“​ Infejjaqhom ​”

Ġesù Kristu kien l-uniku raġel perfett li qatt mexa fid-dinja. Minħabba l-ħajja perfetta tiegħu, Huwa ma kellu l-ebda dejn mal-ġustizzja. Sforz imħabbtu għalina, huwa ta ħajtu għal kull wieħed u waħda minna individwalment u għall-ulied kollha ta’ Alla kollettivament biex huma jiftħu l-bieb għall-immortalità u l-ħajja eterna.

Minkejja dak li jridna nemmnu Satana, ħadd minna ma jaqa’ barra mill-abbiltà tas-Salvatur li jsalvana. Ħadd minna mhu skwalifikat mill-grazzja tal-maħfra. Ħadd minna mhu mingħajr il-possibiltà li jkun “mħaddan għall-eternità f’dirgħajn imħabbtu” (2 Nefi 1:15).

L-akbar fost ir-rigali kollha niksbuhom mill-qawwa li ssaħħaħna u tifdina tal-Espjazzjoni ta’ Ġesù Kristu. Minħabba t-tbatija tas-Salvatur fil-Ġetsemani u fuq il-Golgota, Huwa jaf kif jista’ jsalvana minn kwalunkew u kull tip ta’ sofferenza tagħna, u jgħinna biex negħlbuhom (ara Alma 7:12).

“Hu xejn ma jagħmel jekk ma jkunx ta’ benefiċċju għad-dinja; għaliex huwa jħobb lid-dinja, u saħansitra hu ta ħajtu biex iressaq lill-bnedmin kollha lejh” (2 Nefi 26:24).

Ġesù Kristu huwa s-Salvatur tagħna!

Huwa jersaq lejna.

Huwa jirrestawra.

Huwa jsalva.

“Meta s-Salvatur [għamel is-sagrifiċċju espjatorju tiegħu] għall-umanità kollha, hu fetaħ triq biex dawk li jimxu warajh ikunu jistgħu jkollhom aċċess għall-qawwa li tfejjaq, li ssaħħaħ, u li tifdi tiegħu,” qal il-President Russell M. Nelson.

Dik il-qawwa, bħax-xemx, tinsab dejjem hemm. Qatt ma tbatti. L-għażla li nimxu wara l-passi tas-Salvatur hi bħal meta nimxu ’l barra mid-dellijiet u lejn id-dawl tax-xemx, fejn nistgħu nirċievu l-barkiet tad-dawl, tal-kenn, u tal-imħabba ta’ Alla. Jiena naf li xi darba, aħna nħarsu lura u nkunu mimlijin gratitudni li aħna ħadna d-deċiżjoni eternament importanti li nafdaw f’Ġesù Kristu u fl-imħabba divina tiegħu li televawna u tqawwina.

Il-Ktieb ta’ Mormon jitkellem dwar poplu li qatta’ tlett ijiem fl-aktar dalma profonda wara l-Kruċifissjoni tas-Salvatur. Id-dalma fiżika ta’ madwarhom tista’ tissimbolizza d-dalma spiritwali li lkoll kemm aħna nesperjenzaw minħabba d-dnub. Imbagħad in-nies semgħu leħen Kristu jistedinhom joħorġu mid-dalma u jerqsu lejn id-dawl tiegħu:

“Intom lesti li terġgħu lura għandi u tindmu minn dnubietkom, u tikkonvertu, sabiex jiena nkun nista’ nfejjaqkom?” (3 Nefi 9:13).

“Bħala sagrifiċċju intom għandkom toffruli qalb maqsuma u spirtu niedem” (3 Nefi 9:20).

“Indmu u duru lejja b’impenn sħiħ f’qalbkom” (3 Nefi 10:6).

Is-Salvatur jagħmlilna l-istess stediniet illum meta nsibu lilna nfusna mitlufin fid-dlam. L-istess kif kull sebħ jimmarka l-bidu ta’ jum ġdid, kull darba li nindmu, aħna nirċievu bidu ġdid, bidu ġdid u sabiħ.

Dan ma jfissirx li din xi ħaġa faċli. L-indiema tfisser bidla, u l-bidla ma sseħħx malajr. Filwaqt li hi mimlija ferħ, l-indiema tinkludi ”niket dili” (2 Korintin 7:10). Jeħtieġ li aħna nammettu u nistqarru l-ħażen tagħna, nitolbu l-maħfra mingħand Alla u mingħand dawk li aħna stajna weġġajna. Fuq kollox, jeħtieġ li aħna nfittxu “l-Ispirtu tal-Mulej Omnipotenti,” sabiex inkunu nistgħu nesperjenzaw “bidla setgħana fi … qalbna, li m’għandniex aktar dispożizzjoni li nagħmlu l-ħażen, iżda li nagħmlu t-tajjeb kontinwament” (Mosija 5:2).

Dik it-tip ta’ bidla hija vjaġġ twil, iżda hekk kif tagħmlu l-ewwel pass, “il-jum tas-salvazzjoni tagħkom” jibda, u “b’mod immedjat il-pjan kbir ta’ fidwa jibda jgħodd għalikom” (Alma 34:31).

Permezz tal-indiema sinċiera tagħna, Alla jwiegħed li jaħfer u ma jiftakarx aktar dnubietna. Meta jkollna diffikultà ninsew dnubietna, ejjew nagħmlu li nistgħu biex nafdaw fil-wegħda tal-Mulej li naħfru u nitgħallmu naħfru lil ħaddieħor u lilna nfusna.

“L-ispirtu tagħna jweġġa’ meta aħna niżbaljaw u nikkommettu d-dnubiet,” għallem il-President Boyd K. Packer (1924–2015). “Iżda b’differenza mill-ġisem mortali tagħna, meta l-proċess tal-indiema jkun komplut, l-ebda ġerħa ma tibqa’ minħabba l-Espjazzjoni ta’ Ġesù Kristu.”

Fejqan tar-Raġel Agħma, ta’ Carl Heinrich Bloch

“Ġibuh Hawn”

Is-Salvatur huwa l-Fejjieq Prim. Waħda mill-isbaħ dimostrazzjonijiet tal-qawwa tiegħu tal-fejqan nsibuha fil-Ktieb ta’ Mormon, fir-rakkont tal-ministeru personali tiegħu fl-Amerka tal-qedem:

“Hemm xi ħadd fostkom li hu marid?” Hu staqsiehom. “Ġibuh hawn. Hemm min hu magħtub, jew għami, jew zopp, jew imġiddem, jew mifluġ, jew li hu trux, jew b’xi mod qed ibati? Ġibuh hawn u jiena nfejqu, għax jien tassew qed inħoss għalikom; il‑ħniena tiegħi lejkom hija kbira. …

“U ġara li meta huwa qal dan, dawk kollha li kienu fost il‑miġemgħa, marru flimkien mal‑morda tagħhom, u l‑imsejkna tagħhom, u l‑magħtuba tagħhom, u l‑għomja tagħhom, u l‑imbikkmin tagħhom, u ma’ dawk kollha li b’xi mod kienu għaddejjin minn tbatija; u huwa fejjaqhom ilkoll waqt li bdew jinġiebu quddiemu” (3 Nefi 17:7, 9).

Kull darba li s-Salvatur fejjaq lil kull min “b’xi mod kienu għaddej minn tbatija,” kemm qabel kif ukoll wara l-Qawmien tiegħu mill-Imwiet, kien testment għall-qawwa aħħarija tiegħu li jfejjaq ruħna. Kull fejqan mirakoluż kien biss preludju u wegħda tal-fejqan fiżiku u emozzjonali dejjiem li se jiġi għandna lkoll fil-Qawmien mill-Imwiet, li “huwa l-att ta’ fejqan li jikkonsma tal-Mulej.”

Huwa veru li t-talb tagħna għall-fejqan f’din il-ħajja mhux dejjem jiġi mwieġeb bil-mod li nittamaw, iżda qatt mhu se jiġi injorat. Se jasal iż-żmien għall-fejqan, l-istess kif id-dalma tal-lejl dejjem tagħti triq—fil-ħin f’waqtu—lill-għdwa glorjuża.

Kif xehed il-President Nelson: “Il-fidi tagħna qatt ma tiġi apprezzata. Jiena naf li l-perspettiva ta’ Missier fis-Smewwiet, li huwa mimli għerf, hija wisq ikbar minn tagħna. Filwaqt li nafu dwar il-problemi u l-uġigħ mortali tagħna, Huwa jaf dwar il-progress u l-potenzjal immortali tagħna. Jekk nitolbu biex nagħrfu r-rieda tiegħu u nissottomettu lilna nfusna għaliha bis-sabar u l-kuraġġ, il-fejqan mis-smewwiet jista’ jseħħ bil-mod u bl-orarju tiegħu.”

M’ilux jien u marti, Harriet, inkludejna fit-talb tagħna tama u talba speċjali f’isem xi wħud li nħobbu. Aħna tlabna li t-tim tagħhom tal-kura tas-saħħa jingħata l-abbiltà speċjali li jfejjaq il-mard tagħhom. Waslitilna l-impressjoni li kellna nżidu li anke jekk ma jkunx hemm kura jew irkupru immedjat, il-qawwa tal-fejqan tas-Salvatur tkun tista’ ġġibilhom il-faraġ u l-paċi. L-effett tal-fejqan tal-qawwa feddejja tas-Salvatur jaf iħalli impatt saħansitra akbar fuq is-saħħa emozzjonali, spiritwali, u saħansitra fiżika tagħna minn kull kura fid-dinja li aħna nistgħu nirċievu. Ġesù Kristu huwa l-Fejqan f’din il-ħajja u fl-eternità.

Ħuti, għeżież ħbieb tiegħi, jiena nixhed li l-ħniena tas-Salvatur tagħna hija biżżejjed biex tfejjaq il-ġrieħi tagħkom, tnaddafkom mid-dnub, issaħħaħkom għall-isfidi li għandhom jiġu, u tberikkom bit-tama, bl-għerf, u bil-paċi tiegħu. Il-qawwa tiegħu tinsab dejjem hemm—kostanti u affidabbli—anke meta, għal xi żmien, inħossuna ’l bogħod mill-imħabba, mid-dawl, u mill-imħabba tiegħu.

Nitlob li aħna qatt ma nitilfu s-sens ta’ mħabba u gratitudni profonda għal dak kollu li Ġesù Kristu għamel għalina. Jekk jogħġobkom kunu afu li intom maħbubin perfettament, u ftakru f’dak li ġejtu mwiegħda eternament.

“Jalla Alla jħaffef it‑tagħbija tagħkom, permezz tal‑hena ta’ Ibnu,” Ġesù Kristu (Alma 33:23).