Bulig halin kay Jesucristo: Ang Ngaa kag Paano

Sang gin-antos Niya ang Iya nagabayad-sala nga sakripisyo, ginhimo sang Manluluwas ang tatlo ka importante nga mga butang:

1. Gindaug Niya ang kamatayon, nga nagatugot sa aton nga mabanhaw.

2. Ginbayran Niya ang bili sang tanan nga sala, nga nagapatigayon sa aton nga makahinulsol, magtubo, kag magbalik sa Dios. Nagabulig man ina sa aton nga patawaron ang iban kon makasala sila, tungod ginpas-an ni Cristo sa Iya Kaugalingon ang ila mga sala.

3. Naeksperiyensyahan Niya ang tanan naton nga mga kasakit, mga pag-antos, mga tentasyon, mga balatian, kag mga kasablagan (tan-awa sa Alma 7:11–13). Buot silingon nga kabalo Sia mismo kon paano ka buligan kag paayuhon kag pabaskugon para masarangan mo ang imo mga pagtilaw kag magtinguha nga mangin mas maayo.

Magpili ka sang bisan ano nga problema, kag pwede mo iangot ang solusyon pabalik sa isa ukon sobra pa sa sinang tatlo ka kamatuoran.

Kaimulon? Tungod naeksperiyensyahan ni Jesucristo ang tanan nga butang, kabalo Sia mismo kon daw ano ina. Wala Niya pirme ginakakas ang mga sablag, pero pwede Niya pabakuron ang mga tawo nga nagadala sina nga kalargahon (tan-awa sa Mosias 24:15).

Kapaslawan? Tungod nalampuwasan ni Cristo ang sala, ang aton mga kapaslawan indi kinahanglan nga mangin permanente. Ang paghinulsol ginaupdan sang pag-uswag kag pagtinguha nga mangin mas mga tawo nga nahibal-an Niya nga sarang kita mangin.

Balatian? Tungod gindaug Niya ang kamatayon, mabanhaw kita nga may perpekto nga lawas nga indi madutlan sang balatian kag sakit. “[Gindala man] [ni Cristo] sa iya kaugalingon … ang mga balatian” (Alma 7:11), amo nga Sia ang perpekto nga tawo nga makahatag sang kaumpawan kag suporta.

Bisan pa nga kabalo kita kon ngaa ang Manluluwas ang sabat (tungod sa kon sin-o Sia kag sa Iya ginhimo para sa aton), kinahanglan naton gihapon mabal-an kon paano kita magpangayo sang bulig kag kusog halin sa Iya. Ari ang pila ka pamaagi:

Pangamuyo. Paagi sa pagpangamuyo sa ngalan ni Jesucristo, ang indi perpekto nga mga tawo pareho sa aton pwede makighambal sa perpekto nga Dios. Pwede kita magpangamuyo para sa kabaskog sa bisan ano nga sitwasyon, kag ang Dios magasabat—indi sa paagi nga gusto naton ukon ginapaabot naton, kundi sa paagi nga mabugayan kita. Matuod ang imbitasyon sang Manluluwas: “Pangayo, kag magabaton kamo” (Juan 16:24; 3 Nefi 27:29; Doktrina kag mga Kasugtanan 4:7).

Ang Dulot sang Balaan nga Espiritu. Ang Amay nga Langitnon, si Jesucristo, kag ang Balaan nga Espiritu nagaisa sa katuyuan. Upod sila nga nagatrabaho! Tagsa nga mabatyagan mo ang paggiya ukon pagpaumpaw sang Balaan nga Espiritu, mahimo mo ini intiendihon nga ginabuligan ka man ni Cristo.

Pagtuman sang mga Kasugtanan. Si Elder Dale G. Renlund sang Korum sang Dose ka Apostoles nagtudlo: “Ang tinaga nga dalan sang kasugtanan nagatumod sa serye sang mga kasugtanan kon diin nagapalapit kita kay Cristo kag nagapakig-angot sa Iya. Paagi sa sining kaangtanan sa kasugtanan, makatigayon kita sang Iya wala katapusan nga gahum” (Abr. 2023 pangkabilogan nga komperensya [Liahona, Mayo 2023, 36]).

Grasya. Kon nagagamit kita sang pagtuo kay Jesucristo kag nagahinulsol, makabaton kita sang dugang nga bulig kag kusog (nga ginatawag man nga grasya) para matuman ang mga butang nga indi naton mahimo nga kita lang (tan-awa sa Guide to the Scriptures, “Grace”). Ini nga kusog, ukon grasya, mahimo mag-abot sa madamo nga paagi: halin sa Balaan nga Espiritu, sa abyan, sa indi kilala, sa pamatyagon. Kon pamensaron, ang tanan nga maayo nagahalin kay Cristo (tan-awa sa Moroni 7:22). Kon makakita sang dugang pa gid nga pasensya, dugang pa nga kapagsik, dugang pa nga kusog sa pagpadayon, kilalaha ina bilang si Cristo nga nagabulig sa imo.

Gani sa dason nga kinahanglan mo sang sabat sa pamangkot ukon problema, magtulok kay Cristo. Tandai nga tungod sang pagdaog Niya sa sala, kamatayon, kag iban pa nga kabudlayan sa kabuhi, wala sang imposible. Pangitaa kon paano kamo Niya mabugayan, kag makita ninyo ang Iya impluwensya sa inyo kabuhi. Palangga Niya kamo kaayo!