Jisōs Kraist: Kōjatdikdik eo im Kallim̧ur eo an Ijtō

Anij, Jemād Indeeo ilo Lan̄; Jisōs Kraist, Nejin Jitōnbōro; im Jetōb Kwojarjar eo rej lukkun epaake kōj. Meram eo aer ejeļo̧k jem̧ļo̧kin im ej indeeo, tūriam̧o kake, iakwe in pinmuur eo rej ippen doon ilo kōtopar eo an kōm̧anm̧an eo im m̧ōttan ejaake eo ad (lale Alma 30:44; Moses 6:62–63).

Ilo Ko̧o̧njeļ eo kar an mour eo m̧okta ilo Lan̄, “ke iju ko in raan raar jiṃor al, im ro nejin Anij otemjej raar laṃōj kōn lan̄lōn̄” (Job 38:7). Jaar kāālet kāālet eo. Kiō jej etetal kōn tōmak. Kōn ta ko jej iooni, jej lo Kalim̧m̧ur an Anij ilo aiboojoj, erreo, lan̄lōn̄, im kōtopar ilubwiljin men ko wōj rejjab allikar ilo mour in, jako lōke, im apan̄ ko.

Ekar jab jibadbad eo n̄an ad etetal makeļo̧k ilo men ko jab jeļā kaki. Jemaron̄ em̧m̧ao ippān lan̄, kalōk tōmak im uwaan juon baam̧le im ilo kapijuknene im jukjuk in pād an Armej ro Rekwojarjar, im erom juon make eo ejim̧we tata, eanemkwoj tata, em̧ool, lem̧ōņōnō kōn kōņaan im lem̧ōņōņō ilo pokake kien ko an Anij. Pinmuur—ilo juon tōre—ilo im kōn Jisōs Kraist ej itok bujen uwaan in.

Kōjatdikdik eo kōn mour eo an Jisōs Kraist im Mijen eo An.

Kajjojo raan, kōjatdikdik eo an Ijtō im kallim̧ur eo ej kitbuuj kōjeraaman ko im katak ko Jisōs Kraist eaar kwaļok ilo jerbal in karejar eo An eweppān ilo mour eo An ioon laļ in. Kar kapiti ilo jinoin, Jisōs Kraist ear ļotak tok āinwōt Nejin Anij Emake Ekar Keotak (lale Jacob 4:5; Alma 12:33–34; Moses 5:7, 9). Eaar lapļo̧k ilo An mālōtlōt im rūtto, im ilo jouj ippān armej im Anij (lale Luk 2:52). Kapukot wōt n̄an kōm̧m̧an Ankilaan Jemān, Jisōs Kraist eaar jeorļo̧k jerawiwi ko, kemour rim̧ōjņo ro, kōjerkak eo emej, im kaenōm̧m̧an ro rej nan̄inmej im ajimakeke.

Ilo juon tōre, ālkin an jitlo̧k ium̧win 40 raan ko, Ekar kam̧ool, “Jetōb an Irooj ej Ioō, bwe Ear kapit Eō bwe In kwaļo̧k gospel n̄an ri jeram̧ōl Ear jilkintok Eō bwe In kwaļo̧k kōtļo̧k n̄an ro rej mour wōt, im loļo̧kjeņ n̄an ro re pilo, bwe In kōtļo̧k ro ar ko̧kkure er” (Luk 4:18; lale bar Aiseia 61:1).

Ej kōj kajjojo.

Ilo Kejota eo Āliktata, Jisōs Kraist eaar kwaļ neen rijilōk ro An (lale Jon 13:4–8). Jim̧or ilo laļ eo Mokta im eo Ekāāl, “denin mour” eo im “pilawe in mour eo” E Make eaar jino kwojkwoj eo. Ilo kain̄i eo ekwojarjar an kwojkwoj eo, jej kūr n̄an Jemān im jej kōm̧m̧an bujen n̄an bōk iood etan Jisōs Kraist, kemeemej E iien otemjej, im kōjparok kien ko An, bwe Jetōb eo An en maron̄ pād ippād iien otemjej (lale Luk 22:19–20; 3 Nipai 18:7, 10–11).

Ilo Jikin Kallib Gethsemane, Jisōs eaar en̄taan eļaplo̧k jān an armej maron̄ en̄taan n̄an pinmuur im lo̧mo̧o̧ren kōj. Bōtōktōk kar to̧o̧rļo̧k jān aolep ron̄ in ānbwinin. E ekar en̄taan kōn metak kein n̄an aolep, bwe jen jab maron̄ en̄taan eļan̄e jenaaj ukweļo̧k (lale Katak im Bujen Ko 18:11; 19:16).

Kariab im ņa ruōn ilo jab jim̧we, kar kajirere kake im den̄ļo̧ke Jisōs Kraist, im juon kūraun in lōklōk ko kar iuun laļļo̧k ioon Bar ettā Bōran (lale Matu 27:26, 29; Mark 15:15, 17, 20, 31; Luk 22:63; Jon 19:1–2). “Kakinejnej E kōn bōd ko ad… im kājmour kōj kōn depetpet ko An” (Aiseia 53:5). E ear “toto ioon debwāāl” n̄an kan̄ōltok kōj n̄an E (lale 3 Nipai 27:14–15). Mekarta, aeet ilo ioon debwāāl eo, Jisōs Kraist ear jeorļo̧k bōd (lale Luk 23:34). E ear kajjitōk ippen Jon n̄an lale Jinen (lale Jon 19:26–27). E eaar en̄jake aer eļļo̧k jān E (lale Matu 27:46; Mark 15:34). Bwe en kakūrm̧ool jeje ko rekwojarjar, E ekar ba E ekar maro (lale Jon 19:28). Ke ekar dedeļo̧k aolep kain, E kōn Emake “E mej” (Luk 23:46; bar lale Jon 10:17–18).

Jisōs Kraist ejeļā kilen jipan̄ kōj ilo nan̄inmej ko ad, m̧ōjno̧ ko, ajimakeke, makeļo̧k, im apan̄ ko (lale Alma 7:12). Kain kaen̄taanan kein ekkā aer itok āinwōt ta eo ej waļo̧k tok ālik alikin kāālet ko an ro jet. E ebareinwōt jeļā wāwein lan̄lōn̄ ipped ilo lo̧udin̄din̄ ko ad im kam̧m̧oolol, wāween jan̄ ippād n̄e etōrjān jon̄an obrak kōn lan̄lōn̄. Ilo mera, E ej kūr kōj ilo āt eo Etan, kōn Ainikien, n̄an lowaan oror eo An. E ej kūr n̄an aolep armej ijoko jabdewōt. E ej karuwaineneik kōj n̄an lo im meļeļe kōn mour in kōn juon kōļmenļo̧kjeņ indeeo. Ilo ad etetal jim̧we im kejparok bujen ko ad, E ej kallim̧ur bwe aolep men ko remaron jerbal ippen doon n̄an em̧m̧anļo̧k eo ad (lale Katak im Bujen Ko 90:24; Rom 8:28).

Ilo iien eo An im iaļ eo An, bar kōjepļaak enaaj itok—ejjab wōt kōn wāween an men ko kar ak barāinwōt n̄an ta eo remaron̄ erom. Ilo m̧ool, Jisōs Kraist emaron̄ kanemkwoj kōj jān kōm̧akoko im jerawiwiw, jān mej im hell, im maron̄ jipan̄ kōj kakūrm̧ool kadkad ekwojarjar eo ad ilo ad aorōkļo̧k jān ad kar ļōmņak, kōn tōmak ilo ukweļo̧k.

Kōn Jisōs Kraist, mej ejjab jem̧ļo̧k eo. Ilo Ijtō jej kean̄:

Kōn kien im kajoor jān Jemān, Jisōs emaron̄ likūt An mour im bar bōk e(lale Jon 10:17). Ilo an Abwinin babu ilo lōb eo, Jisōs Kraist eaar jerbal in karejar im ejaake ilo laļ in jetōb ko, kwaļo̧k “lo̧mo̧o̧ren eo aer jān korak ko an mej” (Katak im Bujen Ko 138:16).

Ilo jibon̄in raan eo kein kajilu, E ear jerkak jān lōb eo. E ear kōnono n̄an Mary. E ekar waļo̧kļo̧k n̄an ruo rikaļoor ro ilo iaļ eo n̄an Emmeōs, Rijjilōk ro An, im ro jet. (Lale Matu 28; Mark 16; Luk 24; Jon 20.)

Ilo juon naan in kam̧ool, E ekar karuwaineneik rikaļoor ro An n̄an joļo̧k ok ko aer ilo turejet eo juon in wa eo; ilo iien in, men̄e bar juon alen obrak kōn ek, ok ko raar jab rup (lale Jon 21:6–11; Luk 5:3–7). E eaar najidik rikaļoor ro im kajjitōk ippen Peter jilu allen n̄an najidik siip im lamp ko An (lale Jon 21:12–17). E ekar weakļo̧k n̄an lan̄, kean̄ bwe rikaļoor ro An tōre eo im aolepād wōj kiiō aikuj kwaļo̧k nuuj aiboojoj eo an Ijtō im gospel eo An ippān aolep laļ, nukwi, im armej (lale Matu 28:19–20; Mark 16:15).

Jisōs Kraist ej Seperd eo ad Em̧m̧an im Ļaam̧ eo an Anij. E ekar ajeļo̧k mour eo An n̄an, im leļo̧k mour eo An n̄an, sip ko An. Ilo Jikin Kallib Gethsemen im ioon debwāāl eo, E ekar kōm̧m̧ane men ban kar kōm̧m̧ane im kar lo̧mo̧o̧ren kōj. Iien in im ilo indeeo, E ej kwaļok n̄an kōj kōn waanjon̄ok ekōjkan an “mej ej kōpeļo̧k iaļ eo n̄an indeeo.”

Kōn kajoor eo an Pinmuur im Jerkakpeje eo an Kraist, ānbwinnid im jetōb ko ad renaaj bar koba ippān doon ilo jerkakpeje eo an ānbwin eo. Jenaaj aiboojoj, jepļaak in piktok eo im jekjek eo an ānbwin, ra im makoj. Em̧ool kooļ ko an bōrad renaaj bar jepļaak. Jenaaj anemkwoj jān men ko bwinnin mour in, nan̄inmej, jorrāān an ānbwin, im likjab ilo kōļmenļo̧kjeņ. Pinmuur eo an Kraist emaron̄ kōjeram̧m̧an kōj n̄an anjo ioon aolep kain jepel ilo jetōb im mej ilo jetōb. Kōn jekjek eo an ukweļo̧k, jej anemkwoj jān aolep jeraiwiwi, būrom̧ōj im peļļo̧k n̄an tarlep in iakwe im lan̄lōn̄ eo indeeo. Wānōk, erreo, anemkwoj, jemaron̄ bar ro̧o̧l ilo jemjerā ko an baam̧le raorōk tata n̄an im̧aan mejān Anij im Jisōs Kraist eo aiboojoj, āinwōt aiboojoj in selestial.

Jenaaj lo ro jej iakwe er bar juon allen. N̄e jenaaj bar ippen doon ippen ro jej iakwe er, jenaaj lo doon ilo juon ļōm̧ņak eo ej n̄an indeeo—kōn eļapļo̧k iakwe, meļeļe, im jouj. Pinmuur eo an Jisōs Kraist emaron̄ jipan̄ kōj kememej ta eo ej aorōk im meļo̧kļo̧k ta eo ejjab aorōk. Lo ad Rilo̧mo̧o̧r im jemjerā ko kōn eļapļo̧k tōmak im kam̧olol ej boktok aenōm̧m̧an, ļōn̄aj eddo ko, kemour jemjerā ko an armej ippān doon, im kobaik baam̧le ko ilo iien in im ilo indeeo.

Kōjatdikdik eo kōn Bun̄-Pāļo̧k im Lan̄lōn̄

Ijtō ilo Jisōs Kraist ej kitbuuj an wintō ko lan̄ peļļo̧k, kōjeraam̧m̧an ko an lan̄ rej ļapļok ilo kabiwlōn̄lōn̄, im armej renaaj mour ilo jekjek ko rōlo̧udin̄din̄ im kam̧ōņōņō. Ijtō ilo Jisōs Kraist ej kitbuuj kaenōm̧m̧an im kejparok kōrā ro emej ro riturier im riatijinemjen ro, ro rej kwole im ejjeļo̧k aer maron̄, ro rej mijak, kakkure, ak ro rej pād ilo wāween ko rōkamijak ak kōmmetak ejjab kōn bōd an jabdewōt. Ļōmņak kōn ro kajjojo, Jisōs Kraist ej karuwaineneik kōj n̄an lo im jerbal in karejar kōn iakwe im tūriam̧o kake, āinwōt An kar ko̧m̧m̧ane.

Ilo aolep men ko rem̧m̧an, Jisōs Kraist ej kejepļaaktok eļapļo̧k (lale Jon 10:10; Alma 40:20–24). E ej kallim̧ur bwe “laļ ej obrak, im eļap bwe eo ie” (Katak im Bujen ko 104:17). An kōjepļaaktok aolep men ko ekitbuuj tarlep in gospel eo An, maron̄ im mālim an priesthood eo An, im kain̄i ko rekwojarjar im bujen ko loi ilo Kabun̄ eo An, kar etōņake Etan, em̧ool Kabun̄ eo an Jisōs Kraist im Armej ro Rekwojarjar ilo Raan Ko Āliktata.

Ijtō ilo Jisōs Kraist ej kitbuuj elōn̄ļo̧k m̧ōko rekwojarjar im̧ōn Irooj rej epaaktok n̄an ajiri ro nejin Anij ilo elōn̄ jikin ko, boktok n̄an buruōd katak ko an “Rilo̧mo̧o̧r ilo Toļ Zion” (lale Obedaia 1:21). Irooj ej letok juon iaļ eo kōkwojarjar, jab lōmņak kōn e make n̄an ad leļo̧k ioon laļ in ta eo ro jej iakwe er im em̧ōj aer mootļo̧k rej aikuiji im ikdeleel eo ilo indeeo me rejjab maron̄ bōk kōn er make.

Ta eo kar kōnono kake ej aō kōjatdikdik, kallim̧ur im naan in kam̧ool. Ij kam̧ool kōn Anij Jemād, ad Rilo̧mo̧o̧r im Ripinmuur, Jisōs Kraist; im Jetōb Kwojarjar eo. Ilo Ijtō im aolep raan, kōm̧m̧an bwe jen lo kōjatdikdik indeeo eo ilo kallim̧ur eo ilo karōk in m̧ōņōņō eo ekwojarjar, kōn iaļ in bujen eo an oktak ekwojarjar eo jān mour wabanban n̄an mour jab wabanban im mour indeeo. Kajjojo raaan kōm̧m̧an bwe jeļā eo kōn Pinmuur eo an Jisōs Kraist en ļōn̄aj eddo ko ad, jipan̄ kōj kaenōm̧m̧an ro jet ilo būrom̧ōj ko aer, im kanemkwoj ad n̄an bōk tarlep in lan̄lōn̄ eo An.

Kōn kōjatdikdik im kallim̧ur eo an Ijtō, Jisōs Kraist ej kakūrm̧ool kōjatdikdik ko im ikdeelel ko rem̧ool im m̧wilaļ an juon im uwaake kajjitōk ko an jetōb ko ad.