Aninis seni Jises Kraist: Ewe Pwata me Ifa Usun

Nupwen A engino ngeni An ewe asoren achasefan, ewe Chon Amanau a fori unungat auchean mettoch:

1. A okkufu mano, a mut ngeni kich ach sipwe manausefan.

2. A moni niwinin tipis meinsisin, a otufichi ngeni kich ach sipwe aier, mar, me niwin ngeni Kot. Ena a pwan anisi kich ne omusano ekkoch nupwen ra tipis, pokiten Kraist a wata won Pwisin I ar tipis.

3. A mefi metek meinisin, riaffou, sossot, samwau, me apwangapwang (nengeni Alma 7:11–13 ). Wewen pwe I mi wesewesen sinei ifa usun epwe anisi me echikarok me a tongeni apochokunok ne engino ngeni sossot me achocho ne winiti mi murino.

Fini ese nifinifin osukosuk, me en mi tongeni ochu ewe pungunon niwin ngeni ew ika ekkoch me nein ekkei unungat ennet.

Osupwang? Pokiten Jises Kraist a mefi mettoch meinisin, I mi wesewesen sinei mi ifa usun. Esap iteitan I epwe awesano ewe osukosuk, nge I a tongeni apochokuna aramas ne engino ngeni ena chou (nengeni Mosaia 24:15 ).

Fetanengaw? Pokiten Kraist a okkufu tipis, ach fetanengaw esap namofochono. Aier mi pachenong ach murinono me winiti ewe aramas I a sinei pwe sipwe winiti.

Samwau? Pokiten I a okkufu mano, sipwe manausefan fiti unusochun inis repwe pochokun ngeni samwau me metek. Kraist a pwan “[wata] won inisin … semwen” ( Alma 7:11 ), a fori I pwe ewe unusochun aramas an epwe awora ourur me aninis.

Nge pwan mwo nupwen kich mi sinei pwata ewe Chon Amanau i ewe ponuwan (pokiten ion I me met I a fen fori fan itach), mi chok namot sipwe sinei ifa usun sia angei aninis me pochokun seni I. Ikkei ekkoch awewe:

Iotek. Ren ach iotek non iten Jises Kraist, aramas rese unusoch usun kich sia tongeni kapas ngeni emon unusochun Kot. Sia tongeni iotek fan iten ewe pochokun mi namot ngeni kich non sokopaten nikinik, me Kot epwe ponuweni—esap iteiten fansoun non ewe napanap sia mochen ika esuku, nge non ew napanap epwe efeiochu kich. An ewe Chon Amanau kokon tingor mi ennet: “Tingor, me oupwe angei” ( John 16:24 ; 3 Nifai 27:29 ; Doctrine and Covenants 4:7 ).

Ewe Niffangen ewe Ngun mi Fel. Samach non Nang, Jises Kraist, me ewe Ngun mi Fel ra chufengen non ew popun. Ra angang fengen! Iteiten fansoun ka mefi emwen ika ourur seni ewe Ngun mi Fel, ka tongeni weweiti pwe Kraist a pwan anisuk.

Apwonueta Pwon mi Pin. Elter Dale G. Renlund seni ewe Mwichen Ekkewe Engon me Ruemon Aposel a aiti kich: “Ewe kapas aanen pwon mi pin a wewe ngeni ew tetenin pwon mi pin ren minne sia tongeni feito ren Kraist me chu ngeni I. Seni ei pwonen riri mi pin, a wor ach tufichin angei An ewe manaman ese much” ( Apr. 2023 mwichenap [Liahona, May 2023, 36]).

Chen. Nupwen sia aea nuku non Jises Kraist me aier, sia tongeni angei pwan ekkoch aninis me pochokun (pwan itan chen) ne awesi mettoch sisap pwisin tongeni fori won winikapach (nengeni Emwen ngeni ekkewe pukefel, “ Grace ”). Ei pochokun, ika chen, a tongeni feito non chommong napanapan: seni ewe Ngun mi Fel, emon chiechiach, emon wasona, ew memef. Auchean, och mettoch mi och a feito seni Kraist (nengeni Moronai 7:22 ). Nupwen ka kuna pwan ekis tipepos, ekis pwan pochokuneta, ekis pwan pochokun ne engino, esinna pwe Kraist a anisuk.

Iwe pwan fan ew ka mochen ponuwen ew kapaseis ika osukosuk, nenengeni Kraist. Chechemeni pwe pokiten I a okkufu tipis, mano, me pwan ekkoch weiresin fonufan, ese wor mettoch esap tufich. Nenengeni ifa usun I a tongeni efeiochuk, me kopwe kuna An mwokutukut non manauom. A ennetin tongeok!