Jesus Kristo: Urunguled e Yaksok er a Baskua

A Dios, el Diak a Ulebengelel Demad el ngara Babeluades; me a Jesus Kristo, el Betik er a Rengul Ngelekel; me a Chedaol Reng a kmal kmeed er kid. A cherrungel e diak a ulebengelelel llomes lobang, chubechub, me a beltiklereng a ulekbuk el mo er a blebelel a beluulechad e moktek er a klengar kid (mesa Alma 30:44; Moses 6:62–63).

Sel kldibel el mla er ngii er a Babeluades, “el btuch er a eanged a mlengitakl odanges, e a rokui el sechal [me a redil] ngelekel a Dios a uleldiu er a deureng” (Job 38:7). Kede millilt el mo melilt. E chelecha kede ultuil er a klaumerang. Ngokiu a teletael desiseb er a chelsel, e kede metik el kmo a Dios a klebokel, bleketakl, dmeu a rengul, e oba moktek el diak el iior er a ngeldengodech, ringel, me a sebekereng er tial beluulechad.

Kid a dimlak dobeob el kora di mo cheloit er tial cheliseksikd el beluulechad. Ng sebeched el mengedecheduch el mo er a babeluades, toketekii a klaumerang me a deleuill er a Resanto er a telugnalek me a blai me a buai, e mo er sel ngii a merang, mimokl, e bleketakl, e deureng el klengar lokiu a blakelreng er kid lolngesenges a llechul a Dios. Tngakireng—mo-tang-el ngara Kristo—a ngoikid losisebid er a telbiil.

Urunguled el ngara Klengar me a Urerel a Jesus Kristo

Bek el sils, e a urunguled me a yaksok er a Baskua a uldimukl er ngii a klengeltengat me a osischeklel a Jesus kristo el mlosisechakl er a taem er a lengara beluulechad. Meng mloterekokl er a uchelel, e a Jesus Kristo a mlechell el Di Chimong el Ngelekel a Dios (mesa Jacob 4:5; Alma 12:33–34; Moses 5:7, 9). Meng mlukeroul er a llomes me a ungil blekeradel, el Dios me a chad a mlo semeriar ngii (mesa Lukas 2:52). Meng di ulsiik er a soal a Demal, e a Jesus Kristo a uluusubes a klengit, e ulemkungil er a retelemall, ulekiis er a re mla mad, e mlengelaod er a rsmecher me a chelmongel.

Tara taem, er a uriul er a lolsengerenger lokeua el klebesei, e Ngii a milchisii el kmo, “A Reng er a Rubak obengkek, le ngii el mla chemedolak el mo omerk er a ebangkelio el mo er a remechebuul; ngii a uldureklak el mo omekungil er a remeualech a rengrir, e melubet er a rengara kelebus, e olutii osengel a mikou, e mesterir a iilmokl tirkel telemall a rengrir” (Lukas 4:18; dirrek el mesa Isaiah 61:1).

Tia dersta er kid el rokui.

Sel Ulebongel belsoil, e a Jesus kristo a mirrisou ocherir a rulbengkel (mesa Johanes 13:4–8). Me a chelsel a Chuodel me a Beches el Beluulechad, e Ngii el “ngar el ralm” e “blauang er a klengr” a kildmeklii a sacrament. Chelsel a chedaol ruoll er a sacrament, e kede omekedong er a chedam e tibir el mo nguu a ngklel a Jesus Kristo, e blechoel melbedebek er Ngii, e oltirakl a Llechul, me a Reng er Ngii bol blechoel lobengked (mesa Lukas 22:19–20; 3 Nephi 18:7, 10–11).

Sera le ngara Sers er a Gethsemane, e a Jesus a mlo chuarm er a ringel el diak a chad el medengelii el ringgel lolsobel e melenget el kired. A rsechel a mle kaitebetobed er a bedengel. Ngii a mlo chuarm er a ikal ringel el kirir a rokui el chad, me luchul e lak bo decharm a lsekum kede ouchel a rengud er a kngtid (mesa Doctrine and Covenants 18:11; 19:16).

Meng mloterau e mlotelechakl, e a Jesus Kristo a mlotuub a mechelebed, e a techodulik el korone a mlo er a Bdelul (mesa Mateus 27:26, 29; Markus 15:15, 17, 20, 31; Lukas 22:63; Johanes 19:1–2). “Ng miltemall el kirel a telmelled … ng di chelebed el mlo er ngii a ulemkungil er kid” (Isaiah 53:5). Ngii a “mlodars er a kerus” el uaia lolai er kid el mo er Ngii (mesa 3 Nephi 27:14–15). Me ngara kerus, eng di Jesus Kristo a uluusubes (mesa Lukas 23:34). Ngii a ulelengit er a Johanes me bo lomekerreu er a Delal (mesa Johanes 19:26–27). Ngii. ulemelchesiu el cheloit (mesa Mateus 27:46; Markus 15:34). Me a chedaol llechukl bol motaut, e Ngii a dilu el kmo Sera bol merek a rokui el tekoi, e Ngii “a silebek a telil” (Lukas 23:46; dirrek el mesa Johanes 10:17–18).

A Jesus Kristo medengei el kmo ng mekera lolngeseu er kid er a sechered, telmelled, klsabisi, cheloit, me a ongarm (mesa Alma 7:12). Aikaikid el ringel a blechoel mei el iior er a tekoi lolilt a rebebil el meruul. Ngii a dirrek el meduch el ngara deureng lobengked er a ikel klungiaol me a omereng el saul er kid, e meduch lmangel lobengked er a deuil a rengud. Me Ngii, omekedong er kid loba Ngklel, lokiu oto er a ngerel, el mo Obengkel. Ngii omekedong er a rokui el chad er a ngii di el ker. Ngii olengit er kid el mo mesang e medengelii a klengar er a chutem loba sel diak a ulebengelel losenged. Me sel dorael er a llemalt e doltirakl a telbiled, e Ngii a yaksok el kmo a rokui el tekoi a di mo dmak loureor el kirel a klungioled (mesa Doctrine and Covenants 90:24; Romans 8:28).

E ultuil er a temel me a rolel, e a oluut a mei el diak di le uaia ngaramong ng dirrek el sel teletael el kirel morngii. Ng klemerang, el Jesus Kristo a sebechel ngubetid er a ringel me a klengit, me a kodall me a beluu er a ngau, e sebechel ngosukid e ngoikid el mo er sel chedaol blebeled sel dengeriakl el mo er bab er sel kuk di uldesued el kired, lokiu a klaumerang me a ouchelreng.

A Jesus Kristo a uchul, e a kodall a diak lulebongel. Le temel a Baskua e kede mchisii el kmo:

Ngokiu a llach me a klisiich er a Demal, ea Jesus a sebechel chotii a klengar ngii e lmuut el nguu (mesa Johanes 10:17). A bedengel er a lengara debull, e a Jesus Kristo a uleldingel e tilketekii osisechakl kirir tirkel mlara belurir a redeleb, el milchisii er tir a osebelir er a rgnedel a kodall (Doctrine and Covenants 138:16).

Sel tutau er a ongedei er a klebesei, e Ngii a milkiis er a kodall. Ng milngedecheduch er a Maria. Ng dilum er a reteru lulbengkel er a rael mora Emmaus, me a re Apostol er ngii, me a lmuut el bebil. (Mesa Mateus 28; Markus 16; Lukas 24; Johanes 20.)

Me ngoba mesisiich el tekingel, e Ngii a ulelengit er a rulbengkel me lebidokl a ukedir er a kuk bitang er a bilas; el mlo, uchul eng mlo mui er a ngikel, eng di dimlak el mesodel a uuked (mesa Johanes 21:6–11; Lukas 5:3–7). Ng milkelterir a rulbengkel e ulengit er a Petrus me lomeka cheremel ngelekel a sib (mesa Johanes 21:12–17). Ngilasech el mo er a babeluades, e milchisii el kmo a rulbengkel er sel taem me kid er chelechang a melemolem lomerk er a chisel tial Baskua me a ebangkelio er Ngii el mo er a bek el beluu, kebliil, me a rechad (see Mateus 28:19–20; Markus 16:15).

A Jesus Kristo a ngii a Ungil Mengkerengel a Sib er kid e Ngelekel a Dios. Ngii a uldersii a klengar Ngii, e melemolem loldars er a klengar Ngii, el mo er a cheremel sib. Meng ngara sers el mo er a kerus, e Ngii a ultekau a diak el motekau el berraod e mlengakireng el kired. Meng chelechal taem el mo cherechar, e Ngii ochotii er kid lokiu okesiu el kmo ng mekera “kodall a lenguu a chesmerel a rael mo er a diak a ulebengelel klengar.”

Ngokiu a klisichel a Tengkireng er a Kristo me a Okiis er a kodall, e a bedenged me a delbenged a lmuut el mo dmak sel lemei okiis er a kodall er a tech. Kede mo cherrungel, e moluut el mo er sel bedenged, a bek el telengtengil. Luldimukl a chui er a bdelud meng mo moluut. Kede mo mimokl er a ringel, rakt, aksident er a bedenged, me a secherel a bdelud. A Tngakireng er a Kristo a sebechel omekngeltengat er kid el mo selbechakl er a klengit me a kodall. Me sel douchel a rengud, e kede mo mimokl er a bek el klengit me a klengitelreng e obok a rengud el kirel a diak a ulebengelel beltikelreng me a deureng. Klikiid, beches, e mimokl, eng sebeched e muut el mo teloi er sel deleuill er a telungalek er kid er sel klebkellel, a rngedel a celestial lobengkel a Dios el Demad me a Jesus Kristo.

Kede lmuut el m mesterir a rebetik er a rengud. Sel de teloi er tirkel betik er a rengud, e kede mesterir loba sel diak a ulebengelel losenged er tir—el mui er a beltikelreng, klaodengei, me a blekokouii. A Tngakireng er a Jesus Kristo a sebechel ngosukid el dobedebek aikel meklou a belkul me a ikel diak. Sel desa Osobeled me a deleuill er a mesisiich el klaumerang me a omereng el saul eng meskid a budech, sobecheklid er a berraod, e sumechokl a reng, e odak a telungalek el mo cherechar.

Sel Urunguled er a Mui el Deureng

A Baskua el ngara Jesus Kristo a uldimukl er ngii a blok el mado er a babeluades,, me a chachisois el rdechel a klungiaol, me a klebokel el klengar er a chutem. A Baskua el ngara Jesus Kristo a uldimukl er ngii ongelaod me a ulekerreu el mo er a re mla melakl me a recheloit, a resongerenger me a rengesool, me tirkel ngara dakt, retelemall, a lechub e te klikiid e ngara chelsel a mekngit lomeruul. Meng uldesuel kired el rokui, e a Jesus Kristo olengit er kid el mo omes e oldingel loba beltikelreng me a chubechub, el uai Ngii.

Meng rokui el tekoi, e a Jesus Kristo a oluut a betok el tekoi (mesa Johanes 10:10; Alma 40:20–24). Ngii a mla yaksok el kmo “a beluulechad a mo mui, el medeel a ngara chelsel e ngarngii a derngel” (Doctrine and Covenants 104:17). A Olutel er a rokui el tekoi a uldimukl er ngii a cherrungel el ebangkelio er Ngii, me a ngerachel me a klisiich er a priesthood er Ngii, me a chedaol ruoll me a telbiil el debetik er a chelsel a ikelesia er Ngii, lokedongall er a Ngklel, el ngii a Ikelesia er a Jesus Kristo er a Uriul-klebesei el Santo.

A Baskua el ngara Jesus Kristo a uldimukl er ngii a lmuut el betok el chedaol blil a Rubak el kmeed er a rengelekel a Dios er a chelsel a betok el basio, lolab osischakl er a “lolsobel el ngara Rois er a Zion” el mo er a rengrir a rechad” (see Obadiah 1:21). A Rubak a uchul a klikiid, e ungil rael el kid a rengara beluulechad a ngosuterir tirkel mla mo dibus el betik er a rengud aikel tir ousbech e semeriar el mo ngmai eng di diak el sebechir.

Tiaikid a urungulek, e yaksok, e klaumera er ngak. Ak sioning el kirel a Dios el Demad, me a Osobeled, el Jesus Kristo; me a Chedaol Reng. Me a le temel a Baskua me a bek el sils, e bo debetik er a diak a ulebengelel urunguled me a yaksok er sel chedaol moktek er a Dios el kirel a deureng, el rolel a telbiil a meskid a chedaol belted er a klengar er a chutem el mo er sel diak a ulebengelel klengar. Me a bek el sils e a meral Tngakireng er a Jesus Kristo bol sebecheklid er a berraod, e le ngosukid el mo mengelaod er a rebebil el ngara klengitelreng, el dedaes a rengud el mo nguu a mui el deureng er Ngii.

Ngokiu a urunguled me a yaksok er a Baskua, e a Jesus Kristo a mekeek a rengud e onger a rraureng er kid.