Mesej Blong Ol Yut Oli Kam Strong blong Evri Manis, Febwari 2025
Help we i kam long wan Stret Sos
Nomata wanem hadtaem yu stap fesem, Jisas Kraes bae i helpem yu, taem yu tanem yu i go long Hem.
Wei ia, i kam long Jeanette Bourup
Long wan taem o narafala taem yumi evriwan i nidim wan smol help. Samtaem yumi nidim fulap help. Trutok i we, oltaem laef i kam moa gud taem yumi traem blong no wokbaot yumiwan.
Jisas Kraes i stret sos blong help, hop mo paoa. Hem i save helpem yu kam gud moa—iven long samfala wei we yu no tingse se bae hapen olsem.
Wan Jenis blong Hat
?Yu bin prea wantaem se God bae i mekem hat blong ol enemi blong yu kam sopsop? Sapos i olsem, yu stap long wan gud ples (luk long 3 Nifae 12:44; Moronae 7:48). Iven sapos yu nogat ol enemi olsem hemia blong Buk blong Momon (we yu save, ol enemi we oli kam wetem ol tul blong faet mo rere blong atak), yu prea se God bae i mekem i kam sopsop hat blong man we i stap tritim yu nogud.
?Be yu bin tingting blong prea mo askem God blong mekem hat blong yu sopsop? Ating yu gat hadtaem blong save fogivim wan man. O yu stap gohed blong kros hariap, iven sapos yu no wantem. O yu wantem stap kaen long ol brata mo sista blong yu nomata sapos oli mekem yu kros samtaem.
“[Jisas Kraes] bae i jenisim hat mo laef blong yu. Sloslo, bae yu gro mo kam moa olsem Hem. Kavenan we i joenem yu wetem Hem bae i mekem yu kasem moa paoa blong Hem” (Blong Ol Yut Oli Kam Strong: Wan Gaed blong Stap Mekem Ol Joes [2022], 8, emphasis added).
?Hemia i no wan gudfala promes? Nomata wanem hadtaem yu stap go tru long hem, iven long hat blong yuwan, Jisas Kraes i save help. ?Olsem wanem yu save tanem yu go long Hem tedei?
© 2025 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/19. Oli letem long translesen: 6/19. Translesen Blong Ol Yut Oli Kam Strong blong Evri Manis, Febwari 2025. Bislama. 19621 852