“Mi Bambae Mi Mekem Olgeta I Kam Gud Bakegen,” Liahona, Febwari 2025.
Mesej blong Liahona blong Evri Manis, Febwari 2025
“Mi Bambae Mi mekem Olgeta I Kam Gud Bakegen”
Wok blong Sevya blong hilim man, long saed blong tingting mo bodi, i wan promes we i kam long God we bambae i kam long wan wan long yumi long taem blong Laef Bakegen long Ded.
Mi stap tingbaot yet sam long ol longfala flaet we mi bin mekem olsem wan kapten blong plen long profesonol laef blong mi.
Long wan long olgeta, mi sapos blong flae aot long Jemani long 11 klok long moning mo lan long Kalifonia long 1 klok long aftenun long semmak dei. Blong komperem taem we mi flae aot mo kambak, i soem se wan flaet blong krosem bigfala solwota blong Atlantik i go kasem Not Amerika i tekem tu aoa nomo. Boeing 747 i kwik, be i no kwik tumas! Be rili se hem i tekem mifala samples long 11 aoa; hemia i dipen nomo long win, blong travel 9,000 kilomita.
From se mifala i stap flae long daereksen blong wes, san i neva go draon long flaet blong mifala. Mifala i glad long bigfala delaet long Jemani go kasem Kalifonia.
Blong gobak long Jemani, hemia, i wan narafala defren stori. Iven taem mifala i flae aot long eli moning, mifala i flae i go long is, san i stap go daon kwik taem bitim evri taem, mo bifo mifala i save, tudak i kasem mifala.
Long ol longfala flaet ia, sol blong mi i fulap wetem glad mo harem gud taem mi tingting hevi long naesfala wol ia mo oda blong kriesen blong God. Iven taem mi stap flae long naet, long tudak we i fulwan, mi save wetem strong tingting se san bae i girap bakegen, laet we i saen long tudak i karem i kambak stim mo laef long wan niufala dei bifo wokbaot blong yumi i en. Situesen blong flaet blong mi i save mekem olsem se san i stap go daon sloslo o moa kwik, be mi save san i stap nomo, i no muv, mo i dipen long ol heven.
Mi filim long semmak fasin abaot God. From se mi gat wan save we i dip abaot waes tingting blong God mo stamba tingting blong Hem long evri kriesen blong Hem, Mi save filim glad ia, hop mo pis we i no save finis abaot laef blong yumi long wol ia. Yumi Ol Pikinini blong God. Hem i lavem yumi. Hem i save ol situesen blong yumi. Hem i rere blong givhan. Ol trutok ia oli no jenis, iven taem ol narafala samting raon long yumi i no stap strong mo yumi no save stret wanem bae i kam.
Yumi evriwan i gat ol eksperiens blong ol taem we i tudak, harem nogud, mo ol taem we i no klia we i tekem aot pis blong yumi. Mi glad tumas from stamba blong trutok mo laet we mi save stap dipen long hem (luk long Doktrin mo Ol Kavenan 88:6–11). Jisas Kraes i laet mo laef blong wol. From Hem mo atonmen mo sakrifaes blong Hem, yumi gat hop long fiuja, gat akses long laet ia we i kam long God blong saen long ol dei blong yumi we i tudak, mo promes ia we i blong winim sin mo ded.
“Hem i Lavem Wol Ia”
Jisas Kraes nomo i stret gud evriwan we i bin wokbaot long wol ia. From laef blong Hem we i stret gud evriwan, Hem i pem praes from ol sin blong wol. From lav blong Hem long yumi, Hem i givim laef blong Hem long wan wan long yumi mo long evri pikinini blong God blong openem doa long olgeta blong laef long wol ia mo laef we i no save finis.
Nomata long wanem we Setan i wantem yumi blong bilif long hem, nogat wan long yumi i stap longwe long Sevya blong Hem i karem hem i kambak. Nogat wan long yumi bae i no kwalifae from gladhat blong fogivnes. Hem i raonem yumi wetem “ol han blong lav blong hem we i no save finis” (2 Nifae 1:15).
Presen ia we i moa bitim eni narafala presen i kam long paoa blong Jisas Kraes we i pemaot sin. From safaring blong Sevya long garen blong Getsemane mo Golgota, Hem i save sevem yumi long mo helpem yumi tru long eni mo ol samting we yumi no strong long hem (luk long Alma 7:12).
“Hem i no mekem eni samting sapos i no blong helpem wol; from hem i lavem wol, go kasem hem i givim laef blong hem bakegen blong hem i save pulum evri man i kam long hem” (2 Nifae 26:24).
!Jisas Kraes i givim yumi paoa!
Hem i help.
Hem i karem i kambak bakegen.
Hem i givhan.
Presiden Russell M. Nelson i talem “Taem we Sevya [i pem praes] blong evri man, Hem i bin openem wan rod blong olgeta we oli folem Hem blong save kasem hiling, paoa blong Hem mo paoa we i pemaot man,”
Paoa ia, we i olsem san, i stap oltaem. Hem i neva lus. Joes ia blong folem step blong Sevya i olsem we yu wokbaot aot long sado i go long sanlaet, ples we yumi save kasem ol blesing blong laet, wom mo lav blong God. Mi save se wan dei, bae yumi lukluk bak mo gat filing ia blong tangkyu se yumi mekem wan impoten desisen we i no save finis blong trastem Jisas Kraes mo tabu lav ia blong Hem blong leftemap mo givim yumi paoa.
“Kambak long Mi”
Buk blong Momon i tokbaot wan grup blong pipol we oli spendem tri dei mo filim wan tudak we i folem Ded blong Sevya. Tudak ia long saed blong bodi we i raonem olgeta i save minim tudak long saed blong spirit we yumi eksperiensem from sin. Nao ol pipol ia oli harem voes blong Kraes i invaetem olgeta aot long tudak mo i go long laet blong Hem:
“?Bae yufala i no kambak naoia long mi, mo sakem ol sin blong yufala, mo jenisim laef blong yufala blong mekem se mi save mekem yufala i kam oraet?” (3 Nifae 9:13).
“Mo bae yufala i mekem olsem wan sakrifaes long mi, wan hat we i fulap wetem sore mo wan spirit we i wantem blong sakem sin.” (3 Nifae 9:19–20
“Sakem sin mo kambak long mi wetem ful stamba tingting blong hat” (3 Nifae 10:6).
Sevya i givim ol semmak invitesen long yumi tedei taem yumi faenem yumiwan se yumi lus long tudak. Olsem san we i girap evri taem i makem wan stat blong niu dei, evri taem yumi sakem sin, yumi kasem wan stat bakegen, wan moning we i klia.
Be hemia i no minim se hem i isi. Fasin blong sakem sin i minim blong jenis, mo jenis i no hapen kwik taem. Blong stap glad, sakem sin i gat “sore olsem hemia blong God” insaed long hem (2 Korin 7:10). I nidim blong yumi admitim mo konfes long ol samting we yumi mekem i rong, askem fogivnes long God mo long olgeta we yu mekem i nogud long olgeta. Antap long hemia, yumi nidim blong gat “Spirit blong Lod we I Gat Ol Paoa,” i bin mekem “wan bigfala jenis insaed … long ol hat blong mifala, mekem se mifala i nomo wantem blong mekem nogud fasin, be blong gohed blong mekem gudfala fasin oltaem” (Mosaea 5:2).
Kaen jenis ia i wan longfala rod, be taem yu tekem fas step, naoia “i dei blong sevem yufala”, mo “naoia nomo bae bigfala plan blong fasin blong pemaot man i wok yufala” (Alma 34:31).
Tru long fasin blong sakem sin wetem tru hat, God i promes blong fogivim mo bae i nomo tingbaot ol sin blong yumi. Taem yumi faenem i hat blong fogetem ol sin blong yumi, letem yumi gohed blo trastem promes blong Lod blong lanem blong gat fogivnes mo lanem blong fogivim ol narafala man mo yumiwan.
“Taem yumi mekem ol mistek mo komitim sin bae i spolem spirit blong yumi,” Presiden Boyd K. Packer i tijim (1924–2015). “Be i no olsem bodi blong yumi long laef ia, taem fasin blong sakem sin i finis, i no gat mak i stap from Atonmen blong Jisas Kraes.”
Hilim Blaen Man, i kam long Carl Heinrich Bloch
“Karem Olgeta oli kam long Ples ia”
Sevya i Masta Hila. Wan long ol naes samting we i soem long paoa blong Hem blong hilim man oli faenem insaed long Buk blong Momon, long stori blong seves blong Hem long Amerika blong bifo:
“?Yufala i gat eniwan we i sik long medel blong yufala?” Hem i askem. “Karem olgeta oli kam long ples ia. ?Yufala i gat eniwan we bodi blong olgeta i nogud, o oli blaen, o we leg blong olgeta i nogud, o we i handikap, o we i gat leprosi, o we haf bodi blong olgeta i ded, o we sora blong olgeta i fas, o we oli gat hadtaem long eni fasin? Karem olgeta oli kam long ples ia mo bae mi mekem olgeta i oraet, from mi mi gat sore long yufala; ol insaed blong mi oli kam fulap wetem sore. …
“Mo i bin hapen se taem we hem i bin toktok olsem ia nao, evri grup blong pipol ia long semtaem i bin go fored wetem ol sik blong olgeta mo olgeta we i gat hadtaem, mo blong olgeta we bodi i nogud, mo blong olgeta we i blaen, mo wetem blong olgeta we oli no save toktok, mo wetem evriwan we i bin gat hadtaem long eni fasin; mo hem i bin mekem olgeta evriwan i kam oraet taem we oli bin karem olgeta i go fored long hem.” (3 Nifae 17:7–9.
Evri taem Sevya i hilim wan man we i, “gat hadtaem long eni fasin,” tugeta long bifo mo afta we Hem i Laef Bakegen long Ded, i wan testeman long bigfala paoa blong Hem blong hilim ol sol blong yumi. Wan wan merikel long saed blong hiling i wan promes long saed blong tingting mo bodi, we bambae i kam long wan wan long yumi long taem blong Laef Bakegen long Ded, “we Lod i gat paoa blong hilim.”
I tru se ol prea blong yumi long saed blong kasem hiling long laef ia oli no ansa long hem long wei we yumi hop from, be i no minim se bae yu no kasem ansa long hem. Taem blong hiling bae i kam, semmak olsem tudak long naet i givim wei—long raet taem—long san we i girap we i fulap wetem glori.
Olsem Presiden Nelson i bin testifae: “Oli neva stop blong luksave fet blong yumi. Mi save se wan Papa long Heven we i gat evri waes tingting mo lukluk blong Hem long yumi i moa bitim wanem yumi stap tingting long hem. Taem yumi save long ol problem mo ol harem nogud blong yumi long wol ia, Hem i save long progres mo paoa blong yumi taem bae yumi kasem wan bodi we i no save ded. Sapos yumi prea blong save tingting blong Hem mo givim yumi fulwan long Hem wetem fasin blong stap wet longtaem mo gat strong tingting, hiling blong heven bae i tekem ples long wei mo taem blong Hem.”
Sam dei i pas, waef blong mi Harriet mo mi, i tingbaot long prea blong mitufala wan spesel hop mo krae sore long bihaf blong sam man we mitufala i lavem. Mifala i prea se helt kea tim blong olgeta bae oli kasem wan spesel janis blong faenem tritmen mo oli kam gud long sik ia. Mifala i sapraes blong ademap se iven wan kwik tritmen o blong hem i kam oraet bakegen maet hemia bae i no save hapen, be hiling paoa blong Sevya bae givim kamfot mo pis long olgeta. Hiling paoa blong Sevya blong pemaot man i save mekem wan bigfala jenis long yumi, long saed blong tingting, spirit mo helt long bodi bitim eni narafala tritmen we yumi save kasem. Jisas Kraes i man blong mekem I Kam Oraet Bakegen long laef ia mo long taem we i no save finis.
Ol brata mo sista, ol dia fren, Mi testifae se Sevya mo glad hat blong hem i inaf blong hilim ol soa blong yu, mekem yu kam klin evri wan,mekem yu kam strong taem ol hadtaem i kam, mo blesem yu wetem hop, waes tingting, mo pis blong Hem. Paoa blong Hem i oltaem stap—i semmak mo i no jenis—iven taem yumi, filim se yumi stap longwe long lav, laet mo kaen fasin blong Hem.
Mi prea se bae yumi neva lusum filing ia blong lav mo bigfala tangkyu long evri samting we Jisas Kraes i mekem blong yumi. Plis save se Hem i lavem yu fulwan, mo tingbaot wanem we Hem i promesem yu se i blong taem we i no save finis.
“Mo afta, bae God i mekem ol hevi samting blong yu oli nomo hevi, tru long glad blong Pikinini blong hem,” Jisas Kraes (Alma 33:23).
© 2025 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/19. Oli letem long translesen: 6/19. Translesen blong Mesej blong Liahona blong Evri Manis, Febwari 2025. Bislama. 19609 852