Jesus Christ: Idorenyin ye Eŋwɔŋɔ eke Easter

Abasi ye Nsinsi Ete nnyin ke Heaven; Jesus Christ, Edima Eyen Esie; ye Edisana Spirit ekpere nnyin ke idem. Anana adaŋa ye nsinsi uŋwana mmɔ, mbɔm, ye edifak ima edɔŋɔ kiet ke ntak obot ye obuk uwem nnyin (se Alma 30:44; Moses 6:62–63).

Ke Mbono mbemiso uwem emi ke Heaven, “mme ntantaɔfiɔŋ usen-ubɔk ekwɔde uyo kiet, ndien kpukpru nditɔ iren [ye iban] Abasi esiode mkpo enɔ idaresit” (Job 38:7). Nnyin imek ndimek. Idahaemi nnyin isaŋa ke mbuɔtidem. Oto ke ifiɔk nnyin, nnyin idikut eŋwɔŋɔ uyai Abasi, ŋwɔrɔ-nda, idaresit, ye ntak ke otu mme unana idorenyin, mme ubiɔŋɔ, ye mme afanikɔŋ ke uwem.

Ikinaha nte nnyin iyo ikpɔŋ ke unana idorenyin uwem. Nnyin imikeme ndineme nneme ye heaven, ikɔri ke mbuɔtidem inyuŋ idu ke ufɔk ye ke ufɔkemana ye ke eboho Ndinen owo, inemesit ito ke udɔŋ ye idaresit ŋkopitem inɔ mme ibet Abasi. Usio-isop—ke-ini-kiet—ke ye otode Jesus Christ eda ndidu ke ediomi emi edi.

Idorenyin Uwem Jesus Christy e Utom

Usen kiet kiet, idorenyin ye eŋwɔŋɔ Easter esine mme edidiɔŋ ye mme ukpep-ŋkpɔ Jesus Christ emi ebuanade ke ini mfɔn-mma utom eke mkpa. Ke ekenimde ke editɔŋɔ, Jesus Christ akamana nte Ikpɔŋ Ikpɔŋ Eyen Ete Abasi (se Jacob 4:5; Alma 12:33–34; Moses 5:7, 9). Enye ama ɔkɔri ke ɔniɔŋ ye idaha, enyene mfɔn-iso ye Abasi ye owo (se Luke 2:52). Oyomde ndinam uduak Ete Esie ikpɔŋ, Jesus Christ ama efen mme idiɔk-ŋkpɔ, ɔkɔk mme udɔŋɔ, anam mme akpa-mkpa eset, onyuŋ ɔdɔŋ mbon edide ikpɔŋ esit.

Ke ini kiet, ke ama eketre udia ke usen 40, Enye etie ntie nse ete, “Spirit Abasi odoro mi ke idem, koro enye amayet mi aran ete ŋkwɔrɔ gospel nnɔ mme ubuene; enye ɔdɔŋ mi ete nsɔbɔ mbon mbuŋɔ-esit, ete ŋkwɔrɔ edibɔhɔ nnɔ mbon ŋkpɔkɔbi, ye edikut-usuŋ nnɔ mme nnan, ndinam mbon emi efikde ebɔhɔ” (Luke 4:18; se ŋko Isaiah 61:1).

Oro edi nnyin kiet kiet.

Ke ini Udia Mbubreyo, Jesus Christ amayet mme mbet Esie ukot (se John 13:4–8). Ke Akani ye Obufa Ererimbot mbiba, “oduwem mmɔŋ” ye “uyo uwem” ke Idem Esie ama enim udia Ɔbɔŋ. Ke edisana edinam udia Ɔbɔŋ, nnyin ikot Ete ndien nnyin idiomi ndida nnɔ idem nnyin enyiŋ Jesus Christ, iti Enye Kpukpru ini, inyuŋ inim ibet Esie, man nnyin inyene Spirit Esie kpukpru ini ndidu ye nnyin (se Luke 22:19–20; 3 Nephi 18:7, 10–11).

Ke iŋwaŋ Gethsemane, Jesus ama ɔbɔ ufen akan se owo ɔkpɔbɔde man afak nnyin onyuŋ osio isop ɔnɔ nnyin. Iyip ama ɔwɔrɔ ke ofuri orudu. Enye ɔkɔbɔ mme ubiak emi ɔnɔ ofuri owo, man nnyin ukubɔ ufen edieke nnyin idikabrede esit Doctrine and Covenants 18:11; 19:16).

Etap enyuŋ odori uyo, ema esak enyuŋ emia Jesus Christ, ndien ema edori anyanya ŋkukim ke eti ibuot Esie (se Matthew 27:26, 29; Mark 15:15, 17, 20, 31; Luke 22:63; John 19:1–2). “Anuaha ɔnɔ mme ukwaŋ-ŋkpɔ nnyin … ye mme inia esie ke ekɔk nnyin” (Isaiah 53:5). Ema “emenede Enye ke cross” man enam nnyin isik ikpere Enye (se 3 Nephi 27:14–15). Edi, kpa ke cross, Jesus Christ ama efen ɔnɔ (se Luke 23:34). Enye ama ɔdɔhɔ John ete ekpeme eka Esie (se John 19:26–27). Ema esin Enye (se Matthew 27:46; Mark 15:34). Man ikɔ Abasi osu, Enye ete ke itɔŋ mmɔŋ asat Imɔ (se John 19:28). Ke ini ekekurede kpukpru ŋkpɔ, Enye ke Idem Esie “amayak spirit Esie” (Luke 23:46; se ŋko John 10:17–18).

Jesus Christ ɔfiɔk nte anwamde nnyin ke mme udɔŋɔ, mme mmem-idem, ndobo, ikpɔŋ, ye mme nsɔŋɔ-ŋkpɔ nnyin, (se Alma 7:12). Mme utɔ afanikɔŋ emi esidi ke ntak mme edimek eke mbon efen. Enye ŋko ɔfiɔk nte adarade ye nnyin ke mme idaresit ye ekɔm nnyin, nte esemede ye nnyin ke ini idara nnyin ɔyɔhɔde. Suŋ-suŋ, Enye okot nnyin ke enyin Esie, ke uyo Esie, esin ke eboho Esie. Enye okot kpukpru owo ke ofuri itie. Enye okot nnyin ete ikut inyuŋ ifiɔk uwem mkpa ito ke usuŋ nsinsi. Nte nnyin isaŋade nnen nnen inyuŋ inimde mme ediomi nnyin, Enye ɔŋwɔŋɔ ete ke kpukpru ŋkpɔ ekeme ndisaŋa kiet nnɔ ufɔn nnyin (se Doctrine and Covenants 90:24; Romans 8:28).

Ke ini ye usuŋ Esie, edifiak mmendi edi—idighe nte mme ŋkpɔ ekedide ikpɔŋ edi ŋko nte se mmɔ ekeme ndidi. Ke akpanikɔ, Jesus Christ ekeme ndinam nnyin ibɔhɔ ke ufin ye idiɔk-ŋkpɔ, ke mkpa ye hell, ndien ekeme ndinwam nnyin ndinyene obot nnyin nte nnyin idide ikan se nnyin ikikerede, oto ke mbuɔtidem ye ime.

Ke ntak Jesus Christ, mkpa idighe utit. Ke Easter nnyin idɔhɔ ite:

Ke uyo ye odudu otode Ete Esie, Jesus ekeme ndinim uwem Esie ndien afiak emen enye (se John 10:17). Ke ini ikpɔk-idem Esie akanade ke udi, Jesus Christ ama anam utom onyuŋ otim ke ererimbot mme spirit, anam efiɔk “edifak mmɔ ke mme uruk mkpa” (Doctrine and Covenants 138:16).

Ke usenubɔk ɔyɔhɔ usen ita, Enye ama ɔwɔrɔ ke udi. Enye ama etiŋ ikɔ ye Mary. Enye ama owut mme mbet iba idem ke usuŋ Emmaus, mme Apostle Esie, ye mbon efen. (Se Matthew 28; Mark 16; Luke 24; John 20.)

Ke ekpri ikɔ ntiense, Enye ama okot mme mbet Esie ete esin mme iyire mmɔ ke ŋkaŋ ubom eken; ndien, okposuk edide ke ekɔyɔ ye iyak, mme iyire ikiwaghake (se John 21:6–1; Luke 5:3–7). Enye ama ɔnɔ mme mbet udia onyuŋ ebeŋe Peter ikata ete ɔbɔk mme erɔŋ ye mme nditɔ erɔŋ Esie (se John 21:12–17). Enye ama ɔdɔk heaven, ɔdɔhɔ ete ke mme mbet Esie idahaoro ye kpukpru nnyin idahaemi ana nte ibuana eti mbuk Easter ye gospel Esie ye ofuri obio, idut, ye mme owo (se Matthew 28:19–20; Mark 16:15).

Jesus Christ edi Eti Ekpeme erɔŋ nnyin ye Eyen-erɔŋ Abasi. Enye amayak uwem Esie ɔnɔ ke ntak, onyuŋ ɔnɔ erɔŋ Esie uwem Esie. Ke iŋwaŋ ye ke cross, Enye ama ɔbɔ se owo mikanke onyuŋ osio isop ɔnɔ nnyin. Ke ini ye ke nsinsi, Enye owut nnyin ke uwut-ŋkpɔ nte “mkpa eberede usuŋ ɔnɔ nsinsi uwem.”

Oto ke odudu Usio-isop ye Ediset ke Mkpa Christ, mme idem ye mme spirit nnyin eyefiak ediana kiet ke edidianakiet eke obukidem. Nnyin iyiye, efiak idi kiet ke mbiet ye ke idem, ndido ke ndido. Kpa mme idet ibuot nnyin eyefiak enim. Nnyin iyibɔhɔ ke mmem-idem ini emi,udɔŋɔ, ŋkpɔ-ntibe eke obukidem, ye mfina ke ibuot. Usio-isop Christ ekeme ndidiɔŋ nnyin ndikan kpukpru ubahare eke spirit ye mkpa spirit. Ke ɔkɔŋɔde ke edikabade esit, nnyin ibɔhɔ ke kpukpru idiɔk-ŋkpɔ ye ukut ndien inyene ɔyɔhɔ nsinsi ima ye idaresit. Inanade ndo, isana, ibɔhɔ, nnyin imikeme ndifiak ŋka ke eti ebuana ufɔk emana nnyin ikiduk ediye, iso celestial Abasi Ete nnyin ye Jesus Christ.

Nnyin iyifiak ikut mbon ima nnyin. Ke ini nnyin ifikade ikidiana ye mbon emi nnyin imade, nnyin iyikut kiet eken ye usuŋ nsinsi—ye akamba ima, ifiɔk, ye mbɔm. Usio-isop Jesus Christ ekeme ndinam nnyin iti se ifɔnde inyuŋ ifre se mifɔnke. Ndise Andinyaŋa ye mme ebuana nnyin ke akamba mbuɔtidem ye ekɔm ada emem edi, emenede mme mbumo, adian mme esit, onyuŋ adian mbon ufɔk emana kiet ke ini ye ke nsinsi.

Idorenyin eke Uwak ye idara

Easter ke Jesus Christ esine ndiberede mme window heaven, mfri iŋwaŋ nditɔt, ye mme isɔŋ ndinyene idaraesit. Easter ke Jesus Christ esine ndidɔŋ esit nyuŋ ŋkere mbaŋa mme ebe-akpa ye mme nditɔ akpa, mbon ɔbiɔŋ ye mme anana idorenyin, mbon ndik, mbon ekutde, mme mbon miduehe emi ebɔde ufen. Ke ekerede abaŋa kiet kiet, Jesus Christ okot nnyin ete ise inyuŋ inam ŋkpɔ ye ima ye mbɔm, nte Enye anamde.

Ke kpukpru eti ŋkpɔ, Jesus Christ afiak ɔnɔ nte awakde (se John 10:10; Alma 40:20–24). Enye ɔŋwɔŋɔ ete ke “isɔŋ ɔyɔhɔ, ndien ke se idude ekem onyuŋ ɔyɔhɔ ɔsuhɔ” (Doctrine and Covenants 104:17). Edifiak mmen kpukpru ndi Esie esine uyɔhɔ gospel Esie, odudu ye unen itie-oku Esie, ye mme edisana edinam ye mme ediomi emi ekutde ke Ufɔk Abasi Esie, ekotde ke enyiŋ Esie, kpa Ufɔk Abasi Jesus Christ eke Ndisana Owo ke Ukperedem Usen.

Easter ke Jesus Christ esine ediwak ndisana ufɔk Jehovah edide edikpere nditɔ Abasi ke ediwak ebiet, ndida ndisin ke esit nnyin ukpep-ŋkpɔ “mme andinyaŋa ke Obot Zion” (se Obadiah 1:21). Jehovah ɔnɔ nnyin edisana, ŋwaidem usuŋ ndinam mi ke isɔŋ se ndima owo nnyin eyomde enyuŋ emade ke nsinsi uwem emi mmɔ mikanke inɔ idem mmɔ.

Utɔ oro edi idorenyin, eŋwɔŋɔ, ye ikɔ ntiense mi. Ami metie ntiense nte Abasi Ete nnyin, Andiyaŋa ye Andifak nnyin, Jesus Christ; ye Edisana Spirit. Ke Easter ye ke ofuri usen, yak nnyin inyene nsinsi idorenyin ye eŋwɔŋɔ ke edisana uduak inemesit Abasi, ye usuŋ ediomi esie ke edisana ukpuhɔde nto emi edikpade nsin ke emi midikpaha ye nsinsi uwem. Ke usen kiet kiet yak nsɔŋɔ-nda Usio-isop Jesus Christ emenede mme mbiomo nnyin, aŋwam nnyin ndidɔŋ mbon efen esit ke mme ukut mmɔ, onyuŋ enam mme ukpɔŋ nnyin ebɔhɔ ndibɔ ɔyɔhɔ idaresit Esie.

Otode ke idorenyin ye eŋwɔŋɔ eke Easter, Jesus Christ ɔyɔhɔ mme udɔŋ esit nnyin onyuŋ ɔbɔrɔ mme mbume ukpɔŋ nnyin.