Jises Christ: Ewe Epinukunukun Me Pwonen Paska

Kot, Samach non Nang; Jises Kraist, Noun Achengicheng; me ewe Ngun mi Fel ir mi wesewesen arap ngeni kich. Ar saram mi ese wor nekoukun me esemuch, umoumoch, me tongen ngaseno ir mi fofonong non ewe popun forata me ewe popun ach fis (nengeni Alma 30:44; Moses 6:62–63).

Non ewe Mwichen Opungupung mwen ei manau me non Nang, “ekkewe fuu ran ra koon fengen, me meinisin kewe att [me nengin] noun Kot ra puppuchor ren pwapwa” (Job 38:7). Sia tongeni pwisin finata. Iei sipwe fetan ren nuku. Seni ach piwisin sinei, sia kuna an Kot pwonen ning, fatafatoch, pwapwa, me popun nukanapen manauen fatafatangaw, tipemwaramwar, me weires.

Nonnomuch pwe sisap feinfetan anamon non ach sise weweiti ach popun. Sia tongeni porous ngeni nang, amari nuku me choni famini me non ewe imwen me chochon Souneng, me winiti wesewesen kich mi ennet, ngaseno, pungoch, pwapwa, seni ach chengen me pwapwan aneasosich angeni an Kot kewe annuk. Achasefan—a-cha-sefan—non me seni Jises Kraist a wato ei memefin choni pwon mi pin.

Ewe Epinukunukun An Jises Kraist Manau me Misin

Iteiten ran, epinukunukun me pwonen Paska mi pachenong ekkewe feioch me afanafan Jises Kraist mi atoura fansoun An unusochun angangen afanafan. A fen kefiniat me nopoputan, Jises Kraist a uputiw pwe Noun Kot Anamon (nengeni Jacob 4:5; Alma 12:33–34; Moses 5:7, 9). A mamarita non tipachem me sufon, me pwan non chen meren Kot me aramas (nengeni Luke 2:52). A chok kutta an epwe fori mochenin ewe Sam, Jises Kraist a omusano tipis, echikara mi apwangapwang, amanaua ekkewe mi mano, me oururu ekkewe mi semwen me anamon.

Fan ew, mwirin an echikipin 40 ran, A pwarata, “Ngunun ewe Samon a nom woi, pun a finieita pwe upwe aronga ngeni ekkewe mi woungaw ewe kapas allim; a tinieito pwe upwe echikara ewe mi netipechou, pwe upwe aronga ngeni ekkewe mi fotek ar repwe ngaseno, me apwaki mesen ewe mi chun, me angasano ekkewe mi nom non riaffou” (Luke 4:18; pwan nengeni Isaiah 61:1).

Ina emon me emon kich.

Atun ewe Amwuchunon Faaf, Jises Kraist a toni pechen Noun kewe chon kuno (nengeni John 13:4–8). Non ir me ru ekkewe Fonufanen Nom me Ikenai, ewe “konikin manau” me “ewe pinewan manau” I pwisin a forata ewe sakrament. Non ewe angangepinen ewe sacrament, sia kokkori ewe Sam me sia pwon mi pin pwe sipwe wata woch iten Jises Kraist, chechemeni I fansoun meinisin, me aneasochisi an kewe annuk, pwe Ngunun epwe nonnom rech (nengeni Luke 22:19–20; 3 Nifai 18:7, 10–11).

Non ewe Ataken Gethsemane, Jises a riaffou nap seni aramas ra tongeni riaffou an epwe angasa me achasefan fan itach. Cha a feito seni mononan. A riaffouni ekkei metek fan iten meinisin, pwe sisap riaffou ika sipwe aier (nengeni Doctrine and Covenants 18:11; 19:16).

A kuna amam me tipimwan, Jises Kraist a kuna turunufas me nini, me epa mwarin ira fonufon ra iseta won Mokuran mi tekison (nengeni Matthew 27:26, 29; Mark 15:15, 17, 20, 31; Luke 22:63; John 19:1–2). “A kinas fan iten ach atai annuk … iwe seni an kewe kinasen opup sia chikar” (Isaiah 53:5). A “irapengesino won ewe irapenges” an epwe tongeni akanato aramas ngeni I (nengeni 3 Nifai 27: 14– 15). Nge, pwan mwo won ewe irapenges, Jises Kraist a omusereno (nengeni Luke 23:34). A tingorei John pwe epwe tumunu Inan we (nengeni John 19:26–27). A mefi pwe Kot a nikitano I (nengeni Matthew 27:46; Mark 15:34). Ena uwokisin epwe tongeni pwonueta, A apasa pwe A kaka (nengeni John 19:28). Nupwen meinisin a pwonueta, I pwisin won Inisin A “fangeta ewe ngun ” (Luke 23:46; nengeni pwan John 10:17–18).

Jises Kraist mi sinei ifa usun epwe anisi kich non ach semwen, nipakingaw, anamon, imuno, me weires (nengeni Alma 7:12). Ena sokkun riaffou a kan soun feito pokiten met pungun an ekkoch pwisin finata. I mi pwan sinei ifa usun an epwe mweireir rech non ach pwapwa me kinisou, ifa usun an epwe kechiw rech nupwen ach pwapwa a ureno. Non pwetete, A kokkori kich non Itan, me ren Mongungun, ngeni non An tit. A kokkori emon me emon ekis meinisin. A etiwa kich ach sipwe kuna me weweiti manau won fonufan me non weweochun fansoun esemuch. Nupwen sia fetan wenechar me apwonueta ach kewe pwon mi pin, I a pwonei pwe mettoch meinisin repwe angang fengen fan iten feiochuch (nengeni Doctrine and Covenants 90:24; Rome 8:28).

Non An fansoun me napanapen manauan, niwinsefanito a fis—esap chok ngeni ifa usun mettoch me akkom nge pwan ngeni met ra tongeni winiti. Ennetin, Jises Kraist a tongeni angasa kich seni fotek me tipis, seni mano me hell, me a tongeni anisi kich ne apwonueta fetanin manauach mi pin nupwen sia winiti nap seni met sia tongeni aneanei, ren nuku me aier.

Pokiten Jises Kraist, mano esap ina omuchunon. Fansoun Paska sia affata:

Ren annuk me manaman seni Saman we, Jises a tongeni fangeno manauan me pwan angei sefani (nengeni John 10:17). Nupwen Inisin we a nonnom non ewe peias, Jises Kraist a angang me etetteni non ewe fonufanen ngun, a afata “ar ngaseno seni ekkewe fofon mano“ (Doctrine and Covenants 138:16).

Non ewe sosoren ewe aunungatin ran, I a manausefan seni ewe peias. A kapas ngeni Mary. A pwato ngeni ruemon chon kaeo won ewe aan ngeni Emmaus, Noun kewe Aposel, me ekkoch. (Nengeni Matthew 28; Mark 16; Luke 24; John 20.)

Non tettenin enniwinin kapasen pwarata, I a kori Noun chon kuno ar repwe mwoneu nour kewe chew nepekin ewe sipw me ewe epek; ei fansoun, inamo a pwan ureno ren iik, ekkewe chew rese kamw (nengeni John 21:6–11; Luke 5:3–7). A amwongoni ekkewe chon kuno me a tingor ngeni Peter fan unungat an epwe amwongoni Noun siip me nam (nengeni John 21:12–17). A feita nang, a affata pwe Noun chon kuno nom me meinisin kich ikenai sipwe aea fengen porousen ningen Paska me An kapas allim ngeni meinisin muu, einang, me aramas (nengeni Matthew 28:19–20; Mark 16:15).

Jises Kraist i nouch Chon Masen Siip mi Murino me ewe Namen Kot. I a fen fangeno Manauan fan iten, me fangeno Manauan ngeni, Noun siip. Non ewe atake me won ewe irapenges, A engino ngeni weiresin metek me achasefan fan itach. Non fansoun me esemuch, A pwar ngeni kich ren minen awewen ifa ussun “mano a suki ewe an esemuch.”

Seni ewe manamanen An Kraist Achasefan me Manausefan, inisich me ngunuch repwe chufengen sefan non manausefanin inis. Sipwe mwareiti, niwinsefan non napanapach me inisich, meinisin kinikinin inisich. Pwan mwo meten mokurach repwe niwinsefan. Sipwe ngaseno seni samwenin ei fansoun, samwau, feiengawen inis, me nipwakingawen ekiek. An Kraist Achasefan a tongeni efeiochu kich ne okkufu sokopaten keimunon ngun me manon ngun. Anongonong won aier, sia ngaseno seni meinisin tipis me netipengaw me sukono ngeni ew unusochun tong me pwapwa esemuch. Kurufaten nimoch, nimenimoch, ngaseno, sia tongeni niwin non ach auchean nefinen famini ngeni ewe amwararen, selestial mwen mesen Kot Samach me Jises Kraist.

Sipwe kuna sefani atongeach kewe. Nupwen sia chusefan ngeni ekkewe kich mi tonger, sipwe kuna fengeni kich non weweochun fansoun esemuch—ren watten tong, weweoch, me kirekiroch. An Jises Kraist Achasefan a tongeni anisi kich ach sipwe chechemeni met mi namot me monukano met ese namot. Ach kuna ach Chon Amanau me nefinach ren watten nuku me kinisou a wato kinamwe, apana chou, eniwini netip, me ochufengeni famini non ei fansoun me fansoun esemuch.

Ewe Epinukunukun Chommong me Pwapwa

Paska non Jises Kraist mi pachenong asamwachon nang ra sukkuno, uwan ewe iran kreip a chommongono, me fonu ra winiti mi murino. Paska non Jises Kraist mi pachenong ourur me tumunu fefin mi mano punuwer me ekkewe ese wor semer me iner, ekkewe mi echik me nipakingaw, ekkewe ir mi nuokus, abuse, ika turunong non aanen feiengaw. A ekieki emon me emon, Jises Kraist a tingorekich sipwe kuna me iamwir fiti tong me umoumoch, usun I.

Non mettoch meinisin mi och, Jises Kraist a eniwini non chommong (nengeni John 10:10; Alma 40:20–24). A pwonei pwe ewe fonufan a ureno, me mi naf me somono seni (Doctrine and Covenants 104:17). An niwinsefaniton mettoch meinisin mi pachenong ewe unusochun An kapas allim, An mumutan pristut me manaman, me ekkewe angangepin me pwon mi pin mi pwa me non an Mwichefen, kokko non Itan, pwan ewe Mwichefenin Jises Kraist ren Aramas mi Pin non Fansoun Soponon.

Paska non Jises Kraist mi pachenong chommongonon imwen ewe Samon mi pin ra arapeto ngeni noun Kot semirit non chommong neni, ra wato non netipach ekkewe nongonongen “chon amanauen ewe Chukun Zion” (nengeni Obadiah 1:21). Ewe Samon a awora ew aanen epinipin, mi kirekiroch fan itach ach sipwe fangeta won fonufan met mi namot ngeni atongeach kewe mi mano me met ra mochen non fansoun esemuch minne rese tongeni angei fan iter.

Ina ai epinukunuk, pwon, me kapasen pwarata. Ua pwarata Kot Samach; ach Chon Amanau me Chon Angasano, Jises Kraist; me ewe Ngun mi Fel. Atun Paska me iteiten ran, amwo sipwe kuna epinukunukun fansoun esemuch me pwon non an Kot kokkoten pwapwa mi pin, fiti ewe aanen pwon mi siwin seni manau iei ngeni manau fochofoch me manau esemuch. Iteiten ran amwo ewe ennetin an Jises Kraist Achasefan epwe chunata ach chou, anisi kich ne oururu ekkoch non ar netipechou, me angasa ngunuch ne angei An unusen pwapwa.

Seni ewe epinukunukun me pwonen Paska Jises Kraist a apwonueta mochenin netipach me pwonuwen ekkewe kapaseisen ngunuch.