Rongorongo Ibukin Kakorakoraia Kairake ni Katoa Namwakaina, Beberuare 2025
Te Buoka mairoun ae Onimakinaki ni Koaua
N aki taraia bwa tera taian karawawata aika ko kaitara ma ngaia, e na buokiko Iesu Kristo ngkai ko rairaki nakoina.
Te Banna, iroun Jeanette Bourup
N te tai teuana ma teuana ti bane ni kainnanoa te buoka teutana. N tabetai te buoka ae mwaiti. Te koaua bwa, te maiu e waaki nako n ae nakoraoi riki ngkana ko aki kataia ni wakinnanako n ti ngkoe.
Iesu Kristo bon te tia buokiko ae kororaoi, n te kaantaninga, ao te korakora. E kona naba ni buokiko ni bitiko nakon ae tamaroa riki—tao n aro aika ko aki kona n iangoia.
Te Bitaki n Nano
Ko a tia n tataro bwa te Atua e na kamaraua nanoia am kairiribai? Ngkana ko a tia, ngkanne ko a karekea te reitaki ae moan te tamaroa (taraa 3 Nibwaai 12:44; Moronaai 7:48). Riki ngkana akea am kairiribai are e nanonaki n ana Boki Moomon (ko ataia, taan riribai a katokai bwainibuaka ao a tauraoi ni buaka), ko a bae n tia n tataro bwa te Atua e na kamaraua nanon temanna are e kakaraoa ae aki raoiroi nakoim.
Ma ko a tia n iangoia n tataro ao ni bubutia te Atua bwa e na kamaraua are nanom? Tao e kanganga iroum kabwaraakin ana bure temanna. Ke ko teimatoa ni kakai un, e ngae ngke ko bon aki tangiria. Ke ko tangiria n namakina riki te akoi nakoia tarim ma mwanem e ngae ngke a kaakamaraka nanom n tabetai.
“[Iesu Kristo] e na bita nanom ao maium. Teutana imwin teutana, ko na rikirake ao n riki n ai Arona. Am berita n reitaki ma Ngaia e na karekea riki nakoim te kona ni karekea Mwaakana” (Ibukin Kakorakoraia Kairake Te Kairi Ibukin Karaoan Rinerine [2022], 8, e kairaki ma katuruturuana).
Tiaki anne ngkanne te berita ae korakora? N aki tabe ma te bwai ae ko karawawataki iai, riki bon oin nanom, e kona ni ibuobuoki Iesu Kristo. Ko na kanga n rairaki nakoina n te bong aei?
© 2025 by Intellectual Reserve, Inc. All rights reserved. Boretiaki i USA. Kariaiakaki te Ingiriti: 6/19. Kariaiakaki rairana: 6/19. Rairan te Monthly For the Strength of Youth Message, February 2025. Kiribati. 19621 859