Padahk en ehu ehu sounpwong Ong Kakehlepen me Pwulopwul Pepuweri 2025
Sawas sang ehu Mehn Sawas Keieu Kaselel
Sohte lipilipil soangen kahpwal dah me kumwail sohpai, Sises Krais pahn sewesei kumwail ni ansou me kumwail pahn sohpeidohng Ih.
Koasoandio, sang Jeanette Bourup
Ekei pak kitail koaros kin anahnehda ekis kisin sawas. Ekei pak lapalahn sawas me kitail kin anahne. Ni mehlelo, mour kin udahn mwahu ni ansou me kitail sohte kin song en kelehpwiki.
Sises Krais iei me wia mehn sawas, koapwoaroapwoar, oh kakehlail keieu mwahu. E pil ketin kak sewesei kumwail en mwahusang me—mweihn pil ni soangen wasah kan me kumwail sohte medewe kak wiawi.
Weliakapw en Mohngiong Ehu
Mie pak kumwail kin kapakapiki me Koht en kamwuterehkehla mohngiong en amwail imwintihtih kan? Ma ei, eri kumwail mihmi nan ahl pwung (kilang 3 Nihpai 12:44; Moronai 7:48). Itar ma sohte amwail imwintihti kan me duwehte nan Pwuhk en Mormon (kumwail ese, imwintihti kan me miehier neirail mehn mahwen kan oh onopadahr en pei), mweihn kumwail kapakapier me Koht en kamwuterekehla mohngiong en aramas emen me sohte kin mwahu ehng kumwail.
Ahpw miehier pak ehu me kumwail medewehda en kapakap oh peki rehn Koht en kamwuterekehla amwail mongiong kan? Mweihn kumwail ahniki apwal en mahkehng aramas emen. De kumwail kalapw keh lingeringer, itarete ma kumwail sohte kin men lingeringerda. De kumwail men ahneki kadekehng riomwail kan itarete me ni mehlelo arail kin kalidorei kumwail ekei pak.
“[Sises Krais] pahn wekidala amwail mohngiong oh amwail mour. Ekis ekis, kumwail pahn kekeirda oh duwehla Ih. Amwail inou sarawi kan me kadokei kumwailahng Ih pahn kihong kumwail ahl laud ehu ong Sapwellime manaman” (Ong Kakehlepen me Pwulopwul kan: Mehn Kaweihd Ong Wiahda Pilipil kan [2022], 8, iren kapatapat).
Met sou wia inou lap ehu? Sohte lipilipil soangen kahpwal da kumwail mihmi loalle, pil pein amwail mohngiong kan, Sises Krais kak sawas. Ia mwomwen amwail pahn kak sohpeieng Ih rahn wet?
© 2025 sang Intellectual Reserve, Inc. Kolokol pwuhng koaros. Intingda nan Wehin Amerika. Kamanaman ong ni Lokaiahn Inglis: 6/19. Kamanaman ong kawehwe: 6/19. Kawehwepen Monthly For the Strength of Youth Message, February 2025. Pohnpeian. 19621 885