“I Pahn Kamwauih irailla,” Liaohna, Pepuweri 2025.
Padahk en ehu ehu sounpwong Liaohna Pepuweri 2025
“I Pahn Kamwahuih Irailla”
Sapwellimen Sounkomouro doadoahk en kamwahuihalao iei me wia tepin doadoahk sarawi oh inou en kamwahuihalahn paliwar oh palien pepehm poatoapoat me pahn kohieng emen emen kitail ni rahn en Iasadaho.
I wie tamatamante ekei seiloak reirei me I wiahier ni ahi wia pwukoah doadoahk en kapdin en sompihr.
Nan ehu doadoahk koa, I pahn kin pihrdahsang Sehmen kuloak 11:00 nimenseng oh peidi nan California kuloak 1:00 nisouwas ni rahnohte. Karasapene kulok en pihrdao oh kulok en peidio, e mwomwen me pipihr en sompihr ehu kotehla Sehd en Atlantic oh wehin North America wiawihki ele awahte riau. Sompihr Boeing nempe 747 udahn marahra, ahpw kaidehn soangen marahrahu! Ni mehlel, se pihrki kerenieng awa 11, kisinieng me wihwia, pwe sen seiloangkihla mwaihl 5,600 (kilomider 9,000 ).
Pwehki aht pipihr kohla palikapi, ketipino sohte douluhl kihrla nan ereihn aht wie pipihro. Se pereniki ah wie rarahnte sangete aht seiloak sang Sehmen lel California.
Ahpw uhd ahnsou en pwuralahng Sehmeno, sohte douluhl duwepene. Itarete aht mweselda ni ah apwetehnte mwurin souwas la, ni aht pihrla palimese, ketipino kihrla mwadangasang me e kin udahn wia, oh mwohn aht tehkada, e nihpwongdier.
Nan ereihn pipihr reirei pwukat, palingeniet kin direkihla popohl ni ai kin kilang wen kaselel en sampah wet oh koasoandi en sapwellimen Koht kepikipik. Pil ni ansou se wie pipihr nihpwong, nan rotorot, I ese ni mehlel me ketipino pahn pwurehng dakada, maraihn laudo pahn pwurehng pwurodo oh wahdo pepehm mwahu oh mour ong rahn kapw ehu mwohn aht seiloako pahn imwisekla. Irair kan en ei pipihro kakete wiahda me mwomwen ketipino kikihrla wawaisang de mwadangala, ahpw I ese me ketipino pahn doudoulahte, sohte mwekid, oh wiahte ah pwukoah nanleng kan.
Ihte pil duwen ai pepehm ong Koht. Pwehki ai wehwehki mehlel sapwellimen Koht eripit oh kahrepen Sapwellime kepikipikdah kan koaros, I kak kehn popohl en koapwoaroapwoar oh meleilei poatoapoat ni ansou me I kin medewe duwen atail momour en ansouwet. Kitail wia sapwellimen Koht seri kan. E ketin poakohng kitail. E ketin mwahngih atail kahpwal kan. E ketin onopadahr en sewesei kitail. Mehlel pwukat sohte kin wekidek, itarete ni ansou me soahng teikan me mih limwahtail sohte kin soan oh sohte kak sansal.
Kitail koaros kin lelohng ansou kan me kitail kin mihla nan rotorot, pahtou, oh soh koapwoaroapwoar me kin kauwehla atail onepek mwahu. Ia uwen kaping me I ahniki ong mehn sawas me mie oh mehlel en me mehlelo oh maraihn (kilang Doctrine and Covenants 88:6-11). Sises Krais iei me kamarain oh komour pen sampah. Pwehki Ih oh Sapwellime tomw en tohnmetei, kitail ahniki koapwoaroapwoar ong ansou kan me pahn kohdo, kak alehdi marain me kin kamarainiada rotorot en rahn akan en atail seiloak, oh inou en powehdi lapalap dihp oh mehla.
“E Ketin Poakoahng Sampah”
Sises Krais kelehpw me wia ohl unsek me ketdo pohn sampah. Pwehki sang ni Sapwellime mour unsek, sohte Sapwellime pweipwand ehute ong palien dahme pwung. Sang ni limpoak ong kitail, E meiroangkihla Sapwellime mour ong emenemen kitail oh ong sapwellimen Koht serih kan koaros pwe en ritingada wenihmwo ong mour kokohlahte oh mour soutuk.
Itarete dahme Sehdan nantihong kitail en kamehlele, sohte emen rehtail me kak daulih sapwellimen Sounkomouro koahiek en kapit kitailla. Sohte emen kitail me pahn sohte iang alehdi kupwurkalahngan en mahkepen dipatail. Sohte emen kitail me daulihla uwen “sapwellime limpoak me kipehdier wasa kohkohlahte” (2 Nihpai 1:15).
Kisakis keieu laud nan kisakis koaros kohsang ni manaman me wiawi oh alahldi sang ni Tomwpen Sises Krais. Pwehki en Sounkomouro lokolok nan Kedsemeni oh pohn Kolkohda, E mwahngih mwomwen eh pahn kapit kitail sang oh sewesei kitail nan sohte lipilipil oh nan atail luwet akan koaros (kilang Alma 7:12).
“Soahng koaros me e kin ketin wia kin wiawi ong kamwahupen sampah; pwe e ketin poakohng sampah, kahrehda e ketin mweidala pein eh mour pwe aramas koaros en kak kohdo reh” (2 Nihpai 26:24).
Sises Krais iei kakehle petail!
E kin ketin kapahwei limehkoa.
E kin ketin kapwurehdo.
E kin ketin kapitala.
“Ansou me Sounkomouro [ketin wiahier Sapwellime tomw en meiroango] ong aramas koaros, E ritingadahr ahl ehu ong koaros me kin idawehn Ih en kak ahneki Sapwellime manaman en kamwahuihala, kakehlakahda, oh poadoandoarehla,” Preseden Russell M. Nelson me mahsanih met.
Manamano, me duwehte ketipino, kin ansou koaros mihmihte. E sohte douluhl kin mwekid. Pilipil en idawehn tiahk en Sounkomouro duwehte alialuhieisang nan wasa rotorot kolahng nan marain, wasa kitail kak alehdi kapai kan en sapwellimen Koht marain, pepehm mwahu, oh limpoak. I ese me ehu rahn, kitail pahn kilengla mwuri oh audaudkihda kapinglap me kitail wiahda ong pilipil poatoapoat keieu kesempwal en likih Sises Krais oh sapwellime limpoak laud en utung oh kakehlailih kitail.
“Pwurodo Rehi”
Pwuhk en Mormon koasoia duwen aramas akan me mihmihki rahn siluh nan wasa keieu rotorot me wia mwurin Kalohpwualahn Sounkomouro. Nan wasa rotoroto me kapilpene iraillo kak wewehki ngehn en rotorot me kitail koaros kehnehr pwehki dihp. Eri aramasoko ahpw rongada kepitien Krais lukluke irail sang nan rotoroto en kodohng nan Sapwellime marain:
“Kumwail sohte pahn pwurodo rehi met, oh koluhkihla dipamwail kan, oh wekidala amwail mour, pwe ien kamwahuih kumwail la?” (3 Nihpai 9:13).
“Oh kumwail pahn meirongkihong ie mohngiong karakarahk oh ngehn peik” (3 Nihpai 9:20).
“Koluhla oh pwurodo rehi sang nan mohngiong mehlel unsek” (3 Nihpai 10:6).
Sounkomouro uhsehdohte soangen luhkohte ong kitail rahnwet ni ansou me kitail pahn kin salongala nan rotorot. Me duwehte dakadahn ketipino tapiadahr ehu rahn kapw, ehu ehu ahnsou me kitail koluhla, kitail kin alehdi ehu tepida kapw, marain en tepidahn rahn kapw ehu.
Ahpw e sohte wehwehki me e mengei. Koluhla wehwehki weliakapwala, oh weliakapwala sohte kin mwadangete wiawi. Ni popohl, koluhla wia kisehn “nsensuwed me Koht kin ketin doadoahngkio” (2 Korint 7:10). E anahne kitail en wehkada oh pekmahngki atail wiewia sapwung kan, pekpeki mahkepen dipetail kan sang Koht oh sang irail kan me kitail wia sapwungehng. Ni mehkoaros, e anahne me kitail en rapahki “Ngehn en Kauno Wasa Lapalahpie,” pwe kitail en kak kehn “me ketin kawiliakapwala mehlel nan aht mohngiong kan, me kahrehda se sohlar inengieng wia me suwed, ahpw pahn wiwiahte me mwahu ahnsou koaros” (Mosaia 5:2).
Soangen weliakapwala wet kin werei, ahpw ni ansou me kumwail pahn tapiada ale keieu en kahk, “rahn en amwail komourla” pahn tepida, oh “koasoandi lap en poadoandoaro pahn mwadangete wiawihong kumwail” (Alma 34:31).
Sang ni atail mehleliki koluhla, Koht ketin inouki mahk oh sohte tamataman dipetail kan. Ni ansou me kitail ahniki kahpwal en manokehla dipetail kan, kitail anahne nantihong en likih sapwellimen Koht inou en mahk oh esehla en kin mahkohng mehteikan oh pein kitail.
Preseden Boyd K. Packer padahngkiher me, “Ngenetail kan kin ohla ni ansou me kitail kin wiahda sapwung oh wiahda dihp akan.” (1924-2015). “Ahpw me weksang duwen paliweratail kan, ni ansou me wiepen koluhla pahn imwisekla, sohte lipwen ohla ehu mihmi pwehki sang ni Tomwpen Sises Krais.”
Kamwahuiala Ohl Masukun, sang Carl Heinrich Bloch
“Wahdo Irail Wasah”
Sounkomouro me wia Kaun en Soun Kamwahuiala. Ehu kemwekid keieu kaselel me wia kasalepen Sapwellime manaman en kamwahuiala iei me sansal nan Pwuhk en Mormon, nan soaiepen Sapwellime papah nan Amerika nan mwein kawao:
“Mie me soumwahu nanpwungamwail?” E ahpw ketin keinemwe. “Wahdo irail wasah. Mie rehmwail me nehtuk, de maskun, de sikel, de sohte kak alu, de toktok, de mwoator, de salengopon, de me ahneki soahngen kahpwal sohte lipilipil? Wahdo irail wasaho oh I pahn kamwahuih iraila, pwe I poakeirailahr; loaloiet me kin diren kalahngan.
“Kedekedeo ahnsou me e mahsenier, pokono pwon, ehupene kohla, oh wahla neirail me soumwahu kan oh me ahneki kahpwal, neirail me nehtuk, neirail me maskun, oh neirail me salongopon, oh irail koaros me ahneki kahpwal sohte lipilipil; oh e kamwahuiala emen emen irail ni arail wisikdohng reh” (3 Nihpai 17:7, 9).
Ansou koaros me Sounkomouro kin kamwahuiala aramas emen “me ahneki soangen kahpwal sohte lipilipil,” koaros mwowe oh mwurin Sapwellime Iasadahuo, e wia kadehdehpen Sapwellime manaman lapalap en kamwahuiala palingenetail kan. Ehu ehu kamwahula manaman kan wia tepin doadoahk sarawi oh inou en kamwahulahn paliwar oh pepehm poatoapoat me pahn kohieng emen emen kitail ni ansoun Iasadahu, me “iei Sapwellimen Kauno doadoahk en kamwahuiala me keieu laud.”
Iei e mehlel me atail kapakap akan ong kamwahula ong nan mour wet sohte kin kalapw mie pasapengpe nin duwen me kitail kin kasik, ahpw e kin sohte pohnsehsela irail. Ahnsou en kamwahulao pahn kohdo, duwehte rotorot en pwohng ah kin ansou koaros sohrala—ni ahnsou me pwung—ong ni dakadahn ketipin lingano.
Ni Preseden Nelson kadehdehkier: “E sohte douluhl kin pohnsehsehla atail pwoson. I ese me en Samatail Nanleng me direki-eripito koasoandi inenen laudsang dahme atail. Ni atail wehwehki atail kahpwal akan oh medek en nan mour wet, E mwahngih atail pweidah kan oh koahiek kan en nan mour mwurin met. Ma kitail kapakapiki en ese Sapwellime kupwur oh kihong kitail en ahniki kanengamah oh idemah, kamwahula sang nanleng kak wiawi ni pein Sapwellime koasoandi oh ahnsou.”
Me keren ngehi oh ai pwoud, Harriet, kapatahiengehr nan aht kapakap kan koapwoaroapwoar kesempwal ehu oh pekipek ni ngidingid ong mehkei me se poakoahng. Se kapakapkiher me arail pwihn en apwalih soumwahuo kak alehdi koahiek me kak kamwahuiala arail soumwahu kan. Se inenen kapingki aht kapatahieng me itarete ma sohte mwadang en kamwahula ehu de maiauda mie, Sapwellimen Sounkomouro manaman en kamwahuiala kak wahdohng irail kaloalemwahu oh meleilei. Lipwen Sapwellimen Sounkomouro manaman en kamwahula pahn kak kiheng kitail lapalahn lipwalipw ong atail pepehm, pali ngehn, oh pil roson en paliwar sang kamwahula kan me kitail kin alehdi sang sampah. Sises Krais iei me wia Soun Kamwahuiala nan mour wet oh mour soutuk.
Rie ohl oh lih akan, kempoakehpaih kan, I kahdehdehki me sapwellimen atail Sounkomouro kupwurkalangan itar en kamwahuiala amwail ohlah kan, kamwakelei kumwail sang nan dihp, kakehlakai kumwail ong nan kahpwal akan me pahn kohdo, oh kapai kumwailkihda koapwoaroapwoar, eripit, oh Sapwellime popohl. Sapwellime manaman kin ansou koaros mie—poatoapoat oh lelepek—itarete ma kitail, ong ahnsou ehu, pehmada atail dohsang Sapwellime limpoak, marain, oh pepehm mwahu.
I kapakapiki kitail en dehr sohla ahniki wahu oh kaping lap ong soahng koaros me Sises Krais ketin wiahiong kitailehr. Menlau ese me limpoak me mie ong kumwail me unsek, oh tamataman inou poatoapoat me kumwail alehdiero.
“Oh Koht en ketin mweidohng kumwail pwe amwail toutou kan en kak marahrahda, sang ni peren en Sapwellimeo,” Sises Krais (Alma 33:23).
© 2025 sang Intellectual Reserve, Inc. Kolokol pwuhng koaros. Intingda nan Wehin Amerika. Kamanaman ong ni Lokaiahn Inglis: 6/19. Kamanaman ong kawehwe: 6/19. Kawehwepen Padahk en Liaohna ong ehu ehu Sounpwung , Pepuweri 2025. Pohnpeian. 19609 885