Help we i kam long Jisas Kraes: From Wanem mo Olsem Wanem

Taem Hem i stap strong long sakrifaes blong Hem we i pem praes from sin, Sevya i bin mekem tri impoten samting:

1. Hem i winim ded, we i letem yumi blong laef bakegen long ded.

2. Hem pemaot praes blong evri sin, i mekem i posibol long yumi blong sakem sin, gro, mo gobak long God. Hemia i helpem yumi tu blong fogivim ol narawan taem oli mekem sin, from Kraes i tekem ol sin blong olgeta long Hemwan.

3. Hem i eksperiensem evri harem nogud, hadtaem, temtesen, sik, mo ol samting we yumi no strong long hem (luk long Alma 7:11–13). Hemia i minim se Hem i save gud olsem wanem blong helpem mo hilim yu mo i save mekem yu kam strong moa blong go tru ol tes blong laef mo traehad blong kam moa gud.

Jusum eni problem, mo yu save konektem ansa i gobak long wan o moa long olgeta trutok ia.

?Fasin blong Stap Pua? From we Jisas Kraes i eksperiensem evri samting, Hem i save gud olsem wanem blong stap pua. Oltaem Hem i no stap muvumaot ol samting we i blokem wei blong yu, be Hem i save mekem ol pipol oli kam moa strong blong karem ol hevi samting (luk long Mosaea 24:15).

?Mistek? From we Kraes i winim sin, ol mistek blong yumi i no nid blong stap blong oltaem. Fasin blong sakem sin i gat blong kam gud moa mo kam moa man ia we Hem i save se yumi save kam.

?Sik? From we Hem i winim ded, bae yumi laef bakegen long ded wetem ol bodi we oli stret gud evriwan we bae i nomo gat sik mo harem nogud blong kasem. Kraes tu i “[tekem] long hem … ol sik” (Alma 7:11), we i mekem Hem wan man we i stret gud evriwan blong givim kamfot mo sapot.

Be nomata taem we yumi save from wanem Sevya hem i ansa (from huia Hem mo wanem we Hem i bin mekem blong yumi), yumi stil nid blong save olsem wanem yumi kasem help mo paoa long Hem. Hemia samfala wei:

Prea. Blong stap prea long nem blong Jisas Kraes, ol pipol we oli no stret olsem yumi i save toktok wetem wan God we i stret gud evriwan. Yumi save prea blong kasem paoa we yumi nidim long eni situesen, mo God bae i ansa—i no oltaem long wei we yumi wantem o tingting long hem, be long wei we bae i blesem yumi. Invitesen blong Sevya i tru: “Askem mo bae yufala i kasem” (Jon 16:24; 3 Nifae 27:29; Doktrin mo Ol Kavenan 4:7).

Presen we i Tabu Spirit. Papa Long Heven, Jisas Kraes, mo Tabu Spirit oli wan long stamba tingting. !Oli wok tugeta! Eni taem we yu filim gaed o kamfot we i kam long Tabu Spirit, yu save andastanem se Kraes i stap helpem yu tu.

Kipim Ol Kavenan. Elda Dale G. Renlund blong Kworom blong Olgeta Twelef Aposol i bin tijim: “Toktok ia kavenan rod i stap tokbaot ol kavenan we i mekem yumi kam long Kraes mo joen wetem Hem. Tru long kavenan rilesensip ia, yumi gat akses long paoa blong Hem we i no save finis.” (Epril 2023 jeneral konfrens [Liahona, Mei 2023, 36]).

Gladhat. Taem yumi eksasaesem fet long Jisas Kraes mo sakem sin, yumi save kasem moa help mo paoa (we oli singaotem tu gladhat) blong mekem i hapen ol samting we yumi no save mekem yumiwan (luk long Gaed blong ol Skripja, “Gladhat”). Paoa , o gladhat ia, i save kam long plante wei: tru long Tabu Spirit, wan fren, wan man we yu no save, wan filing. Wanem we i impoten, eni samting we i gud i kam long Kraes (luk long Moronae 07:22). Taem yu faenem se i gat smol moa fasin blong stap wet longtaem, wan smol paoa, wan smol paoa blong stap gohed strong, luksave se Kraes i stap helpem yu.

Blong mekem se nekis taem yu nidim wan ansa blong wan kwestin o problem, lukluk long Kraes. Tingbaot se tru long win blong Hem ova long sin, ded mo evri nara jalenj blong laef ia, i nogat wan samting we i no posibol. Lukaotem blong olsem wanem Hem i save blesem yu mo bae yu luk paoa blong Hem long laef blong yu. !Hem i lavem yu bigwan!.