Tulong manipud ken ni Jesucristo: Ti Apay ken Kasano

Idi inibturanna ti pangsubbot a sakripisiona, tallo a napateg a banag ti inaramid ti Mangisalakan:

1. Pinarmekna ti ipapatay, a nangpalubos iti panagungartayo.

2. Binayadanna ti gatad ti amin a basol, a namagbalin a posible iti panagbabawi, panagdur-as, ken panagsublitayo iti Dios. Makatulong met dayta kadatayo a mangpakawan kadagiti dadduma no agbasolda, gapu ta ni Cristo inakona iti bagina dagiti basolda.

3. Napadasannan ti amin nga ut-ot, rigat, sulisog, saksakit, ken kinakapsut (kitaen iti Alma 7:11–13). Kaipapanan dayta nga ammona nga eksakto no kasano ti tumulong ken mangagas kenka ken papigsaennaka tapno maibturam dagiti pannubok ken ikagumaam ti agbalin a nasaysayaat.

Mangpilika iti aniaman a parikut, ket mabalinmo nga ikonekta ti pangrisut iti maysa wenno ad-adu pay kadagita a tallo a kinapudno.

Kinapanglaw? Gapu ta napadasan ni Jesucristo ti amin a banag, ammona nga eksakto no kasano dayta. Saanna a kanayon nga ikkaten ti lapped, ngem mabalinna a papigsaen dagiti tattao a mangibaklay iti dayta a dadagsen (kitaen iti Mosiah 24:15).

Pannakapaay? Gapu ta naparmek ni Cristo ti basol, saan a kasapulan a permanente dagiti pannakapaaytayo. Ti panagbabawi iramanna ti panangpasayaat ken panagbalin nga ad-adda a nasaysayaat a tao nga ammona a mabalintayo a pagbalinan.

Sakit? Gapu ta pinarmekna ti ipapatay, mapagungartayo a naaddaan iti perpekto a bagi a di agsagaba iti sakit ken ut-ot. Ni Cristo pay ket “sagabaenna … ti saksakit” (Alma 7:11), a namagbalin Kenkuana a perpekto a tao a mangidiaya iti liwliwa ken suporta.

Ngem uray no ammotayo no apay a ti Mangisalakan ti sungbat (gapu iti kinasiasinona ken no ania ti inaramidna para kadatayo), kasapulantayo latta nga ammuen no kasano a magun-odtayo ti tulong ken pigsa manipud kenkuana. Adtoy ti sumagmamano a wagas:

Panagkararag. Babaen ti panagkararag iti nagan ni Jesucristo, dagiti saan a perpekto a tattao a kas kadatayo ket makasao iti perpekto a Dios. Mabalin nga ikararagtayo ti pigsa a kasapulantayo iti aniaman a kasasaad, ket sungbatanto ti Dios—saan a kanayon a kas iti kayattayo wenno namnamaentayo, no di ket iti wagas a mangbendision kadatayo. Pudno ti awis ti Mangisalakan: “Dumawatka, ket umawatkanto” (Juan 16:24; 3 Nephi 27:29; Doktrina ken Katulagan 4:7).

Ti Sagut ti Espiritu Santo. Ti Nailangitan nga Ama, ni Jesucristo, ken ti Espiritu Santo ket agkaykaysada iti panggep. Agtitinnulongda! Aniaman a kanito a mariknam ti panangiwanwan wenno panangliwliwa manipud iti Espiritu Santo, maawatam dayta kas tulong met ni Cristo kenka.

Panangtungpal kadagiti Katulagan. Insuro ni Elder Dale G. Renlund ti Korum dagiti Sangapulo-ket-dua nga Apostol: “Ti termino a dana ti katulagan ket maibasar iti maysa a panangsasaganad dagiti katulagan a babaen iti dayta umasidegtayo ken ni Cristo ken makisinningedtayo Kenkuana. Babaen iti daytoy a begkes ti katulagan, magun-odantayo ti agnanayon a pannakabalinna” (Abr. 2023 general conference [Liahona, Mayo 2023, 36]).

Parabur. No usarentayo ti pammati ken ni Jesucristo ken agbabawitayo, mabalintayo ti umawat iti nayon a tulong ken pigsa (maawagan met iti parabur) tapno maipatungpaltayo dagiti banag a ditayo kabaelan a bukbukodtayo (kitaen iti Pangiwanwan iti Nasantuan a Kasuratan, “Parabur”). Daytoy a pigsa, wenno parabur, ket mabalin a dumteng iti adu a wagas: manipud iti Espiritu Santo, maysa a gayyem, maysa a ganggannaet, maysa a rikna. Kinapudnona, aggapu amin a nasayaat a banag ken ni Cristo (kitaen iti Moroni 7:22). No makasarakka laeng iti ad-adu nga anus, ad-adu a pigsa, ad-adu a pigsa nga agibtur, bigbigem dayta kas tulong ni Cristo kenka.

Isu nga inton sumaruno a kasapulam ti sungbat iti maysa a saludsod wenno parikut, kumita ken Cristo. Laglagipen a gapu iti panagballigina iti basol, ipapatay, ken amin a dadduma pay a mortal a karit, awan ti imposible. Sapulem no kasano a bendisionannaka, ket makitamto ti impluensiana iti biagmo. Ay-ayatennakayo unay!