iTukutuku Vakavula ni Me iSakisaki ni iTabagone Feperueri 2025
Veivuke mai na Dua na iVurevure Uasivi
Se cava ga na dredre o sotava tiko, ena vukei iko o Jisu Karisito ni ko gole Vua.
Na iVakarau, mai vei Jeanette Bourup
Ena so na gauna eda na gadreva kece edua na veivuke lailai. Ena so na gauna e levu sara na veivuke. Na ka dina, na bula e dau vinaka cake sara nio sega ni tovolea mo lako duadua.
O Jisu Karisito na nomu ivurevure uasivi duadua ni veivuke, inuinui, kei na kaukauwa. E rawa talega ni vukei iko me veisautaki iko mo vinaka cake—ena sala mada ga o nanuma ni na sega ni rawa.
Na Veisau ni Yalo
O sa bau masulaka beka me vakamalumalumutaka na Kalou na lomadra na nomu meca? Ke vakakina, eda sa waqa vata tiko (raica na 3 Nifai 12:44; Moronai 7:48). Kevaka mada ga e sega vei iko na meca ena vakasama vata ga oya ni iVola i Momani (era vakaiyaragi tu na meca ka ra vakarau tu me valu), o a masuta beka me vakamalumalumutaka na Kalou na yalona edua ka sega ni dau vinaka vei iko.
Ia o sa bau vakasamataka beka mo masu ka kerea vua na Kalou me vakamalumalumutaka na lomamu? De dua e dredre tiko mo vosota e dua. Se o dau cudru totolo, ka dina ga ni o sega ni dau vinakata. Se o vinakata mo lomani ira vakalevu cake na tacimu dina nira dau vakacudrui iko ena so na gauna.
“[O Jisu Karisito] ena veisautaka na yalomu kei na nomu bula. O na tubu tiko vakamalua, me yacova nio sa yaco mo vakataki Koya vakalevu cake. Na nomu isema ni veiyalayalati kei Koya ena yaco mai kina vakalevu cake vei iko, na Nona kaukauwa” (Me iSakisaki ni iTabagone: iDusidusi ni Nomu Digidigi [2022], 8, vakaikuritaki).
E sega beka ni yalayala cecere oqori? Se cava ga na ka o sotava tiko, na yalomu sara mada ga, o Jisu Karisito e rawa ni veivuke. Ona gole vakacava Vua nikua?
© 2025 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me vaka Valagi: 6/19. Vakadonui me vakadewataki: 6/19. iVakadewa ni iTukutuku Vakavula ni Mei Sakisaki ni iTabagone, Feperueri 2025. Fijian. 19621 858