Naragsak a Damag ti Ayat ken Rag-o

Maysa a baro nga aldaw ti dimteng iti sangkataw-an iti maysa a kaykaywan, a sadiay nagparang ti Dios nga Ama ken ti Anakna, ni Jesucristo, ken nakisaritada ken ni Joseph Smith kas sungbat iti kararag ti agtutubo a ni Joseph maipapan iti no ania a simbaan a rumbeng a pakikamenganna (kitaen iti Joseph Smith—Pakasaritaan 1:14–20). Imbaga ni Jesucristo ken ni Joseph a nasken a saan a kumameng iti ania man a simbaan. Inkarina a maipalgak ken ni Joseph iti masanguanan ti pakabuklan ti ebangheliona.

Para iti kaaduan, kasla saan unay a maikari ni Joseph iti kasta a napateg a trabaho, ket husto ti imbagada. Awan adalna ken awan serserbina nga ubing a lalaki a nagtaud iti bassit a talon iti maysa a bassit nga ili. Kas iti kinuna ti dadduma maipapan iti Mangisalakan idi kaaldawanna, “Adda aya naimbag a tumaud idiay Nazaret?” Iti(Juan 1:46), adu ti nagpampanunot no ania a naimbag ti mabalin nga ipaay ti maysa a saan a nakaadal nga agtawen iti 14 idiay Palmyra, New York. Ngem babaen ken ni Joseph—nupay kasla imposible dayta—ti Nailangitan nga Ama ken ni Apo Jesucristo ti mangyeg iti pudno a naisangsangayan. Daytoy koma ti mangyeg kadatayo iti namnama nga iti bassit ken napakumbaba a wagastayo, makaipaaytayo met kadagiti addaan kaipapanan a wagas iti trabaho ti Apo.

Idi agangay, inawagan ti Apo ni Josephh “ket kinasaona manipud iti langit, ken binilinna” (Doktrina ken Katulagan 1:17). Nakaawat ni Joseph kadagiti napateg a paltiing ken napateg a doktrina a nangyeg iti baro a lawag iti pannakaawattayo iti naayat a plano ti Nailangitan nga Ama ken ti makasubbot nga ayat ni Jesucristo ken ti bileg ti makasubbot a sakripisiona. Nakaskasdaaw, dimteng dagitoy a naragsak a damag iti eksakto a kanito a dagiti napateg nga irarang-ay iti transportasion, komunikasion, ken dadduma pay a benneg ket mangipalubos nga agsilnag ti lawag ti Dios tapno mangbendision iti ad-adu ken ad-adu pay kadagiti annakna.

Ti Anghel Moroni a Mangmangted kadagiti Pinanid ken ni Joseph Smith, ni C. C. A. Christensen

Maysa a Nabileg a Pammaneknek ti Ayat ti Dios

Ti panagparang ni anghel Moroni ken ni Joseph Smith ket napateg iti Pannakaisubli ken nabileg a pammaneknek iti ayat ti Dios. Imbaga ni Moroni ken ni Joseph ti maysa a rekord, a naisurat kadagiti balitok a pinanid, a naikali iti asideg (kitaen iti Joseph Smith—Pakasaritaan 1:33–34). Iti kamaudianan, maited ken ni Joseph ti “bileg a naggapu iti ngato,” (Doktrina ken Katulagan 20:8) a mangipatarus iti dayta a iti agbalinto a Libro ni Mormon, a kadua ti Biblia ken maysa pay a pammaneknek ken ni Jesucristo.

Iti intero a Libro ni Mormon, mabasatayo dagiti tattao a, ginasut a tawen sakbay ni Cristo, ammoda ken impadtoda ti yaayna ken tinarigagayanda dayta. Masarakantayo met ti naisangsangayan a salaysay maipapan iti personal a panagparang ken panangministro ti napagungar a Mangisalakan kadagiti Nephite, a bayat dayta inawisna ti amin nga umasideg Kenkuana ket riknaenda ti marka iti bakrangna ken dagiti marka dagiti lansa kadagiti ima ken sakana (kitaen iti 3 Nephi 11:14–15). Pinaimbagna dagiti masakit, pilay, bulsek—“wenno marigatan iti uray ania a kita”—ken binendisionanna dagiti ubbing ken inkararaganna ida (kitaen iti 3 Nephi 17:7–9, 21). Adu ti masursurotayo maipapan iti ayat ken asi ti Manangisalakan iti daytoy a sagrado a salaysay.

Paneknekan ti Libro ni Mormon a “ni Jesus isu ti Cristo.” Maulit-ulit nga ipalagip kadatayo dagiti pammatalged iti Libro ni Mormon nga ay-ayatennatayo ti Amatayo iti Langit ken ti Mangisalakantayo nga ad-adda ngem iti aniaman a mapanunottayo.

Nagtultuloy ti Pannakaisubli babaen ti panagparang dagiti dadduma pay a nailangitan a mensahero ken ni Joseph Smith. “Insubli ti nagungar a ni Juan Bautista ti turay a mangbuniag babaen ti pannakaipabatok para iti pannakaugas ti basbasol. Tallo kadagiti sigud a sangapulo-ket-dua nga Apostol—da Pedro, Santiago, ken Juan—ti nangisubli iti kinaapostol ken dagiti tulbek ti turay ti priesthood. Immay met dagiti dadduma pay, agraman ken ni Elijah, a nangisubli iti turay a mamagkaykaysa kadagiti pamilia iti agnanayon iti awan patinggana a pagnanaigan a mangparmek iti patay.”

Idi Abril 6, 1830, nangipasdek ni Jesucristo babaen ken ni Propeta Joseph iti maysa a simbaan a maitulad iti simbaan nga Inorganisana idi panawen ti Baro a Tulag (kitaen iti Pagannurotan ti Pammati 1:6), a kumpleto iti “pundasion nga impasdek dagiti apostol ken dagiti propeta, ket ni Cristo a mismo ti kangrunaan a pasuli.” (Taga Efeso 2:20). Pagbalinen ti Simbaan ni Jesucristo dagiti Santo iti Ud-udina nga Aldaw dagiti bendision ti naisubli a bileg ti priesthood a magun-od dagiti amin nga annak ti Dios a mangisagana iti bagbagida nga umawat iti daytoy.

Kas insuro kadatayo ni Presidente Russell M. Nelson, magun-odantayo ti rag-o iti inaldaw a panagbabawi no agsublitayo iti Nailangitan nga Amatayo ken iti Mangisalakantayo. Iti siasinoman a makarikna iti pannakaupay wenno saanda a maikari wenno maibilang: maawis ti amin nga umasideg ken ni Cristo ken iti Simbaanna. Ti Simbaan ket saan a monasterio para kadagiti perpekto no di ket ospital para kadagiti masakit. Ipalagip kadatayo ni Elder Dieter F. Uchtdorf iti Korum dagiti Sangapulo-ket-dua nga Apostol nga “umaytayo iti simbaan saan a tapno mailemmeng dagiti parikuttayo no di ket tapno agasanna ida.”

Iti simbaan masarakantayo ti rag-o kadagiti gundaway no panunotentayo dagiti kasapulan ti sabsabali, naimpusuan a panagserbi kadagiti dadduma, ken mangibinglay kadagiti bukodtayo a personal a padas iti kinawadwad ti kinaimbag ni Cristo. Mabalintayo a “maibilang kadagiti kameng ti simbaan ni Cristo” ken “tapno malaglagip ken mataraonan kadagiti nasayaat a balikas ti Dios” (Moroni 6:4). Anian a nagdakkel a bendision!

Naminsan nga impakdaar ni Propeta Joseph Smith, “Ita, ania ti mangngegtayo iti ebanghelio nga inawattayo? Napnuan ragsak a timek! Timek ti asi manipud iti langit; ken timek ti kinapudno a timpuar iti daga; naimbag a damag para kadagiti natay; naragsak a timek para kadagiti sibibiag ken kadagiti natay; naimbag a damag ti naindaklan a rag-o” (Doktrina ken Katulagan 128:19).

Dimteng dagitoy a naragsak a damag gapu ta ti Nailangitan nga Ama ken ti dungdungnguenna nga Anak, ni Jesucristo, ket ay-ayatendatayo ken tarigagayandatayo—ad-adda ngem iti aniaman a banag—nga awatendatayo manen iti imatangda, tapno maaddaantayo iti agnanayon iti kita ti biag a kas iti panagbiagda. Ipalgak ti Pannakaisubli nga inaramidda ti amin a kasapulan tapno agbalin daytoy a nadayag a posibilidad para kadatayo amin. Iti agnanayon a panagdaliasattayo, mapasarantayto dagiti pannubok ken rigat, ngem “tapno [datayo], maaddaan[tayo] iti rag-o” (2 Nephi 2:25) iti daytoy a biag ken iti sumaruno. Ammo ni Propeta Joseph daytoy a nasaysayaat ngem iti kaaduan.

Masansan a naipasango ni Joseph iti ibubusor ken pannakaidadanes, kaskasdi a tinaginayonna ti “nairuam iti nakayanakanna a kinaragsak.” (Joseph Smith—Pakasaritaan 1:28) Nagtalinaed a narag-o, napigsa, ken naandur, ket tinungpalna ti naisangsangayan a trabaho a naited kenkuana nga aramidenna. Itedko ti pammadayaw kadagiti amin a nagkauna a Santo a namati, nangsuporta, ken nangsurot ken ni Propeta Joseph Smith ken nangikonsagrar iti bagbagida iti pannakabangon ti Simbaan. Nakautangtayo kadakuada iti kasta unay a panagyaman ken dayaw.

Narigat kadagiti nagkauna nga aldaw ti Simbaan, ken narigat met ita. Ngem agtultuloy ti Pannakaisubli. Iti panangidaulo ni Jesucristo iti daytoy a Simbaan, agtultuloy a mangiwanwan kadatayo dagiti sibibiag a propeta. Agtultuloyto a maibangon dagiti balay ti Apo, tapno dagiti bendision dagiti agnanayon a katulagan iti Dios ti mangisinggalut kadatayo Kenkuana ken kadagiti ay-ayatentayo iti agsumbangir ti belo (kitaen iti Mateo16:19). Ti ayat ti Dios ken ni Jesucristo ket agsaknapto iti amin a lubong bayat ti panangsurottayo iti bilin ti Mangisalakan a mangpakan kadagiti karnerona ken mangibinglay iti ebangheliona. Masaksiantayo dagiti kinapudno ti Pannakaisubli nga agtultuloy a dumur-as kadagiti wagas ken kadagiti lugar a narigat a mapanunot idi aldaw ni Joseph.

Masarakantayo ti pigsa ken naindaklan a rag-o—kas iti inaramid ni Propeta Joseph—bayat ti panangawattayo ken panangibiagtayo kadagitoy a napateg a kinapudno. Ti awag nga impaay ni Joseph kadagiti Santo idi panawenna ket agtultuloy kadatayo ita nga aldaw: “Saantayo kadi nga agtuloy iti naindaklan a panggep? Agtuloykayo a saan nga agsanud. Pigsa ti pakinakem, … ket ala, ala gaw-aten ti balligi! Pagrag-uenyo ti puspusoyo, ket agragsakkayo iti aglaplapusanan.” (Doktrina ken Katulagan 128:22).

Sapay koma ta ti naragsak a damag ti ayat ken rag-o nga iyeg ti Pannakaisubli ti mangbendision ken mangiwanwan iti biagtayo—ita ken kanayon.