mau taime ato’a, e nehenehe rā tāna e ha’apūai i te ta’ata e amo ra i taua hōpoi’a ra (hi’o Mosia 24:15).

Te manuia ’ore ? Nō te mea ’ua upo’oti’a te Mesia i ni’a i te hara, ’aita e faufa’a tō tātou mau manuia-’ore-ra’a ’ia vai tāmau noa. Tei roto i te tātarahapara’a te ha’amaita’ira’a ia tātou ’e te riro-rahi-atu-ā-ra’a ’ei ta’ata tāna i ’ite e nehenehe tātou e riro mai.

Te ma’ima’i ? Nō te mea ’ua upo’oti’a ’oia i ni’a i te pohe, e ti’afa’ahou mai tātou ma te tino maita’i roa, tei pāruruhia i te ma’i ’e i te māuiui. Nā reira ato’a te Mesia, ’ua « [rave] i ni’a iāna […] te mau ma’i » (Alama 7:11), ma te fa’ariro iāna ’ei ta’ata maita’i roa nō te pūpū i te tāmāhanahanara’a ’e te pāturura’a.

Terā rā noa atu ’ua ’ite tātou nō te aha ’o te Fa’aora te pāhonora’a (nō tōna hīro’a ’e te mea tāna i rave nō tātou), tē tītauhia nei ia tātou ’ia ’ite nāhea tātou i te fa’ari’i i te tauturu ’e te pūai nō ’ō mai iāna ra. Teie te tahi mau rāve’a :

Te pure. Nā roto i te purera’a nā roto i te i’oa o Iesu Mesia, e nehenehe te mau ta’ata hapehape mai ia tātou e paraparau i te hō’ē Atua maita’i roa. E nehenehe tātou e pure nō te pūai e tītauhia nō te huru vaira’a ato’a, ’e e pāhono mai te Atua—’eiaha noa mai tā tātou e hina’aro ra ’aore rā e tīa’i ra, nā roto rā i te rāve’a e ha’amaita’i ai ia tātou. E parau pāpū te anira’a a te Fa’aora : « ’A ani, e roa’a ïa ia ’outou » (Ioane 16:24 ; 3 Nephi 27:29 ; Te Ha’api’ira’a Tumu ’e te mau Fafaura’a 4:7).

Te hōro’a nō te Vārua Maita’i. ’Ua hō’ē te Metua i te ao ra, ’o Iesu Mesia, ’e te Vārua Maita’i i roto i te ’ōpuara’a. Tē ’ohipa ’āmui nei rātou ! I te mau taime ato’a e fa’ari’i ’outou i te arata’ira’a ’aore rā i te tāmāhanahanara’a a te Vārua Maita’i, e nehenehe ’outou e hāro’aro’a ē tē tauturu ato’a nei te Mesia ia ’outou.

Ha’apa’o i te mau fafaura’a. ’Ua ha’api’i Elder Dale G. Renlund nō te pupu nō te Tino ’Ahuru Ma Piti ’āpōsetolo ē : « Terā parau ’ē’a nō te fafaura’a, e pāpa’a fafaura’a ïa e haere mai ai tātou i te Mesia ’e e tū’ati ai iāna. Nā roto i teie tā’amura’a nō te fafaura’a, ’ua matara nō tātou te ’ē’a nō tōna mana mure ’ore » (’āmuira’a rahi nō ’Ēperēra 2023 [Liahona, Mē 2023, 36]).

Te maita’i rahi. ’Ia fa’a’ohipa ana’e tātou i te fa’aro’o ia Iesu Mesia ’e ’ia tātarahapa ana’e tātou, e nehenehe tātou e fa’ari’i i te tahi atu ā tauturu ’e te pūai (tei pi’i-ato’a-hia te maita’i rahi) nō te rave i te mau mea e’ita e noa’a ia tātou iho (hi’o Arata’i nō te mau pāpa’ira’a mo’a, « Maita’i rahi [Grace] »). E nehenehe teie pūai, ’aore rā teie maita’i rahi, e tae mai nā roto i te mau rāve’a e rave rahi : nā roto mai i te Vārua Maita’i, te hō’ē hoa, te hō’ē ta’ata ’e’ē, te hō’ē mana’o. I te rahira’a o te taime, nō roto mai ïa te mau mea maitata’i ato’a i te Mesia (hi’o Moroni 7:22). ’Ia rahi ri’i ana’e tō ’outou fa’a’oroma’i, tō ’outou pūai, tō ’outou itoito nō te fa’a’oroma’i, ’ia fa’i ’outou ē ’o te Mesia e tauturu nei ia ’outou.

Nō reira ’ia tītau-fa’ahou-ana’e-hia te pāhonora’a i te hō’ē uira’a ’aore rā i te hō’ē fifi, ’a hi’o i ni’a i te Mesia. ’A ha’amana’o ē maoti tōna upo’oti’ara’a i ni’a i te hara, te pohe ’e te tahi atu mau tāmatara’a tāhuti nei, ’aore roa e mea e ’ore e roa’a ’ia rave. ’A ’imi e nāhea ’oia e ha’amaita’i ai ia ’outou, ’e e ’ite ’outou i tāna fa’aurura’a i roto i tō ’outou orara’a. ’Ua here mau ’oia ia ’outou !