“Agasakto Ida,” Liahona, Peb. 2025.
Binulan a Mensahe iti Liahona , Pebrero 2025
“Agasakto Ida”
Ti panagministro iti panangagas ti Mangisalakan ket maysa a nadiosan a pangrugian ken kari ti manayon a pisikal ken emosional a pannakaagas nga umay iti tunggal maysa kadatayo iti Panagungar.
Malagipko pay laeng a silalawag ti sumagmamano kadagiti atitiddog a panagpatayabko bayat ti propesional a biagko kas maysa a kapitan ti eroplano.
Iti maysa kadagitoy, agpatayabak nokua iti Alemania iti 11:00 a.m. ket agdissoak no kua iti California iti 1:00 p.m. iti isu met la nga aldaw. No idilig ti lokal nga oras ti ipapanaw ken isasangpet, mabalin a makita a dua laeng nga oras ti panagtayab a bumallasiw iti Taaw Atlantico ken ti kontinente ti North America. Napardas ti Boeing 747, ngem saan a kasta ti kapardasna! Iti realidad, agarup 11 nga oras, depende iti angin, ti panagdaliasatmi iti 5,600 a milia (9,000 km).
Gapu ta agtaytayabkami nga agpalaud, saan a pulos a limnek ti init bayat ti panagtayabmi. Naay-ayokami iti dakkel a lawag ti aldaw iti amin a dalanmi manipud Alemania agingga iti California.
Nupay kasta, naan-anay a naiduma ti estoria ti panagsubli idiay Alemania. Uray idi agtayabkami iti nasapa a malem, bayat ti panagtayabmi nga agpadaya, naparpartak ti ilelennek ti init ngem iti gagangay, ket sakbay a naammuanmi, dimteng kadakamin ti rabii.
Kabayatan dagitoy atitiddog a panagtayab, masansan a mapno ti kararuak iti panagsiddaaw bayat ti panangutobko iti kinapintas daytoy a daga ken ti urnos ti panangparsua ti Dios. Uray bayat ti panagtayabko iti rabii, iti naan-anay a kinasipnget, ammok nga awan duadua a sumingising manen ti init, agsubli dayta a naraniag a lawag ken mangyeg iti pudot ken biag iti baro nga aldaw sakbay nga aggibus ti panagdaliasattayo. Mabalin a kasla nabaybayag wenno naparpartak ti panagsingising ti init ti kasasaad ti panagtayabko, ngem ammok nga agtalinaed a kanayon, natibker, ken mapagpannurayan ti init kadagiti langit.
Kasta met laeng ti mariknak maipapan iti Dios. Gapu ta addaanak iti nauneg a naibatay a kinasigurado iti sirib ken panggep ti Dios para iti amin a pinarsuana, mariknak ti naragsak a namnama ken manayon a talna no panunotek ti mortal a panagbiagtayo. Datayo dagiti annak ti Dios. Ay-ayatennatayo. Ammona dagiti kasasaadtayo. Nakasagana a tumulong. Saan nga agbaliw dagitoy a kinapudno, uray no kasla saan a natalged ken di mapakpakadaan dagiti dadduma a banag iti aglawlawtayo.
Mapadasantayo amin dagiti kanito ti kinasipnget, ladingit, ken kinaawan ti kinasigurado a mamagpeggad iti talnatayo. Anian a panagyamanko iti mapagtalkan ken pudno a pagtaudan ti kinapudno ken lawag (kitaen iti Doktrina ken Katulagan 88:6–11). Ni Jesucristo ti silaw ken ti biag ti lubong. Gapu Kenkuana ken ti makasubbot a sakripisiona, addaantayo iti namnama iti masakbayan, pannakagun-od iti nadiosan a lawag a mangsilnag kadagiti nasipnget nga aldaw ti panagdaliasattayo, ken ti kari ti ultimo a panagballigi iti basol ken ipapatay.
“Patpatgenna ti Lubong”
Ni Jesucristo ti kakaisuna a perpekto a tao a nagna iti daga. Gapu iti perpekto a biagna, awan utangna iti hustisia. Gapu iti panagayatna kadatayo, intedna ti biagna para iti tunggal maysa kadatayo a saggaysa ken para kadagiti amin nga annak ti Dios a sangsangkamaysa a manglukat iti ruangan iti saan nga ipapatay ken biag nga agnanayon.
Iti laksid ti kayat ni Satanas a patientayo, awan kadatayo ti adda iti labes ti kabaelan ti Mangisalakan a mangispal kadatayo. Awan kadatayo ti saan a maikari manipud iti parabur ti pannakapakawan. Awan kadatayo ti nalabes ti panagbalin a “malikmut iti agnanayon kadagiti takiag ti ayatna” (2 Nephi 1:15).
Daytoy a kaindaklanan kadagiti amin a sagut nga aggapu iti makabael ken makasubbot a bileg ti Pannubbot ni Jesucristo. Gapu iti panagsagaba ti Mangisalakan iti Getsemani ken iti Golgota, ammona no kasano nga isalakannatayo ken tulongannatayo babaen iti aniaman ken amin a kinakapuytayo (kitaen iti Alma 7:12).
“Saan nga agaramid iti ania man malaksid ti pagimbagan ti lubong; ta patpatgenna ti lubong, uray pay no ipustana ti biagna no mayasidegna la ketdi amin dagiti tao kenkuana” (2 Nephi 26:24).
Ni Jesucristo ti pigsatayo!
Mangtulong.
Mangisubli.
Mangispal.
“Idi inted ti Mangisalakan [ti pangsubbot a sakripisiona] para ti amin a sangkataw-an, linuktanna ti maysa a wagas tapno dagiti sumursurot Kenkuana ket makagun-od iti bilegna a mangagas, mangpapigsa, ken mangsubbot, kinuna ni Presidente Russell M. Nelson.
Kas iti init, kanayon nga adda sadiay dayta a bileg. Saan a kaano man agduadua. Ti panagpili a mangsurot kadagiti addang ti Mangisalakan ket kas iti pannagna a rummuar kadagiti anniniwan ken iti lawag ti init, a pakaawatantayo kadagiti bendision ti lawag, bara, ken ayat ti Dios. Ammok nga iti maysa nga aldaw, taliawentayto ti napalabas ken mapnuantayo iti panagyaman ta inaramidtayo ti agnanayon a napateg a pangngeddeng nga agtalek ken ni Jesucristo ken ti nadiosan nga ayatna a mangitag-ay ken mangpapigsa kadatayo.
“Agsublikayo Kaniak”
Saritaen ti Libro ni Mormon ti maysa a tao a nangbusbos iti tallo nga aldaw iti kauunegan a sipnget a nangsurot iti Pannakailansa ti Mangisalakan. Ti pisikal a kinasipnget iti aglawlawda ket mabalin nga isimbolo ti naespirituan a kinasipnget a mapaspasarantayo amin gapu iti basol. Kalpasanna nangngeg dagiti tao ti timek ni Cristo a mangaw-awis kadakuada a rummuar iti sipnget ket agturongda iti lawagna:
“Saankayo kadi nga agsubli ita kaniak, ket ibabawiyo dagiti basolyo, ket mapasurotkayo tapno agasankayo?” (3 Nephi 9:13).
“Idatonyo kaniak a daton ti nasneban a puso ken napnuan babawi nga espiritu” (3 Nephi 9: 20).
“Agbabawikayo ket agsublikayo kaniak nga addaan iti naan-anay a panggep ti puso” (3 Nephi 10:6).
Ipaay ti Mangisalakan dagita met laeng nga awis kadatayo ita no masarakantayo ti bagitayo a nayaw-awan iti kasipngetan. No kasano a ti tunggal panagsilnag ti init ket mangtanda iti rugi ti baro nga aldaw, tunggal agbabawitayo, umawattayo iti baro a pangrugian, naraniag a baro a pangrugian.
Saanna a kayat a sawen a nalaka daytoy. Ti panagbabawi kaipapananna ti panagbalbaliw, ken saan a nadaras a mapasamak ti panagbalbaliw. Idinto a narag-o, iraman ti panagbabawi ti ‘panagladingit a mayannurot iti Dios’ (2 Taga Corinto 7:10). Agkasapulan daytoy nga awaten ken ipudnotayo dagiti bidduttayo, a dumawdawat iti pammakawan manipud iti Dios ken kadagiti mabalin a sinaktantayo. Kangrunaan ti amin, agkasapulan daytoy a kalikagumantayo “ti Espiritu ti Apo a Mannakabalin amin,” tapno mapadasantayo ti “naindaklan a panagbalbaliw iti … puspusotayo, nga awanen kadatayo ti agtarigagay nga agaramid iti kinadakes, ngem ti ketdi agtultuloy a panagaramid iti kinaimbag” (Mosiah 5:2).
Atiddog dayta a kita ti panagbalbaliw, ngem apaman nga aramidem ti umuna nga addang, mangrugin ti “aldaw ti pannakaisalakanmo,” ket “dagus a mayeg kenka ti naindaklan a plano ti pannakasubbot” (Alma 34:31).
Babaen ti napudno a panagbabawitayo, ikari ti Dios a pakawanen ken saannan a lagipen pay dagiti basoltayo. No marigatantayo a manglipat kadagiti basoltayo, ikagumaantayo koma ti agtalek iti kari ti Apo a mamakawan ken sursuruentayo a pakawanen dagiti dadduma ken ti bagbagitayo.
“Madadael dagiti espiritutayo no agbidduttayo ken agaramidtayo kadagiti basol,” insuro ni Presidente Boyd K. Packer (1924–2015). “Ngem saan a kas iti kasasaad dagiti mortal a bagitayo, no nalpasen ti proseso ti panagbabawi, awanen ti nabati a piglat gapu iti Pannubbot ni Jesucristo.
Mangag-agas iti Bulsek a Lalaki, ni Carl Heinrich Bloch
“Yasidegyo Ida”
Ti Mangisalakan ti Maestro a Mangngagas. Maysa kadagiti kapipintasan a panangipakita iti pannakabalinna a mangagas ket masarakan iti Libro ni Mormon, iti salaysay ti personal a panagministrona iti nagkauna nga America:
“Adda kadi masakit kadakayo?” Sinaludsodna. “Yasidegyo ida. Adda kadi kadakayo lugpi, wenno bulsek, wenno pilay, wenno pukol, wenno agkukutel, wenno napakapsutan, wenno umel, wenno marigatan iti uray ania a kita? Yasidegyo ida ta agasak, gapu ta adda asik kadakayo; napno ti lalaemko iti panangngaasi.
“Ket napasamak nga idi nalpasen nga agsao, amin dagiti ummong, a sangsangkatunos, napanda a kaduada dagiti masakitda ken dagiti agtutuok, ken dagiti lugpida, ken bulsekda, ken dagiti umelda, ken dagiti amin a marigatan iti ania man a kita; ket inagasanna ida a saggaysa apaman a naipanda kenkuana” (3 Nephi 17:7, 9).
Tunggal paimbagen ti Mangisalakan ti siasinoman a “naparigat iti aniaman a wagas,” agpadpada a sakbay ken kalpasan ti Panagungarna, maysa daytoy a pammaneknek iti ultimo a pannakabalinna a mangagas kadagiti kararuatayo. Tunggal namilagruan a pannakaagas ket maysa laeng a pangrugian ken kari ti manayon a pisikal ken emosional a pannakaagas nga umayto iti tunggal maysa kadatayo iti Panagungar, nga “isu ti naan-anay nga aramid ti Apo a mangagas.”
Pudno a dagiti kararagtayo para iti pannakaagas iti daytoy a biag ket saan a kanayon a masungbatan iti wagas a namnamaentayo, ngem saan a pulos a di ikankano. Dumtengto ti panawen ti pannakaagas, kas met laeng iti sipnget ti rabii a kanayon a mangted iti dalan—iti umno nga oras—iti nadayag a singising ti init.
Kas iti impaneknek ni Presidente Nelson: “Di kaano man a saan a nabigbig ti pateg ti pammatitayo. Ammok a nalawlawa nga amang ti panirigan ti maysa a nainsiriban a Nailangitan nga Ama ngem iti pannirigantayo. Idinto nga ammotayo dagiti parikut ken saemtayo kas mortal, ammona ti imortal a panagrang-ay ken potensialtayo. No agkararagtayo a mangammo iti pagayatanna ken agpasakuptayo iti daytoy nga addaan iti anus ken tured, ti nailangitan a pannakaagas ket mabalin a mapasamak iti bukodna a wagas ken panawen.”
Iti nabiit pay inramanmi iti asawak, ni Harriet, kadagiti kararagmi ti maysa a naisangsangayan a namnama ken panagpakaasi iti biang ti sumagmamano nga ipatpategmi. Inkararaganmi a maikkan ti healthcare team-da iti naisangsangayan a kabaelanda a mangagas kadagiti sakitda. Naawis ti riknami a nanginayon nga uray no saan a mapasamak ti dagus a pannakaagas wenno panagimbag, ti pannakabalin ti Mangisalakan a mangagas ket mabalin a mangyeg kadakuada iti liwliwa ken talna. Ti makaagas nga epekto ti makasubbot a bileg ti Mangisalakan ket mabalin nga addaan iti dakdakkel pay nga epekto iti emosional, naespirituan, ken uray pay pisikal a salun-attayo ngem iti aniaman a naindagaan nga agas a mabalin nga awatentayo. Ni Jesucristo ti Mangngagas iti daytoy a biag ken iti kinaagnanayon.
Kakabsatko a lallaki ken babbai, patpatgek a gagayyem, paneknekak nga umdasen ti asi ti Mangisalakantayo a mangagas kadagiti sugatyo, mangdalus kadakayo iti basol, mangpapigsa kadakayo para kadagiti umay a pannubok, ken mangbendision kadakayo iti namnama, sirib, ken talna. Kanayon nga adda ti bilegna—kanayon ken mapagtalkan—uray no, iti sumagmamano a panawen, mariknatayo nga adayo manipud iti ayat, lawag, ken barana.
Ikararagko a ditayo kaano man mapukaw ti riknatayo iti panagsiddaaw ken nauneg a panagyaman kadagiti amin nga inaramid ni Jesucristo para kadatayo. Ammoyo koma a naan-anay a maipatpategkayo, ken laglagipenyo ti naikari kadakayo iti agnanayon.
“Maipaay koma ti Dios kadakayo a lumag-an dagiti dagensenyo, babaen ti rag-o ti Anakna,” ni Jesucristo (Alma 33:23).
© 2025 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Pannakaipatarus ti Monthly Liahona Message, February 2025. Ilokano. 19609 864