Ni Jesucristo: Ti Namnama ken Kari ti Paskua ti Panagungar

Ti Dios, ti Agnanayon nga Amatayo idiay Langit; ni Jesucristo, ti Ay-ayatenna nga Anak; ken ti Espiritu Santo ket personal a nasinged kadatayo. Ti awan patinggana ken agnanayon a lawag, pannakipagrikna, ken mangsubbot nga ayatda ket naisinggalut iti panggep a pannakaparsua ken ti kaaddatayo (kitaen iti Alma 30:44; Moises 6:62–63).

Iti Konseho iti Langit sakbay daytoy a biag, “dagiti bitbituen ti agsapa nagdaniwda a sangsangkamaysa, ken amin dagiti annak a lallaki [ken dagiti annak a babbai] ti Dios dimmir-ida gapu iti rag-o ” (Job 38:7). Pinilitayo ti pagpilian. Ita, magnatayo iti pammati. Babaen ti bukodtayo a padas, matakuatantayo ti inkari ti Dios a kinapintas, kinalawag, rag-o, ken panggep iti baet dagiti di masigurado a kasasaad, pannakaupay, ken karit ti mortalidad.

Saantayo a nairanta nga aglayag nga agmaymaysa iti di natalged a kasasaad. Mabalintayo ti makikaysa iti langit, mangbangon iti pammati ken maibilang iti pamilia ken iti sangakabbalayan ken komunidad dagiti Santo, ken agbalintayo a pudpudno, nawaya, napaypayso, ken naragsak ti kinataotayo babaen ti situtulok ken naragsak a panagtulnog kadagiti bilin ti Dios. Ti Pannubbot—pan-nub-bot—iti ken babaen ken ni Jesucristo iyegna daytoy a pannakaibilang iti katulagan.

Ti Namnama ti Biag ken Mision ni Jesucristo

Tunggal aldaw, ti namnama ken kari ti Paskua ti Panagungar iramanna dagiti bendision ken pannursuro nga imbinglay ni Jesucristo bayat ti naan-anay a mortal a panagministrona. Naikeddeng a nasaksakbay idi punganay, ni Jesucristo ket nayanak kas Bugbugtong nga Anak ti Dios (kitaen iti Jacob 4:5; Alma 12:33–34; Moises 5:7, 9). Isu ket dimmakkel iti kinasirib ken kinatayag, tapno maay-ayo kenkuana ti Dios ken dagiti tattao (kitaen iti Lucas 2:52). Gapu ta kayatna laeng nga aramiden ti pagayatan ni Amana, pinakawan ni Jesucristo dagiti basol, pinaimbagna dagiti masakit, pinagungarna dagiti natay, ken liniwliwana dagiti masakit ken naliday.

Naminsan, kalpasan ti panagayunona iti 40 nga aldaw, pinaneknekanna:, “Adda kaniak ti Espiritu ti Apo, ta pinulotannak a mangikasaba iti naimbag a damag kadagiti napanglaw; imbaonnak a mangagas iti nasair ti pusona, mangikasaba iti pannakawayawaya dagiti balud, ken panagkita manen dagiti bulsek, pannakaruk-at dagiti maparparigatan” (Lucas 4:18; kitaen met iti Isaias 61:1).

Dayta iti tunggal maysa kadatayo.

Iti Maudi a Pangrabii, binuggoan ni Jesucristo ti saka dagiti disipulona (kitaen iti Juan 13:4–8). Iti agpadpada a Daan ken Baro a Lubong, ti “nabiag a danum” ken “ti tinapay ti biag” nga Isu Mismo ket inyam-ammona ti sakramento. Iti sagrado a sakramento nga ordinansa, umawagtayo iti Ama ket makitulagtayo a mangawat iti nagan ni Jesucristo, kanayon a laglagipentayo, ken tungpalentayo dagiti bilinna, tapno kanayon nga adda kadatayo ti Espirituna (kitaen iti Lucas 22:19–20; 3 Nephi 18:7, 10–11).

Iti Minuyongan ti Getsemani, nagsagaba ni Jesus iti nakarkaro pay ngem ti mabalin a sagabaen ti tao tapno maisalakan ken masubbottayo. Naggapu ti dara iti tunggal teterremanna. Sinagabana ti saem ti amin, tapno saantayo koma nga agsagaba no agbabawitayo (kitaen iti Doktrina ken Katulagan 18:11; 19:16).

Naliputan ken siuulbod a napabasol, ni Jesucristo ket nauy-uyaw ken nasapsaplit, ken maysa a korona ti siit ti naikabil iti nanumo nga ulona (kitaen iti Mateo 27:26, 29; Marcos 15:15, 17, 20, 31; Lucas 22:63; Juan 19:1–2). “Nasugatan gapu kadagiti basbasoltayo … naagasantayo gapu iti pannakasapsaplitna” (Isaias 53:5). Isu ket “nailansa iti krus” tapno mayasidegtayo Kenkuana, (kitaen iti 3 Nephi 27:14–15). Nupay kasta, uray nailansa iti krus, namakawan ni Jesucristo (kitaen iti Lucas 23:34). Kiniddawna ken Juan nga aywananna ti inana (kitaen iti Juan 19:26–27). Nariknana a nabaybay-an (kitaen iti Mateo 27:46; Marcos 15:34). Tapno matungpal ti nasantuan a kasuratan, kinunana a mawaw (kitaen iti Juan 19:28). Idi natungpalen ti amin, Isu a Mismo “nauyosen ti biagna.” (Lucas 23:46; kitaen met iti Juan 10:17–18).

Ammo ni Jesucristo no kasano a tulongannatayo kadagiti sakit, pagkapuyan, kinaliday, pannakaisina, ken rigrigattayo (kitaen iti Alma 7:12). Masansan a dumteng dagiti kasta a panagsagaba kas pagbanagan dagiti pili dagiti dadduma. Ammona met no kasano ti makipagrag-o kadatayo kadagiti pagraragsakan ken panagyamantayo, no kasano a makipagsangit kadatayo no napno ti rag-otayo. Sidudungngo nga awagannatayo iti naganna, babaen ti timekna, iti salinongna. Aw-awaganna ti tunggal tao iti sadinoman. Awisennatayo a mangkita ken mangawat iti mortal a biag babaen ti agnanayon a pannirigan. No magnatayo a sililinteg ken tungpalentayo dagiti katulagantayo, ikarina nga amin a banag ket mabalin nga agtitinnulong para iti pagimbagantayo (kitaen iti Doktrina ken Katulagan 90:24; Taga Roma 8:28).

Iti panawen ken wagasna, umay ti pannakaisubli—saan laeng no kasano ti kasasaad dagiti bambanag idi no di ket iti mabalinda pay a pagbalinan. Pudno unay, ni Jesucristo ket mawayawayaannatayo manipud iti pannakaadipen ken basol, manipud iti ipapatay ken impierno, ken matulongannatayo a mangtungpal iti nadiosan a kinasiasinotayo bayat nga agbalintayo nga ad-adda ngem iti impagaruptayo, babaen ti pammati ken panagbabawi.

Gapu ken ni Jesucristo, saan a kanibusanan ti ipapatay. Iti Paskua ti Panagungar iwaragawagtayo:

Babaen ti bilin ken pannakabalin manipud iti Amana, sisasagana ni Jesus a mangipaay iti biagna, tapno alaennanto met laeng (kitaen iti Juan 10:17). Bayat a naikabil ti bagina iti tanem, nagserbi ken binukel ni Jesucristo iti lubong dagiti espiritu, a nangipakpakdaar iti “pannakasubbotda manipud iti pammalud ni patay” (Doktrina ken Katulagan 138:16).

Iti agsapa ti maikatlo nga aldaw, nagungar manipud iti tanem. Nakisarita ken ni Maria. Nagparang iti dua a disipulo iti dalan nga agturong idiay Emmaus, kadagiti Apostolna, ken iti dadduma pay. (Kitaen iti Mateo 28; Marcos 16; Lucas 24; Juan 20.)

Iti chiasmatic a pammaneknek, inawisna dagiti disipulona a mangipuruak kadagiti iketda iti sabali a bangir ti bangka; iti daytoy a gundaway, nupay napno manen iti ikan, saan a nadadael dagiti iket (kitaen iti Juan 21:6–11; Lucas 5:3–7). Pinakanna dagiti disipulona ken namitlo nga impakaasina ken Pedro a pakanenna dagiti karnerona (kitaen iti Juan 21:12–17). Immuli iti langit, nga impakdaarna a dagiti disipulona idi ken datayo amin ita ket rumbeng nga ibinglay ti nadayag a damag ti Paskua ti Panagungar ken ti ebangheliona iti tunggal nasion, puli, ken tattao (kitaen iti Mateo 28:19–20; Marcos 16:15).

Ni Jesucristo ti Naimbag a Pastortayo ken ti Kordero ti Dios. Intedna ti biagna, ken itedna ti biagna, kadagiti karnerona. Iti hardin ken iti krus, imbaklayna iti di maibturan ken sinubbot na tayo. Iti panawen ken kinaagnanayon, ipakitana kadatayo babaen ti ulidanna no kasano a ti “ipapatay luktanna ti dalan nga agturong iti kinaagnanayon.”

Babaen ti pannakabalin ti Pannubbot ken Panagungar ni Cristo, agkaykaysanto manen ti bagi ken espiritutayo iti pisikal a panagungar. Agbalintayto a nadayag, a maisubli ti rupa ken ti pisikal a langatayo, amin a dagiti ima ken saka. Uray dagiti buok ti ulotayo maisublidanto. Mawayawayaantayo kadagiti sakit ti panawen, saksakit, pisikal nga aksidente, ken kinakapuy ti panunot. Ti Pannubbot ni Cristo ket mabendisionannatayo tapno maparmektayo ti tunggal kita ti naespirituan a panagsina ken naespirituan nga ipapatay. No agbabawitayo, mawayawayaantayo iti amin a basol ken ladingit ken maaddaantayo iti agnanayon a kinanaan-anay ti ayat ken rag-o. Natarnaw, nadalus, nawaya, mabalintayo ti agsubli kadagiti ipatpategtayo unay a relasion ti pamiliatayo iti nadayag, celestial nga imatang ti Dios nga Amatayo ken ni Jesucristo.

Makitatayto manen dagiti ay-ayatentayo. Inton agkakaduatayto manen kadagiti ipatpategtayo, agkikitatayonto nga addaan iti maysa nga agnanayon a pannirigan—nga addaan iti dakdakkel nga ayat, pannakaawat, ken kinaimbag. Ti Pannubbot ni Jesucristo ket matulongannatayo a manglagip kadagiti napateg ken manglipat no ania ti saan a napateg. Ti panangkita iti Mangisalakantayo ken kadagiti relasiontayo nga addaan iti dakdakkel a pammati ken panagyaman ket mangyeg iti talna, mangitag-ay kadagiti dadagsen, mangitunos kadagiti puso, ken mamagkaykaysa kadagiti pamilia ita a panawen ken iti agnanayon.

Ti Namnama ti Kinawadwad ken Rag-o .

Ti Paskua ti Panagungar ken ni Jesucristo ket iramanna dagiti tawa ti panaglukat ti langit, panagadu ti bunga ti ubas, ken panagbalin a makaay-ayo dagiti daga. Ti Paskua ti Panagungar ken ni Jesucristo iramanna ti panangliwliwa ken panangaywan kadagiti balo ken naulila, dagiti mabisin ken awan gawayna, dagidiay mabuteng, maabuso, wenno awan basolda a natiliwan iti wagas a makadangran. Gapu ta sipapanunot iti tunggal maysa, awisennatayo ni Jesucristo a mangkita ken agministro iti ayat ken pannakipagrikna, kas iti ar-aramidenna.

Iti amin a nasayaat a banag, ni Jesucristo ket isublina a nawadwad (kitaen iti Juan 10:10; Alma 40:20–24). Inkarina a “napno ti daga, ket adda umdas ken maispal” (Doktrina ken Katulagan 104:17). Ti pannakaisublina dagiti amin a banag ket mairaman ti pakabuklan ti ebangheliona, ti turay ken pannakabalin ti priesthoodna ken dagiti sagrado nga ordinansa ken katulagan a masarakan iti Simbaanna, a naawagan iti naganna, uray ti Ti Simbaan ni Jesucristo dagiti Santo iti Ud-udina nga Aldaw.

Ti Paskua ti Panagungar ken ni Jesucristo ket iramanna dagiti ad-adu pay a nasantuan a balay ti Apo nga umasideg kadagiti annak ti Dios iti adu a lugar, a mangyeg iti puspusotayo ti doktrina ti “mangisalakan idiay Bantay Sion” (kitaen iti Obadias 1:21). Mangipaay ti Apo iti mangpaspasanto, saan a managimbubukod a wagas a pakaipaayantayo ditoy daga ti kasapulan ken tarigagayan dagiti pimmusay nga ipatpategtayo iti agnanayon a saanda a magun-od para iti bagbagida.

Daytoy ti namnamak, karik, ken pammaneknekko. Paneknekak ti Dios nga Amatayo; ti Mangisalakan ken Mannubbottayo, ni Jesucristo; ken ti Espiritu Santo. Iti Paskua ti Panagungar ken iti tunggal aldaw, sapay koma ta masarakantayo ti agnanayon a namnama ken kari iti nadiosan a plano ti Dios iti kinaragsak, agraman ti dana ti katulagan iti nadiosan a panagbalbaliw manipud iti mortalidad nga agbalin nga imortalidad ken biag nga agnanayon. Tunggal aldaw, sapay koma ta ti kinapudno a Pannubbot ni Jesucristo itag-ayna dagiti dadagsentayo, tulongannatayo a mangliwliwa kadagiti dadduma kadagiti ladingitda, ken wayawayaanna dagiti kararuatayo a mangawat iti naan-anay a rag-ona.

Babaen ti namnama ken kari ti Paskua ti Panagungar, punnuen ni Jesucristo dagiti tarigagay ti puspusotayo ken sungbatanna dagiti saludsod ti kararuatayo.