Iesu Mesia : Te tīa’ira’a ’e te fafaura’a o te Pāsa

Tei pīha’i iho roa te Atua, tō tātou Metua mure ’ore i te ao ra ; ’o Iesu Mesia, tāna Tamaiti here ’e te Vārua Maita’i, ia tātou tāta’itahi. ’Ua fatuhia tō rātou māramarama tā’ōti’a ’ore ’e te mure ’ore ’e te aumihi ’e te here fa’aora, i roto i te ’ōpuara’a nō te poietera’a ’e te firira’a o tō tātou orara’a (hi’o Alama 30:44 ; Mose 6:62–63).

I roto i te ’Āpo’ora’a hou i te tāhuti nei i te ra’i ra, « ’ua fatu te mau feti’a po’ipo’i i te hīmene, ’e ’ua pi’i te mau tamaiti [’e te mau tamāhine] ato’a a te Atua i te ’oa’oa » (Ioba 38:7). ’Ua mā’iti tātou i te mā’itira’a. I teienei, tē haere nei tātou nā roto i te fa’aro’o. Nā roto i te mau ’ohipa e tupu i ni’a ia tātou, e ’ite tātou i te nehenehe, te māramarama, te ’oa’oa, ’e te ’ōpuara’a i roto i te pāpū ’ore, te fiu o te ’ā’au, ’e te mau tāmatara’a o te tāhuti nei.

’Aita i tītauhia ia tātou ’ia ’ōvere haere noa ’o tātou ana’e i roto i te pāpū ’ore rahi ’o vai tātou. E nehenehe tātou e paraparau i te ra’i, e patu i te fa’aro’o ’e i te tā’amura’a i roto i te ’utuāfare ’e i roto i te nohora’a ’e i te ’oire nō te feiā mo’a, ma te riro iho ’ei ta’ata ti’a roa a’e ’e te ti’amā roa a’e ’e te hōho’a mau roa a’e ’e te ’oa’oa roa a’e, nā roto i te ha’apa’ora’a i te mau fa’auera’a a te Atua ma te hina’aro mau ’e te ’oa’oa. Nā te tāra’ehara—te tāhō’ēra’a—i roto ’e nā roto ia Iesu Mesia e hōpoi mai i teie tā’amura’a fafaura’a.

Te tīa’ira’a i te orara’a ’e te misiōni a Iesu Mesia

I te mau mahana ato’a, tē vai ra i roto i te tīa’ira’a ’e te fafaura’a o te Pāsa i te mau ha’amaita’ira’a ’e te mau ha’api’ira’a tā Iesu Mesia i fa’a’ite i roto i tāna tāvinira’a maita’i roa i te tāhuti nei. Ma te fa’atōro’ahia i te ha’amatara’a, ’ua fānauhia Iesu Mesia, te Tamaiti fānau tahi a te Atua (hi’o Iakoba 4:5 ; Alama 12:33–34 ; Mose 5:7, 9). Tupu atu ra Iesu i te rahi ’e te pa’ari, ’e te herehia mai e te Atua ’e te ta’ata ato’a (hi’o Luka 2:52). Ma te ’imi noa i te rave i te hina’aro o tōna Metua, ’ua fa’a’ore Iesu Mesia i te mau hara a te ta’ata, ’ua fa’aora i te mau paruparu, ’ua fa’ati’a i tei pohe ’e ’ua tāmāhanahana i tei ma’ihia ’e tei vai ’ōtahi noa.

I te hō’ē taime, i muri a’e i tōna ha’apaera’a i te mā’a e 40 mahana te maoro, ’ua parau pāpū ’oia : « Tei ni’a iho iā’u te Vārua o te Fatu, ’oia i fa’atāhinu mai iā’u ’ei poro haere i te parau maita’i i te ta’ata ri’i, ’ua tono mai ’oia iā’u ’ei fa’aora i te feiā ’ā’au ’oto, ’ei poro haere i te ora nō tei tītī, ’e ’ia hi’o fa’ahou te matapō, ’e ’ei tu’u ho’i i te feiā i paruparu » (Luka 4:18 ; hi’o ato’a Isaia 61:1).

’O tātou tāta’itahi te reira.

I te Tāmā’ara’a hope’a, ’ua horoi Iesu Mesia i te ’āvae o tāna mau pipi (hi’o Ioane 13:4–8). I roto i nā ao Tahito ’e te mea ’Āpī, nā te « pape ora » iho ’e « te pāne ora » iho i ha’amau i te ’ōro’a mo’a. I roto i te ’ōro’a mo’a, tē ti’aoro nei tātou i te Metua ’e tē fafau nei tātou e rave i ni’a iho ia tātou i te i’oa o Iesu Mesia, ’ia ha’amana’o noa iāna, ’e ’ia ha’apa’o i tāna mau fa’auera’a, ’ia vai noa tōna Vārua i roto ia tātou (hi’o Luka 22:19–20 ; 3 Nephi 18:7, 10–11).

I roto i te ’ō nō Getesemane, e hau atu tā Iesu i māuiui i tā te ta’ata e nehenehe e māuiui, nō te ho’o ’e nō te tara ’ē nō tātou. ’Ua tahe mai te toto nā roto i te mau poa ato’a. ’Ua fa’a’oroma’i ’oia i teie mau māuiui nō te tā’āto’ara’a, ’ia ’ore tātou ’ia māuiui mai te mea e tātarahapa tātou (hi’o Te Ha’api’ira’a Tumu ’e te mau Fafaura’a 18:11 ; 19:16).

I ho’ohia ’e i fa’ahapa-hape-hia, ’ua fa’ao’ō’ohia Iesu Mesia ’e ’ua tā’irihia, ’e ’ua tu’uhia te hō’ē hei taratara i ni’a i tōna upo’o ha’eha’a (hi’o Mataio 27:26, 29 ; Mareko 15:15, 17, 20, 31 ; Luka 22:63 ; Ioane 19:1–2). « I tā’irihia ’oia i tō tātou nei ’ino […] ’e nō tōna paruparu e ora ai tātou » (Isaia 53:5). ’Ua « fa’ateiteihia ’oia i ni’a i te sātauro » nō te ’ume ia tātou iāna ra (hi’o 3 Nephi 27:14–15). Noa atu rā i te reira, i ni’a ato’a i te sātauro, ’ua fa’a’ore Iesu Mesia i te hapa (hi’o Luka 23:34). ’Ua ani ’oia ia Ioane ’ia aupuru i tōna metua vahine (hi’o Ioane 19:26–27). ’Ua tupu tōna mana’o fa’aru’e (hi’o Mataio 27:46 ; Mareko 15:34). ’Ia tupu te parau o te pāpa’ira’a mo’a, ’ua parau ’oia ē ’ua po’ihā ’oia (hi’o Ioane 19:28). I te otira’a te mau mea ato’a, ’ua « pohe ihora » (Luka 23:46 ; hi’o ato’a Ioane 10:17–18).

’Ua ’ite Iesu Mesia nāhea i te fa’aora ia tātou i roto i tō tātou mau ma’i, mau paruparu, te mo’emo’e, te ’āta’ara’a ’e te mau tāfifira’a (hi’o Alama 7:12). Pinepine te reira mau ’ati i te tae mai ’ei fa’ahope’ara’a nō te mau mā’itira’a a vetahi ’ē. ’Ua ’ite ato’a ’oia nāhea i te ’oa’oa ’e ’o tātou i roto i tō tātou ’oa’oa ’e tō tātou māuruuru, nāhea i te ta’i ’e ’o tātou ’ia ’ī ana’e tō tātou ’oa’oa. Ma te marū, tē pi’i nei ’oia ia tātou nā roto i tōna i’oa, nā roto i tōna reo, i roto i tāna nana. E pi’i ’oia i te mau ta’ata ato’a i te mau vāhi ato’a. Tē ani nei ’oia ia tātou ’ia hi’o ’e ’ia hāro’aro’a i te orara’a tāhuti nei nā roto i te hi’ora’a ātea mure ’ore. ’A haere ti’a noa ai tātou ’e ’a ha’apa’o ai i tā tātou mau fafaura’a, ’ua fafau mai ’oia e nehenehe te mau mea ato’a e ’ohipa ’āmui nō tō tātou maita’i (hi’o Te Ha’api’ira’a Tumu ’e te mau Fafaura’a 90:24 ; Roma 8:28).

I tōna taime ’e i tāna rāve’a, e tae mai te fa’aho’i-fa’ahou-ra’a mai—’eiaha i te huru noa o te mau mea na, i te huru ato’a rā tā te reira e nehenehe e riro mai. ’Oia mau, e nehenehe Iesu Mesia e fa’ati’amā ia tātou i te tītīra’a ’e i te hara, i te pohe ’e ia hade, ’e e nehenehe ’oia e tauturu ia tātou ’ia fa’atupu i tō tātou ihota’ata hanahana ’ia hau atu tātou i tā tātou e mana’o ra, nā roto i te fa’aro’o ’e te tātarahapa.

Maoti ’o Iesu Mesia, e ’ere te pohe i te hope’ara’a. I te Pāsa tē parau nei tātou :

Nā roto i te fa’auera’a ’e te mana nō ’ō mai i tōna Metua ra, ’ua ti’a ia Iesu ’ia hōro’a i tōna ora ’e ’ia rave fa’ahou i te reira (hi’o Ioane 10:17). ’A vai ai tōna tino i roto i te mēnema, ’ua tāvini Iesu Mesia ’e ’ua fa’anahonaho i roto i te ao vārua, ma te parau i « tō rātou fa’aorara’a mai roto mai i te mau tā’amura’a o te pohe » (Te Ha’api’ira’a Tumu ’e te mau Fafaura’a 138:16).

I te po’ipo’i no te toru o te mahana, ’ua ti’a mai ’oia mai te mēnema mai. ’Ua paraparau ’oia ia Maria. ’Ua fā ’oia i nā pipi e piti i ni’a i te purūmu nō Emausa, i tāna mau ’āpōsetolo, ’e ia vetahi ’ē. (Hi‘o Mataio 28 ; Mareto 16 ; Luka 24 ; Ioane 20.)

Ma te ’itera’a pāpū pūai, ’ua ani ’oia i tāna mau pipi ’ia tu’u i tā rātou mau ’ūpe’a i te tahi atu pae o te pahī ; i teie taime, noa atu ā ’ua ’ī fa’ahou te i’a, ’aita te mau ’upe’a i pararī (hi’o Ioane 21:6–11 ; Luka 5:3–7). ’Ua fa’a’amu ’oia i te mau pipi ’e ’ua tāparu ia Petero e toru taime nō te fa’a’amu i tāna mau māmoe ’e mau ’ārenio (hi’o Ioane 21:12–17). ’Ua haere ’oia i te ra’i ma te parau ē, e mea ti’a i tāna mau pipi i taua tau ra, ’e ia tātou i teienei, ’ia fa’a’ite i te parau ’āpī hanahana o te Pāsa ’e tāna ’evanelia i te mau fenua ato’a, te mau ’ōpū ato’a, ’e te mau ta’ata ato’a (hi’o Mataio 28:19–20 ; Mareko 16:15).

’O Iesu Mesia tō tātou tīa’i māmoe maita’i ’e te ’Ārenio a te Atua. ’Ua hōro’a ’oia i tōna ora, ’e tē hōro’a nei i tōna ora, nō tāna mau māmoe. I roto i te ’ō ’e i ni’a i te sātauro, ’ua amo ’oia i te ’ore e au ’ia fa’a’oroma’ihia ’e ’ua tara ’ē nō tātou. I roto i te tau ’e te tau mure ’ore, tē fa’a’ite nei ’oia ia tātou nā roto i te hi’ora’a e nāhea « te pohe i te ’īriti i te ’ē’a e tae atu ai i te tau mure ’ore. »

Nā roto i te mana nō te tāra’ehara ’e te ti’afa’ahoura’a o te Mesia, e tāhō’ē-fa’ahou-hia tō tātou tino ’e tō tātou vārua i roto i te ti’afa’ahoura’a pae tino. E riro mai tātou ’ei ta’ata hanahana, tei fa’aho’i-fa’ahou-hia mai tō tātou hōho’a ’e tō tātou tino tāhuti, te melo ’e te melo. E fa’aho’i-fa’ahou-hia mai te rouru o tō tātou upo’o. E ti’amā tātou i te mau fifi o te tau, te ma’i, te ’ati i te pae tino ’e i te pae ferurira’a. E nehenehe te tāra’ehara a te Mesia e ha’amaita’i ia tātou nō te upo’oti’a i ni’a i te mau huru fa’ata’a-’ē-ra’a pae vārua ato’a ’e te pohe pae vārua. Mai te mea e tātarahapa tātou, e fa’ati’amāhia tātou i te mau hara ato’a ’e te ’oto ’e e ’īritihia ia tātou te ’īra’a mure ’ore o te here ’e te ’oa’oa. Ma te vi’ivi’i ’ore, te mā, te ti’amā, e nehenehe tātou e ho’i i roto i tō tātou mau tā’amura’a ’utuāfare iti rahi roa a’e, i mua i te aro hanahana ’e te tiretiera o te Atua tō tātou Metua ’e ’o Iesu Mesia.

E ’ite fa’ahou tātou i tō tātou feiā here iti. ’Ia tāhō’ē-fa’ahou-ana’e-hia tātou ’e te feiā tā tātou i here, e ’ite tātou te tahi i te tahi ma te hi’ora’a ātea mure ’ore—ma te here rahi a’e, te hāro’aro’ara’a ’e te hāmani maita’i. E nehenehe te tāra’ehara a Iesu Mesia e tauturu ia tātou ’ia ha’amana’o i te mea faufa’a ’e ’ia ha’amo’e i te mea ’aita. Nā te hi’ora’a i tō tātou Fa’aora ’e tō tātou mau tā’amura’a ma te fa’aro’o ’e te māuruuru rahi a’e, e hōpoi mai i te hau, e ha’amāmā i te mau hōpoi’a, e fa’afaite i te mau ’ā’au ’e e tāhō’ē i te mau ’utuāfare i roto i te tau ē a muri noa atu.

Te tīa’ira’a nō te ’auhune ’e te ’oa’oa

Te Pāsa i roto ia Iesu Mesia, ’o te ’īritira’a ato’a ïa o te mau ha’amāramarama nō te ra’i, te hotu nō te vine tāta’i rahi, ’e te mau fenua ’o tē riro ra ’ei mea hina’arohia. Te Pāsa i roto ia Iesu Mesia, ’o te tāmāhanahana ïa ’e te aupurura’a i te mau vahine ’ivi ’e te mau ’ōtare, te feiā po’ia ’e te feiā paruparu, te feiā mata’u, tei hāmani-’ino-hia, ’aore rā tei ha’apēpēhia ma te hara ’ore. Nō tōna māna’ona’o i te ta’ata tāta’itahi, tē ani manihini mai nei Iesu Mesia ia tātou ’ia hi’o ’e ’ia aupuru i te ta’ata ma te here ’e te aumihi, mai tāna e nā reira nei.

I roto i te mau mea maitata’i ato’a, e fa’aho’i rahi mai ’o Iesu Mesia (hi’o Ioane 10:10 ; Alama 40:20–24). Tē parau fafau nei ’oia ē « ’ua ’ī roa te fenua nei, ’e ’ua nava’i ’e ’ua toe mai ho’i » (Te Ha’api’ira’a Tumu ’e te mau Fafaura’a 104:17). I roto i tāna fa’aho’i-fa’ahou-ra’a mai i te mau mea ato’a, tē vai ra te ’īra’a o tāna ’evanelia, tōna ha’amanara’a ’e tōna mana autahu’ara’a ’e te mau ’ōro’a mo’a ’e te mau fafaura’a mo’a e ’itehia i roto i tāna ’Ēkālesia, tei pi’ihia i tōna i’oa, ’oia ho’i Te ’Ēkālesia a Iesu Mesia i te Feiā Mo’a i te mau Mahana Hope’a nei.

Te Pāsa i roto ia Iesu Mesia, ’o te tahi atu ā ïa mau fare mo’a o te Fatu ’o tē ha’afātata atu ā i te mau tamari’i a te Atua i te mau vāhi e rave rahi, ma te ’āfa’i mai i roto i tō tātou ’ā’au i te ha’api’ira’a tumu o « te feiā fa’aora i ni’a i te mou’a ra i Ziona » (hi’o Obadia 1:21). Tē hōro’a mai nei te Fatu i te hō’ē rāve’a ha’amo’a ’e te pīpiri ’ore nō tātou nō te pūpū i ni’a i te fenua nei i te mea e tītauhia nō tō tātou nei feiā i reva, ’o tā rātou i hina’aro i roto i te tau mure ’ore, ’o te ’ore roa e nehenehe e roa’a ia rātou nā roto ia rātou iho.

’O tō’u ïa tīa’ira’a, tā’u parau fafau ’e tō’u ’itera’a pāpū. Tē fa’a’ite pāpū nei au nō te Atua tō tātou Metua, tō tātou Fa’aora ’e Tāra’ehara, ’o Iesu Mesia ; ’e te Vārua Maita’i. I te Pāsa ’e i te mau mahana ato’a, ’ia ’itehia ia tātou te tīa’ira’a ’e te fafaura’a mure ’ore i roto i te fa’anahora’a hanahana a te Atua nō te ’oa’oa, ma tō te reira ’ē’a nō te fafaura’a i te tauira’a hanahana, mai te tāhuti i te tāhuti ’ore ’e te ora mure ’ore. I te mahana tāta’itahi, ’ia ha’amāmā te pāpūra’a o te tāra’ehara a Iesu Mesia i tā tātou mau hōpoi’a, ’e ’ia tauturu ia tātou ’ia tāmāhanahana ia vetahi ’ē i roto i tō rātou ’oto, ’e ’ia fa’ati’amā i tō tātou vairua nō te fa’ari’i i te ’īra’a o tōna ’oa’oa.

Nā roto i te tīa’ira’a ’e te fafaura’a o te Pāsa, e pāhono Iesu Mesia i te mau hia’ai o tō tātou ’ā’au ma te pāhono ato’a i te mau uira’a o tō tātou vairua.