Binulan a Mensahe iti Para iti Pigsa dagiti Agtutubo , Pebrero 2025
Tulong manipud iti maysa a Naan-anay a Pagtaudan
Ania man dagiti panagkarigatan a sangsanguem, tulongannaka ni Jesucristo bayat ti panagturongmo Kenkuana.
Ti Pagtuladan, ni Jeanette Bourup
Iti maysa a panawen wenno sabali kasapulantayo amin ti bassit a tulong. No dadduma adu a tulong. Ti kinapudno ket, gagangay a nasaysayaat nga amang ti biag no diyo padasen ti mapan ditoy nga agmaymaysa.
Ni Jesucristo ti naan-anay a pagtaudam iti tulong, namnama, ken pigsa. Isuna pay ti makatulong a mangbalbaliw kadakayo para iti nasaysayaat—mabalin nga uray kadagiti wagas a dimo impagarup a posible.
Panagbalbaliw ti Puso
Inkararaganyo kadin a paluknengen koma ti Dios ti puspuso dagiti kabusormo? No kasta, addaka iti nasayaat a kakadua (kitaen iti 3 Nephi 12:44; Moroni 7:48). Uray no awanankayo kadagiti kabusor iti dayta met laeng a kaipapanan ti Libro ni Mormon (ammoyo, dagiti kabusor nga armado kadagiti armas ken nakasagana a mangraut), nalabit nga inkararaganyo a paluknengen koma ti Dios ti puso ti maysa a tao a saan a nasayaat ti panangtratona kadakayo.
Ngem napanunotyo kadin ti agkararag ken agkiddaw iti Dios a mangpalukneng iti pusoyo? Mabalin a marigatankayo a mangpakawan iti maysa a tao. Wenno agtultuloy a mapukawyo ti pungtotyo, uray no diyo tarigagayan. Wenno kayatyo a marikna ti ad-adda pay a kinamanangngaasi kadagiti kakabsatyo iti laksid ti kinapudno a mabalin a mangparurod kadakayo no dadduma.
Ni “[Jesucristo] ti mangbalbaliwto iti pusoyo ken ti biagyo. In-inut, dumur-askayonto ket agbalinkayonto nga ad-adda a kas Kenkuana. Ti koneksionyo iti katulagan Kenkuana ket mangyeg kadakayo iti dakdakkel a pannakagun-od iti pannakabalinna” (For the Strength of Youth: A Guide for Making Choices [2022], 8, nainayon ti panangyunay-unay).
Saan kadi a dakkel a kari dayta? Ania man ti panangikarigatanyo, uray ti bukodyo a puso, makatulong ni Jesucristo. Kasano a makaasidegkayo Kenkuana?
© 2025 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly For the Strength of Youth Message, February 2025. Ilokano. 19621 864