Maayong Balita sang Gugma kag Kalipay

Ang bag-o nga adlaw nagsubang sa tawhanon nga pamilya sa sulod sang kakahuyan, kon diin ang Dios nga Amay kag ang Iya Anak nga si Jesucristo, nagpakita kag nakighambal kay Joseph Smith bilang sabat sa pangamuyo sang bata nga Joseph kon diin nga simbahan sia dapat mag-entra (tan-awa sa Joseph Smith—Kasaysayan 1:14–20). Ginsilingan ni Jesucristo si Joseph nga indi mag-entra sa bisan diin nga simbahan. Nagpromisa Sia nga ang kabug-osan sang Iya ebanghelyo ipahayag kay Joseph sa pila ka adlaw.

Para sa madamo nga tawo, si Joseph daw indi bagay tawgon sa amo sina kaimportante nga buluhaton, kag husto sila. Wala sia sang ineskwelahan kag simple nga solterito sa gamay nga uma sa indi kilala nga banwa. Pareho sang siling sang iban sa Manluluwas sa Iya panahon, “May maayo bala nga butang nga magagikan sa Nazaret?” (Juan 1:46), madamo ang naminsar kon ano bala nga kaayohan ang maghalin sa wala tinapusan nga 14-anyos sang Palmyra, New York. Pero paagi kay Joseph—bisan daw indi sia angayan—ipatuman sang Amay nga Langitnon kag sang Ginuong Jesucristo ang matuod nga matahum. Dapat ini maghatag sa aton sang paglaum nga sa gamay naton kag mapainubuson nga paagi, makaamot man kita sa makahulugan nga mga paagi sa buluhaton sang Ginuo.

Sa pag-abot sang tiyempo, gintawag sang Ginuo si Joseph “kag naghambal sa iya halin sa langit, kag naghatag sa iya sang mga kasugoan” (Doktrina kag mga Kasugtanan 1:17). Nabaton ni Joseph ang malahalon nga mga rebelasyon kag kinahanglanon nga doktrina nga naghatag sang kasanagan sa aton pag-intiendi parte sa mapinalanggaon nga plano sang aton Amay nga Langitnon kag sa nagatubos nga pagpalangga kag gahum sang Iya nagabayad-sala nga sakripisyo. Talalupangdon nga ining maayong balita nag-abot sa mismo tion sang ang dalagko nga mga pag-uswag sa transportasyon, komunikasyon, kag sa iban pa nga mga butang nagtugot sang kasanag sang Dios nga magsiga para bugayan ang mas madamo pa gid Niya nga kabataan.

The Angel Moroni Delivering the Plates to Joseph Smith [Si Anghel Moroni nga Nagahatag sang mga Lamina kay Joseph Smith], ni C. C. A. Christensen

Mabaskog nga Saksi sang Gugma sang Dios

Ang pagpakita ni anghel Moroni kay Joseph Smith kinahanglanon sa Pagpanumbalik kag mabaskog nga ebidensya sang gugma sang Dios. Ginhambal ni Moroni kay Joseph ang parte sa isa ka rekord, nga ginsulat sa bulawan nga mga lamina, nga nalubong sa malapit lang (tan-awa sa Joseph Smith—Kasaysayan 1:33–34). Sang ulihi, ginhatagan si Joseph sang “ikasarang halin sa kahitaasan” (Doktrina kag mga Kasugtanan 20:8) para ma-translate ina nga rekord nga sang ulihi amo ang nangin Libro ni Mormon, nga nagatindog upod sa Biblia kag amo ang isa pa ka testamento ni Jesucristo.

Sa bilog nga Libro ni Mormon, mabasahan naton ang parte sa katawhan nga ginatos ka tuig antes kay Cristo, nakahibalo kag naghambal parte sa Iya pag-abot kag nagpaabot sini. Makit-an man naton ang indi matupungan nga panaysayon parte sa personal nga pagpakita kag pag-alagad sang nabanhaw nga Manluluwas sa mga Nefinhon, kon sa diin gin-agda Niya ang tanan nga magpalapit sa Iya kag hikapon ang marka sa Iya kilid kag ang mga inaginahan sang lansang sa Iya mga kamot kag tiil (tan-awa sa 3 Nefi 11:14–15). Ginpaayo Niya ang mga masakiton, ang lupog, ang bulag—“sila tanan nga nagaantos sa ano man nga paagi”—kag dayon ginbendisyunan ang magagmay nga kabataan kag ginpangamuyuan sila (tan-awa sa 3 Nefi 17:7–9, 21). Madamo kita sang natun-an parte sa pagpalangga kag kaluoy sang Manluluwas sa sining sagrado nga sinulatan.

Ang Libro ni Mormon nagasaksi nga “si Jesus ang Cristo.” Ang mga pasalig sa Libro ni Mormon sulit-sulit nga nagapadumdom sa aton nga ang aton Amay sa Langit kag ang aton Manluluwas nagapalangga sa aton labaw pa sangsa aton mahunahuna.

Ang Pagpanumbalik nagpadayon sa pagpakita sang iban pa nga langitnon nga mga mensahero kay Joseph Smith. “Ang nabanhaw nga si Juan Bautista nagpanumbalik sang awtoridad sa pagbunyag paagi sa pagtugmaw para sa kapatawaran sang mga sala. Tatlo sa orihinal nga dose ka mga Apostoles—nga sanday Pedro, Santiago, kag Juan—ang nagpanumbalik sang pagka-apostoles kag sang mga yabi sang awtoridad sang pagkapari. Ang iban nag-alabot man, lakip na si Elias, nga nagpanumbalik sang awtoridad nga bugkuson ang mga pamilya sa katubtuban sa wala katapusan nga mga kaangtanan nga nagalampuwas sang kamatayon.”

Sang Abril 6, 1830, gintukod ni Jesucristo paagi kay Propetang Joseph ang simbahan nga ginsunod sa simbahan nga Iya gin-organisar sang panahon sang Bag-ong Katipan (tan-awa sa Mga Artikulo sang Pagtuo 1:6), nga kompleto “sa sadsaran nga ginpasad sang mga apostoles kag mga propeta, kag si Cristo Jesus gid mismo amo ang pamusod nga bato” (Mga Taga-Efeso 2:20). Ang Simbahan ni Jesucristo sang mga Santos sa Ulihing mga Adlaw nagapatigayon sang tanan nga mga bugay sang ginpanumbalik nga gahum sang priesthood sa tanan nga anak sang Dios nga naghanda sang ila kaugalingon para batunon ini.

Sa gintudlo ni Pangulong Russell M. Nelson sa aton, makakita kita sang kalipay sa adlaw-adlaw nga paghinulsol kon magliso kita sa Amay nga Langitnon kag sa aton Manluluwas. Sa bisan sino nga ginasubuan ukon pamatyag nila indi sila bagay ukon indi parte sang grupo: ang tanan imbitado nga magpalapit kay Cristo kag sa Iya Simbahan. Ang Simbahan indi monasteryo sang mga perpekto kundi ospital sang mga masakiton. Si Elder Dieter F. Uchtdorf sang Korum sang Dose ka Apostoles nagapadumdom sa aton nga “nagakadto kita sa simbahan indi para taguon ang aton mga problema kundi para paayuhon ang mga ini.”

Sa simbahan makita naton ang kalipay sa mga oportunidad nga panumdumon ang iban, serbisyohan ang iban nga may pagpalangga, kag ipakigbahin ang aton personal nga mga eksperiyensya upod ang kabugana sang kaayo ni Cristo. Mahimo kita “isipon sa katawhan sang simbahan ni Cristo” kag “dumdumon kag saguron sang maayo nga pulong sang Dios” (Moroni 6:4). Daw ano kadako nga bugay!

Si Propeta Joseph Smith nagpahayag sadto: “Karon, ano ang aton mabatian sa ebanghelyo nga aton nabaton?” Isa ka tingug sang kalipay! Isa ka tingug sang kaluoy halin sa langit; kag isa ka tingug sang kamatuoran halin sa duta; maayong balita para sa mga patay; isa ka tingug sang kalipay para sa mga buhi kag sa mga patay; maayong balita sang dako nga kalipay.” (Doktrina kag mga Kasugtanan 128:19).

Ining maayong balita nag-abot tungod ang Amay nga Langitnon kag ang Iya pinalangga nga Anak nga si Jesucristo nagapalangga sa aton kag nagahandum—labaw sa tanan—nga abiabihon kita sa Ila presensya, para maangkon naton sa wala katubtuban ang klase sang Ila pangabuhi. Ang Pagpanumbalik nagapahayag nga ginhimo Niya ang tanan nga kinahanglanon para patigayunon ining mahimayaon nga palaabuton para sa aton tanan. Sa aton pagpanglakaton sa wala katapusan, maeksperiyensyahan naton ang mga pagtilaw kag mga kabudlayan, pero “[kita] nagakabuhi, agud makaangkon [kita] sing kalipay” (2 Nefi 2:25) sa sining kinabuhi kag sa madason nga kabuhi. Mas nahibal-an gid ini ni Propetang Joseph sangsa kalabanan sa aton.

Nangatubang si Joseph sang pirme nga oposisyon kag pagpamigos, pero nagpabilin ang iya “duna nga masinadyahon nga panimuot” (Joseph Smith—Kasaysayan 1:28). Nagpabilin sia nga malipayon, makusog, kag resistensyado, kag nahimo niya ang indi ordinaryo nga buluhaton nga ginpahimo sa iya. Ginapasidunggan ko ang tanan nga una nga mga Santos nga nagpati, nagsuporta, kag nagsunod kay Propetang Joseph Smith kag nagdedikar sang ila kaugalingon sa pagtukod sang Simbahan. Kadako sang aton kabalaslan sa ila.

Mabudlay sang nauna nga tiyempo sang Simbahan, kag mahimo nga mabudlay man karon. Pero ang Pagpanumbalik nagapadayon. Upod si Jesucristo sa ulo sining Simbahan, ang buhi nga mga propeta padayon nga magagiya sa aton. Ang mga balay sang Ginuo padayon nga ipatindog, agud nga ang mga bugay sang wala katapusan nga mga kasugtanan upod sa Dios mahimo nga magbugkos sa aton sa Iya kag sa aton mga mahal sa kabuhi sa magtimbang nga bahin sang belo (tan-awa sa Mateo 16:19). Ang gugma sang Dios kag ni Jesucristo magalab-ot sa bilog nga kalibutan samtang ginasunod naton ang sugo sang Manluluwas nga pakan-on ang Iya mga karnero kag ipakigbahin ang Iya ebanghelyo. Masaksihan naton ang mga kamatuoran sang Pagpanumbalik nga mag-abante sa mga paagi kag sa mga lugar nga wala nila mahunahuna sang panahon ni Joseph.

Makakita kita sang kusog kag dako nga kalipay—pareho kay Propetang Joseph—kon batunon naton kag ipangabuhi ining malahalon nga mga kamatuoran. Ang panawagan nga ginhimo ni Joseph sa mga Santos sa iya panahon nagapadayon sa aton sa karon: “Indi bala kita magpadayon sa amo kadako nga kawsa? Mag-abante kag indi mag-atras. Kaisog, … kag abante, abante sa kadalag-an!” Papangalipaya ang inyo mga tagipusuon, kag mangin tuman kamasinadyahon” (Doktrina kag mga Kasugtanan 128:22).

Kabay nga ang maayong balita sang gugma kag kalipay nga dala sang Pagpanumbalik magabugay kag magagiya sang aton mga kabuhi—karon kag sa gihapon.