“Au na Vakabulai Ira,” Liaona, Fep. 2025.
iTukutuku Vakavula ni Liaona Feperueri 2025
“Au Na Vakabulai Ira”
Na veiqaravi ni veivakabulai ni iVakabula e vakamacala vakalou kei na yalayala ni veivakabulai tudei vakayago ka vakayalo tale ga ena yaco mai vei keda yadua ena Tucaketale.
Au se nanuma vinaka toka eso na vuka balavu au a cakava niu a se pailate voli ni waqavuka dau usa pasidia.
Ena dua gona vei ira oqo, au na vuka mai Jamani ena 11:00 ena mataka ka ro e Kalifonia ena 1:00 na kaloko ena yakavi ni siga vata ga oya. Ni vakatauvatani na gauna ni biubiu kei na gauna ni ro, ena rairai me taura ga e rua na auwa na kena vuka kosovi na Wasawasa na Atalanitika ki na Vualiku kei Amerika. Na waqavuka na Boeing 747 e totolo, ia e sega ni totolo sara! Ia na kena dina qo, ni taura e rauta ni 11 na auwa, ka vakatau ena liwa ni cagi, me vukaci kina na 5,600 na maile (9,000 na kilomita) oqo.
Baleta ni keimami vuka tiko vaka ki na ra, e a sega ni dromu na matanisiga ena neimami vuka tiko. Keimami a marautaka na rarama ni matanisiga mai Jamani ki Kalifonia.
Ia, na lesu tale ki Jamani, a duidui sara na italanoa. Ena gauna mada ga keimami biubiu kina ena yakavi rarama, ka keimami vuka vaka ki na tokalau, e totolo cake na dromu ni matanisiga me vaka na kena ivakarau matau, ka keimami qai kidacala ga ni sa solegi keimami na buto.
Ena veigauna ni vuka balavu vakaoqo, e dau vakasinaiti na yaloqu ena qoroqoro niu vakananuma vakatitobu na totoka ni vuravura oqo kei na ivakarau ni nona veibuli na Kalou. Niu vuka voli mada ga ena bogi, ena loma ni butobuto, au kila deivaki ni na cadra tale na matanisiga, ni na basika tale na rarama serau ka kauta mai na katakata kei na bula ki na dua na siga vou ni bera ni cava na noda ilakolako. Na ituvaki ni noqu vuka e vaka me rairai dromu vakamalua se vakatotolo cake na matanisiga, ia au kila ni matanisiga e dei tu ga, sega ni veisau, ka nuitaki e lomalagi.
Au vakila na Kalou ena sala vata oqo. Baleta ni yavutaki vakavinaka tu na noqu vakadeitaka na vuku ni Kalou kei na Nona inaki vei ira na Nona ibulibuli kece, sa rawa niu vakila kina na inuinui rekitaki kei na vakacegu tawayalani niu vakasamataka na noda bula vakayago. Eda sa Luve ni Kalou. O Koya e lomani keda. E kila o Koya na veika eda sotava. Sa tu vakarau tu o Koya me veivuke. Na veidina oqo e sega ni veisau, veitalia mada ga kevaka era sega ni dei se tawamacala na veika era wavoliti keda tu.
Eda dau sotava kece na veigauna butobuto, rarawa, kei na veilecayaki ka dau kauta tani na noda vakacegu. Au vakavinavinakataka vakalevu na ivurevure nuitaki ni dina kei na rarama (raica na Vunau kei na Veiyalayalati 88:6–11). Sai Jisu Karisito na rarama kei na vu-ni-bula kei vuravura. Ena Vukuna kei na Nona isoro ni veivakaduavatataki, e noda kina na inuinui ena veisiga ni mataka, rawata na rarama vakalou me vakararamataka na veisiga buto ni noda ilakolako, kei na yalayala ni qaqa cecere mai na ivalavala ca kei na mate.
“E Lomani Vuravura o Koya”
O Jisu Karisito duadua ga na tamata uasivi duadua ka mai bula e vuravura. Ena vuku ni Nona bula sa uasivi sara, e a sega ni dinau kina o Koya ki na lewa dodonu. Ena nona lomani keda, a solia kina na Nona bula ena vukuda yadua kei ira kece na luve ni Kalou, me dolava kina na katuba ki na tawamate rawa kei na bula tawamudu.
E sega ni dua vei keda e vakuwai mai na kaukauwa ni iVakabula me vueti keda, dina ga ni vinakata o Setani meda kua ni vakabauta. E sega ni dua vei keda e vakuwai mai na loloma soliwale ni veivosoti. E sega ni dua vei keda e sega ni rawa mena “ovici tawamudu tu ena liga ni nona loloma” (2 Nifai 1:15).
Na isolisoli cecere duadua oqo e lako mai na igu kei na kaukauwa ni veivueti ni Veisorovaki i Jisu Karisito. Ena vuku ni nona vakararawataki na iVakabula mai Kecisemani kei Kolikoca, sa kila kina o Koya na sala me vakabulai keda ka vukei keda ena noda malumalumu kecega (raica na Alama 7:12).
“Sa sega ni kitaka ko Koya e dua na ka, ka vakavo kevaka me na vinaka kina ko vuravura; ni sa lomani ira na kai vuravura, o koya ka sa solia kina na nona bula me vakayarayarataki ira kina na tamata kecega ki vua.” (2 Nifai 26:24).
O Jisu Karisito na noda vu ni kaukauwa!
E dau dodoliga mai.
E veivakalesui mai.
E veivueti.
“Ena [Nona vakacabora na Nona isoro ni veisorovaki] na iVakabula ena vuku ni kawatamata, a dolava kina o Koya e dua na sala mera rawata kina na Nona veivakabulai, veivaqaqacotaki, kei na kaukauwa ni veivueti o ira kece era muri Koya,” a kaya o Presitedi Russel M Nelson.
Na kaukauwa oqori, me vaka na matanisiga, e dau tu ga. E sega ni dau veisau. Na digidigi ni muria na mawe ni yava ni iVakabula sa vaka na lako tani mai na butobuto ki na rarama ni matanisiga, me rawa nida ciqoma kina na veivakalougatataki ni rarama, katakata, kei na loloma ni Kalou. Au kila ni ena dua na siga, eda na railesu ka vakasinaiti ena vakavinavinaka nida a cakava na vakatulewa bibi tawamudu meda nuitaki Jisu Karisito kei na Nona loloma vakalou me laveti ka vaqaqacotaki keda.
“Dou Lesu mai vei Au”
Na iVola i Momani e talanoataka edua na matatamata ka a tiko ena loma ni dua na butobuto levu me tolu na siga ni oti na Nona Vakoti na iVakabula ena kauveilatai. Na butobuto vakayago e wavoliti ira tu, e rawa ni vakatakarakarataka na butobuto vakayalo eda sotava kece ena vuku ni ivalavala ca. Era qai rogoca na tamata na domo i Karisito ni sureti ira tani mai na butobuto ki na Nona rarama:
“Koni na sega ni lesu mai vei au, ka veivutunitaka na nomuni ivalavala ca, ka saumaki mai, meu vakabulai kemuni?” (3 Nifai 9:13).
“Ia mo ni na cabora ga me isoro vei au na yalo raramusumusu kei na yalo bibivoro” (3 Nifai 9:20).
“Dou veivutuni ka lesu mai vei au ena lomamudou taucoko” (3 Nifai 10:6).
Na iVakabula e vakatetea mai na veisureti vata oqori vei keda nikua nida kunei keda nida yali tu ena loma ni butobuto. Me vaka ga ni vakaraitaka na itekivu ni dua na siga vou na cadra ni matanisiga, ena veigauna yadua eda veivutuni kina, eda na ciqoma edua na itekitekivu vou, edua na itekitekivu ramase.
E sega ni kena ibalebale oya ni rawarawa. Na veivutuni e kena ibalebale na veisau, ka sega ni dau totolo na yaco ni veisau. Nida reki tiko, na veivutuni e okati tiko kina na “rarawa vakalou” (2 Korinica 7:10). E gadrevi kina meda tusanaka ka vakatusa na noda cala, kerea na veivosoti mai vua na Kalou kei ira eda a vakamavoataki ira. Ka bibi duadua, e gadrevi meda vakasaqara “na Yalo ni Turaga Kaukauwa,” me rawa nida sotava “e dua na veisau levu … kina lomada, ka me kua tale kina ni tiko vei keda edua na gagadre me kitaka na ka ca, ia meda kitaka tiko ga na veika vinaka” (Mosaia 5:2).
Na mataqali veisau vaka oya e dau ilakolako balavu, ia ena gauna ga o taura kina na imatai ni kalawa, “na siga ni nomu vakabulai” sa na tekivu, ka na “kau yani vakatotolo vei kemuni na ituvatuva cecere ni veisereki” (Alama 34:31).
Nida veivutuni vakaidina, sa yalataka na Kalou me vosota ka kakua tale ni nanuma na noda ivalavala ca. Ni dau dredre meda guilecava na noda ivalavala ca, meda saga meda vakararavi kina yalayala ni Turaga meda veivosoti, ka vulica meda vosoti ira na tani kei keda vakai keda.
“Ena vakacacani na yaloda nida caka cala ka ivalavala ca,” a vakatavulica o Peresitedi Boyd K. Packer (1924–2015). “Ia e sega ni tautauvata kei na yagoda, ni sa cava na cakacaka ni veivutuni, ena sega na mawe e kunei ena vuku ni Veisorovaki i Jisu Karisito.”
Healing the Blind Man [Vakabula tiko na Tamata Mataboko], mai vei Carl Heinrich Bloch
“Moni Kauti Ira Mai”
Na iVakabula sai Koya na Dauniveivakabulai. E dua na ivakaraitaki totoka ni kaukauwa ni Nona veivakabulai e kunei ena iVola i Momani, ena itukutuku ni Nona veiqaravi e Amerika makawa:
“Sa tiko li eso na nomuni tauvimate?” A taroga o Koya. “Moni kauti ira mai. Sa tiko li eso era sa lokiloki, na mataboko, na gera, na mudu, na vukavuka, ko ira sa malai, ko ira sa didivara kei ira kecega sa tauvimate tu? Moni kauti ira mai kau na vakabulai ira, niu sa yalololoma vei kemuni; io sa vakasinaiti na lomaqu ena loloma cecere. …
“Ka sa yaco ni sa cavuta oti na vosa oqo, era sa lako yani ena dua vata na gauna ko ira na lewevuqa, era sa kauti ira mai na nodra tauvimate kei ira sa rarawa tu, na nodra lokiloki, na mataboko, na galu kei na veimataqali mate kecega; a sa vakabulai ira kecega ko koya, nira sa kau yani vua” (3 Nifai 17:7, 9).
Ena veigauna kece e vakabula kina na iVakabula e dua “e vakararawataki ena sala cava ga,” ni se bera kei na oti na Nona Tucaketale, oya sa ivakadinadina ni Nona kaukauwa cecere me vakabula na yaloda. Na veivakabulai mana yadua, sai itekitekivu walega ni yalayala ni veivakabulai tawayalani vakayago ka vakayalo talega ena yaco mai vei keda vakayadua ena Tucaketale, ka sai koya na “cakacaka ni veivakabulai cecere duadua ni Turaga.”
E dina sara ni noda masu meda vakabulai ena bula oqo e sega ni dau saumi mai ena sala eda nuitaka, ia era sega ni dau vakawaletaki. Na gauna ni veivakabulai ena yaco mai, me vaka ga na seyavu yani ni butobuto ni bogi—ena kena gauna donu—me cadra mai na matanisiga serau.
Me vaka sa vakadinadinataka o Peresitedi Nelson: “Ena sega vakadua ni vakawaletaki na noda vakabauta. Au kila ni Nona rai edua na Tamada Vakalomalagi vuku ka yalomatua e rabailevu cake sara mai na noda rai. E dina nida kila tu na noda leqa kei na mosi ni bula vakayago, o Koya e kila na noda tubu kei na noda rawa-ka tawayalani. Kevaka eda na masu meda kila na Lomana ka soli keda kina ena vosota kei na yaloqaqa, ena yaco na veivakabulai vakalomalagi ena Nona sala kei na Nona gauna ga.”
Wale tiko ga oqo na watiqu, o Harriet, kei au keirau a okata ena neirau masu edua na vakanuinui vakatabakidua kei na vakamamasu ena vukudra eso keirau dau lomana. Keirau a masulaka me soli vei iratou na nodratou timi ni tikobulabula, na igu mana meratou vakabulai kina mai na nodratou tauvimate. Keirau a vakauqeti me keirau kuria se kevaka mada ga ena sega ni kunei vakatotolo edua na iwali se veivakabulai, me yaco vei iratou na logaloga vinaka kei na vakacegu ena vuku ni kaukauwa ni veivakabulai ni iVakabula. Na revurevu ni veivakabulai ni nona kaukauwa veivueti na iVakabula ena rawa ni vakayaco-ka vakalevu sara ki na bula ni lomada, yaloda, ka vakakina na bula ni yagoda, mai na iwali cava ga vakavuravura eda na ciqoma. Sai Jisu Karisito na Dauniveivakabulai ena bula oqo kei na veigauna tawamudu.
Kemuni na taciqu kei na ganequ, itokani lomani, au vakadinadinataka ni loloma veivueti ni noda iVakabula sa rawa me vakabula na nomu mavoa, savai iko mai na ivalavala ca, vaqaqacotaki iko ena veivakatovolei ena yaco mai, ka vakalougatataki iko ena inuinui, vuku, kei na Nona vakacegu. E dau voleka tu ga na Nona kaukauwa—e tudei ka nuitaki—ena gauna mada ga eda, vakila kina nida yawa mai na Nona loloma, rarama, kei na katakata.
Sa noqu masu nida na sega ni vakayalia na noda qoroqoro kei na vakavinavinaka levu ena veika kece sa cakava vei keda o Jisu Karisito. Yalovinaka mo kila nio lomani vakavinaka sara, ka nanuma tiko na veikatawamudu sa yalataki tu vei iko.
“Ia ena vakamamadataka na Kalou na nomuni icolacola ena vuku ni veivakamarautaki ni Luvena,” o Jisu Karisito (Alama 33:23).
© 2025 mai na Intellectual Reserve, Inc. All rights reserved. Tabaki e Amerika. Vakadonui me vaka Valagi: 6/19. Vakadonui me vakadewataki: 6/19. iVakadewa ni iTukutuku Vakavula ni Liaona, Feperueri 2025. Fijian. 19609 858