“Ami Nye kɔk Mmɔ”

Jesus Christ edi ŋkokure mfɔn-mma owo okodude ke isɔŋ. Otode ke mfɔn-mma uwem Esie, Enye ikamake utip-ikpe isɔn. Otode ke ndima nnyin, Enye amayak uwem Esie ɔnɔ nnyin owo kiet-kiet ye kpukpru nditɔ Abasi ke eboho man eberede usuŋ ɔnɔ uwem unana mkpa ye nsinsi uwem.

Kesioho se Satan okpoyomde ete nnyin inim ke akpanikɔ, iduhe owo nnyin ndomokiet emi ɔdiɔkde ebe ukeme Andinyaŋa ke erinyaŋa nnyin. Iduhe owo nnyin ndomokiet emi esiode ekpɔŋ mfɔn eke erifen-nnɔ. Iduhe owo nnyin ndomokiet emi ɔdiɔkde ebe ndaha eke “mme ubɔk ima esie edikanare nnyin ŋkuk ke nsinsi ” (2 Nephi 1:15).

Mkpon-nkan kotu mme enɔ emi edi oto ukeme ye odudu ufak eke Erisio-isop Jesus Christ. Otode ke ndutuhɔ Andinyaŋa ke Gethsemane ye ke Golgotha, Enye ɔdiɔŋɔ nte edinyaŋade nnyin isio onyuŋ aŋwamde nnyin ke ofuri ye adaha mmemidem nnyin ekededi (se Alma 7:12).

“Enye inamke ŋkpɔ ndomokiet ke mibɔhɔke ke ufɔn ererimbot; koro enye amade ererimbot, kpa ke oro enye ayak uwem esie man enye ekpeda kpukpru ɔnɔ idemesie” (2 Nephi 26:24).

Jesus Christ edi ɔsɔŋɔ nnyin!

Enye oyom ediŋwam.

Enye afiak-emen mfɔn edi.

Enye anyaŋa.

President Russell M. Nelson ete, “Ke ini Andinyaŋa [akanamde uwa ufak Esie] ɔnɔ ofuri ubon owo, Enye ama eberede usuŋ ete kpukpru mbon emi etienede Enye enyene erikɔk, ukeme, ye odudu edifak Esie.”

Odudu oro, ukem nte utin, odu do ke ofuri ini. Enye akananam ifumuke. Edimek editiene mme mkpat-isaŋ Andinyaŋa etie nte edisaŋa ŋwɔrɔ ke mbukpɔŋ nduk uŋwana-utin, ebiete emi nnyin kemeke edibɔ mme edidiɔŋ Abasi eke uŋwana, ufiop, ye ima. Ami mmedidɔŋɔ ke usen kiet, nnyin iyese ini edem ndien idiyɔhɔ y esit-ekɔm ke nnyin ima inam nsinsi akpan ubiere ke edidori-enyin ke Jesus Christ ye edisana ima Esie edimenere nyuŋ nsɔŋɔ nnyin idem.

Ŋwed Mormon etiŋ abaŋa mbonowo emi ekebiatde usen ita ke ata ndaha ekim emi akadade itie kini Ekɔŋde Andinyaŋa ewot ke cross. Ekim emi okofukde mmɔ ekeme ediwut ekim ke ŋkpɔ spirit emi kpukpru nnyin isinyenede otode ke idiɔkŋkpɔ. Edikem mbonowo ekop uyo Christ okotde mmɔ osio ke ekim ndien esin ke uŋwana Esie ete:

“Nte mbufo idifiak-ke edem idahaemi itiene mi, ndien etua-mkpɔfiɔk ke mme idiɔk ŋkpɔ mbufo, enyuŋ ekabare-esit, man ami mkpɔkɔk mbufo?” (3 Nephi 9:13).

“Mbufo edi-nɔ mi uwa mbuŋɔ esit ye edinuaha spirit” (3 Nephi 9:20).

“Etua-mkpɔfiɔk enyuŋ efiak etiene mi ye ɔyɔhɔ uduak esit”(3 Nephi 10:6).

Andinyaŋa ɔnɔ mme ukem-ukem ikoot oro esɔk nnyin mfin emi kini nnyin ikutde idem nnyin nte isopde ke ekim. Ukem nte utin edisiaha kiet-kiet owutde eritɔŋɔ eke obufa usen, ini ekededi emi nnyin ituade mkpɔfiɔk, nnyin imibɔ obufa eritɔŋɔ, edide ediyama ntɔŋɔ obufa.

Oro iwɔrɔke ke edi mmem-mmem. Editua-mkpɔfiɔk ɔwɔrɔ edikpuhɔ, ndien ndikpuhɔ isitibe usɔp-usɔp. Kini adarede-ɔyɔhɔ, editua-mkpɔfiɔk isineke “mfuhɔ ido Abasi” (2 Corinthians 7:10). Oro oyom nnyin inyime inyuŋ iyarare mme ukwaŋ-ŋkpɔ nnyin, iyom erifen-nnɔ ito Abasi ye mbonowo emi nnyin ikpikiduede. Ata akpan ŋkpɔ, oro oyom yak nnyin iyom “Spirit Jehovah Andikara Kpukpru Ŋkpɔ,” man nnyin idinyene “akamaba ukpuhɔre ke … esit nnyin, ndien nnyin inyeneke udɔŋ aba ndinam idiɔk, edi ndinam eti kpukpru ini” (Mosiah 5:2).

Oruk edikpuhɔ oro edi anyan usuŋ-isaŋ, edi ke iwiwa nte afo emenede akpa ikpat-isaŋ, “usen erinyaŋa fo” ɔtɔŋɔ ndien “ke ndo-ndo oro ke edida akwa uduak erifak-nsio esɔk fi” (Alma 34;31).

Otode ke ata editua-mkpɔfiɔk, Abasi ɔŋwɔŋɔ ndifen ndien iditigi mme idiɔkŋkpɔ nnyin aba. Kini nnyin ikopde ekaha ke edifre mme idiɔkŋkpɔ nnyin, yak nnyin idomo edibere-edem ke mme eŋwɔŋɔ Abasi eke erifen-nnɔ nyuŋ mkpep erifen nnɔ mbon efen ye idem nnyin.

President Boyd K. Packer (1924–2015) ekpep ke “Spirit nnyin abiara kini nnyin inamde ndudue inyuŋ inam idiɔkŋkpɔ.” “Edi ke mibietke ndaha eke ikpɔkidem nnyin, kini inamde utom editua-mkpfiɔk ikure, mbɔn-unan iduhe aba otode ke Erisio-isop Jesus Christ.”

Erikɔk eke Owo Nnan, otode Carl Heinrich Bloch

“Eda Mmɔ Ekpere”

Andinyaŋa edi Akwa Ɔkɔk-udɔŋɔ. Kiet kotu akpan ediye mmen-ŋwut eke odudu erikɔk Esie odu ke Ŋwed Mormon, ke mbuk eke ata utom Esie ke America eke eset ete:

“Nte mbufo emenyene owo udɔŋɔ kotu mbufo?” Enye okobup. “Eda mmɔ ekpere. Ndi mbufo emenyene owo ndomokiet emi edide mbuŋɔ, mme nnan, mme owo enyenede unɔmɔ, mme owo akpa-mfia, mme mbon akpaubeŋ, mme inan, mme owo emi enyene oruk ukut ekededi? Eda mmɔ ekpere ndien Ami nyekɔk mmɔ, koro Ami mmeyene mbɔm mbaŋa mbufo; esit mi ɔyɔhɔ ye mbɔm. …

“Ekem ke ini enye eketiŋde emi, ofuri otuowo, ke esit kiet, ekewɔrɔ eka ye udɔŋɔ mmɔ, ye ukut, ye mbuŋɔ, ye nnan, ye imum, ye kpukpru mmɔ emi ekekutde ukut ekededi; ndien enye ɔkɔkɔk mmɔ kpukpru nte ekedade esɔk enye” (3 Nephi 17:7, 9).

Ofuri ini eke Andinyaŋa ɔkɔkde owo ekededi emi ɔkɔbɔde ukut ekededi, mbiba mbemiso ye ke Eriset Esie okurede, oro ekedi ntiense ɔnɔ akakan odudu Esie ke erikɔk mme ukpɔŋ nnyin. Utom erikɔk-udɔŋɔ ekededi ekedi ntɔŋɔ ye eŋwɔŋɔ eke akpatre erikɔk ke obukidem ye ekikere emi edisimde nnyin owo kiet-kiet kini Eriset, emi “edide nam-ŋkure utom erikɔk eke Ɔbɔŋ.”

Edi akpanikɔ ke akam nnyin eke erikɔk udɔŋɔ ke uwem emi isinyeneke ibɔrɔ ke ofuri ini ke usuŋ nte nnyin ikikerede, edi akananam isisinke edibɔrɔ mmɔ. Ini erikɔk eyedi, ukem nte ekim okoneyo ke ofuri ini esiyakde usuŋ—ke edikem ini—ɔnɔ ɔyɔhɔ-ubɔŋ edisiaha-utin.

Nte President Nelson ɔkɔnɔde ikɔ-ntiense ete: “Akananam isitreke edidara mbuɔtidem nnyin. Ami mmediɔŋɔ ke idorenyin eke akwa ɔfiɔk-ŋkpɔ Ete Heaven enehede okpon akan eke nnyin. Kini nnyin ifiɔke mme afanikɔŋ ye ubiak eke uwem isɔŋ, Enye ɔdiɔŋɔ unana-mkpa ŋkɔri ye odudu nnyin. Edieke nnyin ibɔŋde-akam ndidiɔŋɔ uduak Esie nyuŋ nyak idem nnyin nsin ke ime ye uko, erikɔk eke heaven ekeme edida-itie ke usuŋ ye ini Esie.”

Mmi-mmi-emi ŋwan mi, Harriet, ye ami ima isin ke akam nnyin asaŋa-asaŋa idorenyin ye mkpe-ubɔk kabaŋa owo kiet emi nnyin imade. Nnyin ima ibɔŋ-akam yak ŋka mbon enɔde nsɔŋidem edibɔ asaŋa-asaŋa ukeme erikɔk mme udɔŋɔ mmɔ. Nnyin ima inyene ntuuk edidian kpa kini ata usɔp-usɔp erikɔk mme edibɔhɔ mikemeke edida-itie, ke odudu erikɔk Andinyaŋa ekeme edida ndɔŋesit ye emem ɔsk mmɔ. Utom erikɔk eke odudu erifak Andinyaŋa ekeme edinyene ata akamba utom ke nsɔŋidem eke ekikere, spirit, kpa ye ke obukidem akan erikɔk eke ererimbot emi nnyin ikpibɔde. Jesus Christ edi Ɔkɔk-udɔŋɔ ke uwem emi ye ke nsinsi.

Nditɔ-eka mi irenowo ye iban, ndima ufan mi, ami nnɔ ikɔ-ntiense ke mbɔm Andinyaŋa nnyin ekem ke erikɔk mme unan nnyin, eyet nnyin ke idiɔkŋkpɔ, ɔsɔŋɔ mbufo idem ke mme idomo emi edidide, onyuŋ ɔdiɔŋ mbufo ye idorenyin, ifiɔk, ye emem Esie. Odudu Esie odu do ke ofuri ini—kpukpru ini onyuŋ atuak-ada—kpa kini nnyin, ke esisit ini, ikopde nte imiyom usuŋ ikpɔŋ ima, uŋwana, ye ufiop Esie.

Ami mbeŋe nnyin ikunana ekikere uteŋe ye ata esit-ekɔm nnɔ ke kpukpru ŋkpɔ emi Jesus Christ akanamde ɔn nnyin. Mbɔk diɔŋɔ ke enehede ema fi ɔfɔn, ndien ti se ekeŋwɔŋɔde enɔ fi ke nsinsi.

“Yak Abasi anam man mbiomo mbufo edifere, otode ke idara Eyen esie,” Jesus Christ (Alma 33:23).