Jesucristo: Ang Paglaum kag Promisa sang Paskwa sang Pagkabanhaw

Ang Dios nga aton Wala Katapusan nga Amay sa Langit, si Jesucristo, ang Iya Pinalangga nga Anak; kag ang Balaan nga Espiritu personal nga malapit sa aton. Ang ila wala dulunan kag wala katubtuban nga kasanag, kaluoy, kag nagatubos nga pagpalangga makita sa katuyuan sang pagtuga kag sa pundasyon sang aton pagkabuhi (tan-awa sa Alma 30:44; Moises 6:62–63).

Sa premortal nga Konseho sa Langit, “nag-ambahan sing tingob ang kabituonan sang kaagahon, kag naghinugyaw sa kalipay ang tanan nga anak sang Dios” (Job 38:7). Ginpili naton ang kahilwayan sa pagpili. Karon nagapanglakaton kita sa pagtuo. Paagi sa aton kaugalingon nga eksperiyensya, madiskubrehan naton ang ginpromisa sang Dios nga katahum, kaathagan, kalipay, kag katuyuan sa tunga sang kawala-kasigurohan, kapaslawan, kag mga kabudlayan.

Wala kita gintuyo nga magtalang-talang nga kita lang sa wala piho nga pangabuhi. Pwede kita makig-angot sa langit, magpatubo sang pagtuo kag mangin miyembro sang pamilya kag panimalay kag komunidad sang mga Santos, kag mangin ang aton pinakamatuod, pinakahilway, pinakasinsero, malipayon nga kaugalingon nga handa kag malipayon nga nagatuman sang mga kasuguan sang Dios. Ang Pagbayad-Sala—sa kag paagi kay Jesucristo nagadala sining pagpasakop sa kasugtanan.

Ang Paglaum sa Kabuhi kag Misyon ni Jesucristo

Kada adlaw, ang paglaum kag promisa sang Paskwa sang Pagkabanhaw may upod nga mga bugay kag pinanudlo ni Jesucristo nga ginpakigbahin sang panahon sang Iya perpekto nga pag-alagad sa duta. Ginpili na ngadaan sa ginsuguran, si Jesucristo nabata bilang Bugtong nga Anak sang Dios (tan-awa sa Jacob 4:5; Alma 12:33–34; Moises 5:7, 9). Nagdako Sia sa kaalam kag kataason, nga nahamut-an sang Dios kag tawo (tan-awa sa Lucas 2:52). Nga nagahandum lamang nga himuon ang pagbuot sang Iya Amay, si Jesucristo nagpatawad sang mga sala, nagpaayo sang mga kasablagan, nagbuhi sang mga patay, kag nagpaumpaw sang mga nagamasakit kag nagaisahanon.

Sa isa ka tion, pagkatapos nga magpuasa sang 40 ka adlaw, nagpamatuod Sia, “Ang Espiritu sang Ginuo yari sa akon, tungod kay ginpili niya ako sa pagwali sang maayong balita sa mga imol; ginpadala niya ako sa pag-ayo sang mga napaslawan, sa pagpahibalo sang kahilwayan sa mga bihag, kag sa pag-ayo sang panulok sang mga bulag, sa paghilway sang mga ginapigos” (Lucas 4:18; tan-awa man sa Isaias 61:1).

Kita ina tanan.

Sa Katapusan nga Panyapon, ginhugasan ni Jesucristo ang mga tiil sang Iya mga disipulo (tan-awa sa Juan 13:4–8). Sa Daan kag Bag-o nga mga Kalibutan, ang “buhi nga tubig” kag “tinapay sang kabuhi” Mismo ang nagpahamtang sang sakramento. Sa sagrado nga ordinansa sang sakramento, nagatawag kita sa Amay kag nagapakighisugot sa pagdala sa aton mga kaugalingon sang ngalan ni Jesucristo, dalayon Sia nga dumdumon, kag magtuman sang Iya mga kasugoan, agud nga dalayon naton nga makaupod ang Iya Espiritu (tan-awa sa Lucas 22:19–20; 3 Nefi 18:7, 10–11).

Sa Hardin sang Getsemani, nag-antos si Jesus masobra pa sa maantos sang tawo para magtubos kag magbayad-sala para sa aton. Naggwa ang dugo sa tagsa ka buho-buho sang panit. Gin-antos Niya ining kasakit para sa tanan, para indi kita mag-antos kon maghinulsol kita (tan-awa sa Doktrina kag mga Kasugtanan 18:11; 19:16).

Gintraidoran kag ginbutang-butangan, ginyaguta si Jesucristo kag ginbakol, kag gindasok ang korona nga tunok sa mapainubuson Niya nga ulo (tan-awa sa Mateo 27:26, 29; Marcos 15:15, 17, 20, 31; Lucas 22:63; Juan 19:1–2). “Ginpilas tungod sang aton mga paglalis … sa iya mga labod ginaayo kita.” (Isaias 53:5). “Ginlansang sia sa krus” para madala kita palapit sa Iya (tan-awa sa 3 Nefi 27:14–15). Pero, bisan ara na sa krus, nagpatawad si Jesucristo (tan-awa sa Lucas 23:34). Ginpangabay Niya si Juan nga atipanon ang Iya iloy (tan-awa sa Juan 19:26–27). Nakabatyag Sia nga ginpatumbayaan Sia (tan-awa sa Mateo 27:46; Marcos 15:34). Para matuman ang balaan nga kasulatan, nagsiling Sia nga ginauhaw Sia (tan-awa sa Juan 19:28). Sang natapos na Niya ang tanan, Sia sa Iya kagustohan “[nahunosan sang] ginhawa” (Lucas 23:46; tan-awa man sa Juan 10:17–18).

Nahibal-an ni Jesucristo kon paano kita buligan sa aton mga balatian, kasablagan, kamingaw, pag-isahanon, kag mga kabudlayan (tan-awa sa Alma 7:12). Ini nga mga kalisdanan kasami nagaabot bilang konsikwensya sang mga pagpili sang iban. Kahibalo man Sia kon paano magpangalipay upod sa aton sa aton mga kalipayan kag pagpasalamat, kon paano maghibi upod sa aton kon puno ang aton kalipay. Maluluy-on, ginatawag Niya kita sa Iya ngalan, paagi sa Iya tingug, padulong sa Iya panong. Ginatawag Niya ang tagsa ka tawo sa bisan diin. Ginahagad Niya kita nga tan-awon kag intiendihon ang mortal nga kabuhi sa perspektibo sang wala katapusan. Kon nagahimo kita sang matarong kag ginatuman ang aton mga kasugtanan, nagapromisa Sia nga ang tanan nga butang magaresulta sa aton kaayohan (tan-awa sa Doktrina kag mga Kasugtanan 90:24; Mga Taga-Roma 8:28).

Sa Iya tiyempo kag pamaagi, magaabot ang pagpanumbalik—indi lamang sa kon ano sadto kundi kon paano man ini mangin sa palaabuton. Matuod gid, sarang kita hilwayon ni Jesucristo sa pagkaulipon kag sala, sa kamatayon kag impiyerno, kag mabuligan kita nga matuman ang aton diosnon nga pagkatawo samtang nagauswag kita sobra pa sa aton ginahunahuna, paagi sa pagtuo kag paghinulsol.

Tungod kay Jesucristo, ang kamatayon indi ang katapusan. Sa Paskwa sang Pagkabanhaw ginadeklarar naton:

Paagi sa sugo kag gahum sang Iya Amay, ginhatag ni Jesus ang Iya kabuhi kag ginbawi ini liwat (tan-awa sa Juan 10:17). Samtang nahaya ang Iya lawas sa lulubngan, nag-alagad si Jesucristo kag nag-organisar sa kalibutan sang mga espiritu, nga ginapahayag ang “ila pagtubos halin sa mga gapos sang kamatayon” (Doktrina kag mga Kasugtanan 138:16).

Sang aga sang ikatatlo nga adlaw, nagbangon Sia halin sa lulubngan. Nakighambal Sia kay Maria. Nagpakita Sia sa duha ka disipulo sa dalan pa-Emaus, sa Iya Apostoles, kag sa iban pa. (Tan-awa sa Mateo 28; Marcos 16; Lucas 24; Juan 20.)

Sa makakumbinsi nga testimonya, gin-imbitar Niya ang Iya mga disipulo nga ihaboy ang ila mga pukot sa pihak sang lansa; sa sini nga hugada, bisan napuno liwat sang isda, wala magisi ang mga pukot (tan-awa sa Juan 21:6–11; Lucas 5:3–7). Ginpakaon Niya ang mga disipulo kag nagpangabay sing tatlo ka beses kay Pedro nga pakan-on ang Iya mga karnero kag cordero (tan-awa sa Juan 21:12–17). Nagkayab Sia pa-langit, nga nagapahayag sa Iya mga disipulo sadto kag sa aton tanan subong nga ipakigbahin ang mahimayaon nga balita sang Paskwa sang Pagkabanhaw kag ang Iya ebanghelyo sa tagsa ka nasyon, kaliwatan, kag katawhan (tan-awa sa Mateo 28:19–20; Marcos 16:15).

Si Jesucristo ang aton Maayo nga Manugbantay kag ang Cordero sang Dios. Ginhalad Niya ang Iya kabuhi para sa, kag ginahatag ang Iya kabuhi sa, Iya mga karnero. Sa hardin kag sa krus, ginbatas Niya ang indi mabatas kag nagbayad-sala para sa aton. Sa sining kabuhi kag sa wala katubtuban, ginapakita Niya sa aton paagi sa ehemplo kon paano “ginabuksan sang kamatayon ang alagyan padulong sa wala katubtuban.”

Paagi sa gahum sang Pagbayad-Sala kag Pagkabanhaw ni Cristo, ang aton mga lawas kag espiritu magatingob sa liwat sa pisikal nga pagkabanhaw. Mangin mahimayaon kita, nga ginpanumbalik sa dagway kag pisikal nga porma, halin sa kamot pakadto sa tiil. Bisan ang mga buhok sa aton mga ulo ipanumbalik. Mangin hilway kita sa mga balatian sang mortalidad, pagmasakit, pisikal nga aksidente, kag mental nga kasablagan. Ang Pagbayad-Sala ni Cristo sarang magbugay sa aton para malampuwasan ang tagsa ka klase sang espirituhanon nga pagkaseparar kag espiritwal nga kamatayon. Sa kondisyon sang paghinulsol, mahilway kita sa tagsa ka sala kag kasubo kag mabuksan sa wala katapusan nga kabug-osan sang pagpalangga kag kalipay. Puro, matinlo, hilway, makabalik kita sa aton pinakaginahandum nga relasyon sa pamilya sa mahimayaon, selestiyal nga presensya sang Dios nga aton Amay kag ni Jesucristo.

Makita naton liwat ang aton mga mahal sa kabuhi. Kon mahiusa kita liwat sa aton mga pinalangga, makita naton ang kada isa sa perspektibo sang wala katapusan—nga may mas dako nga pagpalangga, paghangop, kag kaayo. Ang Pagbayad-Sala ni Jesucristo makabulig sa aton mga madumduman ang importante kag malimtan ang indi importante. Kon tan-awon naton ang aton Manluluwas kag ang mga relasyon nga may dako nga pagtuo kag pagpasalamat nagadala ini sang kalinong, nagapamag-an sang mga palas-anon, nagahiusa sang mga tagipusuon, kag nagaisa sang mga pamilya sa sining kabuhi kag sa wala katapusan.

Ang Paglaum sang Kabuganaan kag Kalipay

Ang Paskwa sang Pagkabanhaw kay Jesucristo nagalakip sang pagbukas sang mga bintana sang langit, pagdamo sang mga bunga sang ubas, kag makalilipay nga kadutaan. Ang Paskwa sang Pagkabanhaw kay Jesucristo nagalakip sang pagpaumpaw kag pag-atipan sang mga balo kag mga ilo, sang ginagutom kag wala sang madangpan, sang mga ginahadlukan, gin-abuso, ukon mga naulamid sa peligro. Nga ginapanumdom ang kada isa, ginaimbitar kita ni Jesucristo nga mag-ulikid kag mag-alagad nga may pagpalangga kag kaluoy, pareho sang Iya ginahimo.

Sa tanan nga maayong butang, si Jesucristo bugana nga nagapanumbalik (tan-awa sa Juan 10:10; Alma 40:20–24). Nagapromisa Sia nga “bugana ang duta, kag bastante ini kag may sobra pa” (Doktrina kag mga Kasugtanan 104:17). Ang pagpanumbalik Niya sang tanan nga butang nagasakop sang kabug-osan sang Iya ebanghelyo, sang awtoridad kag gahum sang Iya priesthood, kag sang sagrado nga mga ordinansa kag mga kasugtanan nga makita sa Iya Simbahan, nga ginatawag sa Iya ngalan, nga amo ang Ang Simbahan ni Jesucristo sang mga Santos sa Ulihing mga Adlaw.

Ang Paskwa sang Pagkabanhaw kay Jesucristo nagalakip sang mas madamo nga balaan nga mga balay sang Ginuo nga mas nagalapit na gid sa mga anak sang Dios sa madamo nga lugar, nga nagadala sa aton mga tagipusuon sang doktrina sang “mga manluluwas sa Bukid sang Sion” (tan-awa sa Abdias 1:21). Ang Ginuo nagaaman sang nagatinlo, maalwan nga paagi para sa aton nga patigayonon sa duta ang kinahanglanon kag ginahandum sang nagtaliwan na nga mga mahal sa kabuhi sa wala katapusan nga indi nila mabaton nga sila lang.

Amo sini ang akon paglaum, promisa, kag testimonya. Nagasaksi ako sa Dios nga aton Amay; sa aton Manluluwas kag Manunubos nga si Jesucristo; kag sa Balaan nga Espiritu. Sa panahon sang Paskwa sang Pagkabanhaw kag sa adlaw-adlaw, kabay nga makita naton ang wala katapusan nga paglaum kag promisa sa plano sang kalipayan sang Dios, upod ang dalan sang kasugtanan sa diosnon nga pagbag-o halin sa mortalidad padulong sa pagkaimortal kag wala katapusan nga kabuhi. Kada adlaw kabay nga ang kasigurohan sang Pagbayad-Sala ni Jesucristo magaalsa sang aton mga palas-anon, magabulig sa aton nga paumpawan ang iban sa ila mga kasubo, kag hilwayon ang aton mga kalag para mabaton ang Iya bug-os nga kalipay.

Paagi sa paglaum kag promisa sang Paskwa sang Pagkabanhaw, ginapun-an ni Jesucristo ang mga ginahandum sang aton tagipusuon kag ginasabat ang mga pamangkot sang aton mga kalag.