Unwam otode Jesus Christ: Ntak ye Didie

Ke ini Enye ɔkɔyɔde uwa usio-isop Esie, Andiyaŋa ama anam mme akpan ŋkpɔ ita:

1. Enye ama akan mkpa, emi ayakde nnyin iset ke mkpa.

2. Enye ama ekpe ekɔm urua ɔnɔ kpukpru idiɔk-ŋkpɔ, oro anam nnyin ikan ikabade esit, ikɔri, inyuŋ ifiak itiene Abasi. Oro ŋko anwam nnyin ikan ifen inɔ mbon efen ke ini mmɔ enamde idiɔk-ŋkpɔ, ke ntak emi Christ ekemende idiɔk-ŋkpɔ mmɔ odori ke idem Esie.

3. Enye ama enyene kpukpru mme ubiak, mme ukut, mme idomo, mme udɔŋɔ, ye mme mmem-idem (se Alma 7:11–13). Oro ɔwɔrɔ ete ke Enye ɔfiɔk nte enwamde enyuŋ ekɔkde fi ndien ekeme ndisɔŋɔ fi ndiyɔ mme idomo ndien akabade ɔfɔn akan akpa.

Sio mfina ekededi, ndien afo oyokut ibɔrɔ ke kiet me ke awakde akan oro ke mme akpanikɔ ita oro.

Ubuene? Ke ntak emi Jesus Christ ɔkɔfiɔkde kpukpru ŋkpɔ, Enye ɔfiɔk ukem ukem nte edide. Enye isisioho ŋkpɔ-ubiɔŋɔ kpukpru ini, edi Enye ekeme ndisɔŋɔ mme owo emi ebiomde mbiomo oro (se Mosiah 24:15).

Iduɔ? Ke ntak emi Christ akakande idiɔk-ŋkpɔ, inaha nte iduɔ nnyin edi ke nsinsi. Ndikabade esit esine ndifɔn ŋkan akpa nyuŋ ŋkabade ndi owo emi Enye ɔfiɔkde ete ke nnyin imikan idi.

Udɔŋɔ? Ke ntak emi Enye ekekande mkpa, nnyin iyiset ye mme mfɔn-mma idem emi minyeneke udɔŋɔ ye ubiak. Christ ŋko ama “[emen] … udɔŋɔ ɔnɔ idem esie” Alma 7:11), emi anamde Enye edi mfɔn-mma owo ndinɔ idɔŋesit ye uŋwam.

Edi kpa ke ini nnyin ifiɔkde ntak Andinyaŋa edide ibɔrɔ (ke ntak owo emi Enye edide ye se Enye anamde ɔnɔ nnyin), ana nte nnyin isuk ifiɔk didie ke nnyin inyene unwam ye odudu ito Enye. Emi edi mme usuŋ ifaŋ:

Akam. Ke ndibɔŋ akam ke enyiŋ Jesus Christ, mme idiɔk owo nte nnyin imikeme nditiŋ ikɔ ye eti Abasi. Nnyin imikeme ndibɔŋ akam nnɔ odudu emi nnyin iyomde ke ini ekededi, ndien Abasi eyebɔrɔ—idighe kpukpru ini ke usuŋ emi nnyin iyomde mme ikerede, edi ke usuŋ emi edidiɔŋde nnyin. Ikoot Andinyaŋa edi akpanikɔ: “Beŋe, ndien afo eyebɔ” John 16:24; 3 Nephi 27:29; Doctrine and Covenants 4:7).

Enɔ Edisana Spirit. Ete ke Heaven, Jesus Christ, ye Edisana Spirit edi kiet ke utom. Mmɔ enam utom kiet! Ini kiet ekededi emi afo okopde ndausuŋ mme ndɔŋesit oto Edisana Spirit, afo emekeme ndifiɔk ete ke Christ ke anwam mfi ŋko.

Ndinim mme Ediomi. Elder Dale G. Renlund: eke eboho mme Apostle Duopeba ekpep ete: “Ikɔ oro usuŋ ediomi ɔwɔrɔ ediwak ediomi emi nnyin idade itiene Christ inyuŋ iyire ye Enye. Otode ke ubiɔŋ ediomi emi, nnyin imenyene usuŋ ikesim nsinsi odudu Esie” (Apr. 2023 general conference [Liahona, May 2023, 36]).

Mfɔn. Ke ini nnyin inyenede mbuɔtidem ke Jesus Christ inyuŋ ikabadere esit, nnyin imikeme ndibɔ unwam odudu efen (emi ekotde mfɔn ŋko) ndinam mme ŋkpɔ emi nnyin mikpikeme ndinam ke idem nnyin (se Guide to the Scriptures, “ Grace”). Odudu emi, mme mfɔn, ekeme ndito ediwak usuŋ: oto Edisana Spirit, ufan, esen-owo, ntuk. Akpan-akpan, eti ŋkpɔ ndomo kiet oto Christ (se Moroni 7:22). Edieke okutde ekpri ime, ekpri odudu, ekpri ukeme ndiyɔ, kut oro nte ke Christ anwam fi.

Ke ntre ini efen emi afo oyomde ibɔrɔ ɔnɔ mbume mme mfina, se Christ. Ti ete ke ntak edikan Esie ke idiɔk-ŋkpɔ, mkpa, ye ofuri mme mfina uwem efen, ŋkpɔ ndomo kiet isɔŋke ikaha. Yom nte Enye ekemede ndinwam fi, ndien afo oyokut idiɔŋɔ Esie ke uwem fo. Enye ama fi eti-eti.