Kumita ken ni Cristo

Ni Kailey nga agtawen iti sangapulo-ket-pito ket karaman idi iti cheerleading team agingga a naaksidente a nagresulta iti pannakadangran ti utekna. Ti panagpaimbagna ti nanglapped kenkuana nga ageskuela, ket nangrugi a mariknana a naisina ken agmaymaysa. Nagasagaba iti emosional ken dina ammo no sadino ti pagsapulanna iti tulong. Insingasing ti maysa a gayyemna a dumngeg kadagiti misionario. Insuroda kenkuana ti maipapan iti Pannubbot ni Jesucristo. Ti panagsursurona iti ad-adu pay maipapan ken Cristo ti nangted kenkuana iti namnama, ket nariknana a kasla ti Dios a Mismo ti mangtultulong kenkuana.

Imbaga ni Kailey ken ni nanangna, “Diak pulos narikna nga inayatnak ti Dios. Ngem ita ammokon nga ay-ayatennak.”

Medio nasdaaw ni nanangna a Michelle. Pimmanawdan iti asawana a ni Brock iti Ti Simbaan ni Jesucristo dagiti Santo iti Ud-udina nga Aldaw idi agtawen ni Kailey iti pito gapu iti nadumaduma a saludsod, panagduadua, ken pakaseknan. Impagarupda a naragragsak ti balasangda no awan dagiti amin a miting ken bilin. Dida pulos impagarup a ti pilida ti manglapped ken ni Kailey a maaddaan iti nasinged a pannakilangen iti Dios. Bayat ti pannakakita da Michelle ken Brock ti panagbalbaliw ni Kailey, naamirisda a nabayagen a nariknada a nasingedda iti Dios, ket kayatda a marikna manen dayta.

Nakipagkitada iti bishop-da, ket saan a nagbayag nagsubli ti pamiliada, agraman ti kabsat ni Kailey a ni Braeden, iti simbaan. Ti pannakariknada a nasinged iti Dios ken pannakilangenda manen Kenkuana—nangruna babaen ti kararag—ti nangisubli iti pammatida. Ti panagsublida iti simbaan ket saan a nangrisut iti amin a saludsod wenno pakaseknanda, ngem naamirisda a napatpateg ti maaddaan iti natibtibker a personal a pannakilangen iti Dios ngem iti saan a panamatida.

Nangrugi amin daytoy idi ti maysa a gayyem—maysa a tin-edyer a kas kadakayo—inawisna ni Kailey a kumita ken ni Cristo. Ket inaramidna!

Kinuna ni Jesucristo, “Kitaendak iti tunggal panunot; saankayo nga agduadua, saankayo nga agbuteng” (Doktrina ken Katulagan 6:36). Daytoy ti inspirasion iti 2025 Tema dagiti Agtutubo. Palubosandakami a mangibinglay no kasano a mapiliyo ti panagtalek ngem ti panagduadua ken pammati ngem ti panagbuteng no kumitakayo ken ni Cristo:

Tamara W. Runia

No marigatanak, kanayon a makatulong kaniak ti panangpanunotko ken Jesuscristo a nakaunnat dagiti takiagna. No kumitaak Kenkuana, malagipko dagiti balikas ti kanta, “Makipagnaak ken Jesus”: “Saannakto a pulos panawan, uray no matnagak.”

Emily Belle Freeman

No basaek daytoy a tema ti nasantuan a kasuratan, malagipko ni Pedro iti Baybay ti Galilea. Ti panangpampanunotna iti bagyo ti nangpakaro iti buteng ken panagduaduana, a nakaigapuan ti pannakalnedna kadagiti nadawel a dalluyon. Ngem ti panangipamaysana iti Mangisalakan ti nangpabalin Kenkuana a nakaipatungpal iti maysa a banag a dina pay pulos napadasan: nagna iti rabaw ti danum! Nakaskasdaaw dayta, a talaga. Ania ti mabalin a maipatungpalyo no kumitakayo Kenkuana?

Andrea Muñoz Spannaus

No mangrugin a makariknaak iti buteng, sadinoman ti ayanko wenno aniaman ti kasasaadko, igagarak a panunoten ti pannakainaigko iti Nailangitan nga Ama ken ni Jesucristo. Ulit-ulitek iti panunotko iti sumagmamano a daras: MAYSAAK NGA ANAK A BABAI TI DIOS. Itultuloyko nga aramiden daytoy agingga a mangrugin a sumayaat ti riknak. Kanayon nga epektibo daytoy!

Bradley R. Wilcox

Saludsodem iti bagim no siasino ti maseknan ken mangipatpateg unay kenka. Dagiti kadi nagannakmo ken dagiti lider ti Simbaan? Dagiti kadi tattao iti social media a mabalin a mangibilang kenka a maysaka laeng a numero? Kumitaka iti Nailangitan nga Ama ken ni Cristo. Talaga a maseknanda!

Steven J. Lund

Laglagipenyo no ania ti maipalagip kadakayo no isaritayo ti tema ti Aaronic Priesthood Quorum ken Young Women: Maysakayo aa maipatpateg nga anak a lalaki wenno anak a babai ti Dios. Adda koma pammatiyo nga adda plano ti Amatayo para kadakayo. Ti panangkita ken ni Cristo kaipapananna ti panangkita a ti Pannubbotna ti kangrunaan iti dayta a plano.

Michael T. Nelson

Ti panagbasa kadagiti nasantuan a kasuratan ket panangkita ken ni Cristo! Ti panagduadua ken buteng ket gagangay a mapukaw no maipalagip kadatayo dagiti milagro ken pannursuro ni Jesus. Nagasattayo unay ta adda pannakagun-odtayo kadagiti balikasna. Mayaplikar dagitoy iti tunggal kasasaad a mapasarantayo iti biagtayo.