“N na Katoka Aorakiia,” Riaona, Beberuare 2025.
Rongorongon te Riaona ni Katoa Namwakaina, Beberuare 2025
“N na Katoki Aorakiia”
Ana mwakuri te Tia Kamaiu ni katoki aoraki bon te mwakuri ni katauraoi ae itiaki ao te berita ni kamarurung n te rabwata ao namakin ae akea tokina are e na roko nakoira n tatabemaniira inanon te Mangauti.
E teimatoa au ururing ae rangi ni itiaki man abwakin te kiba are I karaoia inanon au tai n riki bwa te kaaben ae mwaatai n te tabo ni kakiba wanikiba.
Teuana mai buakon kibau ae abwabwaki , N na kibanako n te 11:00 n te ingabong mai Tiaman ao ni karoko i California n te aoa 1:00 n te bwakantaai n te bong anne naba. Kabotauan te tai n nako man te tabo ao te tai n roko, taraan ae te kiba n rinukan te marawa ae te Atlantic ao te aba ae Amerika meang e taraa n ae tii uoua te aoa. Te Boeing 747, e bon butimwaaka, ma tiaki n rangi ni butimwaaka! Ni koauana, e nakon 11 te aoa, ibukin te ang, kaean te raroa ae 5,600 te maire (9,000 km).
Ibukina bwa ti kiba nako mainiku, e tuai oti taai inanon kibara. Ti kukurei n otan te ngaina ni kibara mai Tiaman nako California.
Okirikaaki nako Tiaman, ma anne, manga te karaki ae kaokoro. Riki ngkana ti kibanako ni moantaai n te bakantaai, ngke ti kiba rimaeao, e waekoa n roko bungintaai nakon are bon taina, ao imwain are ti ataia, te bong e roko iaora.
Inanon abwakin te kiba anne, e kaonaki n taainako rabwatau ma te namakin ni miimi ngkai I iangoa tamaroan te aba aio ao bairean ana karikibai te Atua. Riki ngkana te kiba n te tairiki, inanon bwaninin te rotongitong, I ataia ni koaua bwa taai e na mang oti, otan te ota anne e na manga oki ni uota te abuee ao te maiu nakon te bong ae boou imwain tokin mwanangara. E taraa n ae aroarou ake a na riki man kibau a na taraa n tia ni karaoa aron otin taai bwa e na karaurau, ke e a manga waekoa, ma I ataia bwa taai e tiku n teimatoa, ni matoa, ao n onimakinaki i karawa.
I namakinna te kawai ae ti te arona n taekan te Atua. Ibukina bwa I karekea korakoran koauan wanawanan te Atua ao te kantaning ibukin Ana karikibai ni kabane, I kona n nmakin te kantaninga te rau ae akea tokina ngka I iangoa taekan rokon rabwatara ae mamate. Ngaira Bon Natin te Atua. E tangiriira. E atai aroarora nako. E tauraoi ni Ibuobuoki. A bon aki bibitaki koaua aikai, riki ngkana bwaai tabeua ake a katobibiira a taraa n aki matoa ao aki kakoauaaki.
Ti bane n rinanon taai man te rotongitong, nanokawaki, ao te nanououa are e kakamaka aron raura i roura. Ai kukureira Ngai ibukin te onimakinaki ao te koaua ni moan rikin te koaua ao te oota (taraa Reirei ao Berita aika Tabu 88:6–11). Iesu Kristo bon otan ao maiun te aonaaba. Ibukina ao Ana mwakuri ni kamaiu, iai ara kaantaninga ibukin taai aika ana roko, ni karekea te oota ni kaotai ara bong aika roo inanon mwanangara, ao te berita man tamaroan te tokanikai i aon te bure ao te mate.
“E Tangira te Aonaaba”
Iesu Kristo bon tii te mwaane ae kororaoi n nakonako n te aonaaba. Ibukin Maiuna ae kororaoi, Akea baena nakon te motikaki taekana. Ibukina bwa E tangiriira, E anga Maiuna ibukira ngaira n tatabemaniira ao ibukiia natin te Atua ni bootaki ni kauka te mataroa nakon te aki mamate ao te maiu ae akea tokina.
N aki ongea Tatan bwa tera ae e na tuangiira ni kakoaua, akea ibuakora ae riaon wanawanan te Tia Kamaiu ni kamaiura. Akea mai ibuakora ae aki tau man te akoi ni kabwarabure. Akea mai ibuakora ae riaoaki ana “katobibiaki ni bain ana tangira ae e aki toki” (2 Nibwaai 1:15).
Korakoran te bwai n tutuaraoi aei e roko man karaoan ao mwaakan kaboon maiura man Ana Mwakuri ni Kamaiu Iesu Kristo. Ibukin rawawatan te Tia Kamaiu i Keketemane ao i Korokota, E ataia bwa e kanga kamaiuara man ao ni buokiira rinanon nako ao ni kabane rawawatara (taraa Aramwa 7:12).
“Bon akea te bwai ae kakaraoia ma ti bwaai aika a na kawaaka te aonaaba, n te aro are e anga oin maiuna bwa e aonga ni kairia aomata ni kabane nakoina” (2 Nibwaai 26:24).
Iesu Kristo bon korakorara!
E kawariia aomata nako.
E kaokii arora.
E kamaiura.
“Ngke te Tia Kamaiu [E anga Ana mwakuri ni kamaiu] ibukiia aomata ni kabane, E kauka te kawai nakoia taan iriiria bwa a na karekea Ana kamaiu, korakorana, ao mwaakana,” e taku Beretitenti Russell M. Nelson.
Te mwaaka anne, n aron taai, e bon teimatoa ikekei. E aki kona ni kamwaingaki. Rinean iriiran mwanekan te Tia Kamaiu bon ti te arona ma nakonakora n otinako man nuura ao inanon ootantaai, ike ti kona ni karekei ana kakabwaia n ootan te Atua, ao te tangira. I ataia bwa n teuana te bong, ti na tanrikaaki ao ni kaonaki ma te kakaitau are ti na karaoa kakawakin ana babaire ae akea tokina ni kakoaua Iesu Kristo ao Ana tangira ae itiak n tabekiira ao n kakorakoraira.
“Oki NakoIu”
N Ana Boki Moomon e taekiniia aomata ake a kabanea teniua te bong inanon te rotongitong n iriira Taurakin te Tia Kamaiu. Te rootongitong n rabwata are e katobibiia e kona n tei ibukin te rootongitong n te maiu n tamnei ake ngaira ni kabane ti rinanona ibukin te bure. Ngkane a na ongo bwanaan Kristo aomata ni kaoiia n otinako man te rootongitong ao nakon Ootana:
“Kam aki okirai ngkai, ma n rairinanomi man ami bure, ma n rairaki, bwa I aonga ni kamarurung ngkami?” (3 Nibwaai 9:13).
“Anganai bwa ami karea te nano ae uruaki ao te tamnei ae raraoma” (3 Nibwaai 9:19–20).
“Rairinanomi man okirai ma nanomi nikoaua” (3 Nibwaai10:6).
E karababaa ana kakao nakoira te Tia Kamaiu ae ti te arona ngkana ti aki kona ni kunea ana kairiiri te tamnei. N aron otintaai n tainako e kaota moan te bong ae boou, ni katoa tai ngkana ti rairinanora, ti karekea te waaki ae boou, te moan waaki ae boou.
E aki nanonaki anne bwa e bebete. Te rairannano nanona te bitaki, ao e aki waekoa n roko te bitaki. N tain te kimwareirei, te rairannao e ikota “rawawatan te atua” (2 I-Korinto 7:10). E kainanoaki bwa ti kaotia ao n kabwarai ara bure, ti bubuti te kabwarabure mairoun te Atua mairouia koraki ake ti a tia ni kamarakiia. Iaon aikai, e kainanoaki bwa tina ukora “Tamnein te Uea ae Moan te Mwaaka,” are e ti na rinanona “te bitaki ae korakora … inanora, n te aro are akea te nano ni kan karaoa ae buakaka, ma n teimatoa ni karaoa ae raoiroi” (Motiaea 5:2).
Aron te bitaki anne bon mwananga ae abwaabwaki, te tai are ko moan anaa te moan mwaneka,“bongin kamaiuam” e waaki, ao “ngkai naba ao e na uotaki te babaire ni kabomwi are e kakannato nakoimi” (Aramwa 34:31).
Rinanon ara rairannano ae koaua, te Atua e berita ni kabwarai ao n aki uringa ara bure riki. Ngkana iai ara kangaanga ni mwanuokin ara bure, ti na kekeiaki ni kakoaua ana berita te Uea ni kabwaraan ara bure ao reiakinna ni kabwarai aia bure tabeman ao ngaira.
“Tamneira a kabuakakaaki ngke ti karaoa te kaairua ao karaoa te bure,” e reirei Beretitenti Boyd K. Packer (1924–2015). “Ma e kaokoro ma rabwatara n aomata bwa, Ngkana e tabwanin te waaki n rairannano, akea te mwaka ae e tiku ibukin ana Mwakuri ni Kamaiu Iesu Kristo.”
Kamaiuan te Mwaane ae Matakii, roun Carl Heinrich Bloch
“Uotiia Mai”
Te Tia Kamaiu bon te Mwatita ni Kamarurung. Teuana man karaoan Ana kamarurung ae mwaaka e kuneaki n Ana Boki Moomon, n rongorongon Ana mwakuri i America ngkoa:
“Iai i buakomi ae aoraki?” E titiraki. “Uotia mai. Iai i buakomi ae mwauku, ke e mataki, ke e ikoaki, ke e aki konabwai, ke e rebera, ke e rai, ke aika a bonotaninga, ke a karawawataki n aekaia nako? Kairiaa mai ao N na katoka aorakiia, bwa iai au nanoanga nakoimi; ao e a onrake nanou n te nanoanga. …
“Ao e korobukina bwa ngke e a tia n taetae, a bane aomata ake a uanao n teuana te tai, ni mwananga ma aia aoraki ao raoia ake a mwauku, ao raoia ake a mataki, ao raoia ake a babanga n taetae, ma aomata ni kabane ake a karawawataki n aekaia nako; ao e boni katoka aorakiia ni kabane ngke a uotaki nakoina” (3 Nephi 17:7, 9).
Ni katoa tai te Tia Kamaiu e kamarurungiia aomata nako “rootaki n aoraki nako,” imwain ao imwiin Manga Utina, bon te tetemanti nakon Mwaakana ae moan te rietaata ni kamaiua rabwatara. Taian kakai ni kamaiu n tatabeua bon moan te mwakuri ao te berita ni kamaiuan te rabwata ao namakin ae akea tokina are e na roko nakoira n te Mangauti, are “bon kakoroan bukin te mwakuri ni kamaiu.”
E bon koaua are ara tataro ibukin te kamaiu inanon te maiu aei a bon aki kaekaaki n tainako n te kawai are ti kantaningaia, ma aaki mwanuokinaki. Te tai ibukin te kamaiu e na roko, n aron te rootongitong n tairiki n tainako e anga te kawai—n te tai ae riai—nakon otintaai ae mimitong.
E kakoaua Beretitenti Nelson: “Ara onimaki e bon aki konaa n ae e na aki butimwaeaki. I ataia bwa ana nonoori te Atua i aon wanawana ni kabane e rang raababa nakon are iroura. Ngkai ti atai ara kangaanga n te maiu aei ao maraki, E atai rikirakera ae e aki mamate ao konabwaira. Ngkana ti tataro ni kan ataa Ana kantaninga ao n anga ngaira nakon te taotaonannano ao te ninikoria, te kamarurung mai karawa e konaa n roko inanon Oin ana kawai ao ana tai.”
N te tai ae aki maan nako kainabau, Harriet, ao Ngai ti reita inanon ara tataro te kantaninga ao te bubuti ae onoti ibukiia tabeman ake ti tangiriia. Ti tataro bwa te tiim ake a tabeakina kamarurungaia ana anganaki te atatai ae onoti ni katokan aorakiia. Ti bon kukurei n reitia are ngkana waekoan katokan aorakiia ke kamarurungakia e aki karaoaki, mwaakan te Tia Kamaiu ni kamarurung e na anganiia te beebete ao te rau. Mwiin te kamarurung man mwaakan kabooan maiura iroun te Tia Kamaiu e na karekea rootakin aia namakin, te maiu n tamnei, ao riki marurungin te rabwata nakon katokan aoraki n te aba are ti kona ni karekei. Iesu Kristo bon Ngaia te Tia Kamarurung n te maiu aei ao akea tokina.
Tariu ao mwaneu, raoraou aika kam tangiraki, I kakoaua bwa ana nanoanga ara Tia Kamaiu e rang tau ni kamarurunga ikoakimi, kaitiakiko man am bure, kakorakorakim ibukin kataaki akana ana roko, ao kakabwaiako ma te kantaninga, wanawana, ao Ana rau. Mwaakana n tainako e mena ikanne—e teimatoa ao onimakinaki—riki ngkana ti, ibukin te tai, namakinan te raroa man Ana tangira, ootana, ao ana namakin n tatangira.
I tataro ti na aki kabwarai ara namakiin ao karekean te kakaitau ibukiia ni kabane are Iesu Kristo e a tia karaoi ibukira. Taiaoka ataia are ko bon tangiraki ni koaua, ao uringnga bwa ko a tia ni beritanaki n ae akea tokina.
“E na te Atua e na anganingkami te Atua kabebetean uotami, rinanon ana kimwareirei Natina,” Iesu Kristo (Aramwa 33:23).
© 2025 iroun Intellectual Reserve, Inc. All rights reserved. Boretiaki i USA. Kariaiakaki te Ingiriti: 6/19. Kariaiakaki rairana: 6/19. Rairan Rongorongon te Riaona ni Katoa Namakaina, Beberuare 2025. Kiribati. 19609 859