Veivuke mai vei Jisu Karisito: Na Vuna kei na Kena Sala

Ni vosota o Koya na Nona isoro ni veisorovaki, a cakava na iVakabula e tolu na ka bibi:

1. A vakamalumalumutaka na mate, e rawa kina ni da tucaketale.

2. A sauma na isau ni ivalavala ca kecega, ka rawa kina vei keda me da veivutuni, tubu, ka lesu vua na Kalou. Oqori ena vukei keda talega meda vosoti ira na tani ni ra ivalavala ca, baleta ni a colata na Karisito na nodra ivalavala ca.

3. A sotava na mosi, veivakararawataki, veitemaki, tauvimate, kei na malumalumu kecega (raica na Alama 7:11–13). Sa kena ibalebale oqori ni kila vakavinaka tu o Koya na sala me vukei iko ka vakabulai iko ka rawa ni vaqaqacotaki iko mo vosota na veivakatovolei ka segata mo vinaka cake.

Digitaka e dua na leqa, ka rawa ni o sema lesu na iwali ki na dua se sivia na tolu na dina oqori.

Dravudravua? Baleta ni a sotava o Jisu Karisito na veika kecega, e kila vakavinaka tu o Koya na kena irairai. E sega ni dau kauta laivi o Koya na veivakataotaki, ia e rawa ni vaqaqacotaki ira na tamata era colata na icolacola o ya (raica na Mosaia 24:15).

Druka? Baleta ni a vakamalumalumutaka na ivalavala ca na Karisito, e sega ni gadrevi me tudei na noda druka. Na veivutuni e oka kina na vakatorocaketaki ka yaco vakalevu cake mo tamata e kila o Koya ni rawa ni da vakakina.

Tauvimate? Baleta ni a vakamalumalumutaka na mate o Koya, eda na tucaketale vata kei na yago uasivi sara ka sega ni tauvimate kei na mosi. Sa “[taura] talega ko Karisito tauvimate” (Alama 7:11), ka vakavuna me tamata uasivi sara me solia na veivakacegui kei na veitokoni.

Ia ena gauna mada ga eda kila kina na vuna e isau ni taro kina na iVakabula (baleta o cei o Koya kei na veika sa cakava vei keda), eda se gadreva tikoga meda kila na sala eda rawata kina na veivuke kei na kaukauwa mai Vua. Oqo e vica na ivakaraitaki:

Masu. Nida masu ena yaca i Jisu Karisito, e rawa ni ra vosa vua e dua na Kalou uasivi sara na tamata sega tu ni taucoko vakataki keda. E rawa ni da masulaka na kaukauwa eda gadreva ena ituvaki cava ga, ka na sauma mai na Kalou—sega ni dau yaco ena sala eda vinakata se namaka, ia ena sala eda na vakalougatataki kina. E dina na veisureti ni iVakabula: “Dou kerekere, ena soli vei kemudou” (Joni 16:24; 3 Nifai 27:29; Vunau kei na Veiyalayalati 4:7).

Na isolisoli ni Yalo Tabu. Na Tamada Vakalomalagi, o Jisu Karisito, kei na Yalo Tabu eratou vakatokai me Le Tolu Vakalou Era na cakacaka vata! Ena gauna ga o vakila kina na veidusimaki se vakacegu mai vua na Yalo Tabu, sa rawa mo kila ni sa vukei iko talega na Karisito.

Maroroi ni Veiyalayalati. E vakavulica o Elder Dale G. Renlund ena Kuoramu ni iApositolo Le Tinikarua: “Na vosa salatu ni veiyalayalati e vakaibalebaletaki ki na vica na veiyalayalati veitaravi eda lako mai kina vei Karisito ka semati Vua. Mai na ivau ni veiyalayalati oqo, eda na rawata kina na Nona kaukauwa tawamudu” (Epe. 2023 koniferedi raraba [Liaona, Me 2023, 36]).

Loloma soliwale. Ni da cakacakataka na vakabauti Jisu Karisito ka veivutuni, eda na ciqoma na ikuri ni veivuke kei na kaukauwa (ka vakatokai talega me loloma soliwale) me da rawata kina na veika eda na sega ni rawa ni cakava vakataki keda (raica na iDusidusi ki na iVolanikalou, “Loloma Soliwale”). Na kaukauwa oqo, se loloma soliwale, e rawa ni yaco mai ena vuqa na sala: mai vua na Yalo Tabu, e dua na itokani, vulagi, e dua na yalo. Na ka e vinaka e lako mai vei Karisito (raica na Moronai 7:22). Ni o kunea e dua na vosota levu cake, e levu cake na nomu igu, na kaukauwa levu cake mo vosota, kila ni vukei iko tiko kina o Karisito.

Ena gauna o na gadreva kina e dua na isau ni dua na taro se leqa, rai vei Karisito. Nanuma tiko ni baleta na Nona qaqa mai na ivalavala ca, mate, kei na bolebole kece tale eso ni bula oqo, e sega ni dua na ka e dredre. Vakasaqara na sala e rawa ni vakalougatataki iko kina o Koya, o na raica kina na Nona veivakayarayarataki ena nomu bula. E lomani iko vakatitobu sara o Koya.