“Upwe Echikara Ir,” Liahona, Feb. 2025.
Porous Ren Liahona Iteiten Maram, February 2025.
“Upwe Echikara Ir”
An ewe Chon Amanau angangen echikar ina ew nepoputan mi echipwer me pwonen ewe echikaren inis me memef minne epwe fis ngeni emon me emon kich non ewe Manausefan.
Ngang mi chok cheme fatatei ekkoch ekkewe tamen sai uwa uwei non fansoun ai we angangen emon kaptin won sepenin.
Non ew me neir, upwe su seni Germany kunok 11:00 a.m. me sotiw non California kunok 1:00 p.m. non pwan ewe chok ran. Anono fengeni ewe fansoun su me fansoun to, usun nikinikin ita pwe ew sai seni epekin ewe Altantic Ocean me esopun Ennefenin Merika a chok ru awa. Ewe Boeing 747 mi mwitir, nge ese kon mwitir! Non ennetin, a arap ngeni 11 awa am sai, anongonong won ewe asepwan, ne sai non 5,600 mwain (9,000 km).
Pokiten aua changeno notou, ewe akkar ese tu tup fansoun am sai. Aua pwapwaiti watten ewe saram seni Germany tor California.
Niwin ngeni Germany, inamo, a fokkun sokkono porousan. Pwan mwo nupwen am we aua mwitir su mwirin neonowas, nupwen aua changeno otiw, ewe tuputiwen akkar a mwitir pwato nap seni mi fifis, me mwen am apareni, nepwin a fen torikem.
Fansoun ekkei nakatamen sai won sepenin, nguni a soun ureno ren mwar nupwen ai ekipwichi ewe ningen ei fonufan me ewe tettenin an Kot forata. Pwan mwo nupwen ai chang nepwin, non unusen rochopwak, ua ennetin sinei pwe ewe akkar epwe teeta sefan, ena tinen saram epwe niwin me wato pwichikar me manau ngeni ew minafon ran me mwen am sai epwe sopwono. Ekkewe nonnomun ai sai won sepenin meni epwe fori pwe usun ita ewe akkar a mang ika mwitir ne tup, nge ngang mi sinei pwe ewe akkar mi chok nonnom ususun ewe chok, nukuchar, me nongonongoch me non nang.
Ua pwan mefi ena usun ren Kot. Pokiten a fokkun anonnon ai sinei usun an Kot mirit me popun ren meinisin An forata, ua tongeni mefi pwapwan epinukunuk me kinamwe fochofoch nupwen ua ekieki usun ach fis won fonufan. Kich noun Kot semirit. A tongei kich. I a sinei usun nonnomuch. I a mwonneta an epwe aninis. Ekkei ennet rese sisiwin, pwan mwo nupwen ekkoch mettoch unukuch usun rese nukuchar me fatoch.
Kich meinisin sia fen weri fansoun rochopwak, netipechou, me fatangaw minne epwe angawa ach kinamwe. Uwa men kinisou ren ewe nongonongochun me popunapen ennet me saram (nengeni Doctrine and Covenants 88:6–11). Jises Kraist i ewe saram me ewe manauen ewe fonufan. Pokiten I me An asoren achasefan, a wor ach apinukunukun fansoun mwach, tufich ngeni saram mi echipwer epwe asarama rochopwakun ranin ach sai, me ewe pwonen ach omwuchunon okkufu tipis me mano.
“I a Tongei ewe Fonufan”
Jises Kraist i ewe chok mwan mi unusoch a fetan won ewe fonufan. Pokiten manauan mi unusoch, I ese wor an niwinimang ngeni pungoch. Pokiten an tong fan itach, I a fangeno Manauan fan iten emon me emon kich me fan iten meinisin noun Kot semirit an epwe suki asamen manau fochofoch me manau esemuch.
Inamo met Setan a fori pwe sipwe nuku, ese wor me neich a nap seni an ewe Chon Amanau tufichin angasa kich. Esor emon me neich eppet seni ewe chenin omusomus. Ese wor me neich sa nap seni ach sipwe “rokopwanino me non an kewe poun tong feinfeino” (2 Nifai 1:15).
Ei watten me nein niffang meinisin a feito seni ewe pochokunen me manamanen ngaseno ren ewe Achesafan an Jises Kraist. Pokiten an ewe Chon Amanau riaffou non Gethsemane me won Golgatha, I mi sinei ifa usun epwe angasa kich seni me anisi kicheu seni och me meinisin ach nipwakingaw (nengeni Alma 7:12).
“Ese fori och mettoch tiwenon chok ika pwe epwe efeiochu fonufan; pun i a tongei ewe fonufan, pwan mwo i a pwisin watiw manauan pwe i epwe emerato aramas meinisin ngeni I” (2 Nifai 26:24).
Jises Kraist I ach pochokun!
A kutta an epwe aninis!
A eniwinochu sefani.
A angasa.
Preseten Russell M. Nelson a apasa, “Nupwen ewe Chon Amanau [awora An asoren achasefan] fan iten aramas meinisin, A suki ew aan pwe ekkewe ra tapweno Mwirin ra tongeni angei An echikar, pochokun, me manamanen ngaseno.”
Ena manaman, usun ewe akkar, mi chok nonnom. Ese tongeni mwokut. Ewe pekin finata ne tapweno mwirin eipweipwen ewe Chon Amanau a usun ach fetaneu seni ekkewe chimwon ngeni non ewe tinen akkar, ikewe ia sia tongeni angei ekkewe feiochun an Kot saram, kirekiroch, me tong. Ngang mi sinei pwe non eu ran, sipwe nenesekur me ureno ren kinisou ren ach sia fen fori ewe auchean finaeta mi fochofoch ne nuku Jises Kraist me An tong ne chunata me apochokuna kich.
“Niwinto Rei”
Ewe Puken Mormon a aporausa usun ew mwichen aramas ra nom non unungat ran mi fokkun unusen rochopwak mwirin an ewe Chon Amanau irapengesino. Ewe wesewesen rochopwak unukur a tongeni esisinata ewe rochopwak ren pekin ngun kich meinisin sia weri pokiten tipis. Iwe ekkewe aramas ra rongorong neuwen Kraist a etiwereu seni ewe rochopwak me ngeni An saram:
“Ousap niwin ngeniei iei, me aier seni ami kewe tipis, me siwin, pwe upwe tongeni echikarakemi?” (3 Nifai 9:13).
“Asorata ew asor ngeniei ew asoren netipechou me netip niemam,” (3 Nifai 9:20).
“Aier me nwin ngeniei ren unusen netip” (3 Nifai 10:6).
Ewe Chon Amanau a atoura ekkena tingor ngeni kich ikenai nupwen sia kuna pwe sia mworukono non kiroch. Usun chok eu me eu tinetan akkar a esisinata nepoputan eu minafon ran, iteiten fansoun sia aier, sia angei eu minafon poputa, ew saramen minafon nepoputan.
Esapw ita wewen nge mi mecheres. Aier wewen siwin, me siwin ese mwitir fis. Nupwen pwapwan, aier mi pachengeni ewe netipechoun kot (2 Corinthians 7:10). A namot pwe sipwe fang me pwarata ach muan, tingor omusomus seni Kot me seni ekkewe ir sia efeiengawer. Nap seni meinisin, a namot pwe sipwe kutta “ewe Ngunun ewe Samon mi Uren Manaman,” pwe sipwe tongeni weri “ew siwin watte non … netipem, iwe ese chiwen wor am mochenin fori mi ngaw, nge am aupwe sopweno ne fori mi öch” (Mosaia 5:2).
Ena sokkun siwin eu nakatamen sai, nge nupwen chok om keran fori ewe aewin eipweipw, “ewe ranin ami amanau; a poputa, me “ewe kokkotun nganseno mi auchea epwe mwitir kawor ngenikemi” (Alma 34:31).
Seni ach ennetin aier, Kot a pwonei epwe omusano me esap chiwen chechemeni ach kewe tipis. Nupwen a weires fach sipwe monnukano ach tipis, sipwe achocho ne nuku non an ewe Samon pwon ne omusano me kaeo ne omusano ekkoch me pwisin kich.
“Ngunuch ra tatakis nupwen sia fori muan me fori tipis,” Preseten Boyd K. Packer a aiti kich (1924–2015). “Nge sokkono seni nonnomun inisich won fonufan, nupwen ewe mwokutukutun aier a wesino, ese wor nemwon kinas epwe nonnom pokiten ewe Achasefanin Jises Kraist.”
Echikara ewe Mwan mi Chuun,, seni Carl Heinrich Bloch
“Uweireto Ikei”
Ewe Chon Amanau i ewe Chon Echikar Mi Nap. Eu me nein ekkewe anapanap mi kon ning usun An manamanen echikar mi pwa me non ewe Puken Mormon, non ewe uruon An pwisin angangen afanafan non Merika me nom:
“Mi wor emon neimi mi semwen?” A eis. “Uweireto ikei. Mi wor neimi mi pechema, are chun, are fetanengaw, are mwok, are kinipotur, are ekkewe ir mi pwaseno inisir, are ekkewe ir mi pung seninger, are ekkewe ir mi riaffou non sokopaten napanap? Uweireto ikei iwe upwe echikarareta, pun mi wor ai kirekiroch womi; nenukei a uren umoumoch. …
“Iwe non ewe fansoun pwe nupwen an a kapas, unusen ewe mwicheich, fengen, ra feino fiti nour kewe mi semwen me nour kewe mi riaffou, me nour kewe mi pechema, me fiti nour kewe mi chun, me fiti nour kewe rese tongeni kapas, me fiti meinisin ir ekkewe mi riaffou non sokopaten napanap; iwe a echikarareta emon me emon nupwen ra emmwenito ngeni i”(3 Nephi 17:7, 9).
Iteien ewe Chon Amanau a echikara emon “riaffou non och napanap,” mwen ika mwirin An Manausefan, a eu pekin pwarata ngeni An omuchunon manaman ne echikara ngunuch. Ew me ew amwararen echikar a chok ew nepoputan mi echipwer me pwonen ewe echikaren inis me memef minne epwe fis ngeni emon me emon kich non ewe Manausefan, minne “ina an ewe Samon unusochun omuchunon napanapen echikar.”
Mi ennet pwe ach iotek fan iten chikar non ei manau resap ponu fansoun meinisin non ewe napanap sia aneanei, nge rese ponnukono. Ewe fansoun chikar epwe feito, usun chok ewe kirochen nepin epwe wesino—atun ewe fansoun mi pung—ngeni ewe ningen tinen akkar.
Usun Preseten Nelson a fen pwarata: “ Ach nuku ese tongeni an esap sinnino. Ngang mi sinei pwe an emon mi unusen-mirit Samach non Nang kuna a kon cheenap seni ach. Nupwen kich mi sinei usun ach osukosuk me metekin non pekin inis, I mi sinei usun ach fefeita me tufich non pekin fochofoch. Ika sia iotek ach sipwe sinei An mochen me fangeta inisich ngeni fiti tipepos me pwaracho, chikaren nang a tongeni fis non pwisin An nikinik me fansoun.
Arapeto chok punuwei we, Harriet, me ngang aua apachanong non am iotek eu auchean epinukunuk me tingor fan iten ekkoch aua tonger. Aua iotek pwe kumien chon safenir repwe angei auchean tufich ne echikara ar semwen. Aua ingeno ne apachata pwe inamo ika eu mwitirin safeien chikar ika pwak sefan esap fis, an ewe Chon Amanau manamanen echikar epwe ngenir ourur me kinamwe. Ewe pochokunen echikar an ach ewe Chon Amanau manamanen ngaseno epwe fen nap pochokunan non ach memef, ngun, me pwan mamauen inis nap seni och safeien echikaren fonufan sipwe angei. Jises Kraist i ewe Chon Echikar non ei manau me non manau esemuch.
Pwi me fefinei, achengicheng chienei, ua pwarata pwe an ach Chon Amanau chen mi naf an epwe echikara kinasemi, nimeti ami tipis, apochokuna kemi ren sossot repwe fis, me efeiochu kemi ren epinukunuk, mirit, me An kinamwe. An manaman mi chok nonnom—iteitan me nongonongoch—pwan mwo nupwen kich, ren och fansoun, sia mefi towaw seni An tong, saram, me kirekiroch.
Ua iotek pwe esap tur seni kich ach memefin mwar me ennetin kinisou ren mettoch meinisin Jises Kraist a fen fori fan itach. Ouse mochen oupwe sinei pwe ami mi unusen tong, me chechemeni met a fen pwon ngeni kemi feinfeino.
“Amwo Kot epwe mut ngenikemi pwe ami kewe chou repwe tongeni paneno, me non pwapwan Noun we,” Jises Kraist (Alma 33:23).
© 2025 by Intellectual Reserve, Inc. Meinisin pung mi kawor. A för non USA. Kapungunon non fosun Merika: 6/19. Kapungunon chiakun: 6/19. Chiakun Porous ren Liahona Iteiten Maram, February 2025. Chuukese. 19609 901